| Library / Tipiṭaka / திபிடக • Tipiṭaka / விப⁴ங்க³-மூலடீகா • Vibhaṅga-mūlaṭīkā |
8. ஸம்மப்பதா⁴னவிப⁴ங்கோ³
8. Sammappadhānavibhaṅgo
1. ஸுத்தந்தபா⁴ஜனீயவண்ணனா
1. Suttantabhājanīyavaṇṇanā
390. காரணப்பதா⁴னாதி ‘‘அனுப்பன்னபாபகானுப்பாதா³தி³அத்தா²’’தி க³ஹிதா ததே²வ தே ஹொந்தீதி தங் அத்த²ங் ஸாதெ⁴ந்தியேவாதி ஏதஸ்ஸ அத்த²ஸ்ஸ தீ³பகோ ஸம்மா-ஸத்³தோ³தி யதா²தி⁴ப்பேதத்த²ஸ்ஸ அனுப்பன்னபாபகானுப்பாதா³தி³னோ காரணபூ⁴தா, பதா⁴னகாரணபூ⁴தாதி அத்தோ². ஸம்மாஸத்³த³ஸ்ஸ உபாயயோனிஸோஅத்த²தீ³பகதங் ஸந்தா⁴ய ‘‘உபாயப்பதா⁴னா யோனிஸோபதா⁴னா’’தி வுத்தங். படிபன்னகோதி பா⁴வனமனுயுத்தோ. பு⁴ஸங் யோகோ³ பயோகோ³, பயோகோ³வ பரக்கமோ பயோக³பரக்கமோ. ஏதானீதி ‘‘வாயமதீ’’திஆதீ³னி ‘‘ஆஸேவமானோ வாயமதீ’’திஆதி³னா யோஜேதப்³பா³னி.
390. Kāraṇappadhānāti ‘‘anuppannapāpakānuppādādiatthā’’ti gahitā tatheva te hontīti taṃ atthaṃ sādhentiyevāti etassa atthassa dīpako sammā-saddoti yathādhippetatthassa anuppannapāpakānuppādādino kāraṇabhūtā, padhānakāraṇabhūtāti attho. Sammāsaddassa upāyayonisoatthadīpakataṃ sandhāya ‘‘upāyappadhānā yonisopadhānā’’ti vuttaṃ. Paṭipannakoti bhāvanamanuyutto. Bhusaṃ yogo payogo, payogova parakkamo payogaparakkamo. Etānīti ‘‘vāyamatī’’tiādīni ‘‘āsevamāno vāyamatī’’tiādinā yojetabbāni.
அனுப்பன்னாதி அவத்தப்³ப³தங் ஆபன்னானந்தி பூ⁴மிலத்³தா⁴ரம்மணாதி⁴க்³க³ஹிதாவிக்க²ம்பி⁴தாஸமுக்³கா⁴திதுப்பன்னானங்.
Anuppannāti avattabbataṃ āpannānanti bhūmiladdhārammaṇādhiggahitāvikkhambhitāsamugghātituppannānaṃ.
391. த⁴ம்மச்ச²ந்தோ³தி தண்ஹாதி³ட்டி²வீரியச்ச²ந்தா³ விய ந அஞ்ஞோ த⁴ம்மோ, அத² கோ² ச²ந்த³னியஸபா⁴வோ ஏவாதி த³ஸ்ஸெந்தோ ஆஹ ‘‘ஸபா⁴வச்ச²ந்தோ³’’தி. தத்த² ‘‘யோ காமேஸு காமச்ச²ந்தோ³’’திஆதீ³ஸு (த⁴॰ ஸ॰ 1103) தண்ஹா ச²ந்தோ³தி வுத்தாதி வேதி³தப்³போ³, ‘‘ஸப்³பே³வ நு கோ², மாரிஸ, ஸமணப்³ராஹ்மணா ஏகந்தவாதா³ ஏகந்தஸீலா ஏகந்தச²ந்தா³ ஏகந்தஅஜ்ஜோ²ஸானா’’தி (தீ³॰ நி॰ 2.366) எத்த² தி³ட்டி², பமாத³னித்³தே³ஸே ‘‘நிக்கி²த்தச²ந்த³தா நிக்கி²த்தது⁴ரதா’’தி வீரியந்தி வண்ணேதி.
391. Dhammacchandoti taṇhādiṭṭhivīriyacchandā viya na añño dhammo, atha kho chandaniyasabhāvo evāti dassento āha ‘‘sabhāvacchando’’ti. Tattha ‘‘yo kāmesu kāmacchando’’tiādīsu (dha. sa. 1103) taṇhā chandoti vuttāti veditabbo, ‘‘sabbeva nu kho, mārisa, samaṇabrāhmaṇā ekantavādā ekantasīlā ekantachandā ekantaajjhosānā’’ti (dī. ni. 2.366) ettha diṭṭhi, pamādaniddese ‘‘nikkhittachandatā nikkhittadhuratā’’ti vīriyanti vaṇṇeti.
394. வாயமதி வீரியங் ஆரப⁴தீதி பத³த்³வயஸ்ஸபி நித்³தே³ஸோ வீரியனித்³தே³ஸோயேவாதி அதி⁴ப்பாயேனாஹ ‘‘வீரியனித்³தே³ஸே’’தி.
394. Vāyamativīriyaṃ ārabhatīti padadvayassapi niddeso vīriyaniddesoyevāti adhippāyenāha ‘‘vīriyaniddese’’ti.
406. ஸப்³ப³புப்³ப³பா⁴கே³தி ஸப்³ப³மக்³கா³னங் புப்³ப³பா⁴கே³. புரிமஸ்மிந்தி ‘‘அனுப்பன்னா மே குஸலா த⁴ம்மா அனுப்பஜ்ஜமானா அனத்தா²ய ஸங்வத்தெய்யு’’ந்தி எத்தா²பி ‘‘ஸமத²விபஸ்ஸனாவ க³ஹேதப்³பா³’’தி வுத்தங் அட்ட²கதா²யங், தங் பன மக்³கா³னுப்பன்னதாய பா⁴வதோ அனுப்பஜ்ஜமானே ச தஸ்மிங் வட்டானத்த²ஸங்வத்தனதோ ந யுத்தந்தி படிக்கி²பதி.
406. Sabbapubbabhāgeti sabbamaggānaṃ pubbabhāge. Purimasminti ‘‘anuppannā me kusalā dhammā anuppajjamānā anatthāya saṃvatteyyu’’nti etthāpi ‘‘samathavipassanāva gahetabbā’’ti vuttaṃ aṭṭhakathāyaṃ, taṃ pana maggānuppannatāya bhāvato anuppajjamāne ca tasmiṃ vaṭṭānatthasaṃvattanato na yuttanti paṭikkhipati.
மஹந்தங் கா³ரவங் ஹோதி, தஸ்மா ‘‘ஸங்க⁴கா³ரவேன யதா²ருசி விந்தி³துங் ந ஸக்கா’’தி ஸங்கே⁴ன ஸஹ ந நிக்க²மி. அதிமந்தா³னி நோதி நனு அதிமந்தா³னீதி அத்தோ². ஸந்தஸமாபத்திதோ அஞ்ஞங் ஸந்த²ம்ப⁴னகாரணங் ப³லவங் நத்தீ²தி ‘‘ததோ பரிஹீனா ஸந்த²ம்பி⁴துங் ந ஸக்கொந்தீ’’தி ஆஹ. ந ஹி மஹாரஜ்ஜும்ஹி சி²ன்னே ஸுத்ததந்தூ ஸந்தா⁴ரேதுங் ஸக்கொந்தீதி. ஸமதே² வத்து²ங் த³ஸ்ஸெத்வா தேன ஸமானக³திகா விபஸ்ஸனா சாதி இமினா அதி⁴ப்பாயேனாஹ ‘‘ஏவங் உப்பன்னா ஸமத²விபஸ்ஸனா…பே॰… ஸங்வத்தந்தீ’’தி.
Mahantaṃgāravaṃ hoti, tasmā ‘‘saṅghagāravena yathāruci vindituṃ na sakkā’’ti saṅghena saha na nikkhami. Atimandāni noti nanu atimandānīti attho. Santasamāpattito aññaṃ santhambhanakāraṇaṃ balavaṃ natthīti ‘‘tato parihīnā santhambhituṃ na sakkontī’’ti āha. Na hi mahārajjumhi chinne suttatantū sandhāretuṃ sakkontīti. Samathe vatthuṃ dassetvā tena samānagatikā vipassanā cāti iminā adhippāyenāha ‘‘evaṃ uppannā samathavipassanā…pe… saṃvattantī’’ti.
தத்த² அனுப்பன்னானந்தி எத்த² தத்த² து³விதா⁴ய ஸம்மப்பதா⁴னகதா²ய, தத்த² வா பாளியங் ‘‘அனுப்பன்னான’’ந்தி ஏதஸ்ஸ அயங் வினிச்ச²யோதி அதி⁴ப்பாயோ. ஏதேயேவாதி அனமதக்³கே³ ஸங்ஸாரே உப்பன்னாயேவ.
Tattha anuppannānanti ettha tattha duvidhāya sammappadhānakathāya, tattha vā pāḷiyaṃ ‘‘anuppannāna’’nti etassa ayaṃ vinicchayoti adhippāyo. Eteyevāti anamatagge saṃsāre uppannāyeva.
சுத்³த³ஸ மஹாவத்தானி க²ந்த⁴கே வுத்தானி ஆக³ந்துகஆவாஸிகக³மிகஅனுமோத³ன ப⁴த்தக்³க³ பிண்ட³சாரிக ஆரஞ்ஞிக ஸேனாஸன ஜந்தாக⁴ரவச்சகுடி ஆசரியஉபஜ்ஜா²யஸத்³தி⁴விஹாரிகஅந்தேவாஸிகவத்தானி சுத்³த³ஸ. ததோ அஞ்ஞானி பன கதா³சி தஜ்ஜனீயகம்மகதாதி³காலே பாரிவாஸிகாதி³காலே ச சரிதப்³பா³னி த்³வாஸீதி கு²த்³த³கவத்தானீதி கதி²தானி த³ட்ட²ப்³பா³னி. ந ஹி தானி ஸப்³பா³ஸு அவத்தா²ஸு சரிதப்³பா³னி, தஸ்மா மஹாவத்தே அக³ணிதானி. தத்த² ‘‘பாரிவாஸிகானங் பி⁴க்கூ²னங் வத்தங் பஞ்ஞாபெஸ்ஸாமீ’’தி ஆரபி⁴த்வா ‘‘ந உபஸம்பாதே³தப்³ப³ங்…பே॰… ந ச²மாயங் சங்கமந்தே சங்கமே சங்கமிதப்³ப³’’ந்தி (சூளவ॰ 76) வுத்தானி பகதத்தே சரிதப்³ப³வத்தாவஸானானி ச²ஸட்டி², ததோ பரங் ‘‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகவுட்³ட⁴தரேன பி⁴க்கு²னா ஸத்³தி⁴ங், மூலாயபடிகஸ்ஸனாரஹேன, மானத்தாரஹேன, மானத்தசாரிகேன, அப்³பா⁴னாரஹேன பி⁴க்கு²னா ஸத்³தி⁴ங் ஏகச்ச²ன்னே ஆவாஸே வத்த²ப்³ப³’’ந்திஆதீ³னி (சூளவ॰ 82) பகதத்தே சரிதப்³பே³ஹி அனஞ்ஞத்தா விஸுங் விஸுங் அக³ணெத்வா பாரிவாஸிகவுட்³ட⁴தராதீ³ஸு புக்³க³லந்தரேஸு சரிதப்³ப³த்தா தேஸங் வஸேன ஸம்பிண்டெ³த்வா ஏகேகங் கத்வா க³ணேதப்³பா³னி பஞ்சாதி ஏகஸத்ததி வத்தானி, உக்கே²பனீயகம்மகதவத்தேஸு வத்தபஞ்ஞாபனவஸேன வுத்தங் ‘‘ந பகதத்தஸ்ஸ பி⁴க்கு²னோ அபி⁴வாத³னங் பச்சுட்டா²னங்…பே॰… நஹானே பிட்டி²பரிகம்மங் ஸாதி³தப்³ப³’’ந்தி (சூளவ॰ 75) இத³ங் அபி⁴வாத³னாதீ³னங் அஸ்ஸாதி³யனங் ஏகங், ‘‘ந பகதத்தோ பி⁴க்கு² ஸீலவிபத்தியா அனுத்³த⁴ங்ஸேதப்³போ³’’திஆதீ³னி (சூளவ॰ 51) ச த³ஸாதி ஏவங் த்³வாஸீதி ஹொந்தி. ஏதெஸ்வேவ கானிசி தஜ்ஜனீயகம்மகதாதி³வத்தானி, கானிசி பாரிவாஸிகாதி³வத்தானீதி அக்³க³ஹிதக்³க³ஹணேன த்³வாஸீதிவத்தந்தி த³ட்ட²ப்³ப³ங்.
Cuddasa mahāvattāni khandhake vuttāni āgantukaāvāsikagamikaanumodana bhattagga piṇḍacārika āraññika senāsana jantāgharavaccakuṭi ācariyaupajjhāyasaddhivihārikaantevāsikavattāni cuddasa. Tato aññāni pana kadāci tajjanīyakammakatādikāle pārivāsikādikāle ca caritabbāni dvāsīti khuddakavattānīti kathitāni daṭṭhabbāni. Na hi tāni sabbāsu avatthāsu caritabbāni, tasmā mahāvatte agaṇitāni. Tattha ‘‘pārivāsikānaṃ bhikkhūnaṃ vattaṃ paññāpessāmī’’ti ārabhitvā ‘‘na upasampādetabbaṃ…pe… na chamāyaṃ caṅkamante caṅkame caṅkamitabba’’nti (cūḷava. 76) vuttāni pakatatte caritabbavattāvasānāni chasaṭṭhi, tato paraṃ ‘‘na, bhikkhave, pārivāsikena bhikkhunā pārivāsikavuḍḍhatarena bhikkhunā saddhiṃ, mūlāyapaṭikassanārahena, mānattārahena, mānattacārikena, abbhānārahena bhikkhunā saddhiṃ ekacchanne āvāse vatthabba’’ntiādīni (cūḷava. 82) pakatatte caritabbehi anaññattā visuṃ visuṃ agaṇetvā pārivāsikavuḍḍhatarādīsu puggalantaresu caritabbattā tesaṃ vasena sampiṇḍetvā ekekaṃ katvā gaṇetabbāni pañcāti ekasattati vattāni, ukkhepanīyakammakatavattesu vattapaññāpanavasena vuttaṃ ‘‘na pakatattassa bhikkhuno abhivādanaṃ paccuṭṭhānaṃ…pe… nahāne piṭṭhiparikammaṃ sāditabba’’nti (cūḷava. 75) idaṃ abhivādanādīnaṃ assādiyanaṃ ekaṃ, ‘‘na pakatatto bhikkhu sīlavipattiyā anuddhaṃsetabbo’’tiādīni (cūḷava. 51) ca dasāti evaṃ dvāsīti honti. Etesveva kānici tajjanīyakammakatādivattāni, kānici pārivāsikādivattānīti aggahitaggahaṇena dvāsītivattanti daṭṭhabbaṃ.
இத⁴ விபாகானுப⁴வனவஸேன ததா³ரம்மணங், அவிபக்கவிபாகஸ்ஸ ஸப்³ப³தா² அவிக³தத்தா ப⁴வித்வா விக³தமத்தவஸேன கம்மஞ்ச ‘‘பு⁴த்வா விக³துப்பன்ன’’ந்தி வுத்தங், ந அட்ட²ஸாலினியங் (த⁴॰ ஸ॰ அட்ட²॰ 1) விய ரஜ்ஜனாதி³வஸேன அனுபு⁴த்வாபக³தங் ஜவனங், உப்பஜ்ஜித்வா நிருத்³த⁴தாவஸேன பூ⁴தாபக³தஸங்கா²தங் ஸேஸஸங்க²தஞ்ச ‘‘பூ⁴தாபக³துப்பன்ன’’ந்தி, தஸ்மா இத⁴ ஓகாஸகதுப்பன்னங் விபாகமேவ வத³தி, ந தத்த² விய கம்மம்பீதி. அனுஸயிதகிலேஸாதி அப்பஹீனா மக்³கே³ன பஹாதப்³பா³ அதி⁴ப்பேதா. தேனாஹ ‘‘அதீதா வா…பே॰… ந வத்தப்³பா³’’தி. தேஸஞ்ஹி அம்ப³தருணோபமாய வத்தமானாதி³தா ந வத்தப்³பா³தி.
Idha vipākānubhavanavasena tadārammaṇaṃ, avipakkavipākassa sabbathā avigatattā bhavitvā vigatamattavasena kammañca ‘‘bhutvā vigatuppanna’’nti vuttaṃ, na aṭṭhasāliniyaṃ (dha. sa. aṭṭha. 1) viya rajjanādivasena anubhutvāpagataṃ javanaṃ, uppajjitvā niruddhatāvasena bhūtāpagatasaṅkhātaṃ sesasaṅkhatañca ‘‘bhūtāpagatuppanna’’nti, tasmā idha okāsakatuppannaṃ vipākameva vadati, na tattha viya kammampīti. Anusayitakilesāti appahīnā maggena pahātabbā adhippetā. Tenāha ‘‘atītā vā…pe… na vattabbā’’ti. Tesañhi ambataruṇopamāya vattamānāditā na vattabbāti.
ஆஹதகீ²ரருக்கோ² விய நிமித்தக்³கா³ஹவஸேன அதி⁴க³தங் ஆரம்மணங், அனாஹதகீ²ரருக்கோ² விய அவிக்க²ம்பி⁴ததாய அந்தோக³த⁴கிலேஸங் ஆரம்மணங் த³ட்ட²ப்³ப³ங், நிமித்தக்³கா³ஹகாவிக்க²ம்பி⁴தகிலேஸா வா புக்³க³லா ஆஹதானாஹதகீ²ரருக்க²ஸதி³ஸா. புரிமனயேனேவாதி அவிக்க²ம்பி⁴துப்பன்னே விய ‘‘இமஸ்மிங் நாம டா²னே நுப்பஜ்ஜிஸ்ஸந்தீதி ந வத்தப்³பா³ அஸமுக்³கா⁴டிதத்தா’’தி யோஜெத்வா வித்தா²ரேதப்³ப³ங்.
Āhatakhīrarukkho viya nimittaggāhavasena adhigataṃ ārammaṇaṃ, anāhatakhīrarukkho viya avikkhambhitatāya antogadhakilesaṃ ārammaṇaṃ daṭṭhabbaṃ, nimittaggāhakāvikkhambhitakilesā vā puggalā āhatānāhatakhīrarukkhasadisā. Purimanayenevāti avikkhambhituppanne viya ‘‘imasmiṃ nāma ṭhāne nuppajjissantīti na vattabbā asamugghāṭitattā’’ti yojetvā vitthāretabbaṃ.
பாளியந்தி படிஸம்பி⁴தா³பாளியங் (படி॰ ம॰ 3.21). மக்³கே³ன பஹீனகிலேஸானமேவ திதா⁴ நவத்தப்³ப³தங் அபாகடங் பாகடங் காதுங் அஜாதப²லருக்கோ² ஆப⁴தோ, அதீதாதீ³னங் அப்பஹீனதாத³ஸ்ஸனத்த²ம்பி ‘‘ஜாதப²லருக்கே²ன தீ³பேதப்³ப³’’ந்தி ஆஹ. தத்த² யதா² அச்சி²ன்னே ருக்கே² நிப்³ப³த்திரஹானி ப²லானி சி²ன்னே அனுப்பஜ்ஜமானானி ந கதா³சி ஸஸபா⁴வானி அஹேஸுங் ஹொந்தி ப⁴விஸ்ஸந்தி சாதி அதீதாதி³பா⁴வேன ந வத்தப்³பா³னி, ஏவங் மக்³கே³ன பஹீனகிலேஸா ச த³ட்ட²ப்³பா³. யதா² ச சே²தே³ அஸதி ப²லானி உப்பஜ்ஜிஸ்ஸந்தி, ஸதி ச நுப்பஜ்ஜிஸ்ஸந்தீதி சே²த³ஸ்ஸ ஸாத்த²கதா, ஏவங் மக்³க³பா⁴வனாய ச ஸாத்த²கதா யோஜேதப்³பா³.
Pāḷiyanti paṭisambhidāpāḷiyaṃ (paṭi. ma. 3.21). Maggena pahīnakilesānameva tidhā navattabbataṃ apākaṭaṃ pākaṭaṃ kātuṃ ajātaphalarukkho ābhato, atītādīnaṃ appahīnatādassanatthampi ‘‘jātaphalarukkhena dīpetabba’’nti āha. Tattha yathā acchinne rukkhe nibbattirahāni phalāni chinne anuppajjamānāni na kadāci sasabhāvāni ahesuṃ honti bhavissanti cāti atītādibhāvena na vattabbāni, evaṃ maggena pahīnakilesā ca daṭṭhabbā. Yathā ca chede asati phalāni uppajjissanti, sati ca nuppajjissantīti chedassa sātthakatā, evaṃ maggabhāvanāya ca sātthakatā yojetabbā.
ஸுத்தந்தபா⁴ஜனீயவண்ணனா நிட்டி²தா.
Suttantabhājanīyavaṇṇanā niṭṭhitā.
3. பஞ்ஹபுச்ச²கவண்ணனா
3. Pañhapucchakavaṇṇanā
427. பஞ்ஹபுச்ச²கே யங் வுத்தங் ‘‘வீரியஜெட்டி²காய பன அஞ்ஞஸ்ஸ வீரியஸ்ஸ அபா⁴வா ந வத்தப்³பா³னி மக்³கா³தி⁴பதீனீதி வா ந மக்³கா³தி⁴பதீனீதி வா’’தி, எத்த² ‘‘மக்³கா³தி⁴பதீனீ’’தி ந வத்தப்³ப³தாய ஏவ அஞ்ஞஸ்ஸ வீரியஸ்ஸ அபா⁴வோ காரணந்தி த³ட்ட²ப்³ப³ங். ச²ந்த³ஸ்ஸ பன சித்தஸ்ஸ வா நமக்³க³பூ⁴தஸ்ஸ அதி⁴பதினோ ததா³ அபா⁴வா ‘‘ந மக்³கா³தி⁴பதீனீ’’தி ந வத்தப்³பா³னீதி வுத்தங். ச²ந்த³சித்தானங் விய நமக்³க³பூ⁴தஸ்ஸ அஞ்ஞஸ்ஸ வீரியாதி⁴பதினோ அபா⁴வாதி வா அதி⁴ப்பாயோ. ஸம்மப்பதா⁴னானங் ததா³ மக்³க³ஸங்கா²தஅதி⁴பதிபா⁴வதோ வா ‘‘ந மக்³கா³தி⁴பதீனீ’’தி நவத்தப்³ப³தா வுத்தாதி வேதி³தப்³பா³.
427. Pañhapucchake yaṃ vuttaṃ ‘‘vīriyajeṭṭhikāya pana aññassa vīriyassa abhāvā na vattabbāni maggādhipatīnīti vā na maggādhipatīnīti vā’’ti, ettha ‘‘maggādhipatīnī’’ti na vattabbatāya eva aññassa vīriyassa abhāvo kāraṇanti daṭṭhabbaṃ. Chandassa pana cittassa vā namaggabhūtassa adhipatino tadā abhāvā ‘‘na maggādhipatīnī’’ti na vattabbānīti vuttaṃ. Chandacittānaṃ viya namaggabhūtassa aññassa vīriyādhipatino abhāvāti vā adhippāyo. Sammappadhānānaṃ tadā maggasaṅkhātaadhipatibhāvato vā ‘‘na maggādhipatīnī’’ti navattabbatā vuttāti veditabbā.
பஞ்ஹபுச்ச²கவண்ணனா நிட்டி²தா.
Pañhapucchakavaṇṇanā niṭṭhitā.
ஸம்மப்பதா⁴னவிப⁴ங்க³வண்ணனா நிட்டி²தா.
Sammappadhānavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 8. ஸம்மப்பதா⁴னவிப⁴ங்கோ³ • 8. Sammappadhānavibhaṅgo
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / ஸம்மோஹவினோத³னீ-அட்ட²கதா² • Sammohavinodanī-aṭṭhakathā
1. ஸுத்தந்தபா⁴ஜனீயவண்ணனா • 1. Suttantabhājanīyavaṇṇanā
3. பஞ்ஹாபுச்ச²கவண்ணனா • 3. Pañhāpucchakavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 8. ஸம்மப்பதா⁴னவிப⁴ங்கோ³ • 8. Sammappadhānavibhaṅgo
