| Library / Tipiṭaka / তিপিটক • Tipiṭaka / ৰিভঙ্গ-মূলটীকা • Vibhaṅga-mūlaṭīkā |
৮. সম্মপ্পধানৰিভঙ্গো
8. Sammappadhānavibhaṅgo
১. সুত্তন্তভাজনীযৰণ্ণনা
1. Suttantabhājanīyavaṇṇanā
৩৯০. কারণপ্পধানাতি ‘‘অনুপ্পন্নপাপকানুপ্পাদাদিঅত্থা’’তি গহিতা তথেৰ তে হোন্তীতি তং অত্থং সাধেন্তিযেৰাতি এতস্স অত্থস্স দীপকো সম্মা-সদ্দোতি যথাধিপ্পেতত্থস্স অনুপ্পন্নপাপকানুপ্পাদাদিনো কারণভূতা, পধানকারণভূতাতি অত্থো। সম্মাসদ্দস্স উপাযযোনিসোঅত্থদীপকতং সন্ধায ‘‘উপাযপ্পধানা যোনিসোপধানা’’তি ৰুত্তং। পটিপন্নকোতি ভাৰনমনুযুত্তো। ভুসং যোগো পযোগো, পযোগোৰ পরক্কমো পযোগপরক্কমো। এতানীতি ‘‘ৰাযমতী’’তিআদীনি ‘‘আসেৰমানো ৰাযমতী’’তিআদিনা যোজেতব্বানি।
390. Kāraṇappadhānāti ‘‘anuppannapāpakānuppādādiatthā’’ti gahitā tatheva te hontīti taṃ atthaṃ sādhentiyevāti etassa atthassa dīpako sammā-saddoti yathādhippetatthassa anuppannapāpakānuppādādino kāraṇabhūtā, padhānakāraṇabhūtāti attho. Sammāsaddassa upāyayonisoatthadīpakataṃ sandhāya ‘‘upāyappadhānā yonisopadhānā’’ti vuttaṃ. Paṭipannakoti bhāvanamanuyutto. Bhusaṃ yogo payogo, payogova parakkamo payogaparakkamo. Etānīti ‘‘vāyamatī’’tiādīni ‘‘āsevamāno vāyamatī’’tiādinā yojetabbāni.
অনুপ্পন্নাতি অৰত্তব্বতং আপন্নানন্তি ভূমিলদ্ধারম্মণাধিগ্গহিতাৰিক্খম্ভিতাসমুগ্ঘাতিতুপ্পন্নানং।
Anuppannāti avattabbataṃ āpannānanti bhūmiladdhārammaṇādhiggahitāvikkhambhitāsamugghātituppannānaṃ.
৩৯১. ধম্মচ্ছন্দোতি তণ্হাদিট্ঠিৰীরিযচ্ছন্দা ৰিয ন অঞ্ঞো ধম্মো, অথ খো ছন্দনিযসভাৰো এৰাতি দস্সেন্তো আহ ‘‘সভাৰচ্ছন্দো’’তি। তত্থ ‘‘যো কামেসু কামচ্ছন্দো’’তিআদীসু (ধ॰ স॰ ১১০৩) তণ্হা ছন্দোতি ৰুত্তাতি ৰেদিতব্বো, ‘‘সব্বেৰ নু খো, মারিস, সমণব্রাহ্মণা একন্তৰাদা একন্তসীলা একন্তছন্দা একন্তঅজ্ঝোসানা’’তি (দী॰ নি॰ ২.৩৬৬) এত্থ দিট্ঠি, পমাদনিদ্দেসে ‘‘নিক্খিত্তছন্দতা নিক্খিত্তধুরতা’’তি ৰীরিযন্তি ৰণ্ণেতি।
391. Dhammacchandoti taṇhādiṭṭhivīriyacchandā viya na añño dhammo, atha kho chandaniyasabhāvo evāti dassento āha ‘‘sabhāvacchando’’ti. Tattha ‘‘yo kāmesu kāmacchando’’tiādīsu (dha. sa. 1103) taṇhā chandoti vuttāti veditabbo, ‘‘sabbeva nu kho, mārisa, samaṇabrāhmaṇā ekantavādā ekantasīlā ekantachandā ekantaajjhosānā’’ti (dī. ni. 2.366) ettha diṭṭhi, pamādaniddese ‘‘nikkhittachandatā nikkhittadhuratā’’ti vīriyanti vaṇṇeti.
৩৯৪. ৰাযমতি ৰীরিযং আরভতীতি পদদ্ৰযস্সপি নিদ্দেসো ৰীরিযনিদ্দেসোযেৰাতি অধিপ্পাযেনাহ ‘‘ৰীরিযনিদ্দেসে’’তি।
394. Vāyamativīriyaṃ ārabhatīti padadvayassapi niddeso vīriyaniddesoyevāti adhippāyenāha ‘‘vīriyaniddese’’ti.
৪০৬. সব্বপুব্বভাগেতি সব্বমগ্গানং পুব্বভাগে। পুরিমস্মিন্তি ‘‘অনুপ্পন্না মে কুসলা ধম্মা অনুপ্পজ্জমানা অনত্থায সংৰত্তেয্যু’’ন্তি এত্থাপি ‘‘সমথৰিপস্সনাৰ গহেতব্বা’’তি ৰুত্তং অট্ঠকথাযং, তং পন মগ্গানুপ্পন্নতায ভাৰতো অনুপ্পজ্জমানে চ তস্মিং ৰট্টানত্থসংৰত্তনতো ন যুত্তন্তি পটিক্খিপতি।
406. Sabbapubbabhāgeti sabbamaggānaṃ pubbabhāge. Purimasminti ‘‘anuppannā me kusalā dhammā anuppajjamānā anatthāya saṃvatteyyu’’nti etthāpi ‘‘samathavipassanāva gahetabbā’’ti vuttaṃ aṭṭhakathāyaṃ, taṃ pana maggānuppannatāya bhāvato anuppajjamāne ca tasmiṃ vaṭṭānatthasaṃvattanato na yuttanti paṭikkhipati.
মহন্তং গারৰং হোতি, তস্মা ‘‘সঙ্ঘগারৰেন যথারুচি ৰিন্দিতুং ন সক্কা’’তি সঙ্ঘেন সহ ন নিক্খমি। অতিমন্দানি নোতি ননু অতিমন্দানীতি অত্থো। সন্তসমাপত্তিতো অঞ্ঞং সন্থম্ভনকারণং বলৰং নত্থীতি ‘‘ততো পরিহীনা সন্থম্ভিতুং ন সক্কোন্তী’’তি আহ। ন হি মহারজ্জুম্হি ছিন্নে সুত্ততন্তূ সন্ধারেতুং সক্কোন্তীতি। সমথে ৰত্থুং দস্সেত্ৰা তেন সমানগতিকা ৰিপস্সনা চাতি ইমিনা অধিপ্পাযেনাহ ‘‘এৰং উপ্পন্না সমথৰিপস্সনা…পে॰… সংৰত্তন্তী’’তি।
Mahantaṃgāravaṃ hoti, tasmā ‘‘saṅghagāravena yathāruci vindituṃ na sakkā’’ti saṅghena saha na nikkhami. Atimandāni noti nanu atimandānīti attho. Santasamāpattito aññaṃ santhambhanakāraṇaṃ balavaṃ natthīti ‘‘tato parihīnā santhambhituṃ na sakkontī’’ti āha. Na hi mahārajjumhi chinne suttatantū sandhāretuṃ sakkontīti. Samathe vatthuṃ dassetvā tena samānagatikā vipassanā cāti iminā adhippāyenāha ‘‘evaṃ uppannā samathavipassanā…pe… saṃvattantī’’ti.
তত্থ অনুপ্পন্নানন্তি এত্থ তত্থ দুৰিধায সম্মপ্পধানকথায, তত্থ ৰা পাল়িযং ‘‘অনুপ্পন্নান’’ন্তি এতস্স অযং ৰিনিচ্ছযোতি অধিপ্পাযো। এতেযেৰাতি অনমতগ্গে সংসারে উপ্পন্নাযেৰ।
Tattha anuppannānanti ettha tattha duvidhāya sammappadhānakathāya, tattha vā pāḷiyaṃ ‘‘anuppannāna’’nti etassa ayaṃ vinicchayoti adhippāyo. Eteyevāti anamatagge saṃsāre uppannāyeva.
চুদ্দস মহাৰত্তানি খন্ধকে ৰুত্তানি আগন্তুকআৰাসিকগমিকঅনুমোদন ভত্তগ্গ পিণ্ডচারিক আরঞ্ঞিক সেনাসন জন্তাঘরৰচ্চকুটি আচরিযউপজ্ঝাযসদ্ধিৰিহারিকঅন্তেৰাসিকৰত্তানি চুদ্দস। ততো অঞ্ঞানি পন কদাচি তজ্জনীযকম্মকতাদিকালে পারিৰাসিকাদিকালে চ চরিতব্বানি দ্ৰাসীতি খুদ্দকৰত্তানীতি কথিতানি দট্ঠব্বানি। ন হি তানি সব্বাসু অৰত্থাসু চরিতব্বানি, তস্মা মহাৰত্তে অগণিতানি। তত্থ ‘‘পারিৰাসিকানং ভিক্খূনং ৰত্তং পঞ্ঞাপেস্সামী’’তি আরভিত্ৰা ‘‘ন উপসম্পাদেতব্বং…পে॰… ন ছমাযং চঙ্কমন্তে চঙ্কমে চঙ্কমিতব্ব’’ন্তি (চূল়ৰ॰ ৭৬) ৰুত্তানি পকতত্তে চরিতব্বৰত্তাৰসানানি ছসট্ঠি, ততো পরং ‘‘ন, ভিক্খৰে, পারিৰাসিকেন ভিক্খুনা পারিৰাসিকৰুড্ঢতরেন ভিক্খুনা সদ্ধিং, মূলাযপটিকস্সনারহেন, মানত্তারহেন, মানত্তচারিকেন, অব্ভানারহেন ভিক্খুনা সদ্ধিং একচ্ছন্নে আৰাসে ৰত্থব্ব’’ন্তিআদীনি (চূল়ৰ॰ ৮২) পকতত্তে চরিতব্বেহি অনঞ্ঞত্তা ৰিসুং ৰিসুং অগণেত্ৰা পারিৰাসিকৰুড্ঢতরাদীসু পুগ্গলন্তরেসু চরিতব্বত্তা তেসং ৰসেন সম্পিণ্ডেত্ৰা একেকং কত্ৰা গণেতব্বানি পঞ্চাতি একসত্ততি ৰত্তানি, উক্খেপনীযকম্মকতৰত্তেসু ৰত্তপঞ্ঞাপনৰসেন ৰুত্তং ‘‘ন পকতত্তস্স ভিক্খুনো অভিৰাদনং পচ্চুট্ঠানং…পে॰… নহানে পিট্ঠিপরিকম্মং সাদিতব্ব’’ন্তি (চূল়ৰ॰ ৭৫) ইদং অভিৰাদনাদীনং অস্সাদিযনং একং, ‘‘ন পকতত্তো ভিক্খু সীলৰিপত্তিযা অনুদ্ধংসেতব্বো’’তিআদীনি (চূল়ৰ॰ ৫১) চ দসাতি এৰং দ্ৰাসীতি হোন্তি। এতেস্ৰেৰ কানিচি তজ্জনীযকম্মকতাদিৰত্তানি, কানিচি পারিৰাসিকাদিৰত্তানীতি অগ্গহিতগ্গহণেন দ্ৰাসীতিৰত্তন্তি দট্ঠব্বং।
Cuddasa mahāvattāni khandhake vuttāni āgantukaāvāsikagamikaanumodana bhattagga piṇḍacārika āraññika senāsana jantāgharavaccakuṭi ācariyaupajjhāyasaddhivihārikaantevāsikavattāni cuddasa. Tato aññāni pana kadāci tajjanīyakammakatādikāle pārivāsikādikāle ca caritabbāni dvāsīti khuddakavattānīti kathitāni daṭṭhabbāni. Na hi tāni sabbāsu avatthāsu caritabbāni, tasmā mahāvatte agaṇitāni. Tattha ‘‘pārivāsikānaṃ bhikkhūnaṃ vattaṃ paññāpessāmī’’ti ārabhitvā ‘‘na upasampādetabbaṃ…pe… na chamāyaṃ caṅkamante caṅkame caṅkamitabba’’nti (cūḷava. 76) vuttāni pakatatte caritabbavattāvasānāni chasaṭṭhi, tato paraṃ ‘‘na, bhikkhave, pārivāsikena bhikkhunā pārivāsikavuḍḍhatarena bhikkhunā saddhiṃ, mūlāyapaṭikassanārahena, mānattārahena, mānattacārikena, abbhānārahena bhikkhunā saddhiṃ ekacchanne āvāse vatthabba’’ntiādīni (cūḷava. 82) pakatatte caritabbehi anaññattā visuṃ visuṃ agaṇetvā pārivāsikavuḍḍhatarādīsu puggalantaresu caritabbattā tesaṃ vasena sampiṇḍetvā ekekaṃ katvā gaṇetabbāni pañcāti ekasattati vattāni, ukkhepanīyakammakatavattesu vattapaññāpanavasena vuttaṃ ‘‘na pakatattassa bhikkhuno abhivādanaṃ paccuṭṭhānaṃ…pe… nahāne piṭṭhiparikammaṃ sāditabba’’nti (cūḷava. 75) idaṃ abhivādanādīnaṃ assādiyanaṃ ekaṃ, ‘‘na pakatatto bhikkhu sīlavipattiyā anuddhaṃsetabbo’’tiādīni (cūḷava. 51) ca dasāti evaṃ dvāsīti honti. Etesveva kānici tajjanīyakammakatādivattāni, kānici pārivāsikādivattānīti aggahitaggahaṇena dvāsītivattanti daṭṭhabbaṃ.
ইধ ৰিপাকানুভৰনৰসেন তদারম্মণং, অৰিপক্কৰিপাকস্স সব্বথা অৰিগতত্তা ভৰিত্ৰা ৰিগতমত্তৰসেন কম্মঞ্চ ‘‘ভুত্ৰা ৰিগতুপ্পন্ন’’ন্তি ৰুত্তং, ন অট্ঠসালিনিযং (ধ॰ স॰ অট্ঠ॰ ১) ৰিয রজ্জনাদিৰসেন অনুভুত্ৰাপগতং জৰনং, উপ্পজ্জিত্ৰা নিরুদ্ধতাৰসেন ভূতাপগতসঙ্খাতং সেসসঙ্খতঞ্চ ‘‘ভূতাপগতুপ্পন্ন’’ন্তি, তস্মা ইধ ওকাসকতুপ্পন্নং ৰিপাকমেৰ ৰদতি, ন তত্থ ৰিয কম্মম্পীতি। অনুসযিতকিলেসাতি অপ্পহীনা মগ্গেন পহাতব্বা অধিপ্পেতা। তেনাহ ‘‘অতীতা ৰা…পে॰… ন ৰত্তব্বা’’তি। তেসঞ্হি অম্বতরুণোপমায ৰত্তমানাদিতা ন ৰত্তব্বাতি।
Idha vipākānubhavanavasena tadārammaṇaṃ, avipakkavipākassa sabbathā avigatattā bhavitvā vigatamattavasena kammañca ‘‘bhutvā vigatuppanna’’nti vuttaṃ, na aṭṭhasāliniyaṃ (dha. sa. aṭṭha. 1) viya rajjanādivasena anubhutvāpagataṃ javanaṃ, uppajjitvā niruddhatāvasena bhūtāpagatasaṅkhātaṃ sesasaṅkhatañca ‘‘bhūtāpagatuppanna’’nti, tasmā idha okāsakatuppannaṃ vipākameva vadati, na tattha viya kammampīti. Anusayitakilesāti appahīnā maggena pahātabbā adhippetā. Tenāha ‘‘atītā vā…pe… na vattabbā’’ti. Tesañhi ambataruṇopamāya vattamānāditā na vattabbāti.
আহতখীররুক্খো ৰিয নিমিত্তগ্গাহৰসেন অধিগতং আরম্মণং, অনাহতখীররুক্খো ৰিয অৰিক্খম্ভিততায অন্তোগধকিলেসং আরম্মণং দট্ঠব্বং, নিমিত্তগ্গাহকাৰিক্খম্ভিতকিলেসা ৰা পুগ্গলা আহতানাহতখীররুক্খসদিসা। পুরিমনযেনেৰাতি অৰিক্খম্ভিতুপ্পন্নে ৰিয ‘‘ইমস্মিং নাম ঠানে নুপ্পজ্জিস্সন্তীতি ন ৰত্তব্বা অসমুগ্ঘাটিতত্তা’’তি যোজেত্ৰা ৰিত্থারেতব্বং।
Āhatakhīrarukkho viya nimittaggāhavasena adhigataṃ ārammaṇaṃ, anāhatakhīrarukkho viya avikkhambhitatāya antogadhakilesaṃ ārammaṇaṃ daṭṭhabbaṃ, nimittaggāhakāvikkhambhitakilesā vā puggalā āhatānāhatakhīrarukkhasadisā. Purimanayenevāti avikkhambhituppanne viya ‘‘imasmiṃ nāma ṭhāne nuppajjissantīti na vattabbā asamugghāṭitattā’’ti yojetvā vitthāretabbaṃ.
পাল়িযন্তি পটিসম্ভিদাপাল়িযং (পটি॰ ম॰ ৩.২১)। মগ্গেন পহীনকিলেসানমেৰ তিধা নৰত্তব্বতং অপাকটং পাকটং কাতুং অজাতফলরুক্খো আভতো, অতীতাদীনং অপ্পহীনতাদস্সনত্থম্পি ‘‘জাতফলরুক্খেন দীপেতব্ব’’ন্তি আহ। তত্থ যথা অচ্ছিন্নে রুক্খে নিব্বত্তিরহানি ফলানি ছিন্নে অনুপ্পজ্জমানানি ন কদাচি সসভাৰানি অহেসুং হোন্তি ভৰিস্সন্তি চাতি অতীতাদিভাৰেন ন ৰত্তব্বানি, এৰং মগ্গেন পহীনকিলেসা চ দট্ঠব্বা। যথা চ ছেদে অসতি ফলানি উপ্পজ্জিস্সন্তি, সতি চ নুপ্পজ্জিস্সন্তীতি ছেদস্স সাত্থকতা, এৰং মগ্গভাৰনায চ সাত্থকতা যোজেতব্বা।
Pāḷiyanti paṭisambhidāpāḷiyaṃ (paṭi. ma. 3.21). Maggena pahīnakilesānameva tidhā navattabbataṃ apākaṭaṃ pākaṭaṃ kātuṃ ajātaphalarukkho ābhato, atītādīnaṃ appahīnatādassanatthampi ‘‘jātaphalarukkhena dīpetabba’’nti āha. Tattha yathā acchinne rukkhe nibbattirahāni phalāni chinne anuppajjamānāni na kadāci sasabhāvāni ahesuṃ honti bhavissanti cāti atītādibhāvena na vattabbāni, evaṃ maggena pahīnakilesā ca daṭṭhabbā. Yathā ca chede asati phalāni uppajjissanti, sati ca nuppajjissantīti chedassa sātthakatā, evaṃ maggabhāvanāya ca sātthakatā yojetabbā.
সুত্তন্তভাজনীযৰণ্ণনা নিট্ঠিতা।
Suttantabhājanīyavaṇṇanā niṭṭhitā.
৩. পঞ্হপুচ্ছকৰণ্ণনা
3. Pañhapucchakavaṇṇanā
৪২৭. পঞ্হপুচ্ছকে যং ৰুত্তং ‘‘ৰীরিযজেট্ঠিকায পন অঞ্ঞস্স ৰীরিযস্স অভাৰা ন ৰত্তব্বানি মগ্গাধিপতীনীতি ৰা ন মগ্গাধিপতীনীতি ৰা’’তি, এত্থ ‘‘মগ্গাধিপতীনী’’তি ন ৰত্তব্বতায এৰ অঞ্ঞস্স ৰীরিযস্স অভাৰো কারণন্তি দট্ঠব্বং। ছন্দস্স পন চিত্তস্স ৰা নমগ্গভূতস্স অধিপতিনো তদা অভাৰা ‘‘ন মগ্গাধিপতীনী’’তি ন ৰত্তব্বানীতি ৰুত্তং। ছন্দচিত্তানং ৰিয নমগ্গভূতস্স অঞ্ঞস্স ৰীরিযাধিপতিনো অভাৰাতি ৰা অধিপ্পাযো। সম্মপ্পধানানং তদা মগ্গসঙ্খাতঅধিপতিভাৰতো ৰা ‘‘ন মগ্গাধিপতীনী’’তি নৰত্তব্বতা ৰুত্তাতি ৰেদিতব্বা।
427. Pañhapucchake yaṃ vuttaṃ ‘‘vīriyajeṭṭhikāya pana aññassa vīriyassa abhāvā na vattabbāni maggādhipatīnīti vā na maggādhipatīnīti vā’’ti, ettha ‘‘maggādhipatīnī’’ti na vattabbatāya eva aññassa vīriyassa abhāvo kāraṇanti daṭṭhabbaṃ. Chandassa pana cittassa vā namaggabhūtassa adhipatino tadā abhāvā ‘‘na maggādhipatīnī’’ti na vattabbānīti vuttaṃ. Chandacittānaṃ viya namaggabhūtassa aññassa vīriyādhipatino abhāvāti vā adhippāyo. Sammappadhānānaṃ tadā maggasaṅkhātaadhipatibhāvato vā ‘‘na maggādhipatīnī’’ti navattabbatā vuttāti veditabbā.
পঞ্হপুচ্ছকৰণ্ণনা নিট্ঠিতা।
Pañhapucchakavaṇṇanā niṭṭhitā.
সম্মপ্পধানৰিভঙ্গৰণ্ণনা নিট্ঠিতা।
Sammappadhānavibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ৮. সম্মপ্পধানৰিভঙ্গো • 8. Sammappadhānavibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā
১. সুত্তন্তভাজনীযৰণ্ণনা • 1. Suttantabhājanīyavaṇṇanā
৩. পঞ্হাপুচ্ছকৰণ্ণনা • 3. Pañhāpucchakavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ৮. সম্মপ্পধানৰিভঙ্গো • 8. Sammappadhānavibhaṅgo
