| Library / Tipiṭaka / ཏིཔིཊཀ • Tipiṭaka / ཝིབྷངྒཔཱལི༹ • Vibhaṅgapāḷi |
༨. སམྨཔྤདྷཱནཝིབྷངྒོ
8. Sammappadhānavibhaṅgo
༡. སུཏྟནྟབྷཱཛནཱིཡཾ
1. Suttantabhājanīyaṃ
༣༩༠. ཙཏྟཱརོ སམྨཔྤདྷཱནཱ – ཨིདྷ བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
390. Cattāro sammappadhānā – idha bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati, uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati, anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati, uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati.
༣༩༡. ཀཐཉྩ བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཏཏྠ ཀཏམེ ཨནུཔྤནྣཱ པཱཔཀཱ ཨཀུསལཱ དྷམྨཱ? ཏཱིཎི ཨཀུསལམཱུལཱནི – ལོབྷོ, དོསོ, མོཧོ། ཏདེཀཊྛཱ ཙ ཀིལེསཱ། ཏཾསམྤཡུཏྟོ ཝེདནཱཀྑནྡྷོ, སཉྙཱཀྑནྡྷོ, སངྑཱརཀྑནྡྷོ, ཝིཉྙཱཎཀྑནྡྷོ, ཏཾསམུཊྛཱནཾ ཀཱཡཀམྨཾ ཝཙཱིཀམྨཾ མནོཀམྨཾ – ཨིམེ ཝུཙྩནྟི ‘‘ཨནུཔྤནྣཱ པཱཔཀཱ ཨཀུསལཱ དྷམྨཱ’’། ཨིཏི ཨིམེསཾ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
391. Kathañca bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati? Tattha katame anuppannā pāpakā akusalā dhammā? Tīṇi akusalamūlāni – lobho, doso, moho. Tadekaṭṭhā ca kilesā. Taṃsampayutto vedanākkhandho, saññākkhandho, saṅkhārakkhandho, viññāṇakkhandho, taṃsamuṭṭhānaṃ kāyakammaṃ vacīkammaṃ manokammaṃ – ime vuccanti ‘‘anuppannā pāpakā akusalā dhammā’’. Iti imesaṃ anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati.
༣༩༣. ཝཱཡམཏཱིཏི། ཏཏྠ ཀཏམོ ཝཱཡཱམོ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ – ཨཡཾ ཝུཙྩཏི ‘‘ཝཱཡཱམོ’’། ཨིམིནཱ ཝཱཡཱམེན ཨུཔེཏོ ཧོཏི སམུཔེཏོ ཨུཔཱགཏོ སམུཔཱགཏོ ཨུཔཔནྣོ སམྤནྣོ སམནྣཱགཏོ། ཏེན ཝུཙྩཏི ‘‘ཝཱཡམཏཱི’’ཏི།
393. Vāyamatīti. Tattha katamo vāyāmo? Yo cetasiko vīriyārambho…pe… sammāvāyāmo – ayaṃ vuccati ‘‘vāyāmo’’. Iminā vāyāmena upeto hoti samupeto upāgato samupāgato upapanno sampanno samannāgato. Tena vuccati ‘‘vāyamatī’’ti.
༣༩༤. ཝཱིརིཡཾ ཨཱརབྷཏཱིཏི། ཏཏྠ ཀཏམཾ ཝཱིརིཡཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ – ཨིདཾ ཝུཙྩཏི ‘‘ཝཱིརིཡཾ’’། ཨིམཾ ཝཱིརིཡཾ ཨཱརབྷཏི སམཱརབྷཏི ཨཱསེཝཏི བྷཱཝེཏི བཧུལཱིཀརོཏི། ཏེན ཝུཙྩཏི ‘‘ཝཱིརིཡཾ ཨཱརབྷཏཱི’’ཏི།
394. Vīriyaṃ ārabhatīti. Tattha katamaṃ vīriyaṃ? Yo cetasiko vīriyārambho…pe… sammāvāyāmo – idaṃ vuccati ‘‘vīriyaṃ’’. Imaṃ vīriyaṃ ārabhati samārabhati āsevati bhāveti bahulīkaroti. Tena vuccati ‘‘vīriyaṃ ārabhatī’’ti.
༣༩༥. ཙིཏྟཾ པགྒཎྷཱཏཱིཏི། ཏཏྠ ཀཏམཾ ཙིཏྟཾ? ཡཾ ཙིཏྟཾ མནོ མཱནསཾ…པེ॰… ཏཛྫཱམནོཝིཉྙཱཎདྷཱཏུ – ཨིདཾ ཝུཙྩཏི ‘‘ཙིཏྟཾ’’། ཨིམཾ ཙིཏྟཾ པགྒཎྷཱཏི སམྤགྒཎྷཱཏི ཨུཔཏྠམྦྷེཏི པཙྩུཔཏྠམྦྷེཏི། ཏེན ཝུཙྩཏི ‘‘ཙིཏྟཾ པགྒཎྷཱཏཱི’’ཏི།
395. Cittaṃ paggaṇhātīti. Tattha katamaṃ cittaṃ? Yaṃ cittaṃ mano mānasaṃ…pe… tajjāmanoviññāṇadhātu – idaṃ vuccati ‘‘cittaṃ’’. Imaṃ cittaṃ paggaṇhāti sampaggaṇhāti upatthambheti paccupatthambheti. Tena vuccati ‘‘cittaṃ paggaṇhātī’’ti.
༣༩༦. པདཧཏཱིཏི། ཏཏྠ ཀཏམཾ པདྷཱནཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ – ཨིདཾ ཝུཙྩཏི ‘‘པདྷཱནཾ’’། ཨིམིནཱ པདྷཱནེན ཨུཔེཏོ ཧོཏི…པེ॰… སམནྣཱགཏོ། ཏེན ཝུཙྩཏི ‘‘པདཧཏཱི’’ཏི།
396. Padahatīti. Tattha katamaṃ padhānaṃ? Yo cetasiko vīriyārambho…pe… sammāvāyāmo – idaṃ vuccati ‘‘padhānaṃ’’. Iminā padhānena upeto hoti…pe… samannāgato. Tena vuccati ‘‘padahatī’’ti.
༣༩༧. ཀཐཉྩ བྷིཀྑུ ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཏཏྠ ཀཏམེ ཨུཔྤནྣཱ པཱཔཀཱ ཨཀུསལཱ དྷམྨཱ? ཏཱིཎི ཨཀུསལམཱུལཱནི – ལོབྷོ, དོསོ, མོཧོ། ཏདེཀཊྛཱ ཙ ཀིལེསཱ། ཏཾསམྤཡུཏྟོ ཝེདནཱཀྑནྡྷོ, སཉྙཱཀྑནྡྷོ, སངྑཱརཀྑནྡྷོ, ཝིཉྙཱཎཀྑནྡྷོ, ཏཾསམུཊྛཱནཾ ཀཱཡཀམྨཾ ཝཙཱིཀམྨཾ མནོཀམྨཾ – ཨིམེ ཝུཙྩནྟི ‘‘ཨུཔྤནྣཱ པཱཔཀཱ ཨཀུསལཱ དྷམྨཱ’’། ཨིཏི ཨིམེསཾ ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
397. Kathañca bhikkhu uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati? Tattha katame uppannā pāpakā akusalā dhammā? Tīṇi akusalamūlāni – lobho, doso, moho. Tadekaṭṭhā ca kilesā. Taṃsampayutto vedanākkhandho, saññākkhandho, saṅkhārakkhandho, viññāṇakkhandho, taṃsamuṭṭhānaṃ kāyakammaṃ vacīkammaṃ manokammaṃ – ime vuccanti ‘‘uppannā pāpakā akusalā dhammā’’. Iti imesaṃ uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati.
༣༩༨. ཚནྡཾ ཛནེཏཱིཏི། ཏཏྠ ཀཏམོ ཚནྡོ? ཡོ ཚནྡོ ཚནྡིཀཏཱ ཀཏྟུཀམྱཏཱ ཀུསལོ དྷམྨཙྪནྡོ – ཨཡཾ ཝུཙྩཏི ‘‘ཚནྡོ’’། ཨིམཾ ཚནྡཾ ཛནེཏི སཉྫནེཏི ཨུཊྛཔེཏི སམུཊྛཔེཏི ནིབྦཏྟེཏི ཨབྷིནིབྦཏྟེཏི། ཏེན ཝུཙྩཏི ‘‘ཚནྡཾ ཛནེཏཱི’’ཏི།
398. Chandaṃ janetīti. Tattha katamo chando? Yo chando chandikatā kattukamyatā kusalo dhammacchando – ayaṃ vuccati ‘‘chando’’. Imaṃ chandaṃ janeti sañjaneti uṭṭhapeti samuṭṭhapeti nibbatteti abhinibbatteti. Tena vuccati ‘‘chandaṃ janetī’’ti.
༣༩༩. ཝཱཡམཏཱིཏི། ཏཏྠ ཀཏམོ ཝཱཡཱམོ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ – ཨཡཾ ཝུཙྩཏི ‘‘ཝཱཡཱམོ’’། ཨིམིནཱ ཝཱཡཱམེན ཨུཔེཏོ ཧོཏི…པེ॰… སམནྣཱགཏོ། ཏེན ཝུཙྩཏི ‘‘ཝཱཡམཏཱི’’ཏི།
399. Vāyamatīti. Tattha katamo vāyāmo? Yo cetasiko vīriyārambho…pe… sammāvāyāmo – ayaṃ vuccati ‘‘vāyāmo’’. Iminā vāyāmena upeto hoti…pe… samannāgato. Tena vuccati ‘‘vāyamatī’’ti.
༤༠༠. ཝཱིརིཡཾ ཨཱརབྷཏཱིཏི། ཏཏྠ ཀཏམཾ ཝཱིརིཡཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ – ཨིདཾ ཝུཙྩཏི ‘‘ཝཱིརིཡཾ’’། ཨིམཾ ཝཱིརིཡཾ ཨཱརབྷཏི སམཱརབྷཏི ཨཱསེཝཏི བྷཱཝེཏི བཧུལཱིཀརོཏི། ཏེན ཝུཙྩཏི ‘‘ཝཱིརིཡཾ ཨཱརབྷཏཱི’’ཏི།
400. Vīriyaṃ ārabhatīti. Tattha katamaṃ vīriyaṃ? Yo cetasiko vīriyārambho…pe… sammāvāyāmo – idaṃ vuccati ‘‘vīriyaṃ’’. Imaṃ vīriyaṃ ārabhati samārabhati āsevati bhāveti bahulīkaroti. Tena vuccati ‘‘vīriyaṃ ārabhatī’’ti.
༤༠༡. ཙིཏྟཾ པགྒཎྷཱཏཱིཏི། ཏཏྠ ཀཏམཾ ཙིཏྟཾ? ཡཾ ཙིཏྟཾ མནོ མཱནསཾ…པེ॰… ཏཛྫཱམནོཝིཉྙཱཎདྷཱཏུ – ཨིདཾ ཝུཙྩཏི ‘‘ཙིཏྟཾ’’། ཨིམཾ ཙིཏྟཾ པགྒཎྷཱཏི སམྤགྒཎྷཱཏི ཨུཔཏྠམྦྷེཏི པཙྩུཔཏྠམྦྷེཏི། ཏེན ཝུཙྩཏི ‘‘ཙིཏྟཾ པགྒཎྷཱཏཱི’’ཏི།
401. Cittaṃ paggaṇhātīti. Tattha katamaṃ cittaṃ? Yaṃ cittaṃ mano mānasaṃ…pe… tajjāmanoviññāṇadhātu – idaṃ vuccati ‘‘cittaṃ’’. Imaṃ cittaṃ paggaṇhāti sampaggaṇhāti upatthambheti paccupatthambheti. Tena vuccati ‘‘cittaṃ paggaṇhātī’’ti.
༤༠༢. པདཧཏཱིཏི། ཏཏྠ ཀཏམཾ པདྷཱནཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ – ཨིདཾ ཝུཙྩཏི ‘‘པདྷཱནཾ’’། ཨིམིནཱ པདྷཱནེན ཨུཔེཏོ ཧོཏི…པེ॰… སམནྣཱགཏོ། ཏེན ཝུཙྩཏི ‘‘པདཧཏཱི’’ཏི།
402. Padahatīti. Tattha katamaṃ padhānaṃ? Yo cetasiko vīriyārambho…pe… sammāvāyāmo – idaṃ vuccati ‘‘padhānaṃ’’. Iminā padhānena upeto hoti…pe… samannāgato. Tena vuccati ‘‘padahatī’’ti.
༤༠༣. ཀཐཉྩ བྷིཀྑུ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཏཏྠ ཀཏམེ ཨནུཔྤནྣཱ ཀུསལཱ དྷམྨཱ? ཏཱིཎི ཀུསལམཱུལཱནི – ཨལོབྷོ, ཨདོསོ, ཨམོཧོ། ཏཾསམྤཡུཏྟོ ཝེདནཱཀྑནྡྷོ, སཉྙཱཀྑནྡྷོ, སངྑཱརཀྑནྡྷོ, ཝིཉྙཱཎཀྑནྡྷོ། ཏཾསམུཊྛཱནཾ ཀཱཡཀམྨཾ, ཝཙཱིཀམྨཾ, མནོཀམྨཾ – ཨིམེ ཝུཙྩནྟི ‘‘ཨནུཔྤནྣཱ ཀུསལཱ དྷམྨཱ’’། ཨིཏི ཨིམེསཾ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
403. Kathañca bhikkhu anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati? Tattha katame anuppannā kusalā dhammā? Tīṇi kusalamūlāni – alobho, adoso, amoho. Taṃsampayutto vedanākkhandho, saññākkhandho, saṅkhārakkhandho, viññāṇakkhandho. Taṃsamuṭṭhānaṃ kāyakammaṃ, vacīkammaṃ, manokammaṃ – ime vuccanti ‘‘anuppannā kusalā dhammā’’. Iti imesaṃ anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati.
༤༠༤. ཚནྡཾ ཛནེཏཱིཏི…པེ॰… ཝཱཡམཏཱིཏི…པེ॰… ཝཱིརིཡཾ ཨཱརབྷཏཱིཏི…པེ॰… ཙིཏྟཾ པགྒཎྷཱཏཱིཏི…པེ॰… པདཧཏཱིཏི། ཏཏྠ ཀཏམཾ པདྷཱནཾ? ཡོ ཙེཏསིཀོ ཝཱིརིཡཱརམྦྷོ …པེ॰… སམྨཱཝཱཡཱམོ – ཨིདཾ ཝུཙྩཏི ‘‘པདྷཱནཾ’’། ཨིམིནཱ པདྷཱནེན ཨུཔེཏོ ཧོཏི…པེ॰… སམནྣཱགཏོ། ཏེན ཝུཙྩཏི ‘‘པདཧཏཱི’’ཏི།
404. Chandaṃ janetīti…pe… vāyamatīti…pe… vīriyaṃ ārabhatīti…pe… cittaṃ paggaṇhātīti…pe… padahatīti. Tattha katamaṃ padhānaṃ? Yo cetasiko vīriyārambho …pe… sammāvāyāmo – idaṃ vuccati ‘‘padhānaṃ’’. Iminā padhānena upeto hoti…pe… samannāgato. Tena vuccati ‘‘padahatī’’ti.
༤༠༥. ཀཐཉྩ བྷིཀྑུ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཏཏྠ ཀཏམེ ཨུཔྤནྣཱ ཀུསལཱ དྷམྨཱ? ཏཱིཎི ཀུསལམཱུལཱནི – ཨལོབྷོ, ཨདོསོ, ཨམོཧོ། ཏཾསམྤཡུཏྟོ ཝེདནཱཀྑནྡྷོ, སཉྙཱཀྑནྡྷོ, སངྑཱརཀྑནྡྷོ, ཝིཉྙཱཎཀྑནྡྷོ , ཏཾསམུཊྛཱནཾ ཀཱཡཀམྨཾ ཝཙཱིཀམྨཾ མནོཀམྨཾ – ཨིམེ ཝུཙྩནྟི ‘‘ཨུཔྤནྣཱ ཀུསལཱ དྷམྨཱ’’། ཨིཏི ཨིམེསཾ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
405. Kathañca bhikkhu uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati? Tattha katame uppannā kusalā dhammā? Tīṇi kusalamūlāni – alobho, adoso, amoho. Taṃsampayutto vedanākkhandho, saññākkhandho, saṅkhārakkhandho, viññāṇakkhandho , taṃsamuṭṭhānaṃ kāyakammaṃ vacīkammaṃ manokammaṃ – ime vuccanti ‘‘uppannā kusalā dhammā’’. Iti imesaṃ uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati.
༤༠༦. ཋིཏིཡཱཏི། ཡཱ ཋིཏི སོ ཨསམྨོསོ, ཡོ ཨསམྨོསོ སོ བྷིཡྻོབྷཱཝོ , ཡོ བྷིཡྻོབྷཱཝོ ཏཾ ཝེཔུལླཾ, ཡཾ ཝེཔུལླཾ སཱ བྷཱཝནཱ, ཡཱ བྷཱཝནཱ སཱ པཱརིཔཱུརཱི།
406. Ṭhitiyāti. Yā ṭhiti so asammoso, yo asammoso so bhiyyobhāvo , yo bhiyyobhāvo taṃ vepullaṃ, yaṃ vepullaṃ sā bhāvanā, yā bhāvanā sā pāripūrī.
༤༠༧. ཚནྡཾ ཛནེཏཱིཏི…པེ॰… ཝཱཡམཏཱིཏི…པེ॰… ཝཱིརིཡཾ ཨཱརབྷཏཱིཏི…པེ॰… ཙིཏྟཾ པགྒཎྷཱཏཱིཏི…པེ॰… པདཧཏཱིཏི། ཏཏྠ ཀཏམཾ པདྷཱནཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ – ཨིདཾ ཝུཙྩཏི ‘‘པདྷཱནཾ’’། ཨིམིནཱ པདྷཱནེན ཨུཔེཏོ ཧོཏི…པེ॰… སམནྣཱགཏོ། ཏེན ཝུཙྩཏི ‘‘པདཧཏཱི’’ཏི།
407. Chandaṃ janetīti…pe… vāyamatīti…pe… vīriyaṃ ārabhatīti…pe… cittaṃ paggaṇhātīti…pe… padahatīti. Tattha katamaṃ padhānaṃ? Yo cetasiko vīriyārambho…pe… sammāvāyāmo – idaṃ vuccati ‘‘padhānaṃ’’. Iminā padhānena upeto hoti…pe… samannāgato. Tena vuccati ‘‘padahatī’’ti.
སུཏྟནྟབྷཱཛནཱིཡཾ།
Suttantabhājanīyaṃ.
༢. ཨབྷིདྷམྨབྷཱཛནཱིཡཾ
2. Abhidhammabhājanīyaṃ
༤༠༨. ཙཏྟཱརོ སམྨཔྤདྷཱནཱ – ཨིདྷ བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
408. Cattāro sammappadhānā – idha bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati, uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati, anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati, uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati.
༤༠༩. ཀཐཉྩ བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
409. Kathañca bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati.
༤༡༠. ཚནྡཾ ཛནེཏཱིཏི། ཏཏྠ ཀཏམོ ཚནྡོ? ཡོ ཚནྡོ ཚནྡིཀཏཱ ཀཏྟུཀམྱཏཱ ཀུསལོ དྷམྨཙྪནྡོ – ཨཡཾ ཝུཙྩཏི ‘‘ཚནྡོ’’། ཨིམཾ ཚནྡཾ ཛནེཏི སཉྫནེཏི ཨུཊྛཔེཏི སམུཊྛཔེཏི ནིབྦཏྟེཏི ཨབྷིནིབྦཏྟེཏི། ཏེན ཝུཙྩཏི ‘‘ཚནྡཾ ཛནེཏཱི’’ཏི།
410. Chandaṃ janetīti. Tattha katamo chando? Yo chando chandikatā kattukamyatā kusalo dhammacchando – ayaṃ vuccati ‘‘chando’’. Imaṃ chandaṃ janeti sañjaneti uṭṭhapeti samuṭṭhapeti nibbatteti abhinibbatteti. Tena vuccati ‘‘chandaṃ janetī’’ti.
༤༡༡. ཝཱཡམཏཱིཏི། ཏཏྠ ཀཏམོ ཝཱཡཱམོ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘ཝཱཡཱམོ’’། ཨིམིནཱ ཝཱཡཱམེན ཨུཔེཏོ ཧོཏི སམུཔེཏོ ཨུཔཱགཏོ སམུཔཱགཏོ ཨུཔཔནྣོ སམྤནྣོ སམནྣཱགཏོ། ཏེན ཝུཙྩཏི ‘‘ཝཱཡམཏཱི’’ཏི།
411. Vāyamatīti. Tattha katamo vāyāmo? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – ayaṃ vuccati ‘‘vāyāmo’’. Iminā vāyāmena upeto hoti samupeto upāgato samupāgato upapanno sampanno samannāgato. Tena vuccati ‘‘vāyamatī’’ti.
༤༡༢. ཝཱིརིཡཾ ཨཱརབྷཏཱིཏི། ཏཏྠ ཀཏམཾ ཝཱིརིཡཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨིདཾ ཝུཙྩཏི ‘‘ཝཱིརིཡཾ’’། ཨིམཾ ཝཱིརིཡཾ ཨཱརབྷཏི སམཱརབྷཏི ཨཱསེཝཏི བྷཱཝེཏི བཧུལཱིཀརོཏི། ཏེན ཝུཙྩཏི ‘‘ཝཱིརིཡཾ ཨཱརབྷཏཱི’’ཏི།
412. Vīriyaṃ ārabhatīti. Tattha katamaṃ vīriyaṃ? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – idaṃ vuccati ‘‘vīriyaṃ’’. Imaṃ vīriyaṃ ārabhati samārabhati āsevati bhāveti bahulīkaroti. Tena vuccati ‘‘vīriyaṃ ārabhatī’’ti.
༤༡༣. ཙིཏྟཾ པགྒཎྷཱཏཱིཏི། ཏཏྠ ཀཏམཾ ཙིཏྟཾ? ཡཾ ཙིཏྟཾ མནོ མཱནསཾ…པེ॰… ཏཛྫཱམནོཝིཉྙཱཎདྷཱཏུ – ཨིདཾ ཝུཙྩཏི ‘‘ཙིཏྟཾ’’། ཨིམཾ ཙིཏྟཾ པགྒཎྷཱཏི སམྤགྒཎྷཱཏི ཨུཔཏྠམྦྷེཏི པཙྩུཔཏྠམྦྷེཏི། ཏེན ཝུཙྩཏི ‘‘ཙིཏྟཾ པགྒཎྷཱཏཱི’’ཏི།
413. Cittaṃ paggaṇhātīti. Tattha katamaṃ cittaṃ? Yaṃ cittaṃ mano mānasaṃ…pe… tajjāmanoviññāṇadhātu – idaṃ vuccati ‘‘cittaṃ’’. Imaṃ cittaṃ paggaṇhāti sampaggaṇhāti upatthambheti paccupatthambheti. Tena vuccati ‘‘cittaṃ paggaṇhātī’’ti.
༤༡༤. པདཧཏཱིཏི། ཏཏྠ ཀཏམཾ སམྨཔྤདྷཱནཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨིདཾ ཝུཙྩཏི ‘‘སམྨཔྤདྷཱནཾ’’། ཨཝསེསཱ དྷམྨཱ སམྨཔྤདྷཱནསམྤཡུཏྟཱ།
414. Padahatīti. Tattha katamaṃ sammappadhānaṃ? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – idaṃ vuccati ‘‘sammappadhānaṃ’’. Avasesā dhammā sammappadhānasampayuttā.
༤༡༥. ཀཐཉྩ བྷིཀྑུ ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
415. Kathañca bhikkhu uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati.
༤༡༦. ཚནྡཾ ཛནེཏཱིཏི…པེ॰… ཝཱཡམཏཱིཏི…པེ॰… ཝཱིརིཡཾ ཨཱརབྷཏཱིཏི…པེ॰… ཙིཏྟཾ པགྒཎྷཱཏཱིཏི…པེ॰… པདཧཏཱིཏི། ཏཏྠ ཀཏམཾ སམྨཔྤདྷཱནཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨིདཾ ཝུཙྩཏི ‘‘སམྨཔྤདྷཱནཾ’’། ཨཝསེསཱ དྷམྨཱ སམྨཔྤདྷཱནསམྤཡུཏྟཱ།
416. Chandaṃ janetīti…pe… vāyamatīti…pe… vīriyaṃ ārabhatīti…pe… cittaṃ paggaṇhātīti…pe… padahatīti. Tattha katamaṃ sammappadhānaṃ? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – idaṃ vuccati ‘‘sammappadhānaṃ’’. Avasesā dhammā sammappadhānasampayuttā.
༤༡༧. ཀཐཉྩ བྷིཀྑུ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
417. Kathañca bhikkhu anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati.
༤༡༨. ཚནྡཾ ཛནེཏཱིཏི…པེ॰… ཝཱཡམཏཱིཏི…པེ॰… ཝཱིརིཡཾ ཨཱརབྷཏཱིཏི…པེ॰… ཙིཏྟཾ པགྒཎྷཱཏཱིཏི…པེ॰… པདཧཏཱིཏི། ཏཏྠ ཀཏམཾ སམྨཔྤདྷཱནཾ? ཡོ ཙེཏསིཀོ ཝཱིརིཡཱརམྦྷོ …པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨིདཾ ཝུཙྩཏི ‘‘སམྨཔྤདྷཱནཾ’’། ཨཝསེསཱ དྷམྨཱ སམྨཔྤདྷཱནསམྤཡུཏྟཱ།
418. Chandaṃ janetīti…pe… vāyamatīti…pe… vīriyaṃ ārabhatīti…pe… cittaṃ paggaṇhātīti…pe… padahatīti. Tattha katamaṃ sammappadhānaṃ? Yo cetasiko vīriyārambho …pe… sammāvāyāmo vīriyasambojjhaṅgo maggaṅgaṃ maggapariyāpannaṃ – idaṃ vuccati ‘‘sammappadhānaṃ’’. Avasesā dhammā sammappadhānasampayuttā.
༤༡༩. ཀཐཉྩ བྷིཀྑུ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཏསྨིཾ སམཡེ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
419. Kathañca bhikkhu uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati.
༤༢༠. ཋིཏིཡཱཏི ། ཡཱ ཋིཏི སོ ཨསམྨོསོ, ཡོ ཨསམྨོསོ སོ བྷིཡྻོབྷཱཝོ, ཡོ བྷིཡྻོབྷཱཝོ ཏཾ ཝེཔུལླཾ, ཡཾ ཝེཔུལླཾ སཱ བྷཱཝནཱ, ཡཱ བྷཱཝནཱ སཱ པཱརིཔཱུརཱི།
420. Ṭhitiyāti . Yā ṭhiti so asammoso, yo asammoso so bhiyyobhāvo, yo bhiyyobhāvo taṃ vepullaṃ, yaṃ vepullaṃ sā bhāvanā, yā bhāvanā sā pāripūrī.
༤༢༡. ཚནྡཾ ཛནེཏཱིཏི། ཏཏྠ ཀཏམོ ཚནྡོ? ཡོ ཚནྡོ ཚནྡིཀཏཱ ཀཏྟུཀམྱཏཱ ཀུསལོ དྷམྨཙྪནྡོ – ཨཡཾ ཝུཙྩཏི ‘‘ཚནྡོ’’། ཨིམཾ ཚནྡཾ ཛནེཏི སཉྫནེཏི ཨུཊྛཔེཏི སམུཊྛཔེཏི ནིབྦཏྟེཏི ཨབྷིནིབྦཏྟེཏི། ཏེན ཝུཙྩཏི ‘‘ཚནྡཾ ཛནེཏཱི’’ཏི།
421. Chandaṃ janetīti. Tattha katamo chando? Yo chando chandikatā kattukamyatā kusalo dhammacchando – ayaṃ vuccati ‘‘chando’’. Imaṃ chandaṃ janeti sañjaneti uṭṭhapeti samuṭṭhapeti nibbatteti abhinibbatteti. Tena vuccati ‘‘chandaṃ janetī’’ti.
༤༢༢. ཝཱཡམཏཱིཏི། ཏཏྠ ཀཏམོ ཝཱཡཱམོ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨཡཾ ཝུཙྩཏི ‘‘ཝཱཡཱམོ’’། ཨིམིནཱ ཝཱཡཱམེན ཨུཔེཏོ ཧོཏི…པེ॰… སམནྣཱགཏོ། ཏེན ཝུཙྩཏི ‘‘ཝཱཡམཏཱི’’ཏི།
422. Vāyamatīti. Tattha katamo vāyāmo? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – ayaṃ vuccati ‘‘vāyāmo’’. Iminā vāyāmena upeto hoti…pe… samannāgato. Tena vuccati ‘‘vāyamatī’’ti.
༤༢༣. ཝཱིརིཡཾ ཨཱརབྷཏཱིཏི། ཏཏྠ ཀཏམཾ ཝཱིརིཡཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨིདཾ ཝུཙྩཏི ‘‘ཝཱིརིཡཾ’’། ཨིམཾ ཝཱིརིཡཾ ཨཱརབྷཏི སམཱརབྷཏི ཨཱསེཝཏི བྷཱཝེཏི བཧུལཱིཀརོཏི། ཏེན ཝུཙྩཏི ‘‘ཝཱིརིཡཾ ཨཱརབྷཏཱི’’ཏི།
423. Vīriyaṃ ārabhatīti. Tattha katamaṃ vīriyaṃ? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – idaṃ vuccati ‘‘vīriyaṃ’’. Imaṃ vīriyaṃ ārabhati samārabhati āsevati bhāveti bahulīkaroti. Tena vuccati ‘‘vīriyaṃ ārabhatī’’ti.
༤༢༤. ཙིཏྟཾ པགྒཎྷཱཏཱིཏི། ཏཏྠ ཀཏམཾ ཙིཏྟཾ? ཡཾ ཙིཏྟཾ མནོ མཱནསཾ…པེ॰… ཏཛྫཱམནོཝིཉྙཱཎདྷཱཏུ – ཨིདཾ ཝུཙྩཏི ‘‘ཙིཏྟཾ’’། ཨིམཾ ཙིཏྟཾ པགྒཎྷཱཏི སམྤགྒཎྷཱཏི ཨུཔཏྠམྦྷེཏི པཙྩུཔཏྠམྦྷེཏི། ཏེན ཝུཙྩཏི ‘‘ཙིཏྟཾ པགྒཎྷཱཏཱི’’ཏི།
424. Cittaṃ paggaṇhātīti. Tattha katamaṃ cittaṃ? Yaṃ cittaṃ mano mānasaṃ…pe… tajjāmanoviññāṇadhātu – idaṃ vuccati ‘‘cittaṃ’’. Imaṃ cittaṃ paggaṇhāti sampaggaṇhāti upatthambheti paccupatthambheti. Tena vuccati ‘‘cittaṃ paggaṇhātī’’ti.
༤༢༥. པདཧཏཱིཏི། ཏཏྠ ཀཏམཾ སམྨཔྤདྷཱནཾ? ཡོ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨིདཾ ཝུཙྩཏི ‘‘སམྨཔྤདྷཱནཾ’’། ཨཝསེསཱ དྷམྨཱ སམྨཔྤདྷཱནསམྤཡུཏྟཱ།
425. Padahatīti. Tattha katamaṃ sammappadhānaṃ? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – idaṃ vuccati ‘‘sammappadhānaṃ’’. Avasesā dhammā sammappadhānasampayuttā.
༤༢༦. ཏཏྠ ཀཏམཾ སམྨཔྤདྷཱནཾ? ཨིདྷ བྷིཀྑུ ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི དུཀྑཔཊིཔདཾ དནྡྷཱབྷིཉྙཾ, ཡོ ཏསྨིཾ སམཡེ ཙེཏསིཀོ ཝཱིརིཡཱརམྦྷོ…པེ॰… སམྨཱཝཱཡཱམོ ཝཱིརིཡསམྦོཛ྄ཛྷངྒོ མགྒངྒཾ མགྒཔརིཡཱཔནྣཾ – ཨིདཾ ཝུཙྩཏི ‘‘སམྨཔྤདྷཱནཾ’’། ཨཝསེསཱ དྷམྨཱ སམྨཔྤདྷཱནསམྤཡུཏྟཱ།
426. Tattha katamaṃ sammappadhānaṃ? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, yo tasmiṃ samaye cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – idaṃ vuccati ‘‘sammappadhānaṃ’’. Avasesā dhammā sammappadhānasampayuttā.
ཨབྷིདྷམྨབྷཱཛནཱིཡཾ།
Abhidhammabhājanīyaṃ.
༣. པཉྷཱཔུཙྪཀཾ
3. Pañhāpucchakaṃ
༤༢༧. ཙཏྟཱརོ སམྨཔྤདྷཱནཱ – ཨིདྷ བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི, ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ…པེ॰… ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ…པེ॰… ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།
427. Cattāro sammappadhānā – idha bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati, uppannānaṃ pāpakānaṃ akusalānaṃ dhammānaṃ pahānāya…pe… anuppannānaṃ kusalānaṃ dhammānaṃ uppādāya…pe… uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati.
༤༢༨. ཙཏུནྣཾ སམྨཔྤདྷཱནཱནཾ ཀཏི ཀུསལཱ, ཀཏི ཨཀུསལཱ, ཀཏི ཨབྱཱཀཏཱ…པེ॰… ཀཏི སརཎཱ, ཀཏི ཨརཎཱ?
428. Catunnaṃ sammappadhānānaṃ kati kusalā, kati akusalā, kati abyākatā…pe… kati saraṇā, kati araṇā?
༡. ཏིཀཾ
1. Tikaṃ
༤༢༩. ཀུསལཱཡེཝ ། སིཡཱ སུཁཱཡ ཝེདནཱཡ སམྤཡུཏྟཱ, སིཡཱ ཨདུཀྑམསུཁཱཡ ཝེདནཱཡ སམྤཡུཏྟཱ། ཝིཔཱཀདྷམྨདྷམྨཱ ། ཨནུཔཱདིནྣཨནུཔཱདཱནིཡཱ། ཨསཾཀིལིཊྛཨསཾཀིལེསིཀཱ། སིཡཱ སཝིཏཀྐསཝིཙཱརཱ, སིཡཱ ཨཝིཏཀྐཝིཙཱརམཏྟཱ, སིཡཱ ཨཝིཏཀྐཨཝིཙཱརཱ། སིཡཱ པཱིཏིསཧགཏཱ, སིཡཱ སུཁསཧགཏཱ, སིཡཱ ཨུཔེཀྑཱསཧགཏཱ། ནེཝ དསྶནེན ན བྷཱཝནཱཡ པཧཱཏབྦཱ། ནེཝ དསྶནེན ན བྷཱཝནཱཡ པཧཱཏབྦཧེཏུཀཱ། ཨཔཙཡགཱམིནོ། སེཀྑཱ། ཨཔྤམཱཎཱ། ཨཔྤམཱཎཱརམྨཎཱ། པཎཱིཏཱ། སམྨཏྟནིཡཏཱ། ན མགྒཱརམྨཎཱ། མགྒཧེཏུཀཱ། སིཡཱ མགྒཱདྷིཔཏིནོ, སིཡཱ ན ཝཏྟབྦཱ མགྒཱདྷིཔཏིནོཏི། སིཡཱ ཨུཔྤནྣཱ, སིཡཱ ཨནུཔྤནྣཱ, ན ཝཏྟབྦཱ ཨུཔྤཱདིནོཏི། སིཡཱ ཨཏཱིཏཱ, སིཡཱ ཨནཱགཏཱ, སིཡཱ པཙྩུཔྤནྣཱ། ན ཝཏྟབྦཱ ཨཏཱིཏཱརམྨཎཱཏིཔི, ཨནཱགཏཱརམྨཎཱཏིཔི, པཙྩུཔྤནྣཱརམྨཎཱཏིཔི། སིཡཱ ཨཛ྄ཛྷཏྟཱ, སིཡཱ བཧིདྡྷཱ, སིཡཱ ཨཛ྄ཛྷཏྟབཧིདྡྷཱ། བཧིདྡྷཱརམྨཎཱ། ཨནིདསྶནཨཔྤཊིགྷཱ།
429. Kusalāyeva . Siyā sukhāya vedanāya sampayuttā, siyā adukkhamasukhāya vedanāya sampayuttā. Vipākadhammadhammā . Anupādinnaanupādāniyā. Asaṃkiliṭṭhaasaṃkilesikā. Siyā savitakkasavicārā, siyā avitakkavicāramattā, siyā avitakkaavicārā. Siyā pītisahagatā, siyā sukhasahagatā, siyā upekkhāsahagatā. Neva dassanena na bhāvanāya pahātabbā. Neva dassanena na bhāvanāya pahātabbahetukā. Apacayagāmino. Sekkhā. Appamāṇā. Appamāṇārammaṇā. Paṇītā. Sammattaniyatā. Na maggārammaṇā. Maggahetukā. Siyā maggādhipatino, siyā na vattabbā maggādhipatinoti. Siyā uppannā, siyā anuppannā, na vattabbā uppādinoti. Siyā atītā, siyā anāgatā, siyā paccuppannā. Na vattabbā atītārammaṇātipi, anāgatārammaṇātipi, paccuppannārammaṇātipi. Siyā ajjhattā, siyā bahiddhā, siyā ajjhattabahiddhā. Bahiddhārammaṇā. Anidassanaappaṭighā.
༢. དུཀཾ
2. Dukaṃ
༤༣༠. ན ཧེཏཱུ། སཧེཏུཀཱ། ཧེཏུསམྤཡུཏྟཱ། ན ཝཏྟབྦཱ ཧེཏཱུ ཙེཝ སཧེཏུཀཱ ཙཱཏི, སཧེཏུཀཱ ཙེཝ ན ཙ ཧེཏཱུ། ན ཝཏྟབྦཱ ཧེཏཱུ ཙེཝ ཧེཏུསམྤཡུཏྟཱ ཙཱཏི, ཧེཏུསམྤཡུཏྟཱ ཙེཝ ན ཙ ཧེཏཱུ། ན ཧེཏཱུ སཧེཏུཀཱ། སཔྤཙྩཡཱ། སངྑཏཱ། ཨནིདསྶནཱ། ཨཔྤཊིགྷཱ། ཨརཱུཔཱ ། ལོཀུཏྟརཱ། ཀེནཙི ཝིཉྙེཡྻཱ, ཀེནཙི ན ཝིཉྙེཡྻཱ། ནོ ཨཱསཝཱ། ཨནཱསཝཱ། ཨཱསཝཝིཔྤཡུཏྟཱ། ན ཝཏྟབྦཱ ཨཱསཝཱ ཙེཝ སཱསཝཱ ཙཱཏིཔི, སཱསཝཱ ཙེཝ ནོ ཙ ཨཱསཝཱཏིཔི། ན ཝཏྟབྦཱ ཨཱསཝཱ ཙེཝ ཨཱསཝསམྤཡུཏྟཱ ཙཱཏིཔི, ཨཱསཝསམྤཡུཏྟཱ ཙེཝ ནོ ཙ ཨཱསཝཱཏིཔི། ཨཱསཝཝིཔྤཡུཏྟཱ། ཨནཱསཝཱ། ནོ སཾཡོཛནཱ…པེ॰… ནོ གནྠཱ…པེ॰… ནོ ཨོགྷཱ…པེ॰… ནོ ཡོགཱ…པེ॰… ནོ ནཱིཝརཎཱ…པེ॰… ནོ པརཱམཱསཱ…པེ॰… སཱརམྨཎཱ། ནོ ཙིཏྟཱ། ཙེཏསིཀཱ། ཙིཏྟསམྤཡུཏྟཱ། ཙིཏྟསཾསཊྛཱ། ཙིཏྟསམུཊྛཱནཱ། ཙིཏྟསཧབྷུནོ། ཙིཏྟཱནུཔརིཝཏྟིནོ། ཙིཏྟསཾསཊྛསམུཊྛཱནཱ། ཙིཏྟསཾསཊྛསམུཊྛཱནསཧབྷུནོ། ཙིཏྟསཾསཊྛསམུཊྛཱནཱནུཔརིཝཏྟིནོ། བཱཧིརཱ། ནོ ཨུཔཱདཱ། ཨནུཔཱདིནྣཱ། ནོ ཨུཔཱདཱནཱ…པེ॰… ནོ ཀིལེསཱ…པེ॰… ན དསྶནེན པཧཱཏབྦཱ། ན བྷཱཝནཱཡ པཧཱཏབྦཱ། ན དསྶནེན པཧཱཏབྦཧེཏུཀཱ། ན བྷཱཝནཱཡ པཧཱཏབྦཧེཏུཀཱ། སིཡཱ སཝིཏཀྐཱ, སིཡཱ ཨཝིཏཀྐཱ ། སིཡཱ སཝིཙཱརཱ, སིཡཱ ཨཝིཙཱརཱ། སིཡཱ སཔྤཱིཏིཀཱ, སིཡཱ ཨཔྤཱིཏིཀཱ། སིཡཱ པཱིཏིསཧགཏཱ, སིཡཱ ན པཱིཏིསཧགཏཱ། སིཡཱ སུཁསཧགཏཱ, སིཡཱ ན སུཁསཧགཏཱ། སིཡཱ ཨུཔེཀྑཱསཧགཏཱ, སིཡཱ ན ཨུཔེཀྑཱསཧགཏཱ། ན ཀཱམཱཝཙརཱ། ན རཱུཔཱཝཙརཱ། ན ཨརཱུཔཱཝཙརཱ། ཨཔརིཡཱཔནྣཱ། ནིཡྻཱནིཀཱ། ནིཡཏཱ། ཨནུཏྟརཱ། ཨརཎཱཏི།
430. Na hetū. Sahetukā. Hetusampayuttā. Na vattabbā hetū ceva sahetukā cāti, sahetukā ceva na ca hetū. Na vattabbā hetū ceva hetusampayuttā cāti, hetusampayuttā ceva na ca hetū. Na hetū sahetukā. Sappaccayā. Saṅkhatā. Anidassanā. Appaṭighā. Arūpā . Lokuttarā. Kenaci viññeyyā, kenaci na viññeyyā. No āsavā. Anāsavā. Āsavavippayuttā. Na vattabbā āsavā ceva sāsavā cātipi, sāsavā ceva no ca āsavātipi. Na vattabbā āsavā ceva āsavasampayuttā cātipi, āsavasampayuttā ceva no ca āsavātipi. Āsavavippayuttā. Anāsavā. No saṃyojanā…pe… no ganthā…pe… no oghā…pe… no yogā…pe… no nīvaraṇā…pe… no parāmāsā…pe… sārammaṇā. No cittā. Cetasikā. Cittasampayuttā. Cittasaṃsaṭṭhā. Cittasamuṭṭhānā. Cittasahabhuno. Cittānuparivattino. Cittasaṃsaṭṭhasamuṭṭhānā. Cittasaṃsaṭṭhasamuṭṭhānasahabhuno. Cittasaṃsaṭṭhasamuṭṭhānānuparivattino. Bāhirā. No upādā. Anupādinnā. No upādānā…pe… no kilesā…pe… na dassanena pahātabbā. Na bhāvanāya pahātabbā. Na dassanena pahātabbahetukā. Na bhāvanāya pahātabbahetukā. Siyā savitakkā, siyā avitakkā . Siyā savicārā, siyā avicārā. Siyā sappītikā, siyā appītikā. Siyā pītisahagatā, siyā na pītisahagatā. Siyā sukhasahagatā, siyā na sukhasahagatā. Siyā upekkhāsahagatā, siyā na upekkhāsahagatā. Na kāmāvacarā. Na rūpāvacarā. Na arūpāvacarā. Apariyāpannā. Niyyānikā. Niyatā. Anuttarā. Araṇāti.
པཉྷཱཔུཙྪཀཾ།
Pañhāpucchakaṃ.
སམྨཔྤདྷཱནཝིབྷངྒོ ནིཊྛིཏོ།
Sammappadhānavibhaṅgo niṭṭhito.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / སམྨོཧཝིནོདནཱི-ཨཊྛཀཐཱ • Sammohavinodanī-aṭṭhakathā
༡. སུཏྟནྟབྷཱཛནཱིཡཝཎྞནཱ • 1. Suttantabhājanīyavaṇṇanā
༢. ཨབྷིདྷམྨབྷཱཛནཱིཡཝཎྞནཱ • 2. Abhidhammabhājanīyavaṇṇanā
༣. པཉྷཱཔུཙྪཀཝཎྞནཱ • 3. Pañhāpucchakavaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / ཝིབྷངྒ-མཱུལཊཱིཀཱ • Vibhaṅga-mūlaṭīkā / ༨. སམྨཔྤདྷཱནཝིབྷངྒོ • 8. Sammappadhānavibhaṅgo
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / ཝིབྷངྒ-ཨནུཊཱིཀཱ • Vibhaṅga-anuṭīkā / ༨. སམྨཔྤདྷཱནཝིབྷངྒོ • 8. Sammappadhānavibhaṅgo
