| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៦. សម្មាសម្ពុទ្ធសុត្តវណ្ណនា
6. Sammāsambuddhasuttavaṇṇanā
៥៨. អធិកំ សវិសេសំ បយសតិ បយុញ្ជតិ ឯតេនាតិ អធិប្បយាសោ, វិសិដ្ឋបយោគោ។ តេនាហ ‘‘អធិកបយោគោ’’តិ។ ឥមញ្ហិ មគ្គន្តិ អដ្ឋង្គិកំ អរិយមគ្គមាហ។ ឥធាតិ ឥមស្មិំ សុត្តេ។ អវត្តមានដ្ឋេនាតិ ពុទ្ធុប្បាទតោ បុព្ពេ ន វត្តមានភាវេន។ មគ្គំ ជានាតីតិ សមុទាគមតោ បដ្ឋាយ សបុព្ពភាគំ សសម្ភារវិសយំ សផលំ សឧទ្រយំ អរិយំ មគ្គំ ជានាតិ អវពុជ្ឈតីតិ មគ្គញ្ញូ។ វិទិតន្តិ អញ្ញេសម្បិ ញាតំ បដិលទ្ធំ ហត្ថតលេ អាមលកំ វិយ បាកដំ អកាសិ, តថា កត្វា ទេសេសិ។ អមគ្គេ បរិវជ្ជនេន មគ្គេ បដិបត្តីតិ តស្ស មគ្គកុសលតា វិយ អមគ្គកុសលតាបិ ឥច្ឆិតព្ពាតិ អាហ ‘‘មគ្គេ ច អមគ្គេ ច កោវិទោ’’តិ។ អហំ បឋមំ គតោតិ អហំ បឋមមគ្គេន សមន្នាគតោ។
58. Adhikaṃ savisesaṃ payasati payuñjati etenāti adhippayāso, visiṭṭhapayogo. Tenāha ‘‘adhikapayogo’’ti. Imañhi magganti aṭṭhaṅgikaṃ ariyamaggamāha. Idhāti imasmiṃ sutte. Avattamānaṭṭhenāti buddhuppādato pubbe na vattamānabhāvena. Maggaṃ jānātīti samudāgamato paṭṭhāya sapubbabhāgaṃ sasambhāravisayaṃ saphalaṃ saudrayaṃ ariyaṃ maggaṃ jānāti avabujjhatīti maggaññū. Viditanti aññesampi ñātaṃ paṭiladdhaṃ hatthatale āmalakaṃ viya pākaṭaṃ akāsi, tathā katvā desesi. Amagge parivajjanena magge paṭipattīti tassa maggakusalatā viya amaggakusalatāpi icchitabbāti āha ‘‘magge ca amagge ca kovido’’ti. Ahaṃ paṭhamaṃ gatoti ahaṃ paṭhamamaggena samannāgato.
សម្មាសម្ពុទ្ធសុត្តវណ្ណនា និដ្ឋិតា។
Sammāsambuddhasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៦. សម្មាសម្ពុទ្ធសុត្តំ • 6. Sammāsambuddhasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. សម្មាសម្ពុទ្ធសុត្តវណ្ណនា • 6. Sammāsambuddhasuttavaṇṇanā
