| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. ஸம்மஸஸுத்தங்
6. Sammasasuttaṃ
66. ஏவங் மே ஸுதங் – ஏகங் ஸமயங் ப⁴க³வா குரூஸு விஹரதி கம்மாஸத⁴ம்மங் நாம குரூனங் நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘ஸம்மஸத² நோ தும்ஹே, பி⁴க்க²வே, அந்தரங் ஸம்மஸ’’ந்தி 1. ஏவங் வுத்தே, அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘அஹங் கோ², ப⁴ந்தே, ஸம்மஸாமி அந்தரங் ஸம்மஸ’’ந்தி. ‘‘யதா² கத²ங் பன த்வங், பி⁴க்கு², ஸம்மஸஸி அந்தரங் ஸம்மஸ’’ந்தி? அத² கோ² ஸோ பி⁴க்கு² ப்³யாகாஸி. யதா² ஸோ பி⁴க்கு² ப்³யாகாஸி ந ஸோ பி⁴க்கு² ப⁴க³வதோ சித்தங் ஆராதே⁴ஸி.
66. Evaṃ me sutaṃ – ekaṃ samayaṃ bhagavā kurūsu viharati kammāsadhammaṃ nāma kurūnaṃ nigamo. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘sammasatha no tumhe, bhikkhave, antaraṃ sammasa’’nti 2. Evaṃ vutte, aññataro bhikkhu bhagavantaṃ etadavoca – ‘‘ahaṃ kho, bhante, sammasāmi antaraṃ sammasa’’nti. ‘‘Yathā kathaṃ pana tvaṃ, bhikkhu, sammasasi antaraṃ sammasa’’nti? Atha kho so bhikkhu byākāsi. Yathā so bhikkhu byākāsi na so bhikkhu bhagavato cittaṃ ārādhesi.
ஏவங் வுத்தே, ஆயஸ்மா ஆனந்தோ³ ப⁴க³வந்தங் ஏதத³வோச – ‘‘ஏதஸ்ஸ, ப⁴க³வா, காலோ; ஏதஸ்ஸ, ஸுக³த, காலோ; யங் ப⁴க³வா அந்தரங் ஸம்மஸங் பா⁴ஸெய்ய. ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘தேனஹானந்த³, ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
Evaṃ vutte, āyasmā ānando bhagavantaṃ etadavoca – ‘‘etassa, bhagavā, kālo; etassa, sugata, kālo; yaṃ bhagavā antaraṃ sammasaṃ bhāseyya. Bhagavato sutvā bhikkhū dhāressantī’’ti. ‘‘Tenahānanda, suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘இத⁴ , பி⁴க்க²வே, பி⁴க்கு² ஸம்மஸமானோ ஸம்மஸதி அந்தரங் ஸம்மஸங் 3 – ‘யங் கோ² இத³ங் அனேகவித⁴ங் நானப்பகாரகங் து³க்க²ங் லோகே உப்பஜ்ஜதி ஜராமரணங். இத³ங் கோ² து³க்க²ங் கிங்னிதா³னங் கிங்ஸமுத³யங் கிங்ஜாதிகங் கிங்பப⁴வங், கிஸ்மிங் ஸதி ஜராமரணங் ஹோதி, கிஸ்மிங் அஸதி ஜராமரணங் ந ஹோதீ’தி? ஸோ ஸம்மஸமானோ ஏவங் ஜானாதி – ‘யங் கோ² இத³ங் அனேகவித⁴ங் நானப்பகாரகங் து³க்க²ங் லோகே உப்பஜ்ஜதி ஜராமரணங். இத³ங் கோ² து³க்க²ங் உபதி⁴னிதா³னங் உபதி⁴ஸமுத³யங் உபதி⁴ஜாதிகங் உபதி⁴பப⁴வங், உபதி⁴ஸ்மிங் ஸதி ஜராமரணங் ஹோதி, உபதி⁴ஸ்மிங் அஸதி ஜராமரணங் ந ஹோதீ’தி. ஸோ ஜராமரணஞ்ச பஜானாதி ஜராமரணஸமுத³யஞ்ச பஜானாதி ஜராமரணனிரோத⁴ஞ்ச பஜானாதி யா ச ஜராமரணனிரோத⁴ஸாருப்பகா³மினீ படிபதா³ தஞ்ச பஜானாதி. ததா²படிபன்னோ ச ஹோதி அனுத⁴ம்மசாரீ. அயங் வுச்சதி, பி⁴க்க²வே, பி⁴க்கு² ஸப்³ப³ஸோ ஸம்மா து³க்க²க்க²யாய படிபன்னோ ஜராமரணனிரோதா⁴ய.
‘‘Idha , bhikkhave, bhikkhu sammasamāno sammasati antaraṃ sammasaṃ 4 – ‘yaṃ kho idaṃ anekavidhaṃ nānappakārakaṃ dukkhaṃ loke uppajjati jarāmaraṇaṃ. Idaṃ kho dukkhaṃ kiṃnidānaṃ kiṃsamudayaṃ kiṃjātikaṃ kiṃpabhavaṃ, kismiṃ sati jarāmaraṇaṃ hoti, kismiṃ asati jarāmaraṇaṃ na hotī’ti? So sammasamāno evaṃ jānāti – ‘yaṃ kho idaṃ anekavidhaṃ nānappakārakaṃ dukkhaṃ loke uppajjati jarāmaraṇaṃ. Idaṃ kho dukkhaṃ upadhinidānaṃ upadhisamudayaṃ upadhijātikaṃ upadhipabhavaṃ, upadhismiṃ sati jarāmaraṇaṃ hoti, upadhismiṃ asati jarāmaraṇaṃ na hotī’ti. So jarāmaraṇañca pajānāti jarāmaraṇasamudayañca pajānāti jarāmaraṇanirodhañca pajānāti yā ca jarāmaraṇanirodhasāruppagāminī paṭipadā tañca pajānāti. Tathāpaṭipanno ca hoti anudhammacārī. Ayaṃ vuccati, bhikkhave, bhikkhu sabbaso sammā dukkhakkhayāya paṭipanno jarāmaraṇanirodhāya.
‘‘அதா²பரங் ஸம்மஸமானோ ஸம்மஸதி அந்தரங் ஸம்மஸங் – ‘உபதி⁴ பனாயங் கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ, கிஸ்மிங் ஸதி உபதி⁴ ஹோதி, கிஸ்மிங் அஸதி உபதி⁴ ந ஹோதீ’தி? ஸோ ஸம்மஸமானோ ஏவங் ஜானாதி – ‘உபதி⁴ தண்ஹானிதா³னோ தண்ஹாஸமுத³யோ தண்ஹாஜாதிகோ தண்ஹாபப⁴வோ, தண்ஹாய ஸதி உபதி⁴ ஹோதி, தண்ஹாய அஸதி உபதி⁴ ந ஹோதீ’தி. ஸோ உபதி⁴ஞ்ச பஜானாதி உபதி⁴ஸமுத³யஞ்ச பஜானாதி உபதி⁴னிரோத⁴ஞ்ச பஜானாதி யா ச உபதி⁴னிரோத⁴ஸாருப்பகா³மினீ படிபதா³ தஞ்ச பஜானாதி. ததா² படிபன்னோ ச ஹோதி அனுத⁴ம்மசாரீ. அயங் வுச்சதி, பி⁴க்க²வே, பி⁴க்கு² ஸப்³ப³ஸோ ஸம்மா து³க்க²க்க²யாய படிபன்னோ உபதி⁴னிரோதா⁴ய.
‘‘Athāparaṃ sammasamāno sammasati antaraṃ sammasaṃ – ‘upadhi panāyaṃ kiṃnidāno kiṃsamudayo kiṃjātiko kiṃpabhavo, kismiṃ sati upadhi hoti, kismiṃ asati upadhi na hotī’ti? So sammasamāno evaṃ jānāti – ‘upadhi taṇhānidāno taṇhāsamudayo taṇhājātiko taṇhāpabhavo, taṇhāya sati upadhi hoti, taṇhāya asati upadhi na hotī’ti. So upadhiñca pajānāti upadhisamudayañca pajānāti upadhinirodhañca pajānāti yā ca upadhinirodhasāruppagāminī paṭipadā tañca pajānāti. Tathā paṭipanno ca hoti anudhammacārī. Ayaṃ vuccati, bhikkhave, bhikkhu sabbaso sammā dukkhakkhayāya paṭipanno upadhinirodhāya.
‘‘அதா²பரங் ஸம்மஸமானோ ஸம்மஸதி அந்தரங் ஸம்மஸங் – ‘தண்ஹா பனாயங் கத்த² உப்பஜ்ஜமானா உப்பஜ்ஜதி, கத்த² நிவிஸமானா நிவிஸதீ’தி? ஸோ ஸம்மஸமானோ ஏவங் ஜானாதி – யங் கோ² லோகே பியரூபங் ஸாதரூபங் எத்தே²ஸா தண்ஹா உப்பஜ்ஜமானா உப்பஜ்ஜதி, எத்த² நிவிஸமானா நிவிஸதி . கிஞ்ச லோகே பியரூபங் ஸாதரூபங்? சக்கு²ங் லோகே பியரூபங், ஸாதரூபங். எத்தே²ஸா தண்ஹா உப்பஜ்ஜமானா உப்பஜ்ஜதி, எத்த² நிவிஸமானா நிவிஸதி. ஸோதங் லோகே பியரூபங் ஸாதரூபங்…பே॰… கா⁴னங் லோகே பியரூபங் ஸாதரூபங்… ஜிவ்ஹா லோகே பியரூபங் ஸாதரூபங்… காயோ லோகே பியரூபங் ஸாதரூபங்… மனோ லோகே பியரூபங் ஸாதரூபங் எத்தே²ஸா தண்ஹா உப்பஜ்ஜமானா உப்பஜ்ஜதி எத்த² நிவிஸமானா நிவிஸதி.
‘‘Athāparaṃ sammasamāno sammasati antaraṃ sammasaṃ – ‘taṇhā panāyaṃ kattha uppajjamānā uppajjati, kattha nivisamānā nivisatī’ti? So sammasamāno evaṃ jānāti – yaṃ kho loke piyarūpaṃ sātarūpaṃ etthesā taṇhā uppajjamānā uppajjati, ettha nivisamānā nivisati . Kiñca loke piyarūpaṃ sātarūpaṃ? Cakkhuṃ loke piyarūpaṃ, sātarūpaṃ. Etthesā taṇhā uppajjamānā uppajjati, ettha nivisamānā nivisati. Sotaṃ loke piyarūpaṃ sātarūpaṃ…pe… ghānaṃ loke piyarūpaṃ sātarūpaṃ… jivhā loke piyarūpaṃ sātarūpaṃ… kāyo loke piyarūpaṃ sātarūpaṃ… mano loke piyarūpaṃ sātarūpaṃ etthesā taṇhā uppajjamānā uppajjati ettha nivisamānā nivisati.
‘‘யே ஹி கேசி, பி⁴க்க²வே, அதீதமத்³தா⁴னங் ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் நிச்சதோ அத்³த³க்கு²ங் ஸுக²தோ அத்³த³க்கு²ங் அத்ததோ அத்³த³க்கு²ங் ஆரொக்³யதோ அத்³த³க்கு²ங் கே²மதோ அத்³த³க்கு²ங். தே தண்ஹங் வட்³டே⁴ஸுங். யே தண்ஹங் வட்³டே⁴ஸுங் தே உபதி⁴ங் வட்³டே⁴ஸுங். யே உபதி⁴ங் வட்³டே⁴ஸுங் தே து³க்க²ங் வட்³டே⁴ஸுங். யே து³க்க²ங் வட்³டே⁴ஸுங் தே ந பரிமுச்சிங்ஸு ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, ந பரிமுச்சிங்ஸு து³க்க²ஸ்மாதி வதா³மி.
‘‘Ye hi keci, bhikkhave, atītamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ niccato addakkhuṃ sukhato addakkhuṃ attato addakkhuṃ ārogyato addakkhuṃ khemato addakkhuṃ. Te taṇhaṃ vaḍḍhesuṃ. Ye taṇhaṃ vaḍḍhesuṃ te upadhiṃ vaḍḍhesuṃ. Ye upadhiṃ vaḍḍhesuṃ te dukkhaṃ vaḍḍhesuṃ. Ye dukkhaṃ vaḍḍhesuṃ te na parimucciṃsu jātiyā jarāya maraṇena sokehi paridevehi dukkhehi domanassehi upāyāsehi, na parimucciṃsu dukkhasmāti vadāmi.
‘‘யேபி ஹி கேசி, பி⁴க்க²வே, அனாக³தமத்³தா⁴னங் ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் நிச்சதோ த³க்கி²ஸ்ஸந்தி 5 ஸுக²தோ த³க்கி²ஸ்ஸந்தி அத்ததோ த³க்கி²ஸ்ஸந்தி ஆரொக்³யதோ த³க்கி²ஸ்ஸந்தி கே²மதோ த³க்கி²ஸ்ஸந்தி. தே தண்ஹங் வட்³டி⁴ஸ்ஸந்தி. யே தண்ஹங் வட்³டி⁴ஸ்ஸந்தி தே உபதி⁴ங் வட்³டி⁴ஸ்ஸந்தி. யே உபதி⁴ங் வட்³டி⁴ஸ்ஸந்தி தே து³க்க²ங் வட்³டி⁴ஸ்ஸந்தி. யே து³க்க²ங் வட்³டி⁴ஸ்ஸந்தி தே ந பரிமுச்சிஸ்ஸந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, ந பரிமுச்சிஸ்ஸந்தி து³க்க²ஸ்மாதி வதா³மி.
‘‘Yepi hi keci, bhikkhave, anāgatamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ niccato dakkhissanti 6 sukhato dakkhissanti attato dakkhissanti ārogyato dakkhissanti khemato dakkhissanti. Te taṇhaṃ vaḍḍhissanti. Ye taṇhaṃ vaḍḍhissanti te upadhiṃ vaḍḍhissanti. Ye upadhiṃ vaḍḍhissanti te dukkhaṃ vaḍḍhissanti. Ye dukkhaṃ vaḍḍhissanti te na parimuccissanti jātiyā jarāya maraṇena sokehi paridevehi dukkhehi domanassehi upāyāsehi, na parimuccissanti dukkhasmāti vadāmi.
‘‘யேபி ஹி கேசி, பி⁴க்க²வே, ஏதரஹி ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் நிச்சதோ பஸ்ஸந்தி ஸுக²தோ பஸ்ஸந்தி அத்ததோ பஸ்ஸந்தி ஆரொக்³யதோ பஸ்ஸந்தி கே²மதோ பஸ்ஸந்தி. தே தண்ஹங் வட்³டெ⁴ந்தி . யே தண்ஹங் வட்³டெ⁴ந்தி தே உபதி⁴ங் வட்³டெ⁴ந்தி. யே உபதி⁴ங் வட்³டெ⁴ந்தி தே து³க்க²ங் வட்³டெ⁴ந்தி. யே து³க்க²ங் வட்³டெ⁴ந்தி தே ந பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, ந பரிமுச்சந்தி து³க்க²ஸ்மாதி வதா³மி.
‘‘Yepi hi keci, bhikkhave, etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ niccato passanti sukhato passanti attato passanti ārogyato passanti khemato passanti. Te taṇhaṃ vaḍḍhenti . Ye taṇhaṃ vaḍḍhenti te upadhiṃ vaḍḍhenti. Ye upadhiṃ vaḍḍhenti te dukkhaṃ vaḍḍhenti. Ye dukkhaṃ vaḍḍhenti te na parimuccanti jātiyā jarāya maraṇena sokehi paridevehi dukkhehi domanassehi upāyāsehi, na parimuccanti dukkhasmāti vadāmi.
‘‘ஸெய்யதா²பி , பி⁴க்க²வே, ஆபானீயகங்ஸோ வண்ணஸம்பன்னோ க³ந்த⁴ஸம்பன்னோ ரஸஸம்பன்னோ. ஸோ ச கோ² விஸேன ஸங்ஸட்டோ². அத² புரிஸோ ஆக³ச்செ²ய்ய க⁴ம்மாபி⁴தத்தோ க⁴ம்மபரேதோ கிலந்தோ தஸிதோ பிபாஸிதோ. தமேனங் ஏவங் வதெ³ய்யுங் – ‘அயங் தே, அம்போ⁴ புரிஸ, ஆபானீயகங்ஸோ வண்ணஸம்பன்னோ க³ந்த⁴ஸம்பன்னோ ரஸஸம்பன்னோ; ஸோ ச கோ² விஸேன ஸங்ஸட்டோ². ஸசே ஆகங்க²ஸி பிவ. பிவதோ ஹி கோ² தங் சா²தெ³ஸ்ஸதி வண்ணேனபி க³ந்தே⁴னபி ரஸேனபி, பிவித்வா ச பன ததோனிதா³னங் மரணங் வா நிக³ச்ச²ஸி மரணமத்தங் வா து³க்க²’ந்தி. ஸோ தங் ஆபானீயகங்ஸங் ஸஹஸா அப்படிஸங்கா² பிவெய்ய, நப்படினிஸ்ஸஜ்ஜெய்ய. ஸோ ததோனிதா³னங் மரணங் வா நிக³ச்செ²ய்ய மரணமத்தங் வா து³க்க²ங். ஏவமேவ கோ², பி⁴க்க²வே, யே ஹி கேசி அதீதமத்³தா⁴னங் ஸமணா வா ப்³ராஹ்மணா வா யங் லோகே பியரூபங்…பே॰… அனாக³தமத்³தா⁴னங்…பே॰… ஏதரஹி ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் நிச்சதோ பஸ்ஸந்தி ஸுக²தோ பஸ்ஸந்தி அத்ததோ பஸ்ஸந்தி ஆரொக்³யதோ பஸ்ஸந்தி கே²மதோ பஸ்ஸந்தி, தே தண்ஹங் வட்³டெ⁴ந்தி. யே தண்ஹங் வட்³டெ⁴ந்தி தே உபதி⁴ங் வட்³டெ⁴ந்தி. யே உபதி⁴ங் வட்³டெ⁴ந்தி தே து³க்க²ங் வட்³டெ⁴ந்தி. யே து³க்க²ங் வட்³டெ⁴ந்தி தே ந பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, ந பரிமுச்சந்தி து³க்க²ஸ்மாதி வதா³மி.
‘‘Seyyathāpi , bhikkhave, āpānīyakaṃso vaṇṇasampanno gandhasampanno rasasampanno. So ca kho visena saṃsaṭṭho. Atha puriso āgaccheyya ghammābhitatto ghammapareto kilanto tasito pipāsito. Tamenaṃ evaṃ vadeyyuṃ – ‘ayaṃ te, ambho purisa, āpānīyakaṃso vaṇṇasampanno gandhasampanno rasasampanno; so ca kho visena saṃsaṭṭho. Sace ākaṅkhasi piva. Pivato hi kho taṃ chādessati vaṇṇenapi gandhenapi rasenapi, pivitvā ca pana tatonidānaṃ maraṇaṃ vā nigacchasi maraṇamattaṃ vā dukkha’nti. So taṃ āpānīyakaṃsaṃ sahasā appaṭisaṅkhā piveyya, nappaṭinissajjeyya. So tatonidānaṃ maraṇaṃ vā nigaccheyya maraṇamattaṃ vā dukkhaṃ. Evameva kho, bhikkhave, ye hi keci atītamaddhānaṃ samaṇā vā brāhmaṇā vā yaṃ loke piyarūpaṃ…pe… anāgatamaddhānaṃ…pe… etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ niccato passanti sukhato passanti attato passanti ārogyato passanti khemato passanti, te taṇhaṃ vaḍḍhenti. Ye taṇhaṃ vaḍḍhenti te upadhiṃ vaḍḍhenti. Ye upadhiṃ vaḍḍhenti te dukkhaṃ vaḍḍhenti. Ye dukkhaṃ vaḍḍhenti te na parimuccanti jātiyā jarāya maraṇena sokehi paridevehi dukkhehi domanassehi upāyāsehi, na parimuccanti dukkhasmāti vadāmi.
‘‘யே ச கோ² கேசி, பி⁴க்க²வே, அதீதமத்³தா⁴னங் ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் அனிச்சதோ அத்³த³க்கு²ங் து³க்க²தோ அத்³த³க்கு²ங் அனத்ததோ அத்³த³க்கு²ங் ரோக³தோ அத்³த³க்கு²ங் ப⁴யதோ அத்³த³க்கு²ங், தே தண்ஹங் பஜஹிங்ஸு. யே தண்ஹங் பஜஹிங்ஸு தே உபதி⁴ங் பஜஹிங்ஸு. யே உபதி⁴ங் பஜஹிங்ஸு தே து³க்க²ங் பஜஹிங்ஸு. யே து³க்க²ங் பஜஹிங்ஸு தே பரிமுச்சிங்ஸு ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, பரிமுச்சிங்ஸு து³க்க²ஸ்மாதி வதா³மி.
‘‘Ye ca kho keci, bhikkhave, atītamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato addakkhuṃ dukkhato addakkhuṃ anattato addakkhuṃ rogato addakkhuṃ bhayato addakkhuṃ, te taṇhaṃ pajahiṃsu. Ye taṇhaṃ pajahiṃsu te upadhiṃ pajahiṃsu. Ye upadhiṃ pajahiṃsu te dukkhaṃ pajahiṃsu. Ye dukkhaṃ pajahiṃsu te parimucciṃsu jātiyā jarāya maraṇena sokehi paridevehi dukkhehi domanassehi upāyāsehi, parimucciṃsu dukkhasmāti vadāmi.
‘‘யேபி ஹி கேசி, பி⁴க்க²வே, அனாக³தமத்³தா⁴னங் ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் அனிச்சதோ த³க்கி²ஸ்ஸந்தி து³க்க²தோ த³க்கி²ஸ்ஸந்தி அனத்ததோ த³க்கி²ஸ்ஸந்தி ரோக³தோ த³க்கி²ஸ்ஸந்தி ப⁴யதோ த³க்கி²ஸ்ஸந்தி, தே தண்ஹங் பஜஹிஸ்ஸந்தி. யே தண்ஹங் பஜஹிஸ்ஸந்தி…பே॰… பரிமுச்சிஸ்ஸந்தி து³க்க²ஸ்மாதி வதா³மி.
‘‘Yepi hi keci, bhikkhave, anāgatamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato dakkhissanti dukkhato dakkhissanti anattato dakkhissanti rogato dakkhissanti bhayato dakkhissanti, te taṇhaṃ pajahissanti. Ye taṇhaṃ pajahissanti…pe… parimuccissanti dukkhasmāti vadāmi.
‘‘யேபி ஹி கேசி, பி⁴க்க²வே, ஏதரஹி ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் அனிச்சதோ பஸ்ஸந்தி து³க்க²தோ பஸ்ஸந்தி அனத்ததோ பஸ்ஸந்தி ரோக³தோ பஸ்ஸந்தி ப⁴யதோ பஸ்ஸந்தி, தே தண்ஹங் பஜஹந்தி. யே தண்ஹங் பஜஹந்தி தே உபதி⁴ங் பஜஹந்தி. யே உபதி⁴ங் பஜஹந்தி தே து³க்க²ங் பஜஹந்தி. யே து³க்க²ங் பஜஹந்தி தே பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, பரிமுச்சந்தி து³க்க²ஸ்மாதி வதா³மி.
‘‘Yepi hi keci, bhikkhave, etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato passanti dukkhato passanti anattato passanti rogato passanti bhayato passanti, te taṇhaṃ pajahanti. Ye taṇhaṃ pajahanti te upadhiṃ pajahanti. Ye upadhiṃ pajahanti te dukkhaṃ pajahanti. Ye dukkhaṃ pajahanti te parimuccanti jātiyā jarāya maraṇena sokehi paridevehi dukkhehi domanassehi upāyāsehi, parimuccanti dukkhasmāti vadāmi.
‘‘ஸெய்யதா²பி, பி⁴க்க²வே, ஆபானீயகங்ஸோ வண்ணஸம்பன்னோ க³ந்த⁴ஸம்பன்னோ ரஸஸம்பன்னோ. ஸோ ச கோ² விஸேன ஸங்ஸட்டோ². அத² புரிஸோ ஆக³ச்செ²ய்ய க⁴ம்மாபி⁴தத்தோ க⁴ம்மபரேதோ கிலந்தோ தஸிதோ பிபாஸிதோ. தமேனங் ஏவங் வதெ³ய்யுங் – ‘அயங் தே, அம்போ⁴ புரிஸ, ஆபானீயகங்ஸோ வண்ணஸம்பன்னோ க³ந்த⁴ஸம்பன்னோ ரஸஸம்பன்னோ ஸோ ச கோ² விஸேன ஸங்ஸட்டோ². ஸசே ஆகங்க²ஸி பிவ. பிவதோ ஹி கோ² தங் சா²தெ³ஸ்ஸதி வண்ணேனபி க³ந்தே⁴னபி ரஸேனபி; பிவித்வா ச பன ததோனிதா³னங் மரணங் வா நிக³ச்ச²ஸி மரணமத்தங் வா து³க்க²’ந்தி. அத² கோ², பி⁴க்க²வே, தஸ்ஸ புரிஸஸ்ஸ ஏவமஸ்ஸ – ‘ஸக்கா கோ² மே அயங் ஸுராபிபாஸிதா 7 பானீயேன வா வினேதுங் த³தி⁴மண்ட³கேன வா வினேதுங் ப⁴ட்ட²லோணிகாய 8 வா வினேதுங் லோணஸோவீரகேன வா வினேதுங், ந த்வேவாஹங் தங் பிவெய்யங், யங் மம அஸ்ஸ தீ³க⁴ரத்தங் ஹிதாய ஸுகா²யா’தி. ஸோ தங் ஆபானீயகங்ஸங் படிஸங்கா² ந பிவெய்ய, படினிஸ்ஸஜ்ஜெய்ய . ஸோ ததோனிதா³னங் ந மரணங் வா நிக³ச்செ²ய்ய மரணமத்தங் வா து³க்க²ங். ஏவமேவ கோ², பி⁴க்க²வே, யே ஹி கேசி அதீதமத்³தா⁴னங் ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் அனிச்சதோ அத்³த³க்கு²ங் து³க்க²தோ அத்³த³க்கு²ங் அனத்ததோ அத்³த³க்கு²ங் ரோக³தோ அத்³த³க்கு²ங் ப⁴யதோ அத்³த³க்கு²ங், தே தண்ஹங் பஜஹிங்ஸு. யே தண்ஹங் பஜஹிங்ஸு தே உபதி⁴ங் பஜஹிங்ஸு. யே உபதி⁴ங் பஜஹிங்ஸு தே து³க்க²ங் பஜஹிங்ஸு. யே து³க்க²ங் பஜஹிங்ஸு தே பரிமுச்சிங்ஸு ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, பரிமுச்சிங்ஸு து³க்க²ஸ்மாதி வதா³மி.
‘‘Seyyathāpi, bhikkhave, āpānīyakaṃso vaṇṇasampanno gandhasampanno rasasampanno. So ca kho visena saṃsaṭṭho. Atha puriso āgaccheyya ghammābhitatto ghammapareto kilanto tasito pipāsito. Tamenaṃ evaṃ vadeyyuṃ – ‘ayaṃ te, ambho purisa, āpānīyakaṃso vaṇṇasampanno gandhasampanno rasasampanno so ca kho visena saṃsaṭṭho. Sace ākaṅkhasi piva. Pivato hi kho taṃ chādessati vaṇṇenapi gandhenapi rasenapi; pivitvā ca pana tatonidānaṃ maraṇaṃ vā nigacchasi maraṇamattaṃ vā dukkha’nti. Atha kho, bhikkhave, tassa purisassa evamassa – ‘sakkā kho me ayaṃ surāpipāsitā 9 pānīyena vā vinetuṃ dadhimaṇḍakena vā vinetuṃ bhaṭṭhaloṇikāya 10 vā vinetuṃ loṇasovīrakena vā vinetuṃ, na tvevāhaṃ taṃ piveyyaṃ, yaṃ mama assa dīgharattaṃ hitāya sukhāyā’ti. So taṃ āpānīyakaṃsaṃ paṭisaṅkhā na piveyya, paṭinissajjeyya . So tatonidānaṃ na maraṇaṃ vā nigaccheyya maraṇamattaṃ vā dukkhaṃ. Evameva kho, bhikkhave, ye hi keci atītamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato addakkhuṃ dukkhato addakkhuṃ anattato addakkhuṃ rogato addakkhuṃ bhayato addakkhuṃ, te taṇhaṃ pajahiṃsu. Ye taṇhaṃ pajahiṃsu te upadhiṃ pajahiṃsu. Ye upadhiṃ pajahiṃsu te dukkhaṃ pajahiṃsu. Ye dukkhaṃ pajahiṃsu te parimucciṃsu jātiyā jarāya maraṇena sokehi paridevehi dukkhehi domanassehi upāyāsehi, parimucciṃsu dukkhasmāti vadāmi.
‘‘யேபி ஹி கேசி, பி⁴க்க²வே, அனாக³தமத்³தா⁴னங்…பே॰… ஏதரஹி ஸமணா வா ப்³ராஹ்மணா வா யங் லோகே பியரூபங் ஸாதரூபங் தங் அனிச்சதோ பஸ்ஸந்தி து³க்க²தோ பஸ்ஸந்தி அனத்ததோ பஸ்ஸந்தி ரோக³தோ பஸ்ஸந்தி ப⁴யதோ பஸ்ஸந்தி, தே தண்ஹங் பஜஹந்தி. யே தண்ஹங் பஜஹந்தி தே உபதி⁴ங் பஜஹந்தி. யே உபதி⁴ங் பஜஹந்தி தே து³க்க²ங் பஜஹந்தி. யே து³க்க²ங் பஜஹந்தி தே பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, பரிமுச்சந்தி து³க்க²ஸ்மாதி வதா³மீ’’தி. ச²ட்ட²ங்.
‘‘Yepi hi keci, bhikkhave, anāgatamaddhānaṃ…pe… etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato passanti dukkhato passanti anattato passanti rogato passanti bhayato passanti, te taṇhaṃ pajahanti. Ye taṇhaṃ pajahanti te upadhiṃ pajahanti. Ye upadhiṃ pajahanti te dukkhaṃ pajahanti. Ye dukkhaṃ pajahanti te parimuccanti jātiyā jarāya maraṇena sokehi paridevehi dukkhehi domanassehi upāyāsehi, parimuccanti dukkhasmāti vadāmī’’ti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ஸம்மஸஸுத்தவண்ணனா • 6. Sammasasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. ஸம்மஸஸுத்தவண்ணனா • 6. Sammasasuttavaṇṇanā
