Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༦. སམྨསསུཏྟཾ

    6. Sammasasuttaṃ

    ༦༦. ཨེཝཾ མེ སུཏཾ – ཨེཀཾ སམཡཾ བྷགཝཱ ཀུརཱུསུ ཝིཧརཏི ཀམྨཱསདྷམྨཾ ནཱམ ཀུརཱུནཾ ནིགམོ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ – ‘‘སམྨསཐ ནོ ཏུམྷེ, བྷིཀྑཝེ, ཨནྟརཾ སམྨས’’ནྟི 1། ཨེཝཾ ཝུཏྟེ, ཨཉྙཏརོ བྷིཀྑུ བྷགཝནྟཾ ཨེཏདཝོཙ – ‘‘ཨཧཾ ཁོ, བྷནྟེ, སམྨསཱམི ཨནྟརཾ སམྨས’’ནྟི། ‘‘ཡཐཱ ཀཐཾ པན ཏྭཾ, བྷིཀྑུ, སམྨསསི ཨནྟརཾ སམྨས’’ནྟི? ཨཐ ཁོ སོ བྷིཀྑུ བྱཱཀཱསི། ཡཐཱ སོ བྷིཀྑུ བྱཱཀཱསི ན སོ བྷིཀྑུ བྷགཝཏོ ཙིཏྟཾ ཨཱརཱདྷེསི།

    66. Evaṃ me sutaṃ – ekaṃ samayaṃ bhagavā kurūsu viharati kammāsadhammaṃ nāma kurūnaṃ nigamo. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘sammasatha no tumhe, bhikkhave, antaraṃ sammasa’’nti 2. Evaṃ vutte, aññataro bhikkhu bhagavantaṃ etadavoca – ‘‘ahaṃ kho, bhante, sammasāmi antaraṃ sammasa’’nti. ‘‘Yathā kathaṃ pana tvaṃ, bhikkhu, sammasasi antaraṃ sammasa’’nti? Atha kho so bhikkhu byākāsi. Yathā so bhikkhu byākāsi na so bhikkhu bhagavato cittaṃ ārādhesi.

    ཨེཝཾ ཝུཏྟེ, ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘ཨེཏསྶ, བྷགཝཱ, ཀཱལོ; ཨེཏསྶ, སུགཏ, ཀཱལོ; ཡཾ བྷགཝཱ ཨནྟརཾ སམྨསཾ བྷཱསེཡྻ། བྷགཝཏོ སུཏྭཱ བྷིཀྑཱུ དྷཱརེསྶནྟཱི’’ཏི། ‘‘ཏེནཧཱནནྡ, སུཎཱཐ, སཱདྷུཀཾ མནསི ཀརོཐ; བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –

    Evaṃ vutte, āyasmā ānando bhagavantaṃ etadavoca – ‘‘etassa, bhagavā, kālo; etassa, sugata, kālo; yaṃ bhagavā antaraṃ sammasaṃ bhāseyya. Bhagavato sutvā bhikkhū dhāressantī’’ti. ‘‘Tenahānanda, suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

    ‘‘ཨིདྷ , བྷིཀྑཝེ, བྷིཀྑུ སམྨསམཱནོ སམྨསཏི ཨནྟརཾ སམྨསཾ 3 – ‘ཡཾ ཁོ ཨིདཾ ཨནེཀཝིདྷཾ ནཱནཔྤཀཱརཀཾ དུཀྑཾ ལོཀེ ཨུཔྤཛྫཏི ཛརཱམརཎཾ། ཨིདཾ ཁོ དུཀྑཾ ཀིཾནིདཱནཾ ཀིཾསམུདཡཾ ཀིཾཛཱཏིཀཾ ཀིཾཔབྷཝཾ, ཀིསྨིཾ སཏི ཛརཱམརཎཾ ཧོཏི, ཀིསྨིཾ ཨསཏི ཛརཱམརཎཾ ན ཧོཏཱི’ཏི? སོ སམྨསམཱནོ ཨེཝཾ ཛཱནཱཏི – ‘ཡཾ ཁོ ཨིདཾ ཨནེཀཝིདྷཾ ནཱནཔྤཀཱརཀཾ དུཀྑཾ ལོཀེ ཨུཔྤཛྫཏི ཛརཱམརཎཾ། ཨིདཾ ཁོ དུཀྑཾ ཨུཔདྷིནིདཱནཾ ཨུཔདྷིསམུདཡཾ ཨུཔདྷིཛཱཏིཀཾ ཨུཔདྷིཔབྷཝཾ, ཨུཔདྷིསྨིཾ སཏི ཛརཱམརཎཾ ཧོཏི, ཨུཔདྷིསྨིཾ ཨསཏི ཛརཱམརཎཾ ན ཧོཏཱི’ཏི། སོ ཛརཱམརཎཉྩ པཛཱནཱཏི ཛརཱམརཎསམུདཡཉྩ པཛཱནཱཏི ཛརཱམརཎནིརོདྷཉྩ པཛཱནཱཏི ཡཱ ཙ ཛརཱམརཎནིརོདྷསཱརུཔྤགཱམིནཱི པཊིཔདཱ ཏཉྩ པཛཱནཱཏི། ཏཐཱཔཊིཔནྣོ ཙ ཧོཏི ཨནུདྷམྨཙཱརཱི། ཨཡཾ ཝུཙྩཏི, བྷིཀྑཝེ, བྷིཀྑུ སབྦསོ སམྨཱ དུཀྑཀྑཡཱཡ པཊིཔནྣོ ཛརཱམརཎནིརོདྷཱཡ།

    ‘‘Idha , bhikkhave, bhikkhu sammasamāno sammasati antaraṃ sammasaṃ 4 – ‘yaṃ kho idaṃ anekavidhaṃ nānappakārakaṃ dukkhaṃ loke uppajjati jarāmaraṇaṃ. Idaṃ kho dukkhaṃ kiṃnidānaṃ kiṃsamudayaṃ kiṃjātikaṃ kiṃpabhavaṃ, kismiṃ sati jarāmaraṇaṃ hoti, kismiṃ asati jarāmaraṇaṃ na hotī’ti? So sammasamāno evaṃ jānāti – ‘yaṃ kho idaṃ anekavidhaṃ nānappakārakaṃ dukkhaṃ loke uppajjati jarāmaraṇaṃ. Idaṃ kho dukkhaṃ upadhinidānaṃ upadhisamudayaṃ upadhijātikaṃ upadhipabhavaṃ, upadhismiṃ sati jarāmaraṇaṃ hoti, upadhismiṃ asati jarāmaraṇaṃ na hotī’ti. So jarāmaraṇañca pajānāti jarāmaraṇasamudayañca pajānāti jarāmaraṇanirodhañca pajānāti yā ca jarāmaraṇanirodhasāruppagāminī paṭipadā tañca pajānāti. Tathāpaṭipanno ca hoti anudhammacārī. Ayaṃ vuccati, bhikkhave, bhikkhu sabbaso sammā dukkhakkhayāya paṭipanno jarāmaraṇanirodhāya.

    ‘‘ཨཐཱཔརཾ སམྨསམཱནོ སམྨསཏི ཨནྟརཾ སམྨསཾ – ‘ཨུཔདྷི པནཱཡཾ ཀིཾནིདཱནོ ཀིཾསམུདཡོ ཀིཾཛཱཏིཀོ ཀིཾཔབྷཝོ, ཀིསྨིཾ སཏི ཨུཔདྷི ཧོཏི, ཀིསྨིཾ ཨསཏི ཨུཔདྷི ན ཧོཏཱི’ཏི? སོ སམྨསམཱནོ ཨེཝཾ ཛཱནཱཏི – ‘ཨུཔདྷི ཏཎྷཱནིདཱནོ ཏཎྷཱསམུདཡོ ཏཎྷཱཛཱཏིཀོ ཏཎྷཱཔབྷཝོ, ཏཎྷཱཡ སཏི ཨུཔདྷི ཧོཏི, ཏཎྷཱཡ ཨསཏི ཨུཔདྷི ན ཧོཏཱི’ཏི། སོ ཨུཔདྷིཉྩ པཛཱནཱཏི ཨུཔདྷིསམུདཡཉྩ པཛཱནཱཏི ཨུཔདྷིནིརོདྷཉྩ པཛཱནཱཏི ཡཱ ཙ ཨུཔདྷིནིརོདྷསཱརུཔྤགཱམིནཱི པཊིཔདཱ ཏཉྩ པཛཱནཱཏི། ཏཐཱ པཊིཔནྣོ ཙ ཧོཏི ཨནུདྷམྨཙཱརཱི། ཨཡཾ ཝུཙྩཏི, བྷིཀྑཝེ, བྷིཀྑུ སབྦསོ སམྨཱ དུཀྑཀྑཡཱཡ པཊིཔནྣོ ཨུཔདྷིནིརོདྷཱཡ།

    ‘‘Athāparaṃ sammasamāno sammasati antaraṃ sammasaṃ – ‘upadhi panāyaṃ kiṃnidāno kiṃsamudayo kiṃjātiko kiṃpabhavo, kismiṃ sati upadhi hoti, kismiṃ asati upadhi na hotī’ti? So sammasamāno evaṃ jānāti – ‘upadhi taṇhānidāno taṇhāsamudayo taṇhājātiko taṇhāpabhavo, taṇhāya sati upadhi hoti, taṇhāya asati upadhi na hotī’ti. So upadhiñca pajānāti upadhisamudayañca pajānāti upadhinirodhañca pajānāti yā ca upadhinirodhasāruppagāminī paṭipadā tañca pajānāti. Tathā paṭipanno ca hoti anudhammacārī. Ayaṃ vuccati, bhikkhave, bhikkhu sabbaso sammā dukkhakkhayāya paṭipanno upadhinirodhāya.

    ‘‘ཨཐཱཔརཾ སམྨསམཱནོ སམྨསཏི ཨནྟརཾ སམྨསཾ – ‘ཏཎྷཱ པནཱཡཾ ཀཏྠ ཨུཔྤཛྫམཱནཱ ཨུཔྤཛྫཏི, ཀཏྠ ནིཝིསམཱནཱ ནིཝིསཏཱི’ཏི? སོ སམྨསམཱནོ ཨེཝཾ ཛཱནཱཏི – ཡཾ ཁོ ལོཀེ པིཡརཱུཔཾ སཱཏརཱུཔཾ ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི ། ཀིཉྩ ལོཀེ པིཡརཱུཔཾ སཱཏརཱུཔཾ? ཙཀྑུཾ ལོཀེ པིཡརཱུཔཾ, སཱཏརཱུཔཾ། ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི། སོཏཾ ལོཀེ པིཡརཱུཔཾ སཱཏརཱུཔཾ…པེ॰… གྷཱནཾ ལོཀེ པིཡརཱུཔཾ སཱཏརཱུཔཾ… ཛིཝ྄ཧཱ ལོཀེ པིཡརཱུཔཾ སཱཏརཱུཔཾ… ཀཱཡོ ལོཀེ པིཡརཱུཔཾ སཱཏརཱུཔཾ… མནོ ལོཀེ པིཡརཱུཔཾ སཱཏརཱུཔཾ ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི ཨེཏྠ ནིཝིསམཱནཱ ནིཝིསཏི།

    ‘‘Athāparaṃ sammasamāno sammasati antaraṃ sammasaṃ – ‘taṇhā panāyaṃ kattha uppajjamānā uppajjati, kattha nivisamānā nivisatī’ti? So sammasamāno evaṃ jānāti – yaṃ kho loke piyarūpaṃ sātarūpaṃ etthesā taṇhā uppajjamānā uppajjati, ettha nivisamānā nivisati . Kiñca loke piyarūpaṃ sātarūpaṃ? Cakkhuṃ loke piyarūpaṃ, sātarūpaṃ. Etthesā taṇhā uppajjamānā uppajjati, ettha nivisamānā nivisati. Sotaṃ loke piyarūpaṃ sātarūpaṃ…pe… ghānaṃ loke piyarūpaṃ sātarūpaṃ… jivhā loke piyarūpaṃ sātarūpaṃ… kāyo loke piyarūpaṃ sātarūpaṃ… mano loke piyarūpaṃ sātarūpaṃ etthesā taṇhā uppajjamānā uppajjati ettha nivisamānā nivisati.

    ‘‘ཡེ ཧི ཀེཙི, བྷིཀྑཝེ, ཨཏཱིཏམདྡྷཱནཾ སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ནིཙྩཏོ ཨདྡཀྑུཾ སུཁཏོ ཨདྡཀྑུཾ ཨཏྟཏོ ཨདྡཀྑུཾ ཨཱརོགྱཏོ ཨདྡཀྑུཾ ཁེམཏོ ཨདྡཀྑུཾ། ཏེ ཏཎྷཾ ཝཌྜྷེསུཾ། ཡེ ཏཎྷཾ ཝཌྜྷེསུཾ ཏེ ཨུཔདྷིཾ ཝཌྜྷེསུཾ། ཡེ ཨུཔདྷིཾ ཝཌྜྷེསུཾ ཏེ དུཀྑཾ ཝཌྜྷེསུཾ། ཡེ དུཀྑཾ ཝཌྜྷེསུཾ ཏེ ན པརིམུཙྩིཾསུ ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, ན པརིམུཙྩིཾསུ དུཀྑསྨཱཏི ཝདཱམི།

    ‘‘Ye hi keci, bhikkhave, atītamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ niccato addakkhuṃ sukhato addakkhuṃ attato addakkhuṃ ārogyato addakkhuṃ khemato addakkhuṃ. Te taṇhaṃ vaḍḍhesuṃ. Ye taṇhaṃ vaḍḍhesuṃ te upadhiṃ vaḍḍhesuṃ. Ye upadhiṃ vaḍḍhesuṃ te dukkhaṃ vaḍḍhesuṃ. Ye dukkhaṃ vaḍḍhesuṃ te na parimucciṃsu jātiyā jarāya maraṇena sokehi paridevehi dukkhehi domanassehi upāyāsehi, na parimucciṃsu dukkhasmāti vadāmi.

    ‘‘ཡེཔི ཧི ཀེཙི, བྷིཀྑཝེ, ཨནཱགཏམདྡྷཱནཾ སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ནིཙྩཏོ དཀྑིསྶནྟི 5 སུཁཏོ དཀྑིསྶནྟི ཨཏྟཏོ དཀྑིསྶནྟི ཨཱརོགྱཏོ དཀྑིསྶནྟི ཁེམཏོ དཀྑིསྶནྟི། ཏེ ཏཎྷཾ ཝཌྜྷིསྶནྟི། ཡེ ཏཎྷཾ ཝཌྜྷིསྶནྟི ཏེ ཨུཔདྷིཾ ཝཌྜྷིསྶནྟི། ཡེ ཨུཔདྷིཾ ཝཌྜྷིསྶནྟི ཏེ དུཀྑཾ ཝཌྜྷིསྶནྟི། ཡེ དུཀྑཾ ཝཌྜྷིསྶནྟི ཏེ ན པརིམུཙྩིསྶནྟི ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, ན པརིམུཙྩིསྶནྟི དུཀྑསྨཱཏི ཝདཱམི།

    ‘‘Yepi hi keci, bhikkhave, anāgatamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ niccato dakkhissanti 6 sukhato dakkhissanti attato dakkhissanti ārogyato dakkhissanti khemato dakkhissanti. Te taṇhaṃ vaḍḍhissanti. Ye taṇhaṃ vaḍḍhissanti te upadhiṃ vaḍḍhissanti. Ye upadhiṃ vaḍḍhissanti te dukkhaṃ vaḍḍhissanti. Ye dukkhaṃ vaḍḍhissanti te na parimuccissanti jātiyā jarāya maraṇena sokehi paridevehi dukkhehi domanassehi upāyāsehi, na parimuccissanti dukkhasmāti vadāmi.

    ‘‘ཡེཔི ཧི ཀེཙི, བྷིཀྑཝེ, ཨེཏརཧི སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ནིཙྩཏོ པསྶནྟི སུཁཏོ པསྶནྟི ཨཏྟཏོ པསྶནྟི ཨཱརོགྱཏོ པསྶནྟི ཁེམཏོ པསྶནྟི། ཏེ ཏཎྷཾ ཝཌྜྷེནྟི ། ཡེ ཏཎྷཾ ཝཌྜྷེནྟི ཏེ ཨུཔདྷིཾ ཝཌྜྷེནྟི། ཡེ ཨུཔདྷིཾ ཝཌྜྷེནྟི ཏེ དུཀྑཾ ཝཌྜྷེནྟི། ཡེ དུཀྑཾ ཝཌྜྷེནྟི ཏེ ན པརིམུཙྩནྟི ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, ན པརིམུཙྩནྟི དུཀྑསྨཱཏི ཝདཱམི།

    ‘‘Yepi hi keci, bhikkhave, etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ niccato passanti sukhato passanti attato passanti ārogyato passanti khemato passanti. Te taṇhaṃ vaḍḍhenti . Ye taṇhaṃ vaḍḍhenti te upadhiṃ vaḍḍhenti. Ye upadhiṃ vaḍḍhenti te dukkhaṃ vaḍḍhenti. Ye dukkhaṃ vaḍḍhenti te na parimuccanti jātiyā jarāya maraṇena sokehi paridevehi dukkhehi domanassehi upāyāsehi, na parimuccanti dukkhasmāti vadāmi.

    ‘‘སེཡྻཐཱཔི , བྷིཀྑཝེ, ཨཱཔཱནཱིཡཀཾསོ ཝཎྞསམྤནྣོ གནྡྷསམྤནྣོ རསསམྤནྣོ། སོ ཙ ཁོ ཝིསེན སཾསཊྛོ། ཨཐ པུརིསོ ཨཱགཙྪེཡྻ གྷམྨཱབྷིཏཏྟོ གྷམྨཔརེཏོ ཀིལནྟོ ཏསིཏོ པིཔཱསིཏོ། ཏམེནཾ ཨེཝཾ ཝདེཡྻུཾ – ‘ཨཡཾ ཏེ, ཨམྦྷོ པུརིས, ཨཱཔཱནཱིཡཀཾསོ ཝཎྞསམྤནྣོ གནྡྷསམྤནྣོ རསསམྤནྣོ; སོ ཙ ཁོ ཝིསེན སཾསཊྛོ། སཙེ ཨཱཀངྑསི པིཝ། པིཝཏོ ཧི ཁོ ཏཾ ཚཱདེསྶཏི ཝཎྞེནཔི གནྡྷེནཔི རསེནཔི, པིཝིཏྭཱ ཙ པན ཏཏོནིདཱནཾ མརཎཾ ཝཱ ནིགཙྪསི མརཎམཏྟཾ ཝཱ དུཀྑ’ནྟི། སོ ཏཾ ཨཱཔཱནཱིཡཀཾསཾ སཧསཱ ཨཔྤཊིསངྑཱ པིཝེཡྻ, ནཔྤཊིནིསྶཛྫེཡྻ། སོ ཏཏོནིདཱནཾ མརཎཾ ཝཱ ནིགཙྪེཡྻ མརཎམཏྟཾ ཝཱ དུཀྑཾ། ཨེཝམེཝ ཁོ, བྷིཀྑཝེ, ཡེ ཧི ཀེཙི ཨཏཱིཏམདྡྷཱནཾ སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ…པེ॰… ཨནཱགཏམདྡྷཱནཾ…པེ॰… ཨེཏརཧི སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ནིཙྩཏོ པསྶནྟི སུཁཏོ པསྶནྟི ཨཏྟཏོ པསྶནྟི ཨཱརོགྱཏོ པསྶནྟི ཁེམཏོ པསྶནྟི, ཏེ ཏཎྷཾ ཝཌྜྷེནྟི། ཡེ ཏཎྷཾ ཝཌྜྷེནྟི ཏེ ཨུཔདྷིཾ ཝཌྜྷེནྟི། ཡེ ཨུཔདྷིཾ ཝཌྜྷེནྟི ཏེ དུཀྑཾ ཝཌྜྷེནྟི། ཡེ དུཀྑཾ ཝཌྜྷེནྟི ཏེ ན པརིམུཙྩནྟི ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, ན པརིམུཙྩནྟི དུཀྑསྨཱཏི ཝདཱམི།

    ‘‘Seyyathāpi , bhikkhave, āpānīyakaṃso vaṇṇasampanno gandhasampanno rasasampanno. So ca kho visena saṃsaṭṭho. Atha puriso āgaccheyya ghammābhitatto ghammapareto kilanto tasito pipāsito. Tamenaṃ evaṃ vadeyyuṃ – ‘ayaṃ te, ambho purisa, āpānīyakaṃso vaṇṇasampanno gandhasampanno rasasampanno; so ca kho visena saṃsaṭṭho. Sace ākaṅkhasi piva. Pivato hi kho taṃ chādessati vaṇṇenapi gandhenapi rasenapi, pivitvā ca pana tatonidānaṃ maraṇaṃ vā nigacchasi maraṇamattaṃ vā dukkha’nti. So taṃ āpānīyakaṃsaṃ sahasā appaṭisaṅkhā piveyya, nappaṭinissajjeyya. So tatonidānaṃ maraṇaṃ vā nigaccheyya maraṇamattaṃ vā dukkhaṃ. Evameva kho, bhikkhave, ye hi keci atītamaddhānaṃ samaṇā vā brāhmaṇā vā yaṃ loke piyarūpaṃ…pe… anāgatamaddhānaṃ…pe… etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ niccato passanti sukhato passanti attato passanti ārogyato passanti khemato passanti, te taṇhaṃ vaḍḍhenti. Ye taṇhaṃ vaḍḍhenti te upadhiṃ vaḍḍhenti. Ye upadhiṃ vaḍḍhenti te dukkhaṃ vaḍḍhenti. Ye dukkhaṃ vaḍḍhenti te na parimuccanti jātiyā jarāya maraṇena sokehi paridevehi dukkhehi domanassehi upāyāsehi, na parimuccanti dukkhasmāti vadāmi.

    ‘‘ཡེ ཙ ཁོ ཀེཙི, བྷིཀྑཝེ, ཨཏཱིཏམདྡྷཱནཾ སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ཨནིཙྩཏོ ཨདྡཀྑུཾ དུཀྑཏོ ཨདྡཀྑུཾ ཨནཏྟཏོ ཨདྡཀྑུཾ རོགཏོ ཨདྡཀྑུཾ བྷཡཏོ ཨདྡཀྑུཾ, ཏེ ཏཎྷཾ པཛཧིཾསུ། ཡེ ཏཎྷཾ པཛཧིཾསུ ཏེ ཨུཔདྷིཾ པཛཧིཾསུ། ཡེ ཨུཔདྷིཾ པཛཧིཾསུ ཏེ དུཀྑཾ པཛཧིཾསུ། ཡེ དུཀྑཾ པཛཧིཾསུ ཏེ པརིམུཙྩིཾསུ ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, པརིམུཙྩིཾསུ དུཀྑསྨཱཏི ཝདཱམི།

    ‘‘Ye ca kho keci, bhikkhave, atītamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato addakkhuṃ dukkhato addakkhuṃ anattato addakkhuṃ rogato addakkhuṃ bhayato addakkhuṃ, te taṇhaṃ pajahiṃsu. Ye taṇhaṃ pajahiṃsu te upadhiṃ pajahiṃsu. Ye upadhiṃ pajahiṃsu te dukkhaṃ pajahiṃsu. Ye dukkhaṃ pajahiṃsu te parimucciṃsu jātiyā jarāya maraṇena sokehi paridevehi dukkhehi domanassehi upāyāsehi, parimucciṃsu dukkhasmāti vadāmi.

    ‘‘ཡེཔི ཧི ཀེཙི, བྷིཀྑཝེ, ཨནཱགཏམདྡྷཱནཾ སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ཨནིཙྩཏོ དཀྑིསྶནྟི དུཀྑཏོ དཀྑིསྶནྟི ཨནཏྟཏོ དཀྑིསྶནྟི རོགཏོ དཀྑིསྶནྟི བྷཡཏོ དཀྑིསྶནྟི, ཏེ ཏཎྷཾ པཛཧིསྶནྟི། ཡེ ཏཎྷཾ པཛཧིསྶནྟི…པེ॰… པརིམུཙྩིསྶནྟི དུཀྑསྨཱཏི ཝདཱམི།

    ‘‘Yepi hi keci, bhikkhave, anāgatamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato dakkhissanti dukkhato dakkhissanti anattato dakkhissanti rogato dakkhissanti bhayato dakkhissanti, te taṇhaṃ pajahissanti. Ye taṇhaṃ pajahissanti…pe… parimuccissanti dukkhasmāti vadāmi.

    ‘‘ཡེཔི ཧི ཀེཙི, བྷིཀྑཝེ, ཨེཏརཧི སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ཨནིཙྩཏོ པསྶནྟི དུཀྑཏོ པསྶནྟི ཨནཏྟཏོ པསྶནྟི རོགཏོ པསྶནྟི བྷཡཏོ པསྶནྟི, ཏེ ཏཎྷཾ པཛཧནྟི། ཡེ ཏཎྷཾ པཛཧནྟི ཏེ ཨུཔདྷིཾ པཛཧནྟི། ཡེ ཨུཔདྷིཾ པཛཧནྟི ཏེ དུཀྑཾ པཛཧནྟི། ཡེ དུཀྑཾ པཛཧནྟི ཏེ པརིམུཙྩནྟི ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, པརིམུཙྩནྟི དུཀྑསྨཱཏི ཝདཱམི།

    ‘‘Yepi hi keci, bhikkhave, etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato passanti dukkhato passanti anattato passanti rogato passanti bhayato passanti, te taṇhaṃ pajahanti. Ye taṇhaṃ pajahanti te upadhiṃ pajahanti. Ye upadhiṃ pajahanti te dukkhaṃ pajahanti. Ye dukkhaṃ pajahanti te parimuccanti jātiyā jarāya maraṇena sokehi paridevehi dukkhehi domanassehi upāyāsehi, parimuccanti dukkhasmāti vadāmi.

    ‘‘སེཡྻཐཱཔི, བྷིཀྑཝེ, ཨཱཔཱནཱིཡཀཾསོ ཝཎྞསམྤནྣོ གནྡྷསམྤནྣོ རསསམྤནྣོ། སོ ཙ ཁོ ཝིསེན སཾསཊྛོ། ཨཐ པུརིསོ ཨཱགཙྪེཡྻ གྷམྨཱབྷིཏཏྟོ གྷམྨཔརེཏོ ཀིལནྟོ ཏསིཏོ པིཔཱསིཏོ། ཏམེནཾ ཨེཝཾ ཝདེཡྻུཾ – ‘ཨཡཾ ཏེ, ཨམྦྷོ པུརིས, ཨཱཔཱནཱིཡཀཾསོ ཝཎྞསམྤནྣོ གནྡྷསམྤནྣོ རསསམྤནྣོ སོ ཙ ཁོ ཝིསེན སཾསཊྛོ། སཙེ ཨཱཀངྑསི པིཝ། པིཝཏོ ཧི ཁོ ཏཾ ཚཱདེསྶཏི ཝཎྞེནཔི གནྡྷེནཔི རསེནཔི; པིཝིཏྭཱ ཙ པན ཏཏོནིདཱནཾ མརཎཾ ཝཱ ནིགཙྪསི མརཎམཏྟཾ ཝཱ དུཀྑ’ནྟི། ཨཐ ཁོ, བྷིཀྑཝེ, ཏསྶ པུརིསསྶ ཨེཝམསྶ – ‘སཀྐཱ ཁོ མེ ཨཡཾ སུརཱཔིཔཱསིཏཱ 7 པཱནཱིཡེན ཝཱ ཝིནེཏུཾ དདྷིམཎྜཀེན ཝཱ ཝིནེཏུཾ བྷཊྛལོཎིཀཱཡ 8 ཝཱ ཝིནེཏུཾ ལོཎསོཝཱིརཀེན ཝཱ ཝིནེཏུཾ, ན ཏྭེཝཱཧཾ ཏཾ པིཝེཡྻཾ, ཡཾ མམ ཨསྶ དཱིགྷརཏྟཾ ཧིཏཱཡ སུཁཱཡཱ’ཏི། སོ ཏཾ ཨཱཔཱནཱིཡཀཾསཾ པཊིསངྑཱ ན པིཝེཡྻ, པཊིནིསྶཛྫེཡྻ ། སོ ཏཏོནིདཱནཾ ན མརཎཾ ཝཱ ནིགཙྪེཡྻ མརཎམཏྟཾ ཝཱ དུཀྑཾ། ཨེཝམེཝ ཁོ, བྷིཀྑཝེ, ཡེ ཧི ཀེཙི ཨཏཱིཏམདྡྷཱནཾ སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ཨནིཙྩཏོ ཨདྡཀྑུཾ དུཀྑཏོ ཨདྡཀྑུཾ ཨནཏྟཏོ ཨདྡཀྑུཾ རོགཏོ ཨདྡཀྑུཾ བྷཡཏོ ཨདྡཀྑུཾ, ཏེ ཏཎྷཾ པཛཧིཾསུ། ཡེ ཏཎྷཾ པཛཧིཾསུ ཏེ ཨུཔདྷིཾ པཛཧིཾསུ། ཡེ ཨུཔདྷིཾ པཛཧིཾསུ ཏེ དུཀྑཾ པཛཧིཾསུ། ཡེ དུཀྑཾ པཛཧིཾསུ ཏེ པརིམུཙྩིཾསུ ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, པརིམུཙྩིཾསུ དུཀྑསྨཱཏི ཝདཱམི།

    ‘‘Seyyathāpi, bhikkhave, āpānīyakaṃso vaṇṇasampanno gandhasampanno rasasampanno. So ca kho visena saṃsaṭṭho. Atha puriso āgaccheyya ghammābhitatto ghammapareto kilanto tasito pipāsito. Tamenaṃ evaṃ vadeyyuṃ – ‘ayaṃ te, ambho purisa, āpānīyakaṃso vaṇṇasampanno gandhasampanno rasasampanno so ca kho visena saṃsaṭṭho. Sace ākaṅkhasi piva. Pivato hi kho taṃ chādessati vaṇṇenapi gandhenapi rasenapi; pivitvā ca pana tatonidānaṃ maraṇaṃ vā nigacchasi maraṇamattaṃ vā dukkha’nti. Atha kho, bhikkhave, tassa purisassa evamassa – ‘sakkā kho me ayaṃ surāpipāsitā 9 pānīyena vā vinetuṃ dadhimaṇḍakena vā vinetuṃ bhaṭṭhaloṇikāya 10 vā vinetuṃ loṇasovīrakena vā vinetuṃ, na tvevāhaṃ taṃ piveyyaṃ, yaṃ mama assa dīgharattaṃ hitāya sukhāyā’ti. So taṃ āpānīyakaṃsaṃ paṭisaṅkhā na piveyya, paṭinissajjeyya . So tatonidānaṃ na maraṇaṃ vā nigaccheyya maraṇamattaṃ vā dukkhaṃ. Evameva kho, bhikkhave, ye hi keci atītamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato addakkhuṃ dukkhato addakkhuṃ anattato addakkhuṃ rogato addakkhuṃ bhayato addakkhuṃ, te taṇhaṃ pajahiṃsu. Ye taṇhaṃ pajahiṃsu te upadhiṃ pajahiṃsu. Ye upadhiṃ pajahiṃsu te dukkhaṃ pajahiṃsu. Ye dukkhaṃ pajahiṃsu te parimucciṃsu jātiyā jarāya maraṇena sokehi paridevehi dukkhehi domanassehi upāyāsehi, parimucciṃsu dukkhasmāti vadāmi.

    ‘‘ཡེཔི ཧི ཀེཙི, བྷིཀྑཝེ, ཨནཱགཏམདྡྷཱནཾ…པེ॰… ཨེཏརཧི སམཎཱ ཝཱ བྲཱཧྨཎཱ ཝཱ ཡཾ ལོཀེ པིཡརཱུཔཾ སཱཏརཱུཔཾ ཏཾ ཨནིཙྩཏོ པསྶནྟི དུཀྑཏོ པསྶནྟི ཨནཏྟཏོ པསྶནྟི རོགཏོ པསྶནྟི བྷཡཏོ པསྶནྟི, ཏེ ཏཎྷཾ པཛཧནྟི། ཡེ ཏཎྷཾ པཛཧནྟི ཏེ ཨུཔདྷིཾ པཛཧནྟི། ཡེ ཨུཔདྷིཾ པཛཧནྟི ཏེ དུཀྑཾ པཛཧནྟི། ཡེ དུཀྑཾ པཛཧནྟི ཏེ པརིམུཙྩནྟི ཛཱཏིཡཱ ཛརཱཡ མརཎེན སོཀེཧི པརིདེཝེཧི དུཀྑེཧི དོམནསྶེཧི ཨུཔཱཡཱསེཧི, པརིམུཙྩནྟི དུཀྑསྨཱཏི ཝདཱམཱི’’ཏི། ཚཊྛཾ།

    ‘‘Yepi hi keci, bhikkhave, anāgatamaddhānaṃ…pe… etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato passanti dukkhato passanti anattato passanti rogato passanti bhayato passanti, te taṇhaṃ pajahanti. Ye taṇhaṃ pajahanti te upadhiṃ pajahanti. Ye upadhiṃ pajahanti te dukkhaṃ pajahanti. Ye dukkhaṃ pajahanti te parimuccanti jātiyā jarāya maraṇena sokehi paridevehi dukkhehi domanassehi upāyāsehi, parimuccanti dukkhasmāti vadāmī’’ti. Chaṭṭhaṃ.




    Next: ༧. ནལ༹ཀལཱཔཱིསུཏྟཾ • 7. Naḷakalāpīsuttaṃ




    Footnotes:
    1. ཨནྟརཱ སམྨསནནྟི (སཱི॰)
    2. antarā sammasananti (sī.)
    3. སམྨསནཾ (སཱི॰)
    4. sammasanaṃ (sī.)
    5. དཀྑིནྟི (སཱི॰)
    6. dakkhinti (sī.)
    7. སུརཱཔིཔཱསཱ (?)
    8. མཊྛལོཎིཀཱཡ (སཱི॰ སྱཱ॰ ཀཾ॰ པཱི॰)
    9. surāpipāsā (?)
    10. maṭṭhaloṇikāya (sī. syā. kaṃ. pī.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༦. སམྨསསུཏྟཝཎྞནཱ • 6. Sammasasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༦. སམྨསསུཏྟཝཎྞནཱ • 6. Sammasasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact