| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. ஸம்மஸஸுத்தவண்ணனா
6. Sammasasuttavaṇṇanā
66. ச²ட்டே² ஆமந்தேஸீதி கஸ்மா ஆமந்தேஸி? யஸ்மாஸ்ஸ ஸுகு²மா திலக்க²ணாஹதா த⁴ம்மதே³ஸனா உபட்டா²ஸி. தஸ்மிங் கிர ஜனபதே³ மனுஸ்ஸா ஸஹேதுகா பஞ்ஞவந்தோ. ஸினித்³தா⁴னி கிரெத்த² போ⁴ஜனானி, தானிஸேவதோ ஜனஸ்ஸ பஞ்ஞா வட்³ட⁴தி, தே க³ம்பீ⁴ரங் திலக்க²ணாஹதங் த⁴ம்மகத²ங் படிவிஜ்ஜி²துங் ஸமத்தா² ஹொந்தி. தேனேவ ப⁴க³வா தீ³க⁴மஜ்ஜி²மேஸு மஹாஸதிபட்டா²னானி (தீ³॰ நி॰ 2.372 ஆத³யோ) மஹானிதா³னங் (தீ³॰ நி॰ 2.95 ஆத³யோ), ஆனேஞ்ஜஸப்பாயங் (ம॰ நி॰ 3.66 ஆத³யோ), ஸங்யுத்தகே சூளனிதா³னாதி³ஸுத்தந்தி ஏவமாதீ³னி அஞ்ஞானி க³ம்பீ⁴ரானி ஸுத்தானி தத்தே²வ கதே²ஸி. ஸம்மஸத² நோதி ஸம்மஸத² நு. அந்தரங் ஸம்மஸந்தி அப்³ப⁴ந்தரங் பச்சயஸம்மஸனங். ந ஸோ பி⁴க்கு² ப⁴க³வதோ சித்தங் ஆராதே⁴ஸீதி பச்சயாகாரவஸேன ப்³யாகாராபேதுகாமஸ்ஸ ப⁴க³வதோ ததா² அப்³யாகரித்வா த்³வத்திங்ஸாகாரவஸேன ப்³யாகரொந்தோ அஜ்ஜா²ஸயங் க³ஹேதுங் நாஸக்கி².
66. Chaṭṭhe āmantesīti kasmā āmantesi? Yasmāssa sukhumā tilakkhaṇāhatā dhammadesanā upaṭṭhāsi. Tasmiṃ kira janapade manussā sahetukā paññavanto. Siniddhāni kirettha bhojanāni, tānisevato janassa paññā vaḍḍhati, te gambhīraṃ tilakkhaṇāhataṃ dhammakathaṃ paṭivijjhituṃ samatthā honti. Teneva bhagavā dīghamajjhimesu mahāsatipaṭṭhānāni (dī. ni. 2.372 ādayo) mahānidānaṃ (dī. ni. 2.95 ādayo), āneñjasappāyaṃ (ma. ni. 3.66 ādayo), saṃyuttake cūḷanidānādisuttanti evamādīni aññāni gambhīrāni suttāni tattheva kathesi. Sammasatha noti sammasatha nu. Antaraṃ sammasanti abbhantaraṃ paccayasammasanaṃ. Na so bhikkhu bhagavato cittaṃ ārādhesīti paccayākāravasena byākārāpetukāmassa bhagavato tathā abyākaritvā dvattiṃsākāravasena byākaronto ajjhāsayaṃ gahetuṃ nāsakkhi.
ஏதத³வோசாதி தே³ஸனா யதா²னுஸந்தி⁴ங் ந க³தா, தே³ஸனாய யதா²னுஸந்தி⁴க³மனத்த²ங் ஏதத³வோச. தேனஹானந்த³, ஸுணாதா²தி இத³ங் தேபிடகே பு³த்³த⁴வசனே அஸம்பி⁴ன்னபத³ங். அஞ்ஞத்த² ஹி ஏவங் வுத்தங் நாம நத்தி². உபதி⁴னிதா³னந்தி க²ந்து⁴பதி⁴னிதா³னங். க²ந்த⁴பஞ்சகஞ்ஹெத்த² உபதீ⁴தி அதி⁴ப்பேதங். உப்பஜ்ஜதீதி ஜாயதி. நிவிஸதீதி புனப்புனங் பவத்திவஸேன பதிட்ட²ஹதி.
Etadavocāti desanā yathānusandhiṃ na gatā, desanāya yathānusandhigamanatthaṃ etadavoca. Tenahānanda, suṇāthāti idaṃ tepiṭake buddhavacane asambhinnapadaṃ. Aññattha hi evaṃ vuttaṃ nāma natthi. Upadhinidānanti khandhupadhinidānaṃ. Khandhapañcakañhettha upadhīti adhippetaṃ. Uppajjatīti jāyati. Nivisatīti punappunaṃ pavattivasena patiṭṭhahati.
யங் கோ² லோகே பியரூபங் ஸாதரூபந்தி யங் லோகஸ்மிங் பியஸபா⁴வஞ்சேவ மது⁴ரஸபா⁴வஞ்ச. சக்கு²ங் லோகேதிஆதீ³ஸு லோகஸ்மிஞ்ஹி சக்கா²தீ³ஸு மமத்தேன அபி⁴னிவிட்டா² ஸத்தா ஸம்பத்தியங் பதிட்டி²தா அத்தனோ சக்கு²ங் ஆதா³ஸாதீ³ஸு நிமித்தக்³க³ஹணானுஸாரேன விப்பஸன்னபஞ்சபஸாத³ங் ஸுவண்ணவிமானே உக்³கா⁴டிதமணிஸீஹபஞ்ஜரங் விய மஞ்ஞந்தி, ஸோதங் ரஜதபனாளிகங் விய பாமங்க³ஸுத்தங் விய ச மஞ்ஞந்தி, துங்க³னாஸாதி லத்³த⁴வோஹாரங் கா⁴னங் வட்டெத்வா ட²பிதஹரிதாலவட்டிங் விய மஞ்ஞந்தி, ஜிவ்ஹங் ரத்தகம்ப³லபடலங் விய முது³ஸினித்³த⁴மது⁴ரரஸத³ங் மஞ்ஞந்தி, காயங் ஸாலலட்டி²ங் விய ஸுவண்ணதோரணங் விய ச மஞ்ஞந்தி, மனங் அஞ்ஞேஸங் மனேன அஸதி³ஸங் உளாரங் மஞ்ஞந்தி.
Yaṃ kho loke piyarūpaṃ sātarūpanti yaṃ lokasmiṃ piyasabhāvañceva madhurasabhāvañca. Cakkhuṃ loketiādīsu lokasmiñhi cakkhādīsu mamattena abhiniviṭṭhā sattā sampattiyaṃ patiṭṭhitā attano cakkhuṃ ādāsādīsu nimittaggahaṇānusārena vippasannapañcapasādaṃ suvaṇṇavimāne ugghāṭitamaṇisīhapañjaraṃ viya maññanti, sotaṃ rajatapanāḷikaṃ viya pāmaṅgasuttaṃ viya ca maññanti, tuṅganāsāti laddhavohāraṃ ghānaṃ vaṭṭetvā ṭhapitaharitālavaṭṭiṃ viya maññanti, jivhaṃ rattakambalapaṭalaṃ viya mudusiniddhamadhurarasadaṃ maññanti, kāyaṃ sālalaṭṭhiṃ viya suvaṇṇatoraṇaṃ viya ca maññanti, manaṃ aññesaṃ manena asadisaṃ uḷāraṃ maññanti.
நிச்சதோ அத்³த³க்கு²ந்தி நிச்சந்தி அத்³த³ஸங்ஸு. ஸேஸபதே³ஸுபி ஏஸேவ நயோ. ந பரிமுச்சிங்ஸு து³க்க²ஸ்மாதி ஸகலஸ்மாபி வட்டது³க்கா² ந பரிமுச்சிங்ஸு. த³க்கி²ஸ்ஸந்தீதி பஸ்ஸிஸ்ஸந்தி. ஆபானீயகங்ஸோதி ஸரகஸ்ஸ நாமங். யஸ்மா பனெத்த² ஆபங் பிவந்தி, தஸ்மா ‘‘ஆபானீயோ’’தி வுச்சதி. ஆபானீயோ ச ஸோ கங்ஸோ சாதி ஆபானீயகங்ஸோ. ஸுராமண்ட³ஸரகஸ்ஸேதங் நாமங். ‘‘வண்ணஸம்பன்னோ’’திஆதி³வசனதோ பன கங்ஸே டி²தபானமேவ ஏவங் வுத்தங். க⁴ம்மாபி⁴தத்தோதி க⁴ம்மேன அபி⁴தத்தோ. க⁴ம்மபரேதோதி க⁴ம்மேன பு²ட்டோ², அனுக³தோதி அத்தோ². பிவதோ ஹி கோ² தங் சா²தெ³ஸ்ஸதீதி பிவந்தஸ்ஸ தங் பானீயங் வண்ணாதி³ஸம்பத்தியா ருச்சிஸ்ஸதி, ஸகலஸரீரங் வா ப²ரித்வா துட்டி²ங் உப்பாத³யமானங் ட²ஸ்ஸதி. அப்படிஸங்கா²தி அபச்சவெக்கி²த்வா.
Niccato addakkhunti niccanti addasaṃsu. Sesapadesupi eseva nayo. Na parimucciṃsu dukkhasmāti sakalasmāpi vaṭṭadukkhā na parimucciṃsu. Dakkhissantīti passissanti. Āpānīyakaṃsoti sarakassa nāmaṃ. Yasmā panettha āpaṃ pivanti, tasmā ‘‘āpānīyo’’ti vuccati. Āpānīyo ca so kaṃso cāti āpānīyakaṃso. Surāmaṇḍasarakassetaṃ nāmaṃ. ‘‘Vaṇṇasampanno’’tiādivacanato pana kaṃse ṭhitapānameva evaṃ vuttaṃ. Ghammābhitattoti ghammena abhitatto. Ghammaparetoti ghammena phuṭṭho, anugatoti attho. Pivato hi kho taṃ chādessatīti pivantassa taṃ pānīyaṃ vaṇṇādisampattiyā ruccissati, sakalasarīraṃ vā pharitvā tuṭṭhiṃ uppādayamānaṃ ṭhassati. Appaṭisaṅkhāti apaccavekkhitvā.
ஏவமேவ கோ²தி எத்த² இத³ங் ஓபம்மஸங்ஸந்த³னங் – ஆபானீயகங்ஸோ விய ஹி லோகே பியரூபங் ஸாதரூபங் ஆரம்மணங் த³ட்ட²ப்³ப³ங், க⁴ம்மாபி⁴தத்தபுரிஸோ விய வட்டனிஸ்ஸிதோ புது²ஜ்ஜனோ, ஆபானீயகங்ஸேன நிமந்தனபுரிஸோ விய லோகே பியரூபேன ஸாதரூபேன ஆரம்மணேன நிமந்தகஜனோ, ஆபானீயகங்ஸே ஸம்பத்திஞ்ச ஆதீ³னவஞ்ச ஆரோசெந்தோ ஆபானகமனுஸ்ஸோ விய ஆசரியுபஜ்ஜா²யாதி³கோ கல்யாணமித்தோ. யதே²வ ஹி தஸ்ஸ புரிஸஸ்ஸ அபலோகிதமனுஸ்ஸோ ஆபானீயகங்ஸே கு³ணஞ்ச ஆதீ³னவஞ்ச ஆரோசேதி, ஏவமேவ ஆசரியோ வா உபஜ்ஜா²யோ வா பி⁴க்கு²னோ பஞ்சஸு காமகு³ணேஸு அஸ்ஸாத³ஞ்ச நிஸ்ஸரணஞ்ச கதே²தி.
Evameva khoti ettha idaṃ opammasaṃsandanaṃ – āpānīyakaṃso viya hi loke piyarūpaṃ sātarūpaṃ ārammaṇaṃ daṭṭhabbaṃ, ghammābhitattapuriso viya vaṭṭanissito puthujjano, āpānīyakaṃsena nimantanapuriso viya loke piyarūpena sātarūpena ārammaṇena nimantakajano, āpānīyakaṃse sampattiñca ādīnavañca ārocento āpānakamanusso viya ācariyupajjhāyādiko kalyāṇamitto. Yatheva hi tassa purisassa apalokitamanusso āpānīyakaṃse guṇañca ādīnavañca āroceti, evameva ācariyo vā upajjhāyo vā bhikkhuno pañcasu kāmaguṇesu assādañca nissaraṇañca katheti.
தத்த² யதா² ஆபானீயகங்ஸம்ஹி கு³ணே ச ஆதீ³னவே ச ஆரோசிதே ஸோ புரிஸோ பியவண்ணாதி³ஸம்பதா³யமேவ ஸஞ்ஜாதவேகோ³ ‘‘ஸசே மரணங் ப⁴விஸ்ஸதி, பச்சா² ஜானிஸ்ஸாமீ’’தி ஸஹஸா அப்படிஸங்கா²ய தங் பிவித்வா மரணங் வா மரணமத்தங் வா து³க்க²ங் நிக³ச்ச²தி, ஏவமேவ, பி⁴க்கு², ‘‘பஞ்சஸு காமகு³ணேஸு த³ஸ்ஸனாதி³வஸேன உப்பன்னஸோமனஸ்ஸமத்தமேவ அஸ்ஸாதோ³, ஆதீ³னவோ பன தி³ட்ட²த⁴ம்மிகஸம்பராயிகோ ப³ஹு நானப்பகாரோ, அப்பஸ்ஸாதா³ காமா ப³ஹுது³க்கா² ப³ஹுபாயாஸா’’தி ஏவங் ஆசரியுபஜ்ஜா²யேஹி ஆனிஸங்ஸஞ்ச ஆதீ³னவஞ்ச கதெ²த்வா – ‘‘ஸமணபடிபத³ங் படிபஜ்ஜ, இந்த்³ரியேஸு கு³த்தத்³வாரோ ப⁴வ போ⁴ஜனே மத்தஞ்ஞூ ஜாக³ரியங் அனுயுத்தோ’’தி ஏவங் ஓவதி³தோபி அஸ்ஸாத³ப³த்³த⁴சித்ததாய ‘‘ஸசே வுத்தப்பகாரோ ஆதீ³னவோ ப⁴விஸ்ஸதி, பச்சா² ஜானிஸ்ஸாமீ’’தி ஆசரியுபஜ்ஜா²யே அபஸாதெ³த்வா உத்³தே³ஸபரிபுச்சா²தீ³னி சேவ வத்தபடிபத்திஞ்ச பஹாய லோகாமிஸகத²ங் கதெ²ந்தோ காமே பரிபு⁴ஞ்ஜிதுகாமதாய ஸிக்க²ங் பச்சக்கா²ய ஹீனாயாவத்ததி. ததோ து³ச்சரிதானி பூரெந்தோ ஸந்தி⁴ச்சே²த³னாதி³காலே ‘‘சோரோ அய’’ந்தி க³ஹெத்வா ரஞ்ஞோ த³ஸ்ஸிதோ இதே⁴வ ஹத்த²பாதா³தி³சே²த³னங் பத்வா ஸம்பராயே சதூஸு அபாயேஸு மஹாது³க்க²ங் அனுபோ⁴தி.
Tattha yathā āpānīyakaṃsamhi guṇe ca ādīnave ca ārocite so puriso piyavaṇṇādisampadāyameva sañjātavego ‘‘sace maraṇaṃ bhavissati, pacchā jānissāmī’’ti sahasā appaṭisaṅkhāya taṃ pivitvā maraṇaṃ vā maraṇamattaṃ vā dukkhaṃ nigacchati, evameva, bhikkhu, ‘‘pañcasu kāmaguṇesu dassanādivasena uppannasomanassamattameva assādo, ādīnavo pana diṭṭhadhammikasamparāyiko bahu nānappakāro, appassādā kāmā bahudukkhā bahupāyāsā’’ti evaṃ ācariyupajjhāyehi ānisaṃsañca ādīnavañca kathetvā – ‘‘samaṇapaṭipadaṃ paṭipajja, indriyesu guttadvāro bhava bhojane mattaññū jāgariyaṃ anuyutto’’ti evaṃ ovaditopi assādabaddhacittatāya ‘‘sace vuttappakāro ādīnavo bhavissati, pacchā jānissāmī’’ti ācariyupajjhāye apasādetvā uddesaparipucchādīni ceva vattapaṭipattiñca pahāya lokāmisakathaṃ kathento kāme paribhuñjitukāmatāya sikkhaṃ paccakkhāya hīnāyāvattati. Tato duccaritāni pūrento sandhicchedanādikāle ‘‘coro aya’’nti gahetvā rañño dassito idheva hatthapādādichedanaṃ patvā samparāye catūsu apāyesu mahādukkhaṃ anubhoti.
பானீயேன வா வினேதுந்தி ஸீதேன வாரினா ஹரிதுங். த³தி⁴மண்ட³கேனாதி த³தி⁴மண்ட³னமத்தேன. ப⁴ட்ட²லோணிகாயாதி ஸலோணேன ஸத்துபானீயேன. லோணஸோவீரகேனாதி ஸப்³ப³த⁴ஞ்ஞப²லகளீராதீ³னி பக்கி²பித்வா லோணஸோவீரகங் நாம கரொந்தி, தேன.
Pānīyena vā vinetunti sītena vārinā harituṃ. Dadhimaṇḍakenāti dadhimaṇḍanamattena. Bhaṭṭhaloṇikāyāti saloṇena sattupānīyena. Loṇasovīrakenāti sabbadhaññaphalakaḷīrādīni pakkhipitvā loṇasovīrakaṃ nāma karonti, tena.
ஓபம்மஸங்ஸந்த³னங் பனெத்த² – க⁴ம்மாபி⁴தத்தபுரிஸோ விய வட்டஸன்னிஸ்ஸிதகாலே யோகா³வசரோ த³ட்ட²ப்³போ³, தஸ்ஸ புரிஸஸ்ஸ படிஸங்கா² ஆபானீயகங்ஸங் பஹாய பானீயாதீ³ஹி பிபாஸஸ்ஸ வினோத³னங் விய பி⁴க்கு²னோ ஆசரியுபஜ்ஜா²யானங் ஓவாதே³ ட²த்வா ச²த்³வாராதீ³னி பரிக்³க³ஹெத்வா அனுக்கமேன விபஸ்ஸனங் வட்³டெ⁴ந்தஸ்ஸ அரஹத்தப²லாதி⁴க³மோ, பானீயாதீ³னி சத்தாரி பானானி விய ஹி சத்தாரோ மக்³கா³, தேஸு அஞ்ஞதரங் பிவித்வா ஸுராபிபாஸிதங் வினோதெ³த்வா ஸுகி²னோ யேன காமங் க³மனங் விய கீ²ணாஸவஸ்ஸ சதுமக்³க³பானங் பிவித்வா தண்ஹங் வினோதெ³த்வா அக³தபுப்³ப³ங் நிப்³பா³னதி³ஸங் க³மனகாலோ வேதி³தப்³போ³. ச²ட்ட²ங்.
Opammasaṃsandanaṃ panettha – ghammābhitattapuriso viya vaṭṭasannissitakāle yogāvacaro daṭṭhabbo, tassa purisassa paṭisaṅkhā āpānīyakaṃsaṃ pahāya pānīyādīhi pipāsassa vinodanaṃ viya bhikkhuno ācariyupajjhāyānaṃ ovāde ṭhatvā chadvārādīni pariggahetvā anukkamena vipassanaṃ vaḍḍhentassa arahattaphalādhigamo, pānīyādīni cattāri pānāni viya hi cattāro maggā, tesu aññataraṃ pivitvā surāpipāsitaṃ vinodetvā sukhino yena kāmaṃ gamanaṃ viya khīṇāsavassa catumaggapānaṃ pivitvā taṇhaṃ vinodetvā agatapubbaṃ nibbānadisaṃ gamanakālo veditabbo. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஸம்மஸஸுத்தங் • 6. Sammasasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. ஸம்மஸஸுத்தவண்ணனா • 6. Sammasasuttavaṇṇanā
