| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༦. སམྨསསུཏྟཝཎྞནཱ
6. Sammasasuttavaṇṇanā
༦༦. ཚཊྛེ ཨསྶཱཏི བྷགཝཏོ། སཎྷསུཁུམདྷམྨཔརིདཱིཔནཏོ སུཁུམཱ། ཏཱིཧི ལཀྑཎེཧི ཨངྐིཡཏྟཱ ཏིལཀྑཎཱཧཏཱ, ཨནིཙྩཱདིལཀྑཎཔརིདཱིཔིནཱིཏི ཨཏྠོ། ཨརིཡདྷམྨཱདྷིགམསྶ ཨུཔནིསྶཡབྷཱུཏེན ཧེཏུནཱ སཧེཏུཀཱ། ཏིཧེཏུཀཔཊིསནྡྷིཔཉྙཱཡ པཱཊིཧཱརིཡཔཉྙཱཡ ཙ ཨཏྠིཏཱཡ པཉྙཝནྟོ ན ཀེཝལཾ ཨཛ྄ཛྷཏྟིཀཨངྒསམྤཏྟིཡེཝ, བཱཧིརངྒསམྤཏྟིཔི ནེསམཏྠཱིཏི དསྶེཏུཾ ‘‘སིནིདྡྷཱནཱི’’ཏིཨཱདི ཝུཏྟཾ། ཨབྦྷནྟརནྟི ཨཛ྄ཛྷཏྟཾ། པཙྩཡསམྨསནནྟི པཙྩཡུཔྤནྣཱནཾ པཙྩཡཝཱིམཾསཾ།
66. Chaṭṭhe assāti bhagavato. Saṇhasukhumadhammaparidīpanato sukhumā. Tīhi lakkhaṇehi aṅkiyattā tilakkhaṇāhatā, aniccādilakkhaṇaparidīpinīti attho. Ariyadhammādhigamassa upanissayabhūtena hetunā sahetukā. Tihetukapaṭisandhipaññāya pāṭihāriyapaññāya ca atthitāya paññavanto na kevalaṃ ajjhattikaaṅgasampattiyeva, bāhiraṅgasampattipi nesamatthīti dassetuṃ ‘‘siniddhānī’’tiādi vuttaṃ. Abbhantaranti ajjhattaṃ. Paccayasammasananti paccayuppannānaṃ paccayavīmaṃsaṃ.
ཨཱརམྦྷཱནུརཱུཔཱ ཨནུསནྡྷི ཡཐཱནུསནྡྷི། ན གཏཱཏི ན སམྤཏྟཱ། ཨསམྦྷིནྣཔདནྟི ཨཝོམིསྶཀཔདཾ, ཨཉྙཏྠ ཨེཝཾ ཨནཱགཏཾ ཝཱཀྱནྟི ཨཏྠོ། ཏེནཱཧ ‘‘ཨཉྙཏྠ ཧི ཨེཝཾ ཝུཏྟཾ ནཱམ ནཏྠཱི’’ཏི། ཨེཝནྟི ‘‘ཏེནཧཱནནྡཱ’’ཏི ཨེཀཝཙནཾ, ‘‘སུཎཱཐ མནསི ཀརོཐཱ’’ཏི བཧུཝཙནཾ ཀཏྭཱ ཝུཏྟཾ ནཱམ ནཏྠཱིཏི ཨཏྠོ། ཀེཙི པན ‘‘ཏེནཧཱནནྡཱ’’ཏི ཨིདྷཱཔི བཧུཝཙནམེཝ ཀཏྭཱ པཋནྟི ‘‘སཱདྷུ ཨནུརུདྡྷཱ’’ཏིཨཱདཱིསུ ཝིཡ། ཨུཔདྷཱིཏི ཨདྷིཔྤེཏཾ ཨུཔདྷཱིཡཏི ཨེཏྠ དུཀྑནྟི། ཨུཔྤཛྫཏི ཨུཔྤཱདཀྑཎཾ ཨུདཡཾ པཊིལབྷཏི ‘‘པཱཀཊབྷཱཝོ ཋིཏིཀོ, ཨཏྟལཱབྷོ ཨུདཡོ’’ཏི། ནིཝིསཏི ནིཝེསཾ ཨོཀཱསཾ པཊིལབྷཏི། ཨེཀཝཱརམེཝ ཧི ཨུཔྤནྣམཏྟསྶ དྷམྨསྶ དུབྦལཏྟེན ཨོཀཱསེ ཝིཡ པཏིཊྛཧནཾ ནཏྠི, པུནཔྤུནཾ ཨཱརམྨཎེ པཝཏྟམཱནཾ ནིཝིཊྛཾ པཏིཊྛིཏཾ ནཱམ ཧོཏི། ཏེནཱཧ ‘‘ནིཝིསཏཱིཏི པུནཔྤུནཾ པཝཏྟིཝསེན པཏིཊྛཧཏཱི’’ཏི།
Ārambhānurūpā anusandhi yathānusandhi. Na gatāti na sampattā. Asambhinnapadanti avomissakapadaṃ, aññattha evaṃ anāgataṃ vākyanti attho. Tenāha ‘‘aññattha hi evaṃ vuttaṃ nāma natthī’’ti. Evanti ‘‘tenahānandā’’ti ekavacanaṃ, ‘‘suṇātha manasi karothā’’ti bahuvacanaṃ katvā vuttaṃ nāma natthīti attho. Keci pana ‘‘tenahānandā’’ti idhāpi bahuvacanameva katvā paṭhanti ‘‘sādhu anuruddhā’’tiādīsu viya. Upadhīti adhippetaṃ upadhīyati ettha dukkhanti. Uppajjati uppādakkhaṇaṃ udayaṃ paṭilabhati ‘‘pākaṭabhāvo ṭhitiko, attalābho udayo’’ti. Nivisati nivesaṃ okāsaṃ paṭilabhati. Ekavārameva hi uppannamattassa dhammassa dubbalattena okāse viya patiṭṭhahanaṃ natthi, punappunaṃ ārammaṇe pavattamānaṃ niviṭṭhaṃ patiṭṭhitaṃ nāma hoti. Tenāha ‘‘nivisatīti punappunaṃ pavattivasena patiṭṭhahatī’’ti.
པིཡསབྷཱཝནྟི པིཡཱཡིཏབྦཛཱཏིཀཾ། མདྷུརསབྷཱཝནྟི ཨིཊྛཛཱཏིཀཾ། ཨབྷིནིཝིཊྛཱཏི ཏཎྷཱབྷིནིཝེསེན ཨོཏིཎྞཱ། སམྤཏྟིཡནྟི བྷཝསམྤཏྟིཡཾ། ནིམིཏྟགྒཧཎཱནུསཱརེནཱཏི པཊིབིམྦགྒཧཎཱནུསཱརེན། ཀཎྞསྶ ཚིདྡཔདེསཾ རཛཏནཱལི༹ཀཾ ཝིཡ, ཀཎྞབདྡྷཾ པན པཱམངྒསུཏྟཾ ཝིཡ། ཏུངྒཱ ཨུཙྩཱ དཱིགྷཱ ནཱསིཀཱ ཏུངྒནཱསཱ། ཨེཝཾ ལདྡྷཝོཧཱརཾ ཨཏྟནོ གྷཱནཾ། ‘‘ལདྡྷཝོཧཱརཱ’’ཏི ཝཱ པཱཋོ། ཏསྨིཾ སཏི ཏུངྒཱ ནཱསཱ ཡེསཾ ཏེ ཏུངྒནཱསཱ། ཨེཝཾ ལདྡྷཝོཧཱརཱ སཏྟཱ ཨཏྟནོ གྷཱནནྟི ཡོཛནཱ ཝཎྞསཎྛཱནཏོ རཏྟཀམྦལཔཊལཾ ཝིཡ། སམྥསྶཏོ མུདུསིནིདྡྷཾ ཀིཙྩཏོ སིནིདྡྷམདྷུརརསདཾ། སཱལལཊྛིནྟི སཱལཀྑནྡྷཾ།
Piyasabhāvanti piyāyitabbajātikaṃ. Madhurasabhāvanti iṭṭhajātikaṃ. Abhiniviṭṭhāti taṇhābhinivesena otiṇṇā. Sampattiyanti bhavasampattiyaṃ. Nimittaggahaṇānusārenāti paṭibimbaggahaṇānusārena. Kaṇṇassa chiddapadesaṃ rajatanāḷikaṃ viya, kaṇṇabaddhaṃ pana pāmaṅgasuttaṃ viya. Tuṅgā uccā dīghā nāsikā tuṅganāsā. Evaṃ laddhavohāraṃ attano ghānaṃ. ‘‘Laddhavohārā’’ti vā pāṭho. Tasmiṃ sati tuṅgā nāsā yesaṃ te tuṅganāsā. Evaṃ laddhavohārā sattā attano ghānanti yojanā vaṇṇasaṇṭhānato rattakambalapaṭalaṃ viya. Samphassato mudusiniddhaṃ kiccato siniddhamadhurarasadaṃ. Sālalaṭṭhinti sālakkhandhaṃ.
ཨདྡསཾསཱུཏི པསྶིཾསུ། ཨེཝཾ ཝུཏྟནྟི ‘‘ཀཾསེ’’ཏི ཨེཝཾ ཝུཏྟཾ ཨདྷིཊྛཱནཝོཧཱརེན།
Addasaṃsūti passiṃsu. Evaṃ vuttanti ‘‘kaṃse’’ti evaṃ vuttaṃ adhiṭṭhānavohārena.
སམྤཏྟིནྟི ཝཎྞཱདིགུཎཾ། ཨཱདཱིནཝནྟི མརཎགྒཏཏོ།
Sampattinti vaṇṇādiguṇaṃ. Ādīnavanti maraṇaggatato.
སཏྟུཔཱནཱིཡེནཱཏི སཏྟུཾ པཀྑིཔིཏྭཱ ཨཱལོལིཏཔཱནཱིཡེན། ཙཏྟཱརི པཱནཱནི ཝིཡ ཙཏྟཱརོ མགྒཱ ཏཎྷཱཔིཔཱསཱཝཱུཔསམནཏོ།
Sattupānīyenāti sattuṃ pakkhipitvā ālolitapānīyena. Cattāri pānāni viya cattāro maggā taṇhāpipāsāvūpasamanato.
སམྨསསུཏྟཝཎྞནཱ ནིཊྛིཏཱ།
Sammasasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༦. སམྨསསུཏྟཾ • 6. Sammasasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༦. སམྨསསུཏྟཝཎྞནཱ • 6. Sammasasuttavaṇṇanā
