| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੬. ਸਮ੍ਮਸਸੁਤ੍ਤવਣ੍ਣਨਾ
6. Sammasasuttavaṇṇanā
੬੬. ਛਟ੍ਠੇ ਆਮਨ੍ਤੇਸੀਤਿ ਕਸ੍ਮਾ ਆਮਨ੍ਤੇਸਿ? ਯਸ੍ਮਾਸ੍ਸ ਸੁਖੁਮਾ ਤਿਲਕ੍ਖਣਾਹਤਾ ਧਮ੍ਮਦੇਸਨਾ ਉਪਟ੍ਠਾਸਿ। ਤਸ੍ਮਿਂ ਕਿਰ ਜਨਪਦੇ ਮਨੁਸ੍ਸਾ ਸਹੇਤੁਕਾ ਪਞ੍ਞવਨ੍ਤੋ। ਸਿਨਿਦ੍ਧਾਨਿ ਕਿਰੇਤ੍ਥ ਭੋਜਨਾਨਿ, ਤਾਨਿਸੇવਤੋ ਜਨਸ੍ਸ ਪਞ੍ਞਾ વਡ੍ਢਤਿ, ਤੇ ਗਮ੍ਭੀਰਂ ਤਿਲਕ੍ਖਣਾਹਤਂ ਧਮ੍ਮਕਥਂ ਪਟਿવਿਜ੍ਝਿਤੁਂ ਸਮਤ੍ਥਾ ਹੋਨ੍ਤਿ। ਤੇਨੇવ ਭਗવਾ ਦੀਘਮਜ੍ਝਿਮੇਸੁ ਮਹਾਸਤਿਪਟ੍ਠਾਨਾਨਿ (ਦੀ॰ ਨਿ॰ ੨.੩੭੨ ਆਦਯੋ) ਮਹਾਨਿਦਾਨਂ (ਦੀ॰ ਨਿ॰ ੨.੯੫ ਆਦਯੋ), ਆਨੇਞ੍ਜਸਪ੍ਪਾਯਂ (ਮ॰ ਨਿ॰ ੩.੬੬ ਆਦਯੋ), ਸਂਯੁਤ੍ਤਕੇ ਚੂਲ਼ਨਿਦਾਨਾਦਿਸੁਤ੍ਤਨ੍ਤਿ ਏવਮਾਦੀਨਿ ਅਞ੍ਞਾਨਿ ਗਮ੍ਭੀਰਾਨਿ ਸੁਤ੍ਤਾਨਿ ਤਤ੍ਥੇવ ਕਥੇਸਿ। ਸਮ੍ਮਸਥ ਨੋਤਿ ਸਮ੍ਮਸਥ ਨੁ। ਅਨ੍ਤਰਂ ਸਮ੍ਮਸਨ੍ਤਿ ਅਬ੍ਭਨ੍ਤਰਂ ਪਚ੍ਚਯਸਮ੍ਮਸਨਂ। ਨ ਸੋ ਭਿਕ੍ਖੁ ਭਗવਤੋ ਚਿਤ੍ਤਂ ਆਰਾਧੇਸੀਤਿ ਪਚ੍ਚਯਾਕਾਰવਸੇਨ ਬ੍ਯਾਕਾਰਾਪੇਤੁਕਾਮਸ੍ਸ ਭਗવਤੋ ਤਥਾ ਅਬ੍ਯਾਕਰਿਤ੍વਾ ਦ੍વਤ੍ਤਿਂਸਾਕਾਰવਸੇਨ ਬ੍ਯਾਕਰੋਨ੍ਤੋ ਅਜ੍ਝਾਸਯਂ ਗਹੇਤੁਂ ਨਾਸਕ੍ਖਿ।
66. Chaṭṭhe āmantesīti kasmā āmantesi? Yasmāssa sukhumā tilakkhaṇāhatā dhammadesanā upaṭṭhāsi. Tasmiṃ kira janapade manussā sahetukā paññavanto. Siniddhāni kirettha bhojanāni, tānisevato janassa paññā vaḍḍhati, te gambhīraṃ tilakkhaṇāhataṃ dhammakathaṃ paṭivijjhituṃ samatthā honti. Teneva bhagavā dīghamajjhimesu mahāsatipaṭṭhānāni (dī. ni. 2.372 ādayo) mahānidānaṃ (dī. ni. 2.95 ādayo), āneñjasappāyaṃ (ma. ni. 3.66 ādayo), saṃyuttake cūḷanidānādisuttanti evamādīni aññāni gambhīrāni suttāni tattheva kathesi. Sammasatha noti sammasatha nu. Antaraṃ sammasanti abbhantaraṃ paccayasammasanaṃ. Na so bhikkhu bhagavato cittaṃ ārādhesīti paccayākāravasena byākārāpetukāmassa bhagavato tathā abyākaritvā dvattiṃsākāravasena byākaronto ajjhāsayaṃ gahetuṃ nāsakkhi.
ਏਤਦવੋਚਾਤਿ ਦੇਸਨਾ ਯਥਾਨੁਸਨ੍ਧਿਂ ਨ ਗਤਾ, ਦੇਸਨਾਯ ਯਥਾਨੁਸਨ੍ਧਿਗਮਨਤ੍ਥਂ ਏਤਦવੋਚ। ਤੇਨਹਾਨਨ੍ਦ, ਸੁਣਾਥਾਤਿ ਇਦਂ ਤੇਪਿਟਕੇ ਬੁਦ੍ਧવਚਨੇ ਅਸਮ੍ਭਿਨ੍ਨਪਦਂ। ਅਞ੍ਞਤ੍ਥ ਹਿ ਏવਂ વੁਤ੍ਤਂ ਨਾਮ ਨਤ੍ਥਿ। ਉਪਧਿਨਿਦਾਨਨ੍ਤਿ ਖਨ੍ਧੁਪਧਿਨਿਦਾਨਂ। ਖਨ੍ਧਪਞ੍ਚਕਞ੍ਹੇਤ੍ਥ ਉਪਧੀਤਿ ਅਧਿਪ੍ਪੇਤਂ। ਉਪ੍ਪਜ੍ਜਤੀਤਿ ਜਾਯਤਿ। ਨਿવਿਸਤੀਤਿ ਪੁਨਪ੍ਪੁਨਂ ਪવਤ੍ਤਿવਸੇਨ ਪਤਿਟ੍ਠਹਤਿ।
Etadavocāti desanā yathānusandhiṃ na gatā, desanāya yathānusandhigamanatthaṃ etadavoca. Tenahānanda, suṇāthāti idaṃ tepiṭake buddhavacane asambhinnapadaṃ. Aññattha hi evaṃ vuttaṃ nāma natthi. Upadhinidānanti khandhupadhinidānaṃ. Khandhapañcakañhettha upadhīti adhippetaṃ. Uppajjatīti jāyati. Nivisatīti punappunaṃ pavattivasena patiṭṭhahati.
ਯਂ ਖੋ ਲੋਕੇ ਪਿਯਰੂਪਂ ਸਾਤਰੂਪਨ੍ਤਿ ਯਂ ਲੋਕਸ੍ਮਿਂ ਪਿਯਸਭਾવਞ੍ਚੇવ ਮਧੁਰਸਭਾવਞ੍ਚ। ਚਕ੍ਖੁਂ ਲੋਕੇਤਿਆਦੀਸੁ ਲੋਕਸ੍ਮਿਞ੍ਹਿ ਚਕ੍ਖਾਦੀਸੁ ਮਮਤ੍ਤੇਨ ਅਭਿਨਿવਿਟ੍ਠਾ ਸਤ੍ਤਾ ਸਮ੍ਪਤ੍ਤਿਯਂ ਪਤਿਟ੍ਠਿਤਾ ਅਤ੍ਤਨੋ ਚਕ੍ਖੁਂ ਆਦਾਸਾਦੀਸੁ ਨਿਮਿਤ੍ਤਗ੍ਗਹਣਾਨੁਸਾਰੇਨ વਿਪ੍ਪਸਨ੍ਨਪਞ੍ਚਪਸਾਦਂ ਸੁવਣ੍ਣવਿਮਾਨੇ ਉਗ੍ਘਾਟਿਤਮਣਿਸੀਹਪਞ੍ਜਰਂ વਿਯ ਮਞ੍ਞਨ੍ਤਿ, ਸੋਤਂ ਰਜਤਪਨਾਲ਼ਿਕਂ વਿਯ ਪਾਮਙ੍ਗਸੁਤ੍ਤਂ વਿਯ ਚ ਮਞ੍ਞਨ੍ਤਿ, ਤੁਙ੍ਗਨਾਸਾਤਿ ਲਦ੍ਧવੋਹਾਰਂ ਘਾਨਂ વਟ੍ਟੇਤ੍વਾ ਠਪਿਤਹਰਿਤਾਲવਟ੍ਟਿਂ વਿਯ ਮਞ੍ਞਨ੍ਤਿ, ਜਿવ੍ਹਂ ਰਤ੍ਤਕਮ੍ਬਲਪਟਲਂ વਿਯ ਮੁਦੁਸਿਨਿਦ੍ਧਮਧੁਰਰਸਦਂ ਮਞ੍ਞਨ੍ਤਿ, ਕਾਯਂ ਸਾਲਲਟ੍ਠਿਂ વਿਯ ਸੁવਣ੍ਣਤੋਰਣਂ વਿਯ ਚ ਮਞ੍ਞਨ੍ਤਿ, ਮਨਂ ਅਞ੍ਞੇਸਂ ਮਨੇਨ ਅਸਦਿਸਂ ਉਲ਼ਾਰਂ ਮਞ੍ਞਨ੍ਤਿ।
Yaṃ kho loke piyarūpaṃ sātarūpanti yaṃ lokasmiṃ piyasabhāvañceva madhurasabhāvañca. Cakkhuṃ loketiādīsu lokasmiñhi cakkhādīsu mamattena abhiniviṭṭhā sattā sampattiyaṃ patiṭṭhitā attano cakkhuṃ ādāsādīsu nimittaggahaṇānusārena vippasannapañcapasādaṃ suvaṇṇavimāne ugghāṭitamaṇisīhapañjaraṃ viya maññanti, sotaṃ rajatapanāḷikaṃ viya pāmaṅgasuttaṃ viya ca maññanti, tuṅganāsāti laddhavohāraṃ ghānaṃ vaṭṭetvā ṭhapitaharitālavaṭṭiṃ viya maññanti, jivhaṃ rattakambalapaṭalaṃ viya mudusiniddhamadhurarasadaṃ maññanti, kāyaṃ sālalaṭṭhiṃ viya suvaṇṇatoraṇaṃ viya ca maññanti, manaṃ aññesaṃ manena asadisaṃ uḷāraṃ maññanti.
ਨਿਚ੍ਚਤੋ ਅਦ੍ਦਕ੍ਖੁਨ੍ਤਿ ਨਿਚ੍ਚਨ੍ਤਿ ਅਦ੍ਦਸਂਸੁ। ਸੇਸਪਦੇਸੁਪਿ ਏਸੇવ ਨਯੋ। ਨ ਪਰਿਮੁਚ੍ਚਿਂਸੁ ਦੁਕ੍ਖਸ੍ਮਾਤਿ ਸਕਲਸ੍ਮਾਪਿ વਟ੍ਟਦੁਕ੍ਖਾ ਨ ਪਰਿਮੁਚ੍ਚਿਂਸੁ। ਦਕ੍ਖਿਸ੍ਸਨ੍ਤੀਤਿ ਪਸ੍ਸਿਸ੍ਸਨ੍ਤਿ। ਆਪਾਨੀਯਕਂਸੋਤਿ ਸਰਕਸ੍ਸ ਨਾਮਂ। ਯਸ੍ਮਾ ਪਨੇਤ੍ਥ ਆਪਂ ਪਿવਨ੍ਤਿ, ਤਸ੍ਮਾ ‘‘ਆਪਾਨੀਯੋ’’ਤਿ વੁਚ੍ਚਤਿ। ਆਪਾਨੀਯੋ ਚ ਸੋ ਕਂਸੋ ਚਾਤਿ ਆਪਾਨੀਯਕਂਸੋ। ਸੁਰਾਮਣ੍ਡਸਰਕਸ੍ਸੇਤਂ ਨਾਮਂ। ‘‘વਣ੍ਣਸਮ੍ਪਨ੍ਨੋ’’ਤਿਆਦਿવਚਨਤੋ ਪਨ ਕਂਸੇ ਠਿਤਪਾਨਮੇવ ਏવਂ વੁਤ੍ਤਂ। ਘਮ੍ਮਾਭਿਤਤ੍ਤੋਤਿ ਘਮ੍ਮੇਨ ਅਭਿਤਤ੍ਤੋ। ਘਮ੍ਮਪਰੇਤੋਤਿ ਘਮ੍ਮੇਨ ਫੁਟ੍ਠੋ, ਅਨੁਗਤੋਤਿ ਅਤ੍ਥੋ। ਪਿવਤੋ ਹਿ ਖੋ ਤਂ ਛਾਦੇਸ੍ਸਤੀਤਿ ਪਿવਨ੍ਤਸ੍ਸ ਤਂ ਪਾਨੀਯਂ વਣ੍ਣਾਦਿਸਮ੍ਪਤ੍ਤਿਯਾ ਰੁਚ੍ਚਿਸ੍ਸਤਿ, ਸਕਲਸਰੀਰਂ વਾ ਫਰਿਤ੍વਾ ਤੁਟ੍ਠਿਂ ਉਪ੍ਪਾਦਯਮਾਨਂ ਠਸ੍ਸਤਿ। ਅਪ੍ਪਟਿਸਙ੍ਖਾਤਿ ਅਪਚ੍ਚવੇਕ੍ਖਿਤ੍વਾ।
Niccato addakkhunti niccanti addasaṃsu. Sesapadesupi eseva nayo. Na parimucciṃsu dukkhasmāti sakalasmāpi vaṭṭadukkhā na parimucciṃsu. Dakkhissantīti passissanti. Āpānīyakaṃsoti sarakassa nāmaṃ. Yasmā panettha āpaṃ pivanti, tasmā ‘‘āpānīyo’’ti vuccati. Āpānīyo ca so kaṃso cāti āpānīyakaṃso. Surāmaṇḍasarakassetaṃ nāmaṃ. ‘‘Vaṇṇasampanno’’tiādivacanato pana kaṃse ṭhitapānameva evaṃ vuttaṃ. Ghammābhitattoti ghammena abhitatto. Ghammaparetoti ghammena phuṭṭho, anugatoti attho. Pivato hi kho taṃ chādessatīti pivantassa taṃ pānīyaṃ vaṇṇādisampattiyā ruccissati, sakalasarīraṃ vā pharitvā tuṭṭhiṃ uppādayamānaṃ ṭhassati. Appaṭisaṅkhāti apaccavekkhitvā.
ਏવਮੇવ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਆਪਾਨੀਯਕਂਸੋ વਿਯ ਹਿ ਲੋਕੇ ਪਿਯਰੂਪਂ ਸਾਤਰੂਪਂ ਆਰਮ੍ਮਣਂ ਦਟ੍ਠਬ੍ਬਂ, ਘਮ੍ਮਾਭਿਤਤ੍ਤਪੁਰਿਸੋ વਿਯ વਟ੍ਟਨਿਸ੍ਸਿਤੋ ਪੁਥੁਜ੍ਜਨੋ, ਆਪਾਨੀਯਕਂਸੇਨ ਨਿਮਨ੍ਤਨਪੁਰਿਸੋ વਿਯ ਲੋਕੇ ਪਿਯਰੂਪੇਨ ਸਾਤਰੂਪੇਨ ਆਰਮ੍ਮਣੇਨ ਨਿਮਨ੍ਤਕਜਨੋ, ਆਪਾਨੀਯਕਂਸੇ ਸਮ੍ਪਤ੍ਤਿਞ੍ਚ ਆਦੀਨવਞ੍ਚ ਆਰੋਚੇਨ੍ਤੋ ਆਪਾਨਕਮਨੁਸ੍ਸੋ વਿਯ ਆਚਰਿਯੁਪਜ੍ਝਾਯਾਦਿਕੋ ਕਲ੍ਯਾਣਮਿਤ੍ਤੋ। ਯਥੇવ ਹਿ ਤਸ੍ਸ ਪੁਰਿਸਸ੍ਸ ਅਪਲੋਕਿਤਮਨੁਸ੍ਸੋ ਆਪਾਨੀਯਕਂਸੇ ਗੁਣਞ੍ਚ ਆਦੀਨવਞ੍ਚ ਆਰੋਚੇਤਿ, ਏવਮੇવ ਆਚਰਿਯੋ વਾ ਉਪਜ੍ਝਾਯੋ વਾ ਭਿਕ੍ਖੁਨੋ ਪਞ੍ਚਸੁ ਕਾਮਗੁਣੇਸੁ ਅਸ੍ਸਾਦਞ੍ਚ ਨਿਸ੍ਸਰਣਞ੍ਚ ਕਥੇਤਿ।
Evameva khoti ettha idaṃ opammasaṃsandanaṃ – āpānīyakaṃso viya hi loke piyarūpaṃ sātarūpaṃ ārammaṇaṃ daṭṭhabbaṃ, ghammābhitattapuriso viya vaṭṭanissito puthujjano, āpānīyakaṃsena nimantanapuriso viya loke piyarūpena sātarūpena ārammaṇena nimantakajano, āpānīyakaṃse sampattiñca ādīnavañca ārocento āpānakamanusso viya ācariyupajjhāyādiko kalyāṇamitto. Yatheva hi tassa purisassa apalokitamanusso āpānīyakaṃse guṇañca ādīnavañca āroceti, evameva ācariyo vā upajjhāyo vā bhikkhuno pañcasu kāmaguṇesu assādañca nissaraṇañca katheti.
ਤਤ੍ਥ ਯਥਾ ਆਪਾਨੀਯਕਂਸਮ੍ਹਿ ਗੁਣੇ ਚ ਆਦੀਨવੇ ਚ ਆਰੋਚਿਤੇ ਸੋ ਪੁਰਿਸੋ ਪਿਯવਣ੍ਣਾਦਿਸਮ੍ਪਦਾਯਮੇવ ਸਞ੍ਜਾਤવੇਗੋ ‘‘ਸਚੇ ਮਰਣਂ ਭવਿਸ੍ਸਤਿ, ਪਚ੍ਛਾ ਜਾਨਿਸ੍ਸਾਮੀ’’ਤਿ ਸਹਸਾ ਅਪ੍ਪਟਿਸਙ੍ਖਾਯ ਤਂ ਪਿવਿਤ੍વਾ ਮਰਣਂ વਾ ਮਰਣਮਤ੍ਤਂ વਾ ਦੁਕ੍ਖਂ ਨਿਗਚ੍ਛਤਿ, ਏવਮੇવ, ਭਿਕ੍ਖੁ, ‘‘ਪਞ੍ਚਸੁ ਕਾਮਗੁਣੇਸੁ ਦਸ੍ਸਨਾਦਿવਸੇਨ ਉਪ੍ਪਨ੍ਨਸੋਮਨਸ੍ਸਮਤ੍ਤਮੇવ ਅਸ੍ਸਾਦੋ, ਆਦੀਨવੋ ਪਨ ਦਿਟ੍ਠਧਮ੍ਮਿਕਸਮ੍ਪਰਾਯਿਕੋ ਬਹੁ ਨਾਨਪ੍ਪਕਾਰੋ, ਅਪ੍ਪਸ੍ਸਾਦਾ ਕਾਮਾ ਬਹੁਦੁਕ੍ਖਾ ਬਹੁਪਾਯਾਸਾ’’ਤਿ ਏવਂ ਆਚਰਿਯੁਪਜ੍ਝਾਯੇਹਿ ਆਨਿਸਂਸਞ੍ਚ ਆਦੀਨવਞ੍ਚ ਕਥੇਤ੍વਾ – ‘‘ਸਮਣਪਟਿਪਦਂ ਪਟਿਪਜ੍ਜ, ਇਨ੍ਦ੍ਰਿਯੇਸੁ ਗੁਤ੍ਤਦ੍વਾਰੋ ਭવ ਭੋਜਨੇ ਮਤ੍ਤਞ੍ਞੂ ਜਾਗਰਿਯਂ ਅਨੁਯੁਤ੍ਤੋ’’ਤਿ ਏવਂ ਓવਦਿਤੋਪਿ ਅਸ੍ਸਾਦਬਦ੍ਧਚਿਤ੍ਤਤਾਯ ‘‘ਸਚੇ વੁਤ੍ਤਪ੍ਪਕਾਰੋ ਆਦੀਨવੋ ਭવਿਸ੍ਸਤਿ, ਪਚ੍ਛਾ ਜਾਨਿਸ੍ਸਾਮੀ’’ਤਿ ਆਚਰਿਯੁਪਜ੍ਝਾਯੇ ਅਪਸਾਦੇਤ੍વਾ ਉਦ੍ਦੇਸਪਰਿਪੁਚ੍ਛਾਦੀਨਿ ਚੇવ વਤ੍ਤਪਟਿਪਤ੍ਤਿਞ੍ਚ ਪਹਾਯ ਲੋਕਾਮਿਸਕਥਂ ਕਥੇਨ੍ਤੋ ਕਾਮੇ ਪਰਿਭੁਞ੍ਜਿਤੁਕਾਮਤਾਯ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾવਤ੍ਤਤਿ। ਤਤੋ ਦੁਚ੍ਚਰਿਤਾਨਿ ਪੂਰੇਨ੍ਤੋ ਸਨ੍ਧਿਚ੍ਛੇਦਨਾਦਿਕਾਲੇ ‘‘ਚੋਰੋ ਅਯ’’ਨ੍ਤਿ ਗਹੇਤ੍વਾ ਰਞ੍ਞੋ ਦਸ੍ਸਿਤੋ ਇਧੇવ ਹਤ੍ਥਪਾਦਾਦਿਛੇਦਨਂ ਪਤ੍વਾ ਸਮ੍ਪਰਾਯੇ ਚਤੂਸੁ ਅਪਾਯੇਸੁ ਮਹਾਦੁਕ੍ਖਂ ਅਨੁਭੋਤਿ।
Tattha yathā āpānīyakaṃsamhi guṇe ca ādīnave ca ārocite so puriso piyavaṇṇādisampadāyameva sañjātavego ‘‘sace maraṇaṃ bhavissati, pacchā jānissāmī’’ti sahasā appaṭisaṅkhāya taṃ pivitvā maraṇaṃ vā maraṇamattaṃ vā dukkhaṃ nigacchati, evameva, bhikkhu, ‘‘pañcasu kāmaguṇesu dassanādivasena uppannasomanassamattameva assādo, ādīnavo pana diṭṭhadhammikasamparāyiko bahu nānappakāro, appassādā kāmā bahudukkhā bahupāyāsā’’ti evaṃ ācariyupajjhāyehi ānisaṃsañca ādīnavañca kathetvā – ‘‘samaṇapaṭipadaṃ paṭipajja, indriyesu guttadvāro bhava bhojane mattaññū jāgariyaṃ anuyutto’’ti evaṃ ovaditopi assādabaddhacittatāya ‘‘sace vuttappakāro ādīnavo bhavissati, pacchā jānissāmī’’ti ācariyupajjhāye apasādetvā uddesaparipucchādīni ceva vattapaṭipattiñca pahāya lokāmisakathaṃ kathento kāme paribhuñjitukāmatāya sikkhaṃ paccakkhāya hīnāyāvattati. Tato duccaritāni pūrento sandhicchedanādikāle ‘‘coro aya’’nti gahetvā rañño dassito idheva hatthapādādichedanaṃ patvā samparāye catūsu apāyesu mahādukkhaṃ anubhoti.
ਪਾਨੀਯੇਨ વਾ વਿਨੇਤੁਨ੍ਤਿ ਸੀਤੇਨ વਾਰਿਨਾ ਹਰਿਤੁਂ। ਦਧਿਮਣ੍ਡਕੇਨਾਤਿ ਦਧਿਮਣ੍ਡਨਮਤ੍ਤੇਨ। ਭਟ੍ਠਲੋਣਿਕਾਯਾਤਿ ਸਲੋਣੇਨ ਸਤ੍ਤੁਪਾਨੀਯੇਨ। ਲੋਣਸੋવੀਰਕੇਨਾਤਿ ਸਬ੍ਬਧਞ੍ਞਫਲਕਲ਼ੀਰਾਦੀਨਿ ਪਕ੍ਖਿਪਿਤ੍વਾ ਲੋਣਸੋવੀਰਕਂ ਨਾਮ ਕਰੋਨ੍ਤਿ, ਤੇਨ।
Pānīyena vā vinetunti sītena vārinā harituṃ. Dadhimaṇḍakenāti dadhimaṇḍanamattena. Bhaṭṭhaloṇikāyāti saloṇena sattupānīyena. Loṇasovīrakenāti sabbadhaññaphalakaḷīrādīni pakkhipitvā loṇasovīrakaṃ nāma karonti, tena.
ਓਪਮ੍ਮਸਂਸਨ੍ਦਨਂ ਪਨੇਤ੍ਥ – ਘਮ੍ਮਾਭਿਤਤ੍ਤਪੁਰਿਸੋ વਿਯ વਟ੍ਟਸਨ੍ਨਿਸ੍ਸਿਤਕਾਲੇ ਯੋਗਾવਚਰੋ ਦਟ੍ਠਬ੍ਬੋ, ਤਸ੍ਸ ਪੁਰਿਸਸ੍ਸ ਪਟਿਸਙ੍ਖਾ ਆਪਾਨੀਯਕਂਸਂ ਪਹਾਯ ਪਾਨੀਯਾਦੀਹਿ ਪਿਪਾਸਸ੍ਸ વਿਨੋਦਨਂ વਿਯ ਭਿਕ੍ਖੁਨੋ ਆਚਰਿਯੁਪਜ੍ਝਾਯਾਨਂ ਓવਾਦੇ ਠਤ੍વਾ ਛਦ੍વਾਰਾਦੀਨਿ ਪਰਿਗ੍ਗਹੇਤ੍વਾ ਅਨੁਕ੍ਕਮੇਨ વਿਪਸ੍ਸਨਂ વਡ੍ਢੇਨ੍ਤਸ੍ਸ ਅਰਹਤ੍ਤਫਲਾਧਿਗਮੋ, ਪਾਨੀਯਾਦੀਨਿ ਚਤ੍ਤਾਰਿ ਪਾਨਾਨਿ વਿਯ ਹਿ ਚਤ੍ਤਾਰੋ ਮਗ੍ਗਾ, ਤੇਸੁ ਅਞ੍ਞਤਰਂ ਪਿવਿਤ੍વਾ ਸੁਰਾਪਿਪਾਸਿਤਂ વਿਨੋਦੇਤ੍વਾ ਸੁਖਿਨੋ ਯੇਨ ਕਾਮਂ ਗਮਨਂ વਿਯ ਖੀਣਾਸવਸ੍ਸ ਚਤੁਮਗ੍ਗਪਾਨਂ ਪਿવਿਤ੍વਾ ਤਣ੍ਹਂ વਿਨੋਦੇਤ੍વਾ ਅਗਤਪੁਬ੍ਬਂ ਨਿਬ੍ਬਾਨਦਿਸਂ ਗਮਨਕਾਲੋ વੇਦਿਤਬ੍ਬੋ। ਛਟ੍ਠਂ।
Opammasaṃsandanaṃ panettha – ghammābhitattapuriso viya vaṭṭasannissitakāle yogāvacaro daṭṭhabbo, tassa purisassa paṭisaṅkhā āpānīyakaṃsaṃ pahāya pānīyādīhi pipāsassa vinodanaṃ viya bhikkhuno ācariyupajjhāyānaṃ ovāde ṭhatvā chadvārādīni pariggahetvā anukkamena vipassanaṃ vaḍḍhentassa arahattaphalādhigamo, pānīyādīni cattāri pānāni viya hi cattāro maggā, tesu aññataraṃ pivitvā surāpipāsitaṃ vinodetvā sukhino yena kāmaṃ gamanaṃ viya khīṇāsavassa catumaggapānaṃ pivitvā taṇhaṃ vinodetvā agatapubbaṃ nibbānadisaṃ gamanakālo veditabbo. Chaṭṭhaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੬. ਸਮ੍ਮਸਸੁਤ੍ਤਂ • 6. Sammasasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੬. ਸਮ੍ਮਸਸੁਤ੍ਤવਣ੍ਣਨਾ • 6. Sammasasuttavaṇṇanā
