| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৫. সম্মুখাথৰিকত্থেরঅপদানৰণ্ণনা
5. Sammukhāthavikattheraapadānavaṇṇanā
জাযমানে ৰিপস্সিম্হীতিআদিকং আযস্মতো সম্মুখাথৰিকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে ব্রাহ্মণকুলে নিব্বত্তো সত্তৰস্সিককালেযেৰ সকসিপ্পে নিপ্ফত্তিং পত্তো ঘরাৰাসং সণ্ঠপেত্ৰা ৰসন্তো ৰিপস্সিম্হি বোধিসত্তে উপ্পন্নে সব্ববুদ্ধানং লক্খণানি ৰেদত্তযে দিস্সমানানি তানি রাজপ্পমুখস্স জনকাযস্স ৰিপস্সীবোধিসত্তস্স লক্খণঞ্চ বুদ্ধভাৰঞ্চ ব্যাকরিত্ৰা জনানং মানসং নিব্বাপেসি, অনেকানি চ থুতিৰচনানি নিৰেদেসি। সো তেন কুসলকম্মেন ছ কামাৰচরসম্পত্তিযো অনুভৰিত্ৰা মনুস্সেসু চ চক্কৰত্তিসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সদ্ধাজাতো পব্বজিত্ৰা নচিরস্সেৰ অরহা অহোসি। কতকুসলনামেন সম্মুখাথৰিকত্থেরোতি পাকটো।
Jāyamāne vipassimhītiādikaṃ āyasmato sammukhāthavikattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto sattavassikakāleyeva sakasippe nipphattiṃ patto gharāvāsaṃ saṇṭhapetvā vasanto vipassimhi bodhisatte uppanne sabbabuddhānaṃ lakkhaṇāni vedattaye dissamānāni tāni rājappamukhassa janakāyassa vipassībodhisattassa lakkhaṇañca buddhabhāvañca byākaritvā janānaṃ mānasaṃ nibbāpesi, anekāni ca thutivacanāni nivedesi. So tena kusalakammena cha kāmāvacarasampattiyo anubhavitvā manussesu ca cakkavattisampattiyo anubhavitvā imasmiṃ buddhuppāde kulagehe nibbatto viññutaṃ patto saddhājāto pabbajitvā nacirasseva arahā ahosi. Katakusalanāmena sammukhāthavikattheroti pākaṭo.
৪১. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো জাযমানে ৰিপস্সিম্হীতিআদিমাহ। ৰিপস্সিম্হি সম্মাসম্বুদ্ধে জাযমানে উপ্পজ্জমানে মাতুকুচ্ছিতো নিক্খন্তে অহং পাতুভূতং নিমিত্তং কারণং বুদ্ধভাৰস্স হেতুং ব্যাকরিং কথেসিং, অনেকানি অচ্ছরিযানি পাকটানি অকাসিন্তি অত্থো। সেসং ৰুত্তনযানুসারেন সুৰিঞ্ঞেয্যমেৰাতি।
41. So attano pubbakammaṃ saritvā somanassajāto pubbacaritāpadānaṃ pakāsento jāyamāne vipassimhītiādimāha. Vipassimhi sammāsambuddhe jāyamāne uppajjamāne mātukucchito nikkhante ahaṃ pātubhūtaṃ nimittaṃ kāraṇaṃ buddhabhāvassa hetuṃ byākariṃ kathesiṃ, anekāni acchariyāni pākaṭāni akāsinti attho. Sesaṃ vuttanayānusārena suviññeyyamevāti.
সম্মুখাথৰিকত্থেরঅপদানৰণ্ণনা সমত্তা।
Sammukhāthavikattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৫. সম্মুখাথৰিকত্থেরঅপদানং • 5. Sammukhāthavikattheraapadānaṃ
