| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၅. သမ္မုခာထဝိကတ္ထေရအပဒာနဝဏ္ဏနာ
5. Sammukhāthavikattheraapadānavaṇṇanā
ဇာယမာနေ ဝိပသ္သိမ္ဟီတိအာဒိကံ အာယသ္မတော သမ္မုခာထဝိကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဗ္ရာဟ္မဏကုလေ နိဗ္ဗတ္တော သတ္တဝသ္သိကကာလေယေဝ သကသိပ္ပေ နိပ္ဖတ္တိံ ပတ္တော ဃရာဝာသံ သဏ္ဌပေတ္ဝာ ဝသန္တော ဝိပသ္သိမ္ဟိ ဗောဓိသတ္တေ ဥပ္ပန္နေ သဗ္ဗဗုဒ္ဓာနံ လက္ခဏာနိ ဝေဒတ္တယေ ဒိသ္သမာနာနိ တာနိ ရာဇပ္ပမုခသ္သ ဇနကာယသ္သ ဝိပသ္သီဗောဓိသတ္တသ္သ လက္ခဏဉ္စ ဗုဒ္ဓဘာဝဉ္စ ဗ္ယာကရိတ္ဝာ ဇနာနံ မာနသံ နိဗ္ဗာပေသိ, အနေကာနိ စ ထုတိဝစနာနိ နိဝေဒေသိ။ သော တေန ကုသလကမ္မေန ဆ ကာမာဝစရသမ္ပတ္တိယော အနုဘဝိတ္ဝာ မနုသ္သေသု စ စက္ကဝတ္တိသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝိညုတံ ပတ္တော သဒ္ဓာဇာတော ပဗ္ဗဇိတ္ဝာ နစိရသ္သေဝ အရဟာ အဟောသိ။ ကတကုသလနာမေန သမ္မုခာထဝိကတ္ထေရောတိ ပာကဋော။
Jāyamāne vipassimhītiādikaṃ āyasmato sammukhāthavikattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto sattavassikakāleyeva sakasippe nipphattiṃ patto gharāvāsaṃ saṇṭhapetvā vasanto vipassimhi bodhisatte uppanne sabbabuddhānaṃ lakkhaṇāni vedattaye dissamānāni tāni rājappamukhassa janakāyassa vipassībodhisattassa lakkhaṇañca buddhabhāvañca byākaritvā janānaṃ mānasaṃ nibbāpesi, anekāni ca thutivacanāni nivedesi. So tena kusalakammena cha kāmāvacarasampattiyo anubhavitvā manussesu ca cakkavattisampattiyo anubhavitvā imasmiṃ buddhuppāde kulagehe nibbatto viññutaṃ patto saddhājāto pabbajitvā nacirasseva arahā ahosi. Katakusalanāmena sammukhāthavikattheroti pākaṭo.
၄၁. သော အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဇာယမာနေ ဝိပသ္သိမ္ဟီတိအာဒိမာဟ။ ဝိပသ္သိမ္ဟိ သမ္မာသမ္ဗုဒ္ဓေ ဇာယမာနေ ဥပ္ပဇ္ဇမာနေ မာတုကုစ္ဆိတော နိက္ခန္တေ အဟံ ပာတုဘူတံ နိမိတ္တံ ကာရဏံ ဗုဒ္ဓဘာဝသ္သ ဟေတုံ ဗ္ယာကရိံ ကထေသိံ, အနေကာနိ အစ္ဆရိယာနိ ပာကဋာနိ အကာသိန္တိ အတ္ထော။ သေသံ ဝုတ္တနယာနုသာရေန သုဝိညေယ္ယမေဝာတိ။
41. So attano pubbakammaṃ saritvā somanassajāto pubbacaritāpadānaṃ pakāsento jāyamāne vipassimhītiādimāha. Vipassimhi sammāsambuddhe jāyamāne uppajjamāne mātukucchito nikkhante ahaṃ pātubhūtaṃ nimittaṃ kāraṇaṃ buddhabhāvassa hetuṃ byākariṃ kathesiṃ, anekāni acchariyāni pākaṭāni akāsinti attho. Sesaṃ vuttanayānusārena suviññeyyamevāti.
သမ္မုခာထဝိကတ္ထေရအပဒာနဝဏ္ဏနာ သမတ္တာ။
Sammukhāthavikattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၅. သမ္မုခာထဝိကတ္ထေရအပဒာနံ • 5. Sammukhāthavikattheraapadānaṃ
