| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
5. සම්‌මුඛාථවිකත්‌ථෙරඅපදානවණ්‌ණනා
5. Sammukhāthavikattheraapadānavaṇṇanā
ජායමානෙ විපස්‌සිම්‌හීතිආදිකං ආයස්‌මතො සම්‌මුඛාථවිකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ බ්‍රාහ්‌මණකුලෙ නිබ්‌බත්‌තො සත්‌තවස්‌සිකකාලෙයෙව සකසිප්‌පෙ නිප්‌ඵත්‌තිං පත්‌තො ඝරාවාසං සණ්‌ඨපෙත්‌වා වසන්‌තො විපස්‌සිම්‌හි බොධිසත්‌තෙ උප්‌පන්‌නෙ සබ්‌බබුද්‌ධානං ලක්‌ඛණානි වෙදත්‌තයෙ දිස්‌සමානානි තානි රාජප්‌පමුඛස්‌ස ජනකායස්‌ස විපස්‌සීබොධිසත්‌තස්‌ස ලක්‌ඛණඤ්‌ච බුද්‌ධභාවඤ්‌ච බ්‍යාකරිත්‌වා ජනානං මානසං නිබ්‌බාපෙසි, අනෙකානි ච ථුතිවචනානි නිවෙදෙසි. සො තෙන කුසලකම්‌මෙන ඡ කාමාවචරසම්‌පත්‌තියො අනුභවිත්‌වා මනුස්‌සෙසු ච චක්‌කවත්‌තිසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌තො සද්‌ධාජාතො පබ්‌බජිත්‌වා නචිරස්‌සෙව අරහා අහොසි. කතකුසලනාමෙන සම්‌මුඛාථවිකත්‌ථෙරොති පාකටො.
Jāyamāne vipassimhītiādikaṃ āyasmato sammukhāthavikattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto sattavassikakāleyeva sakasippe nipphattiṃ patto gharāvāsaṃ saṇṭhapetvā vasanto vipassimhi bodhisatte uppanne sabbabuddhānaṃ lakkhaṇāni vedattaye dissamānāni tāni rājappamukhassa janakāyassa vipassībodhisattassa lakkhaṇañca buddhabhāvañca byākaritvā janānaṃ mānasaṃ nibbāpesi, anekāni ca thutivacanāni nivedesi. So tena kusalakammena cha kāmāvacarasampattiyo anubhavitvā manussesu ca cakkavattisampattiyo anubhavitvā imasmiṃ buddhuppāde kulagehe nibbatto viññutaṃ patto saddhājāto pabbajitvā nacirasseva arahā ahosi. Katakusalanāmena sammukhāthavikattheroti pākaṭo.
41. සො අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො ජායමානෙ විපස්‌සිම්‌හීතිආදිමාහ. විපස්‌සිම්‌හි සම්‌මාසම්‌බුද්‌ධෙ ජායමානෙ උප්‌පජ්‌ජමානෙ මාතුකුච්‌ඡිතො නික්‌ඛන්‌තෙ අහං පාතුභූතං නිමිත්‌තං කාරණං බුද්‌ධභාවස්‌ස හෙතුං බ්‍යාකරිං කථෙසිං, අනෙකානි අච්‌ඡරියානි පාකටානි අකාසින්‌ති අත්‌ථො. සෙසං වුත්‌තනයානුසාරෙන සුවිඤ්‌ඤෙය්‍යමෙවාති.
41. So attano pubbakammaṃ saritvā somanassajāto pubbacaritāpadānaṃ pakāsento jāyamāne vipassimhītiādimāha. Vipassimhi sammāsambuddhe jāyamāne uppajjamāne mātukucchito nikkhante ahaṃ pātubhūtaṃ nimittaṃ kāraṇaṃ buddhabhāvassa hetuṃ byākariṃ kathesiṃ, anekāni acchariyāni pākaṭāni akāsinti attho. Sesaṃ vuttanayānusārena suviññeyyamevāti.
සම්‌මුඛාථවිකත්‌ථෙරඅපදානවණ්‌ණනා සමත්‌තා.
Sammukhāthavikattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 5. සම්‌මුඛාථවිකත්‌ථෙරඅපදානං • 5. Sammukhāthavikattheraapadānaṃ
