| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
৪. সমথক্খন্ধকৰণ্ণনা
4. Samathakkhandhakavaṇṇanā
সম্মুখাৰিনযকথাৰণ্ণনা
Sammukhāvinayakathāvaṇṇanā
১৮৬-১৮৭. যত্থ যত্থ কম্মৰাচায ‘‘অয’’ন্তি ৰা ‘‘ইমে’’তি ৰা সম্মুখানিদ্দেসনিযমো অত্থি, সব্বং তং কম্মং সম্মুখাকরণীযমেৰ, ন কেৰলং তজ্জনীযাদিপঞ্চৰিধমেৰ। পঞ্চৰিধস্সেৰ পন উদ্ধরিত্ৰা দস্সনং কম্মক্খন্ধকে তাৰ তস্সেৰ পাল়িআরুল়্হত্তা, চতুৰীসতিযা পারাজিকেসু ৰিজ্জমানেসু পারাজিককণ্ডে আগতানংযেৰ চতুন্নং উদ্ধরিত্ৰা দস্সনং ৰিযাতি ৰেদিতব্বং। তত্থ ‘‘পুগ্গলস্স সম্মুখতা হত্থপাসূপগমনমেৰা’’তি ৰুত্তং, তং কারণং সম্মুখাকরণীযস্সপি সম্মুখানিদ্দেসনিযমাভাৰতো। কামং অযমত্থো কম্মক্খন্ধকেযেৰ ‘‘তীহি, ভিক্খৰে, অঙ্গেহি সমন্নাগতং তজ্জনীযকম্মং অধম্মকম্মঞ্চ হোতি…পে॰… অসম্মুখাকতং হোতী’’তি (চূল়ৰ॰ ৪) ৰচনেনেৰ সিদ্ধো, তত্থ পন আপত্তি ন দস্সিতা। ইধ ‘‘যো করেয্য, আপত্তি দুক্কটস্সা’’তি তত্থ ভৰিতব্বাপত্তিদস্সনত্থং ইদং আরদ্ধন্তি ৰেদিতব্বং। ‘‘সম্মুখাৰিনযপতিরূপকেন ৰূপসন্তম্পি সম্মুখাৰিনযেনেৰ ৰূপসন্তগণনং গচ্ছতীতি দস্সেতুং ‘অধম্মৰাদী পুগ্গলো’তিআদি আরদ্ধ’’ন্তি ৰুত্তং, লিখিতঞ্চ। এৰং ৰূপসন্তং সম্মুখাৰিনযপতিরূপকেন ৰূপসন্তং নাম হোতি, ন সম্মুখাৰিনযেন চ অঞ্ঞেন কেনচীতি দস্সেতুং ইদমারদ্ধন্তি আচরিযো।
186-187. Yattha yattha kammavācāya ‘‘aya’’nti vā ‘‘ime’’ti vā sammukhāniddesaniyamo atthi, sabbaṃ taṃ kammaṃ sammukhākaraṇīyameva, na kevalaṃ tajjanīyādipañcavidhameva. Pañcavidhasseva pana uddharitvā dassanaṃ kammakkhandhake tāva tasseva pāḷiāruḷhattā, catuvīsatiyā pārājikesu vijjamānesu pārājikakaṇḍe āgatānaṃyeva catunnaṃ uddharitvā dassanaṃ viyāti veditabbaṃ. Tattha ‘‘puggalassa sammukhatā hatthapāsūpagamanamevā’’ti vuttaṃ, taṃ kāraṇaṃ sammukhākaraṇīyassapi sammukhāniddesaniyamābhāvato. Kāmaṃ ayamattho kammakkhandhakeyeva ‘‘tīhi, bhikkhave, aṅgehi samannāgataṃ tajjanīyakammaṃ adhammakammañca hoti…pe… asammukhākataṃ hotī’’ti (cūḷava. 4) vacaneneva siddho, tattha pana āpatti na dassitā. Idha ‘‘yo kareyya, āpatti dukkaṭassā’’ti tattha bhavitabbāpattidassanatthaṃ idaṃ āraddhanti veditabbaṃ. ‘‘Sammukhāvinayapatirūpakena vūpasantampi sammukhāvinayeneva vūpasantagaṇanaṃ gacchatīti dassetuṃ ‘adhammavādī puggalo’tiādi āraddha’’nti vuttaṃ, likhitañca. Evaṃ vūpasantaṃ sammukhāvinayapatirūpakena vūpasantaṃ nāma hoti, na sammukhāvinayena ca aññena kenacīti dassetuṃ idamāraddhanti ācariyo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
১. সম্মুখাৰিনযো • 1. Sammukhāvinayo
কণ্হপক্খনৰকং • Kaṇhapakkhanavakaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / সম্মুখাৰিনযকথা • Sammukhāvinayakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সম্মুখাৰিনযকথাৰণ্ণনা • Sammukhāvinayakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. সম্মুখাৰিনযকথা • 1. Sammukhāvinayakathā
