| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༩. ཨདྷིཀརཎཝཱུཔསམནསམཐོ
9. Adhikaraṇavūpasamanasamatho
སམྨུཁཱཝིནཡོ
Sammukhāvinayo
༢༢༨. 1 ‘‘ཝིཝཱདཱདྷིཀརཎཾ ཀཏིཧི སམཐེཧི སམྨཏི? ཝིཝཱདཱདྷིཀརཎཾ དྭཱིཧི སམཐེཧི སམྨཏི – སམྨུཁཱཝིནཡེན ཙ, ཡེབྷུཡྻསིཀཱཡ ཙ། སིཡཱ ཝིཝཱདཱདྷིཀརཎཾ ཨེཀཾ སམཐཾ ཨནཱགམྨ ཡེབྷུཡྻསིཀཾ, ཨེཀེན སམཐེན སམེཡྻ – སམྨུཁཱཝིནཡེནཱཏི? སིཡཱཏིསྶ ཝཙནཱིཡཾ། ཡཐཱ ཀཐཾ ཝིཡ? ཨིདྷ པན, བྷིཀྑཝེ, བྷིཀྑཱུ ཝིཝདནྟི – དྷམྨོཏི ཝཱ ཨདྷམྨོཏི ཝཱ, ཝིནཡོཏི ཝཱ ཨཝིནཡོཏི ཝཱ, བྷཱསིཏཾ ལཔིཏཾ ཏཐཱགཏེནཱཏི ཝཱ ཨབྷཱསིཏཾ ཨལཔིཏཾ ཏཐཱགཏེནཱཏི ཝཱ, ཨཱཙིཎྞཾ ཏཐཱགཏེནཱཏི ཝཱ ཨནཱཙིཎྞཾ ཏཐཱགཏེནཱཏི ཝཱ, པཉྙཏྟཾ ཏཐཱགཏེནཱཏི ཝཱ ཨཔཉྙཏྟཾ ཏཐཱགཏེནཱཏི ཝཱ, ཨཱཔཏྟཱིཏི ཝཱ ཨནཱཔཏྟཱིཏི ཝཱ, ལཧུཀཱ ཨཱཔཏྟཱིཏི ཝཱ གརུཀཱ ཨཱཔཏྟཱིཏི ཝཱ, སཱཝསེསཱ ཨཱཔཏྟཱིཏི ཝཱ ཨནཝསེསཱ ཨཱཔཏྟཱིཏི ཝཱ, དུཊྛུལླཱ ཨཱཔཏྟཱིཏི ཝཱ ཨདུཊྛུལླཱ ཨཱཔཏྟཱིཏི ཝཱ།
228.2 ‘‘Vivādādhikaraṇaṃ katihi samathehi sammati? Vivādādhikaraṇaṃ dvīhi samathehi sammati – sammukhāvinayena ca, yebhuyyasikāya ca. Siyā vivādādhikaraṇaṃ ekaṃ samathaṃ anāgamma yebhuyyasikaṃ, ekena samathena sameyya – sammukhāvinayenāti? Siyātissa vacanīyaṃ. Yathā kathaṃ viya? Idha pana, bhikkhave, bhikkhū vivadanti – dhammoti vā adhammoti vā, vinayoti vā avinayoti vā, bhāsitaṃ lapitaṃ tathāgatenāti vā abhāsitaṃ alapitaṃ tathāgatenāti vā, āciṇṇaṃ tathāgatenāti vā anāciṇṇaṃ tathāgatenāti vā, paññattaṃ tathāgatenāti vā apaññattaṃ tathāgatenāti vā, āpattīti vā anāpattīti vā, lahukā āpattīti vā garukā āpattīti vā, sāvasesā āpattīti vā anavasesā āpattīti vā, duṭṭhullā āpattīti vā aduṭṭhullā āpattīti vā.
‘‘ཏེ ཙེ, བྷིཀྑཝེ, བྷིཀྑཱུ སཀྐོནྟི ཏཾ ཨདྷིཀརཎཾ ཝཱུཔསམེཏུཾ, ཨིདཾ ཝུཙྩཏི, བྷིཀྑཝེ, ཨདྷིཀརཎཾ ཝཱུཔསནྟཾ། ཀེན ཝཱུཔསནྟཾ? སམྨུཁཱཝིནཡེན། ཀིཉྩ ཏཏྠ སམྨུཁཱཝིནཡསྨིཾ? སངྒྷསམྨུཁཏཱ, དྷམྨསམྨུཁཏཱ, ཝིནཡསམྨུཁཏཱ, པུགྒལསམྨུཁཏཱ། ཀཱ ཙ ཏཏྠ སངྒྷསམྨུཁཏཱ? ཡཱཝཏིཀཱ བྷིཀྑཱུ ཀམྨཔྤཏྟཱ ཏེ ཨཱགཏཱ ཧོནྟི, ཚནྡཱརཧཱནཾ ཚནྡོ ཨཱཧཊོ ཧོཏི, སམྨུཁཱིབྷཱུཏཱ ན པཊིཀྐོསནྟི – ཨཡཾ ཏཏྠ སངྒྷསམྨུཁཏཱ། ཀཱ ཙ ཏཏྠ དྷམྨསམྨུཁཏཱ, ཝིནཡསམྨུཁཏཱ ? ཡེན དྷམྨེན ཡེན ཝིནཡེན ཡེན སཏྠུསཱསནེན ཏཾ ཨདྷིཀརཎཾ ཝཱུཔསམྨཏི – ཨཡཾ ཏཏྠ དྷམྨསམྨུཁཏཱ, ཝིནཡསམྨུཁཏཱ། ཀཱ ཙ ཏཏྠ པུགྒལསམྨུཁཏཱ? ཡོ ཙ ཝིཝདཏི, ཡེན ཙ ཝིཝདཏི, ཨུབྷོ ཨཏྠཔཙྩཏྠིཀཱ སམྨུཁཱིབྷཱུཏཱ ཧོནྟི – ཨཡཾ ཏཏྠ པུགྒལསམྨུཁཏཱ། ཨེཝཾ ཝཱུཔསནྟཾ ཙེ, བྷིཀྑཝེ, ཨདྷིཀརཎཾ ཀཱརཀོ ཨུཀྐོཊེཏི, ཨུཀྐོཊནཀཾ པཱཙིཏྟིཡཾ; ཚནྡདཱཡཀོ ཁཱིཡཏི, ཁཱིཡནཀཾ པཱཙིཏྟིཡཾ།
‘‘Te ce, bhikkhave, bhikkhū sakkonti taṃ adhikaraṇaṃ vūpasametuṃ, idaṃ vuccati, bhikkhave, adhikaraṇaṃ vūpasantaṃ. Kena vūpasantaṃ? Sammukhāvinayena. Kiñca tattha sammukhāvinayasmiṃ? Saṅghasammukhatā, dhammasammukhatā, vinayasammukhatā, puggalasammukhatā. Kā ca tattha saṅghasammukhatā? Yāvatikā bhikkhū kammappattā te āgatā honti, chandārahānaṃ chando āhaṭo hoti, sammukhībhūtā na paṭikkosanti – ayaṃ tattha saṅghasammukhatā. Kā ca tattha dhammasammukhatā, vinayasammukhatā ? Yena dhammena yena vinayena yena satthusāsanena taṃ adhikaraṇaṃ vūpasammati – ayaṃ tattha dhammasammukhatā, vinayasammukhatā. Kā ca tattha puggalasammukhatā? Yo ca vivadati, yena ca vivadati, ubho atthapaccatthikā sammukhībhūtā honti – ayaṃ tattha puggalasammukhatā. Evaṃ vūpasantaṃ ce, bhikkhave, adhikaraṇaṃ kārako ukkoṭeti, ukkoṭanakaṃ pācittiyaṃ; chandadāyako khīyati, khīyanakaṃ pācittiyaṃ.
༢༢༩. ‘‘ཏེ ཙེ, བྷིཀྑཝེ, བྷིཀྑཱུ ན སཀྐོནྟི ཏཾ ཨདྷིཀརཎཾ ཏསྨིཾ ཨཱཝཱསེ ཝཱུཔསམེཏུཾ, ཏེཧི, བྷིཀྑཝེ, བྷིཀྑཱུཧི, ཡསྨིཾ ཨཱཝཱསེ སམྦཧུལཱ 3 བྷིཀྑཱུ, སོ ཨཱཝཱསོ གནྟབྦོ། ཏེ ཙེ, བྷིཀྑཝེ, བྷིཀྑཱུ ཏཾ ཨཱཝཱསཾ གཙྪནྟཱ ཨནྟརཱམགྒེ སཀྐོནྟི ཏཾ ཨདྷིཀརཎཾ ཝཱུཔསམེཏུཾ, ཨིདཾ ཝུཙྩཏི, བྷིཀྑཝེ, ཨདྷིཀརཎཾ ཝཱུཔསནྟཾ། ཀེན ཝཱུཔསནྟཾ? སམྨུཁཱཝིནཡེན ། ཀིཉྩ ཏཏྠ སམྨུཁཱཝིནཡསྨིཾ? སངྒྷསམྨུཁཏཱ, དྷམྨསམྨུཁཏཱ, ཝིནཡསམྨུཁཏཱ, པུགྒལསམྨུཁཏཱ། ཀཱ ཙ ཏཏྠ སངྒྷསམྨུཁཏཱ? ཡཱཝཏིཀཱ བྷིཀྑཱུ ཀམྨཔྤཏྟཱ ཏེ ཨཱགཏཱ ཧོནྟི, ཚནྡཱརཧཱནཾ ཚནྡོ ཨཱཧཊོ ཧོཏི, སམྨུཁཱིབྷཱུཏཱ ན པཊིཀྐོསནྟི – ཨཡཾ ཏཏྠ སངྒྷསམྨུཁཏཱ། ཀཱ ཙ ཏཏྠ དྷམྨསམྨུཁཏཱ, ཝིནཡསམྨུཁཏཱ? ཡེན དྷམྨེན ཡེན ཝིནཡེན ཡེན སཏྠུསཱསནེན ཏཾ ཨདྷིཀརཎཾ ཝཱུཔསམྨཏི – ཨཡཾ ཏཏྠ དྷམྨསམྨུཁཏཱ, ཝིནཡསམྨུཁཏཱ། ཀཱ ཙ ཏཏྠ པུགྒལསམྨུཁཏཱ? ཡོ ཙ ཝིཝདཏི, ཡེན ཙ ཝིཝདཏི, ཨུབྷོ ཨཏྠཔཙྩཏྠིཀཱ སམྨུཁཱིབྷཱུཏཱ ཧོནྟི – ཨཡཾ ཏཏྠ པུགྒལསམྨུཁཏཱ། ཨེཝཾ ཝཱུཔསནྟཾ ཙེ, བྷིཀྑཝེ, ཨདྷིཀརཎཾ ཀཱརཀོ ཨུཀྐོཊེཏི, ཨུཀྐོཊནཀཾ པཱཙིཏྟིཡཾ; ཚནྡདཱཡཀོ ཁཱིཡཏི, ཁཱིཡནཀཾ པཱཙིཏྟིཡཾ།
229. ‘‘Te ce, bhikkhave, bhikkhū na sakkonti taṃ adhikaraṇaṃ tasmiṃ āvāse vūpasametuṃ, tehi, bhikkhave, bhikkhūhi, yasmiṃ āvāse sambahulā 4 bhikkhū, so āvāso gantabbo. Te ce, bhikkhave, bhikkhū taṃ āvāsaṃ gacchantā antarāmagge sakkonti taṃ adhikaraṇaṃ vūpasametuṃ, idaṃ vuccati, bhikkhave, adhikaraṇaṃ vūpasantaṃ. Kena vūpasantaṃ? Sammukhāvinayena . Kiñca tattha sammukhāvinayasmiṃ? Saṅghasammukhatā, dhammasammukhatā, vinayasammukhatā, puggalasammukhatā. Kā ca tattha saṅghasammukhatā? Yāvatikā bhikkhū kammappattā te āgatā honti, chandārahānaṃ chando āhaṭo hoti, sammukhībhūtā na paṭikkosanti – ayaṃ tattha saṅghasammukhatā. Kā ca tattha dhammasammukhatā, vinayasammukhatā? Yena dhammena yena vinayena yena satthusāsanena taṃ adhikaraṇaṃ vūpasammati – ayaṃ tattha dhammasammukhatā, vinayasammukhatā. Kā ca tattha puggalasammukhatā? Yo ca vivadati, yena ca vivadati, ubho atthapaccatthikā sammukhībhūtā honti – ayaṃ tattha puggalasammukhatā. Evaṃ vūpasantaṃ ce, bhikkhave, adhikaraṇaṃ kārako ukkoṭeti, ukkoṭanakaṃ pācittiyaṃ; chandadāyako khīyati, khīyanakaṃ pācittiyaṃ.
༢༣༠. ‘‘ཏེ ཙེ, བྷིཀྑཝེ, བྷིཀྑཱུ ཏཾ ཨཱཝཱསཾ ཨཱགཙྪནྟཱ ཨནྟརཱམགྒེ ན སཀྐོནྟི ཏཾ ཨདྷིཀརཎཾ ཝཱུཔསམེཏུཾ, ཏེཧི, བྷིཀྑཝེ, བྷིཀྑཱུཧི, ཏཾ ཨཱཝཱསཾ གནྟྭཱ ཨཱཝཱསིཀཱ བྷིཀྑཱུ ཨེཝམསྶུ ཝཙནཱིཡཱ – ‘ཨིདཾ ཁོ, ཨཱཝུསོ, ཨདྷིཀརཎཾ ཨེཝཾ ཛཱཏཾ, ཨེཝཾ སམུཔྤནྣཾ; སཱདྷཱཡསྨནྟཱ ཨིམཾ ཨདྷིཀརཎཾ ཝཱུཔསམེནྟུ དྷམྨེན ཝིནཡེན སཏྠུསཱསནེན, ཡཐཡིདཾ ཨདྷིཀརཎཾ སུཝཱུཔསནྟཾ ཨསྶཱ’ཏི།
230. ‘‘Te ce, bhikkhave, bhikkhū taṃ āvāsaṃ āgacchantā antarāmagge na sakkonti taṃ adhikaraṇaṃ vūpasametuṃ, tehi, bhikkhave, bhikkhūhi, taṃ āvāsaṃ gantvā āvāsikā bhikkhū evamassu vacanīyā – ‘idaṃ kho, āvuso, adhikaraṇaṃ evaṃ jātaṃ, evaṃ samuppannaṃ; sādhāyasmantā imaṃ adhikaraṇaṃ vūpasamentu dhammena vinayena satthusāsanena, yathayidaṃ adhikaraṇaṃ suvūpasantaṃ assā’ti.
‘‘སཙེ , བྷིཀྑཝེ, ཨཱཝཱསིཀཱ བྷིཀྑཱུ ཝུཌྜྷཏརཱ ཧོནྟི, ཨཱགནྟུཀཱ བྷིཀྑཱུ ནཝཀཏརཱ, ཏེཧི, བྷིཀྑཝེ, ཨཱཝཱསིཀེཧི བྷིཀྑཱུཧི ཨཱགནྟུཀཱ བྷིཀྑཱུ ཨེཝམསྶུ ཝཙནཱིཡཱ – ‘ཨིངྒྷ ཏུམྷེ, ཨཱཡསྨནྟོ, མུཧུཏྟཾ ཨེཀམནྟཾ ཧོཐ, ཡཱཝ མཡཾ མནྟེམཱ’ཏི། སཙེ པན, བྷིཀྑཝེ, ཨཱཝཱསིཀཱ བྷིཀྑཱུ ནཝཀཏརཱ ཧོནྟི, ཨཱགནྟུཀཱ བྷིཀྑཱུ ཝུཌྜྷཏརཱ, ཏེཧི, བྷིཀྑཝེ, ཨཱཝཱསིཀེཧི བྷིཀྑཱུཧི ཨཱགནྟུཀཱ བྷིཀྑཱུ ཨེཝམསྶུ ཝཙནཱིཡཱ – ‘ཏེན ཧི ཏུམྷེ, ཨཱཡསྨནྟོ, མུཧུཏྟཾ ཨིདྷེཝ ཏཱཝ ཧོཐ, ཡཱཝ མཡཾ མནྟེམཱ’ཏི།
‘‘Sace , bhikkhave, āvāsikā bhikkhū vuḍḍhatarā honti, āgantukā bhikkhū navakatarā, tehi, bhikkhave, āvāsikehi bhikkhūhi āgantukā bhikkhū evamassu vacanīyā – ‘iṅgha tumhe, āyasmanto, muhuttaṃ ekamantaṃ hotha, yāva mayaṃ mantemā’ti. Sace pana, bhikkhave, āvāsikā bhikkhū navakatarā honti, āgantukā bhikkhū vuḍḍhatarā, tehi, bhikkhave, āvāsikehi bhikkhūhi āgantukā bhikkhū evamassu vacanīyā – ‘tena hi tumhe, āyasmanto, muhuttaṃ idheva tāva hotha, yāva mayaṃ mantemā’ti.
‘‘སཙེ པན, བྷིཀྑཝེ, ཨཱཝཱསིཀཱནཾ བྷིཀྑཱུནཾ མནྟཡམཱནཱནཾ ཨེཝཾ ཧོཏི – ‘ན མཡཾ སཀྐོམ ཨིམཾ ཨདྷིཀརཎཾ ཝཱུཔསམེཏུཾ དྷམྨེན ཝིནཡེན སཏྠུསཱསནེནཱ’ཏི, ན ཏཾ ཨདྷིཀརཎཾ ཨཱཝཱསིཀེཧི བྷིཀྑཱུཧི སམྤཊིཙྪིཏབྦཾ། སཙེ པན, བྷིཀྑཝེ, ཨཱཝཱསིཀཱནཾ བྷིཀྑཱུནཾ མནྟཡམཱནཱནཾ ཨེཝཾ ཧོཏི – ‘སཀྐོམ མཡཾ ཨིམཾ ཨདྷིཀརཎཾ ཝཱུཔསམེཏུཾ དྷམྨེན ཝིནཡེན སཏྠུསཱསནེནཱ’ཏི, ཏེཧི, བྷིཀྑཝེ, ཨཱཝཱསིཀེཧི བྷིཀྑཱུཧི ཨཱགནྟུཀཱ བྷིཀྑཱུ ཨེཝམསྶུ ཝཙནཱིཡཱ – ‘སཙེ ཏུམྷེ, ཨཱཡསྨནྟོ, ཨམྷཱཀཾ ཨིམཾ ཨདྷིཀརཎཾ ཡཐཱཛཱཏཾ ཡཐཱསམུཔྤནྣཾ ཨཱརོཙེསྶཐ, ཡཐཱ ཙ མཡཾ ཨིམཾ ཨདྷིཀརཎཾ ཝཱུཔསམེསྶཱམ དྷམྨེན ཝིནཡེན སཏྠུསཱསནེན ཏཐཱ སུཝཱུཔསནྟཾ བྷཝིསྶཏི། ཨེཝཾ མཡཾ ཨིམཾ ཨདྷིཀརཎཾ སམྤཊིཙྪིསྶཱམ། ནོ ཙེ ཏུམྷེ, ཨཱཡསྨནྟོ, ཨམྷཱཀཾ ཨིམཾ ཨདྷིཀརཎཾ ཡཐཱཛཱཏཾ ཡཐཱསམུཔྤནྣཾ ཨཱརོཙེསྶཐ, ཡཐཱ ཙ མཡཾ ཨིམཾ ཨདྷིཀརཎཾ ཝཱུཔསམེསྶཱམ དྷམྨེན ཝིནཡེན སཏྠུསཱསནེན ཏཐཱ ན སུཝཱུཔསནྟཾ བྷཝིསྶཏི, ན མཡཾ ཨིམཾ ཨདྷིཀརཎཾ སམྤཊིཙྪིསྶཱམཱ’ཏི། ཨེཝཾ སུཔརིགྒཧིཏཾ ཁོ, བྷིཀྑཝེ, ཀཏྭཱ ཨཱཝཱསིཀེཧི བྷིཀྑཱུཧི ཏཾ ཨདྷིཀརཎཾ སམྤཊིཙྪིཏབྦཾ།
‘‘Sace pana, bhikkhave, āvāsikānaṃ bhikkhūnaṃ mantayamānānaṃ evaṃ hoti – ‘na mayaṃ sakkoma imaṃ adhikaraṇaṃ vūpasametuṃ dhammena vinayena satthusāsanenā’ti, na taṃ adhikaraṇaṃ āvāsikehi bhikkhūhi sampaṭicchitabbaṃ. Sace pana, bhikkhave, āvāsikānaṃ bhikkhūnaṃ mantayamānānaṃ evaṃ hoti – ‘sakkoma mayaṃ imaṃ adhikaraṇaṃ vūpasametuṃ dhammena vinayena satthusāsanenā’ti, tehi, bhikkhave, āvāsikehi bhikkhūhi āgantukā bhikkhū evamassu vacanīyā – ‘sace tumhe, āyasmanto, amhākaṃ imaṃ adhikaraṇaṃ yathājātaṃ yathāsamuppannaṃ ārocessatha, yathā ca mayaṃ imaṃ adhikaraṇaṃ vūpasamessāma dhammena vinayena satthusāsanena tathā suvūpasantaṃ bhavissati. Evaṃ mayaṃ imaṃ adhikaraṇaṃ sampaṭicchissāma. No ce tumhe, āyasmanto, amhākaṃ imaṃ adhikaraṇaṃ yathājātaṃ yathāsamuppannaṃ ārocessatha, yathā ca mayaṃ imaṃ adhikaraṇaṃ vūpasamessāma dhammena vinayena satthusāsanena tathā na suvūpasantaṃ bhavissati, na mayaṃ imaṃ adhikaraṇaṃ sampaṭicchissāmā’ti. Evaṃ supariggahitaṃ kho, bhikkhave, katvā āvāsikehi bhikkhūhi taṃ adhikaraṇaṃ sampaṭicchitabbaṃ.
‘‘ཏེཧི, བྷིཀྑཝེ, ཨཱགནྟུཀེཧི བྷིཀྑཱུཧི ཨཱཝཱསིཀཱ བྷིཀྑཱུ ཨེཝམསྶུ ཝཙནཱིཡཱ – ‘ཡཐཱཛཱཏཾ ཡཐཱསམུཔྤནྣཾ མཡཾ ཨིམཾ ཨདྷིཀརཎཾ ཨཱཡསྨནྟཱནཾ ཨཱརོཙེསྶཱམ། སཙེ ཨཱཡསྨནྟཱ སཀྐོནྟི ཨེཏྟཀེན ཝཱ ཨེཏྟཀེན ཝཱ ཨནྟརེན ཨིམཾ ཨདྷིཀརཎཾ ཝཱུཔསམེཏུཾ དྷམྨེན ཝིནཡེན སཏྠུསཱསནེན ཏཐཱ སུཝཱུཔསནྟཾ བྷཝིསྶཏི། ཨེཝཾ མཡཾ ཨིམཾ ཨདྷིཀརཎཾ ཨཱཡསྨནྟཱནཾ ནིཡྻཱདེསྶཱམ། ནོ ཙེ ཨཱཡསྨནྟཱ སཀྐོནྟི ཨེཏྟཀེན ཝཱ ཨེཏྟཀེན ཝཱ ཨནྟརེན ཨིམཾ ཨདྷིཀརཎཾ ཝཱུཔསམེཏུཾ དྷམྨེན ཝིནཡེན སཏྠུསཱསནེན ཏཐཱ ན སུཝཱུཔསནྟཾ བྷཝིསྶཏི, ན མཡཾ ཨིམཾ ཨདྷིཀརཎཾ ཨཱཡསྨནྟཱནཾ ནིཡྻཱདེསྶཱམ ། མཡམེཝ ཨིམསྶ ཨདྷིཀརཎསྶ སཱམིནོ བྷཝིསྶཱམཱ’ཏི། ཨེཝཾ སུཔརིགྒཧིཏཾ ཁོ, བྷིཀྑཝེ, ཀཏྭཱ ཨཱགནྟུཀེཧི བྷིཀྑཱུཧི ཏཾ ཨདྷིཀརཎཾ ཨཱཝཱསིཀཱནཾ བྷིཀྑཱུནཾ ནིཡྻཱདེཏབྦཾ།
‘‘Tehi, bhikkhave, āgantukehi bhikkhūhi āvāsikā bhikkhū evamassu vacanīyā – ‘yathājātaṃ yathāsamuppannaṃ mayaṃ imaṃ adhikaraṇaṃ āyasmantānaṃ ārocessāma. Sace āyasmantā sakkonti ettakena vā ettakena vā antarena imaṃ adhikaraṇaṃ vūpasametuṃ dhammena vinayena satthusāsanena tathā suvūpasantaṃ bhavissati. Evaṃ mayaṃ imaṃ adhikaraṇaṃ āyasmantānaṃ niyyādessāma. No ce āyasmantā sakkonti ettakena vā ettakena vā antarena imaṃ adhikaraṇaṃ vūpasametuṃ dhammena vinayena satthusāsanena tathā na suvūpasantaṃ bhavissati, na mayaṃ imaṃ adhikaraṇaṃ āyasmantānaṃ niyyādessāma . Mayameva imassa adhikaraṇassa sāmino bhavissāmā’ti. Evaṃ supariggahitaṃ kho, bhikkhave, katvā āgantukehi bhikkhūhi taṃ adhikaraṇaṃ āvāsikānaṃ bhikkhūnaṃ niyyādetabbaṃ.
‘‘ཏེ ཙེ, བྷིཀྑཝེ, བྷིཀྑཱུ སཀྐོནྟི ཏཾ ཨདྷིཀརཎཾ ཝཱུཔསམེཏུཾ, ཨིདཾ ཝུཙྩཏི, བྷིཀྑཝེ, ཨདྷིཀརཎཾ ཝཱུཔསནྟཾ། ཀེན ཝཱུཔསནྟཾ? སམྨུཁཱཝིནཡེན། ཀིཉྩ ཏཏྠ སམྨུཁཱཝིནཡསྨིཾ? སངྒྷསམྨུཁཏཱ, དྷམྨསམྨུཁཏཱ, ཝིནཡསམྨུཁཏཱ, པུགྒལསམྨུཁཏཱ…པེ॰… ཨེཝཾ ཝཱུཔསནྟཾ ཙེ, བྷིཀྑཝེ, ཨདྷིཀརཎཾ ཀཱརཀོ ཨུཀྐོཊེཏི, ཨུཀྐོཊནཀཾ པཱཙིཏྟིཡཾ; ཚནྡདཱཡཀོ ཁཱིཡཏི, ཁཱིཡནཀཾ པཱཙིཏྟིཡཾ།
‘‘Te ce, bhikkhave, bhikkhū sakkonti taṃ adhikaraṇaṃ vūpasametuṃ, idaṃ vuccati, bhikkhave, adhikaraṇaṃ vūpasantaṃ. Kena vūpasantaṃ? Sammukhāvinayena. Kiñca tattha sammukhāvinayasmiṃ? Saṅghasammukhatā, dhammasammukhatā, vinayasammukhatā, puggalasammukhatā…pe… evaṃ vūpasantaṃ ce, bhikkhave, adhikaraṇaṃ kārako ukkoṭeti, ukkoṭanakaṃ pācittiyaṃ; chandadāyako khīyati, khīyanakaṃ pācittiyaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨདྷིཀརཎཝཱུཔསམནསམཐཀཐཱ • Adhikaraṇavūpasamanasamathakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨདྷིཀརཎཝཱུཔསམནསམཐཀཐཱཝཎྞནཱ • Adhikaraṇavūpasamanasamathakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨདྷིཀརཎཀཐཱཝཎྞནཱ • Adhikaraṇakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨདྷིཀརཎཝཱུཔསམནསམཐཀཐཱདིཝཎྞནཱ • Adhikaraṇavūpasamanasamathakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༩. ཨདྷིཀརཎཝཱུཔསམནསམཐཀཐཱ • 9. Adhikaraṇavūpasamanasamathakathā
