| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৫. চূল়ৰগ্গো
5. Cūḷavaggo
১. সম্মুখীভাৰসুত্তৰণ্ণনা
1. Sammukhībhāvasuttavaṇṇanā
৪১. পঞ্চমস্স পঠমে সম্মুখীভাৰাতি সম্মুখীভাৰেন, ৰিজ্জমানতাযাতি অত্থো। পসৰতীতি পটিলভতি। সদ্ধায সম্মুখীভাৰাতি যদি হি সদ্ধা ন ভৰেয্য, দেয্যধম্মো ন ভৰেয্য, দক্খিণেয্যসঙ্খাতা পটিগ্গাহকপুগ্গলা ন ভৰেয্যুং, কথং পুঞ্ঞকম্মং করেয্য। তেসং পন সম্মুখীভাৰেন সক্কা কাতুন্তি তস্মা ‘‘সদ্ধায সম্মুখীভাৰা’’তিআদিমাহ। এত্থ চ দ্ৰে ধম্মা সুলভা দেয্যধম্মা চেৰ দক্খিণেয্যা চ, সদ্ধা পন দুল্লভা। পুথুজ্জনস্স হি সদ্ধা অথাৰরা পদৰারেন নানা হোতি, তেনেৰ মহামোগ্গল্লানসদিসোপি অগ্গসাৰকো পাটিভোগো ভৰিতুং অসক্কোন্তো আহ – ‘‘দ্ৰিন্নং খো তে অহং, আৰুসো, ধম্মানং পাটিভোগো ভোগানঞ্চ জীৰিতস্স চ, সদ্ধায পন ত্ৰংযেৰ পাটিভোগো’’তি (উদা॰ ১৮)।
41. Pañcamassa paṭhame sammukhībhāvāti sammukhībhāvena, vijjamānatāyāti attho. Pasavatīti paṭilabhati. Saddhāya sammukhībhāvāti yadi hi saddhā na bhaveyya, deyyadhammo na bhaveyya, dakkhiṇeyyasaṅkhātā paṭiggāhakapuggalā na bhaveyyuṃ, kathaṃ puññakammaṃ kareyya. Tesaṃ pana sammukhībhāvena sakkā kātunti tasmā ‘‘saddhāya sammukhībhāvā’’tiādimāha. Ettha ca dve dhammā sulabhā deyyadhammā ceva dakkhiṇeyyā ca, saddhā pana dullabhā. Puthujjanassa hi saddhā athāvarā padavārena nānā hoti, teneva mahāmoggallānasadisopi aggasāvako pāṭibhogo bhavituṃ asakkonto āha – ‘‘dvinnaṃ kho te ahaṃ, āvuso, dhammānaṃ pāṭibhogo bhogānañca jīvitassa ca, saddhāya pana tvaṃyeva pāṭibhogo’’ti (udā. 18).
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. সম্মুখীভাৰসুত্তং • 1. Sammukhībhāvasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১. সম্মুখীভাৰসুত্তৰণ্ণনা • 1. Sammukhībhāvasuttavaṇṇanā
