| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. စူဠဝဂ္ဂော
5. Cūḷavaggo
၁. သမ္မုခီဘာဝသုတ္တဝဏ္ဏနာ
1. Sammukhībhāvasuttavaṇṇanā
၄၁. ပဉ္စမသ္သ ပဌမေ သမ္မုခီဘာဝာတိ သမ္မုခီဘာဝေန, ဝိဇ္ဇမာနတာယာတိ အတ္ထော။ ပသဝတီတိ ပဋိလဘတိ။ သဒ္ဓာယ သမ္မုခီဘာဝာတိ ယဒိ ဟိ သဒ္ဓာ န ဘဝေယ္ယ, ဒေယ္ယဓမ္မော န ဘဝေယ္ယ, ဒက္ခိဏေယ္ယသင္ခာတာ ပဋိဂ္ဂာဟကပုဂ္ဂလာ န ဘဝေယ္ယုံ, ကထံ ပုညကမ္မံ ကရေယ္ယ။ တေသံ ပန သမ္မုခီဘာဝေန သက္ကာ ကာတုန္တိ တသ္မာ ‘‘သဒ္ဓာယ သမ္မုခီဘာဝာ’’တိအာဒိမာဟ။ ဧတ္ထ စ ဒ္ဝေ ဓမ္မာ သုလဘာ ဒေယ္ယဓမ္မာ စေဝ ဒက္ခိဏေယ္ယာ စ, သဒ္ဓာ ပန ဒုလ္လဘာ။ ပုထုဇ္ဇနသ္သ ဟိ သဒ္ဓာ အထာဝရာ ပဒဝာရေန နာနာ ဟောတိ, တေနေဝ မဟာမောဂ္ဂလ္လာနသဒိသောပိ အဂ္ဂသာဝကော ပာဋိဘောဂော ဘဝိတုံ အသက္ကောန္တော အာဟ – ‘‘ဒ္ဝိန္နံ ခော တေ အဟံ, အာဝုသော, ဓမ္မာနံ ပာဋိဘောဂော ဘောဂာနဉ္စ ဇီဝိတသ္သ စ, သဒ္ဓာယ ပန တ္ဝံယေဝ ပာဋိဘောဂော’’တိ (ဥဒာ. ၁၈)။
41. Pañcamassa paṭhame sammukhībhāvāti sammukhībhāvena, vijjamānatāyāti attho. Pasavatīti paṭilabhati. Saddhāya sammukhībhāvāti yadi hi saddhā na bhaveyya, deyyadhammo na bhaveyya, dakkhiṇeyyasaṅkhātā paṭiggāhakapuggalā na bhaveyyuṃ, kathaṃ puññakammaṃ kareyya. Tesaṃ pana sammukhībhāvena sakkā kātunti tasmā ‘‘saddhāya sammukhībhāvā’’tiādimāha. Ettha ca dve dhammā sulabhā deyyadhammā ceva dakkhiṇeyyā ca, saddhā pana dullabhā. Puthujjanassa hi saddhā athāvarā padavārena nānā hoti, teneva mahāmoggallānasadisopi aggasāvako pāṭibhogo bhavituṃ asakkonto āha – ‘‘dvinnaṃ kho te ahaṃ, āvuso, dhammānaṃ pāṭibhogo bhogānañca jīvitassa ca, saddhāya pana tvaṃyeva pāṭibhogo’’ti (udā. 18).
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. သမ္မုခီဘာဝသုတ္တံ • 1. Sammukhībhāvasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. သမ္မုခီဘာဝသုတ္တဝဏ္ဏနာ • 1. Sammukhībhāvasuttavaṇṇanā
