| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೫. ಚೂಳವಗ್ಗೋ
5. Cūḷavaggo
೧. ಸಮ್ಮುಖೀಭಾವಸುತ್ತವಣ್ಣನಾ
1. Sammukhībhāvasuttavaṇṇanā
೪೧. ಪಞ್ಚಮಸ್ಸ ಪಠಮೇ ಸಮ್ಮುಖೀಭಾವಾತಿ ಸಮ್ಮುಖೀಭಾವೇನ, ವಿಜ್ಜಮಾನತಾಯಾತಿ ಅತ್ಥೋ। ಪಸವತೀತಿ ಪಟಿಲಭತಿ। ಸದ್ಧಾಯ ಸಮ್ಮುಖೀಭಾವಾತಿ ಯದಿ ಹಿ ಸದ್ಧಾ ನ ಭವೇಯ್ಯ, ದೇಯ್ಯಧಮ್ಮೋ ನ ಭವೇಯ್ಯ, ದಕ್ಖಿಣೇಯ್ಯಸಙ್ಖಾತಾ ಪಟಿಗ್ಗಾಹಕಪುಗ್ಗಲಾ ನ ಭವೇಯ್ಯುಂ, ಕಥಂ ಪುಞ್ಞಕಮ್ಮಂ ಕರೇಯ್ಯ। ತೇಸಂ ಪನ ಸಮ್ಮುಖೀಭಾವೇನ ಸಕ್ಕಾ ಕಾತುನ್ತಿ ತಸ್ಮಾ ‘‘ಸದ್ಧಾಯ ಸಮ್ಮುಖೀಭಾವಾ’’ತಿಆದಿಮಾಹ। ಏತ್ಥ ಚ ದ್ವೇ ಧಮ್ಮಾ ಸುಲಭಾ ದೇಯ್ಯಧಮ್ಮಾ ಚೇವ ದಕ್ಖಿಣೇಯ್ಯಾ ಚ, ಸದ್ಧಾ ಪನ ದುಲ್ಲಭಾ। ಪುಥುಜ್ಜನಸ್ಸ ಹಿ ಸದ್ಧಾ ಅಥಾವರಾ ಪದವಾರೇನ ನಾನಾ ಹೋತಿ, ತೇನೇವ ಮಹಾಮೋಗ್ಗಲ್ಲಾನಸದಿಸೋಪಿ ಅಗ್ಗಸಾವಕೋ ಪಾಟಿಭೋಗೋ ಭವಿತುಂ ಅಸಕ್ಕೋನ್ತೋ ಆಹ – ‘‘ದ್ವಿನ್ನಂ ಖೋ ತೇ ಅಹಂ, ಆವುಸೋ, ಧಮ್ಮಾನಂ ಪಾಟಿಭೋಗೋ ಭೋಗಾನಞ್ಚ ಜೀವಿತಸ್ಸ ಚ, ಸದ್ಧಾಯ ಪನ ತ್ವಂಯೇವ ಪಾಟಿಭೋಗೋ’’ತಿ (ಉದಾ॰ ೧೮)।
41. Pañcamassa paṭhame sammukhībhāvāti sammukhībhāvena, vijjamānatāyāti attho. Pasavatīti paṭilabhati. Saddhāya sammukhībhāvāti yadi hi saddhā na bhaveyya, deyyadhammo na bhaveyya, dakkhiṇeyyasaṅkhātā paṭiggāhakapuggalā na bhaveyyuṃ, kathaṃ puññakammaṃ kareyya. Tesaṃ pana sammukhībhāvena sakkā kātunti tasmā ‘‘saddhāya sammukhībhāvā’’tiādimāha. Ettha ca dve dhammā sulabhā deyyadhammā ceva dakkhiṇeyyā ca, saddhā pana dullabhā. Puthujjanassa hi saddhā athāvarā padavārena nānā hoti, teneva mahāmoggallānasadisopi aggasāvako pāṭibhogo bhavituṃ asakkonto āha – ‘‘dvinnaṃ kho te ahaṃ, āvuso, dhammānaṃ pāṭibhogo bhogānañca jīvitassa ca, saddhāya pana tvaṃyeva pāṭibhogo’’ti (udā. 18).
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧. ಸಮ್ಮುಖೀಭಾವಸುತ್ತಂ • 1. Sammukhībhāvasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧. ಸಮ್ಮುಖೀಭಾವಸುತ್ತವಣ್ಣನಾ • 1. Sammukhībhāvasuttavaṇṇanā
