| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
5. පඤ්‌චමවග්‌ගො
5. Pañcamavaggo
(48) 6. සම්‌මුතිඤාණකථා
(48) 6. Sammutiñāṇakathā
434. න වත්‌තබ්‌බං – ‘‘සම්‌මුතිඤාණං සච්‌චාරම්‌මණඤ්‌ඤෙව න අඤ්‌ඤාරම්‌මණ’’න්‌ති? ආමන්‌තා. නනු පථවීකසිණං සමාපත්‌තිං සමාපන්‌නස්‌ස අත්‌ථි ඤාණං, පථවීකසිණඤ්‌ච සම්‌මුතිසච්‌චම්‌හීති? ආමන්‌තා. හඤ්‌චි පථවීකසිණං සමාපත්‌තිං සමාපන්‌නස්‌ස අත්‌ථි ඤාණං, පථවීකසිණඤ්‌ච සම්‌මුතිසච්‌චම්‌හි, තෙන වත රෙ වත්‌තබ්‌බෙ – ‘‘සම්‌මුතිඤාණං සච්‌චාරම්‌මණඤ්‌ඤෙව න අඤ්‌ඤාරම්‌මණ’’න්‌ති.
434. Na vattabbaṃ – ‘‘sammutiñāṇaṃ saccārammaṇaññeva na aññārammaṇa’’nti? Āmantā. Nanu pathavīkasiṇaṃ samāpattiṃ samāpannassa atthi ñāṇaṃ, pathavīkasiṇañca sammutisaccamhīti? Āmantā. Hañci pathavīkasiṇaṃ samāpattiṃ samāpannassa atthi ñāṇaṃ, pathavīkasiṇañca sammutisaccamhi, tena vata re vattabbe – ‘‘sammutiñāṇaṃ saccārammaṇaññeva na aññārammaṇa’’nti.
න වත්‌තබ්‌බං – ‘‘සම්‌මුතිඤාණං සච්‌චාරම්‌මණඤ්‌ඤෙව න අඤ්‌ඤාරම්‌මණ’’න්‌ති? ආමන්‌තා…පෙ.… නනු ආපොකසිණං…පෙ.… තෙජොකසිණං…පෙ.… ගිලානපච්‌චයභෙසජ්‌ජපරික්‌ඛාරං දදන්‌තස්‌ස අත්‌ථි ඤාණං, ගිලානපච්‌චයභෙසජ්‌ජපරික්‌ඛාරො ච සම්‌මුතිසච්‌චම්‌හීති? ආමන්‌තා. හඤ්‌චි ගිලානපච්‌චයභෙසජ්‌ජපරික්‌ඛාරං දදන්‌තස්‌ස අත්‌ථි ඤාණං, ගිලානපච්‌චයභෙසජ්‌ජපරික්‌ඛාරො ච සම්‌මුතිසච්‌චම්‌හි, තෙන වත රෙ වත්‌තබ්‌බෙ – ‘‘සම්‌මුතිඤාණං සච්‌චාරම්‌මණඤ්‌ඤෙව න අඤ්‌ඤාරම්‌මණ’’න්‌ති.
Na vattabbaṃ – ‘‘sammutiñāṇaṃ saccārammaṇaññeva na aññārammaṇa’’nti? Āmantā…pe… nanu āpokasiṇaṃ…pe… tejokasiṇaṃ…pe… gilānapaccayabhesajjaparikkhāraṃ dadantassa atthi ñāṇaṃ, gilānapaccayabhesajjaparikkhāro ca sammutisaccamhīti? Āmantā. Hañci gilānapaccayabhesajjaparikkhāraṃ dadantassa atthi ñāṇaṃ, gilānapaccayabhesajjaparikkhāro ca sammutisaccamhi, tena vata re vattabbe – ‘‘sammutiñāṇaṃ saccārammaṇaññeva na aññārammaṇa’’nti.
435. සම්‌මුතිඤාණං සච්‌චාරම්‌මණඤ්‌ඤෙව න අඤ්‌ඤාරම්‌මණන්‌ති? ආමන්‌තා . තෙන ඤාණෙන දුක්‌ඛං පරිජානාති, සමුදයං පජහති, නිරොධං සච්‌ඡිකරොති, මග්‌ගං භාවෙතීති? න හෙවං වත්‌තබ්‌බෙ…පෙ.….
435. Sammutiñāṇaṃ saccārammaṇaññeva na aññārammaṇanti? Āmantā . Tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
සම්‌මුතිඤාණකථා නිට්‌ඨිතා.
Sammutiñāṇakathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 6. සම්‌මුතිඤාණකථාවණ්‌ණනා • 6. Sammutiñāṇakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 6. සම්‌මුතිඤාණකථාවණ්‌ණනා • 6. Sammutiñāṇakathāvaṇṇanā
