| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၆. သမ္မုတိဉာဏကထာဝဏ္ဏနာ
6. Sammutiñāṇakathāvaṇṇanā
၄၃၄-၄၃၅. ဣဒာနိ သမ္မုတိဉာဏကထာ နာမ ဟောတိ။ တတ္ထ သမ္မုတိသစ္စံ ပရမတ္ထသစ္စန္တိ ဒ္ဝေ သစ္စာနိ။ ယေ ပန ဧဝံ ဝိဘာဂံ အကတ္ဝာ သစ္စန္တိ ဝစနသာမညေန သမ္မုတိဉာဏမ္ပိ ‘‘သစ္စာရမ္မဏမေဝာ’’တိ ဝဒန္တိ, သေယ္ယထာပိ အန္ဓကာ; တေ အယုတ္တဝာဒိနောတိ တေသံ ဝာဒဝိသောဓနတ္ထံ အယံ ကထာ အာရဒ္ဓာ။ တတ္ထ န ဝတ္တဗ္ဗန္တိ ပုစ္ဆာ ပရဝာဒိသ္သ, ပရမတ္ထသစ္စံ သန္ဓာယ ပဋိညာ သကဝာဒိသ္သ။ သမ္မုတိသစ္စမ္ဟီတိ သမ္မုတိံ အနုပဝိဋ္ဌေ သစ္စမ္ဟိ။ ပစ္စတ္တေ ဝာ ဘုမ္မဝစနံ, သမ္မုတိသစ္စန္တိ အတ္ထော။ သမ္မုတိဉာဏံ သစ္စာရမ္မဏညေဝာတိ ပုစ္ဆာ သကဝာဒိသ္သ, ပဋိညာ ဣတရသ္သ။ တတော နံ ‘‘ယဒိ တံ အဝိသေသေန သစ္စာရမ္မဏညေဝ, တေန ဉာဏေန ဒုက္ခပရိညာဒီနိ ကရေယ္ယာ’’တိ စောဒေတုံ တေန ဉာဏေနာတိအာဒိမာဟ။
434-435. Idāni sammutiñāṇakathā nāma hoti. Tattha sammutisaccaṃ paramatthasaccanti dve saccāni. Ye pana evaṃ vibhāgaṃ akatvā saccanti vacanasāmaññena sammutiñāṇampi ‘‘saccārammaṇamevā’’ti vadanti, seyyathāpi andhakā; te ayuttavādinoti tesaṃ vādavisodhanatthaṃ ayaṃ kathā āraddhā. Tattha na vattabbanti pucchā paravādissa, paramatthasaccaṃ sandhāya paṭiññā sakavādissa. Sammutisaccamhīti sammutiṃ anupaviṭṭhe saccamhi. Paccatte vā bhummavacanaṃ, sammutisaccanti attho. Sammutiñāṇaṃ saccārammaṇaññevāti pucchā sakavādissa, paṭiññā itarassa. Tato naṃ ‘‘yadi taṃ avisesena saccārammaṇaññeva, tena ñāṇena dukkhapariññādīni kareyyā’’ti codetuṃ tena ñāṇenātiādimāha.
သမ္မုတိဉာဏကထာဝဏ္ဏနာ။
Sammutiñāṇakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၄၈) ၆. သမ္မုတိဉာဏကထာ • (48) 6. Sammutiñāṇakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၆. သမ္မုတိဉာဏကထာဝဏ္ဏနာ • 6. Sammutiñāṇakathāvaṇṇanā
