| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၁. သမ္ပက္ခန္ဒနလက္ခဏသဒ္ဓာပဉ္ဟော
11. Sampakkhandanalakkhaṇasaddhāpañho
၁၁. ‘‘ကထံ , ဘန္တေ, သမ္ပက္ခန္ဒနလက္ခဏာ သဒ္ဓာ’’တိ,? ‘‘ယထာ, မဟာရာဇ, ယောဂာဝစရော အညေသံ စိတ္တံ ဝိမုတ္တံ ပသ္သိတ္ဝာ သောတာပတ္တိဖလေ ဝာ သကဒာဂာမိဖလေ ဝာ အနာဂာမိဖလေ ဝာ အရဟတ္တေ ဝာ သမ္ပက္ခန္ဒတိ ယောဂံ ကရောတိ အပ္ပတ္တသ္သ ပတ္တိယာ အနဓိဂတသ္သ အဓိဂမာယ အသစ္ဆိကတသ္သ သစ္ဆိကိရိယာယ။ ဧဝံ ခော, မဟာရာဇ, သမ္ပက္ခန္ဒနလက္ခဏာ သဒ္ဓာ’’တိ။
11. ‘‘Kathaṃ , bhante, sampakkhandanalakkhaṇā saddhā’’ti,? ‘‘Yathā, mahārāja, yogāvacaro aññesaṃ cittaṃ vimuttaṃ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṃ karoti appattassa pattiyā anadhigatassa adhigamāya asacchikatassa sacchikiriyāya. Evaṃ kho, mahārāja, sampakkhandanalakkhaṇā saddhā’’ti.
‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ဥပရိပဗ္ဗတေ မဟာမေဃော အဘိပ္ပဝသ္သေယ္ယ, တံ ဥဒကံ ယထာနိန္နံ ပဝတ္တမာနံ ပဗ္ဗတကန္ဒရပဒရသာခာ ပရိပူရေတ္ဝာ နဒိံ ပရိပူရေယ္ယ, သာ ဥဘတော ကူလာနိ သံဝိသ္သန္ဒန္တီ ဂစ္ဆေယ္ယ, အထ မဟာဇနကာယော အာဂန္တ္ဝာ တသ္သာ နဒိယာ ဥတ္တာနတံ ဝာ ဂမ္ဘီရတံ ဝာ အဇာနန္တော ဘီတော ဝိတ္ထတော တီရေ တိဋ္ဌေယ္ယ, အထညတရော ပုရိသော အာဂန္တ္ဝာ အတ္တနော ထာမဉ္စ ဗလဉ္စ သမ္ပသ္သန္တော ဂာဠ္ဟံ ကစ္ဆံ ဗန္ဓိတ္ဝာ ပက္ခန္ဒိတ္ဝာ တရေယ္ယ, တံ တိဏ္ဏံ ပသ္သိတ္ဝာ မဟာဇနကာယောပိ တရေယ္ယ။ ဧဝမေဝ ခော, မဟာရာဇ, ယောဂာဝစရော အညေသံ စိတ္တံ ဝိမုတ္တံ ပသ္သိတ္ဝာ သောတာပတ္တိဖလေ ဝာ သကဒာဂာမိဖလေ ဝာ အနာဂာမိဖလေ ဝာ အရဟတ္တေ ဝာ သမ္ပက္ခန္ဒတိ ယောဂံ ကရောတိ အပ္ပတ္တသ္သ ပတ္တိယာ အနဓိဂတသ္သ အဓိဂမာယ အသစ္ဆိကတသ္သ သစ္ဆိကိရိယာယ။ ဧဝံ ခော, မဟာရာဇ, သမ္ပက္ခန္ဒနလက္ခဏာ သဒ္ဓာတိ။ ဘာသိတမ္ပေတံ, မဟာရာဇ, ဘဂဝတာ သံယုတ္တနိကာယဝရေ –
‘‘Opammaṃ karohī’’ti. ‘‘Yathā, mahārāja, uparipabbate mahāmegho abhippavasseyya, taṃ udakaṃ yathāninnaṃ pavattamānaṃ pabbatakandarapadarasākhā paripūretvā nadiṃ paripūreyya, sā ubhato kūlāni saṃvissandantī gaccheyya, atha mahājanakāyo āgantvā tassā nadiyā uttānataṃ vā gambhīrataṃ vā ajānanto bhīto vitthato tīre tiṭṭheyya, athaññataro puriso āgantvā attano thāmañca balañca sampassanto gāḷhaṃ kacchaṃ bandhitvā pakkhanditvā tareyya, taṃ tiṇṇaṃ passitvā mahājanakāyopi tareyya. Evameva kho, mahārāja, yogāvacaro aññesaṃ cittaṃ vimuttaṃ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṃ karoti appattassa pattiyā anadhigatassa adhigamāya asacchikatassa sacchikiriyāya. Evaṃ kho, mahārāja, sampakkhandanalakkhaṇā saddhāti. Bhāsitampetaṃ, mahārāja, bhagavatā saṃyuttanikāyavare –
‘‘‘သဒ္ဓာယ တရတီ ဩဃံ၊ အပ္ပမာဒေန အဏ္ဏဝံ။
‘‘‘Saddhāya taratī oghaṃ, appamādena aṇṇavaṃ;
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
သမ္ပက္ခန္ဒနလက္ခဏသဒ္ဓာပဉ္ဟော ဧကာဒသမော။
Sampakkhandanalakkhaṇasaddhāpañho ekādasamo.
Footnotes:
