| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
10. ஸம்பஸாத³னலக்க²ணஸத்³தா⁴பஞ்ஹோ
10. Sampasādanalakkhaṇasaddhāpañho
10. ராஜா ஆஹ ‘‘ப⁴ந்தே நாக³ஸேன, கிங்லக்க²ணா ஸத்³தா⁴’’தி? ‘‘ஸம்பஸாத³னலக்க²ணா ச, மஹாராஜ, ஸத்³தா⁴, ஸம்பக்க²ந்த³னலக்க²ணா சா’’தி. ‘‘கத²ங், ப⁴ந்தே, ஸம்பஸாத³னலக்க²ணா ஸத்³தா⁴’’தி? ‘‘ஸத்³தா⁴ கோ², மஹாராஜ, உப்பஜ்ஜமானா நீவரணே விக்க²ம்பே⁴தி, வினீவரணங் சித்தங் ஹோதி அச்ச²ங் விப்பஸன்னங் அனாவிலங். ஏவங் கோ², மஹாராஜ, ஸம்பஸாத³னலக்க²ணா ஸத்³தா⁴’’தி.
10. Rājā āha ‘‘bhante nāgasena, kiṃlakkhaṇā saddhā’’ti? ‘‘Sampasādanalakkhaṇā ca, mahārāja, saddhā, sampakkhandanalakkhaṇā cā’’ti. ‘‘Kathaṃ, bhante, sampasādanalakkhaṇā saddhā’’ti? ‘‘Saddhā kho, mahārāja, uppajjamānā nīvaraṇe vikkhambheti, vinīvaraṇaṃ cittaṃ hoti acchaṃ vippasannaṃ anāvilaṃ. Evaṃ kho, mahārāja, sampasādanalakkhaṇā saddhā’’ti.
‘‘ஓபம்மங் கரோஹீ’’தி. ‘‘யதா², மஹாராஜ, ராஜா சக்கவத்தீ சதுரங்கி³னியா ஸேனாய ஸத்³தி⁴ங் அத்³தா⁴னமக்³க³ப்படிபன்னோ பரித்தங் உத³கங் தரெய்ய, தங் உத³கங் ஹத்தீ²ஹி ச அஸ்ஸேஹி ச ரதே²ஹி ச பத்தீஹி ச கு²பி⁴தங் ப⁴வெய்ய ஆவிலங் லுளிதங் கலலீபூ⁴தங். உத்திண்ணோ ச ராஜா சக்கவத்தீ மனுஸ்ஸே ஆணாபெய்ய ‘பானீயங், ப⁴ணே, ஆஹரத², பிவிஸ்ஸாமீ’தி, ரஞ்ஞோ ச உத³கப்பஸாத³கோ மணி ப⁴வெய்ய. ‘ஏவங் தே³வா’தி கோ² தே மனுஸ்ஸா ரஞ்ஞோ சக்கவத்திஸ்ஸ படிஸ்ஸுத்வா தங் உத³கப்பஸாத³கங் மணிங் உத³கே பக்கி²பெய்யுங், தஸ்மிங் உத³கே பக்கி²த்தமத்தே ஸங்க²ஸேவாலபணகங் விக³ச்செ²ய்ய, கத்³த³மோ ச ஸன்னிஸீதெ³ய்ய, அச்ச²ங் ப⁴வெய்ய உத³கங் விப்பஸன்னங் அனாவிலங். ததோ ரஞ்ஞோ சக்கவத்திஸ்ஸ பானீயங் உபனாமெய்யுங் ‘பிவது, தே³வ, பானீய’ந்தி.
‘‘Opammaṃ karohī’’ti. ‘‘Yathā, mahārāja, rājā cakkavattī caturaṅginiyā senāya saddhiṃ addhānamaggappaṭipanno parittaṃ udakaṃ tareyya, taṃ udakaṃ hatthīhi ca assehi ca rathehi ca pattīhi ca khubhitaṃ bhaveyya āvilaṃ luḷitaṃ kalalībhūtaṃ. Uttiṇṇo ca rājā cakkavattī manusse āṇāpeyya ‘pānīyaṃ, bhaṇe, āharatha, pivissāmī’ti, rañño ca udakappasādako maṇi bhaveyya. ‘Evaṃ devā’ti kho te manussā rañño cakkavattissa paṭissutvā taṃ udakappasādakaṃ maṇiṃ udake pakkhipeyyuṃ, tasmiṃ udake pakkhittamatte saṅkhasevālapaṇakaṃ vigaccheyya, kaddamo ca sannisīdeyya, acchaṃ bhaveyya udakaṃ vippasannaṃ anāvilaṃ. Tato rañño cakkavattissa pānīyaṃ upanāmeyyuṃ ‘pivatu, deva, pānīya’nti.
‘‘யதா², மஹாராஜ, உத³கங், ஏவங் சித்தங் த³ட்ட²ப்³ப³ங், யதா² தே மனுஸ்ஸா, ஏவங் யோகா³வசரோ த³ட்ட²ப்³போ³, யதா² ஸங்க²ஸேவாலபணகங் கத்³த³மோ ச, ஏவங் கிலேஸா த³ட்ட²ப்³பா³. யதா² உத³கப்பஸாத³கோ மணி, ஏவங் ஸத்³தா⁴ த³ட்ட²ப்³பா³, யதா² உத³கப்பஸாத³கே மணிம்ஹி உத³கே பக்கி²த்தமத்தே ஸங்க²ஸேவாலபணகங் விக³ச்செ²ய்ய, கத்³த³மோ ச ஸன்னிஸீதெ³ய்ய, அச்ச²ங் ப⁴வெய்ய உத³கங் விப்பஸன்னங் அனாவிலங், ஏவமேவ கோ², மஹாராஜ, ஸத்³தா⁴ உப்பஜ்ஜமானா நீவரணே விக்க²ம்பே⁴தி, வினீவரணங் சித்தங் ஹோதி அச்ச²ங் விப்பஸன்னங் அனாவிலங், ஏவங் கோ², மஹாராஜ, ஸம்பஸாத³னலக்க²ணா ஸத்³தா⁴’’தி.
‘‘Yathā, mahārāja, udakaṃ, evaṃ cittaṃ daṭṭhabbaṃ, yathā te manussā, evaṃ yogāvacaro daṭṭhabbo, yathā saṅkhasevālapaṇakaṃ kaddamo ca, evaṃ kilesā daṭṭhabbā. Yathā udakappasādako maṇi, evaṃ saddhā daṭṭhabbā, yathā udakappasādake maṇimhi udake pakkhittamatte saṅkhasevālapaṇakaṃ vigaccheyya, kaddamo ca sannisīdeyya, acchaṃ bhaveyya udakaṃ vippasannaṃ anāvilaṃ, evameva kho, mahārāja, saddhā uppajjamānā nīvaraṇe vikkhambheti, vinīvaraṇaṃ cittaṃ hoti acchaṃ vippasannaṃ anāvilaṃ, evaṃ kho, mahārāja, sampasādanalakkhaṇā saddhā’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
ஸம்பஸாத³னலக்க²ணஸத்³தா⁴பஞ்ஹோ த³ஸமோ.
Sampasādanalakkhaṇasaddhāpañho dasamo.
