| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༠. སམྤསཱདནལཀྑཎསདྡྷཱཔཉྷོ
10. Sampasādanalakkhaṇasaddhāpañho
༡༠. རཱཛཱ ཨཱཧ ‘‘བྷནྟེ ནཱགསེན, ཀིཾལཀྑཎཱ སདྡྷཱ’’ཏི? ‘‘སམྤསཱདནལཀྑཎཱ ཙ, མཧཱརཱཛ, སདྡྷཱ, སམྤཀྑནྡནལཀྑཎཱ ཙཱ’’ཏི། ‘‘ཀཐཾ, བྷནྟེ, སམྤསཱདནལཀྑཎཱ སདྡྷཱ’’ཏི? ‘‘སདྡྷཱ ཁོ, མཧཱརཱཛ, ཨུཔྤཛྫམཱནཱ ནཱིཝརཎེ ཝིཀྑམྦྷེཏི, ཝིནཱིཝརཎཾ ཙིཏྟཾ ཧོཏི ཨཙྪཾ ཝིཔྤསནྣཾ ཨནཱཝིལཾ། ཨེཝཾ ཁོ, མཧཱརཱཛ, སམྤསཱདནལཀྑཎཱ སདྡྷཱ’’ཏི།
10. Rājā āha ‘‘bhante nāgasena, kiṃlakkhaṇā saddhā’’ti? ‘‘Sampasādanalakkhaṇā ca, mahārāja, saddhā, sampakkhandanalakkhaṇā cā’’ti. ‘‘Kathaṃ, bhante, sampasādanalakkhaṇā saddhā’’ti? ‘‘Saddhā kho, mahārāja, uppajjamānā nīvaraṇe vikkhambheti, vinīvaraṇaṃ cittaṃ hoti acchaṃ vippasannaṃ anāvilaṃ. Evaṃ kho, mahārāja, sampasādanalakkhaṇā saddhā’’ti.
‘‘ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, རཱཛཱ ཙཀྐཝཏྟཱི ཙཏུརངྒིནིཡཱ སེནཱཡ སདྡྷིཾ ཨདྡྷཱནམགྒཔྤཊིཔནྣོ པརིཏྟཾ ཨུདཀཾ ཏརེཡྻ, ཏཾ ཨུདཀཾ ཧཏྠཱིཧི ཙ ཨསྶེཧི ཙ རཐེཧི ཙ པཏྟཱིཧི ཙ ཁུབྷིཏཾ བྷཝེཡྻ ཨཱཝིལཾ ལུལི༹ཏཾ ཀལལཱིབྷཱུཏཾ། ཨུཏྟིཎྞོ ཙ རཱཛཱ ཙཀྐཝཏྟཱི མནུསྶེ ཨཱཎཱཔེཡྻ ‘པཱནཱིཡཾ, བྷཎེ, ཨཱཧརཐ, པིཝིསྶཱམཱི’ཏི, རཉྙོ ཙ ཨུདཀཔྤསཱདཀོ མཎི བྷཝེཡྻ། ‘ཨེཝཾ དེཝཱ’ཏི ཁོ ཏེ མནུསྶཱ རཉྙོ ཙཀྐཝཏྟིསྶ པཊིསྶུཏྭཱ ཏཾ ཨུདཀཔྤསཱདཀཾ མཎིཾ ཨུདཀེ པཀྑིཔེཡྻུཾ, ཏསྨིཾ ཨུདཀེ པཀྑིཏྟམཏྟེ སངྑསེཝཱལཔཎཀཾ ཝིགཙྪེཡྻ, ཀདྡམོ ཙ སནྣིསཱིདེཡྻ, ཨཙྪཾ བྷཝེཡྻ ཨུདཀཾ ཝིཔྤསནྣཾ ཨནཱཝིལཾ། ཏཏོ རཉྙོ ཙཀྐཝཏྟིསྶ པཱནཱིཡཾ ཨུཔནཱམེཡྻུཾ ‘པིཝཏུ, དེཝ, པཱནཱིཡ’ནྟི།
‘‘Opammaṃ karohī’’ti. ‘‘Yathā, mahārāja, rājā cakkavattī caturaṅginiyā senāya saddhiṃ addhānamaggappaṭipanno parittaṃ udakaṃ tareyya, taṃ udakaṃ hatthīhi ca assehi ca rathehi ca pattīhi ca khubhitaṃ bhaveyya āvilaṃ luḷitaṃ kalalībhūtaṃ. Uttiṇṇo ca rājā cakkavattī manusse āṇāpeyya ‘pānīyaṃ, bhaṇe, āharatha, pivissāmī’ti, rañño ca udakappasādako maṇi bhaveyya. ‘Evaṃ devā’ti kho te manussā rañño cakkavattissa paṭissutvā taṃ udakappasādakaṃ maṇiṃ udake pakkhipeyyuṃ, tasmiṃ udake pakkhittamatte saṅkhasevālapaṇakaṃ vigaccheyya, kaddamo ca sannisīdeyya, acchaṃ bhaveyya udakaṃ vippasannaṃ anāvilaṃ. Tato rañño cakkavattissa pānīyaṃ upanāmeyyuṃ ‘pivatu, deva, pānīya’nti.
‘‘ཡཐཱ, མཧཱརཱཛ, ཨུདཀཾ, ཨེཝཾ ཙིཏྟཾ དཊྛབྦཾ, ཡཐཱ ཏེ མནུསྶཱ, ཨེཝཾ ཡོགཱཝཙརོ དཊྛབྦོ, ཡཐཱ སངྑསེཝཱལཔཎཀཾ ཀདྡམོ ཙ, ཨེཝཾ ཀིལེསཱ དཊྛབྦཱ། ཡཐཱ ཨུདཀཔྤསཱདཀོ མཎི, ཨེཝཾ སདྡྷཱ དཊྛབྦཱ, ཡཐཱ ཨུདཀཔྤསཱདཀེ མཎིམྷི ཨུདཀེ པཀྑིཏྟམཏྟེ སངྑསེཝཱལཔཎཀཾ ཝིགཙྪེཡྻ, ཀདྡམོ ཙ སནྣིསཱིདེཡྻ, ཨཙྪཾ བྷཝེཡྻ ཨུདཀཾ ཝིཔྤསནྣཾ ཨནཱཝིལཾ, ཨེཝམེཝ ཁོ, མཧཱརཱཛ, སདྡྷཱ ཨུཔྤཛྫམཱནཱ ནཱིཝརཎེ ཝིཀྑམྦྷེཏི, ཝིནཱིཝརཎཾ ཙིཏྟཾ ཧོཏི ཨཙྪཾ ཝིཔྤསནྣཾ ཨནཱཝིལཾ, ཨེཝཾ ཁོ, མཧཱརཱཛ, སམྤསཱདནལཀྑཎཱ སདྡྷཱ’’ཏི།
‘‘Yathā, mahārāja, udakaṃ, evaṃ cittaṃ daṭṭhabbaṃ, yathā te manussā, evaṃ yogāvacaro daṭṭhabbo, yathā saṅkhasevālapaṇakaṃ kaddamo ca, evaṃ kilesā daṭṭhabbā. Yathā udakappasādako maṇi, evaṃ saddhā daṭṭhabbā, yathā udakappasādake maṇimhi udake pakkhittamatte saṅkhasevālapaṇakaṃ vigaccheyya, kaddamo ca sannisīdeyya, acchaṃ bhaveyya udakaṃ vippasannaṃ anāvilaṃ, evameva kho, mahārāja, saddhā uppajjamānā nīvaraṇe vikkhambheti, vinīvaraṇaṃ cittaṃ hoti acchaṃ vippasannaṃ anāvilaṃ, evaṃ kho, mahārāja, sampasādanalakkhaṇā saddhā’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
སམྤསཱདནལཀྑཎསདྡྷཱཔཉྷོ དསམོ།
Sampasādanalakkhaṇasaddhāpañho dasamo.
