| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੧੦. ਸਮ੍ਪਸਾਦਨਲਕ੍ਖਣਸਦ੍ਧਾਪਞ੍ਹੋ
10. Sampasādanalakkhaṇasaddhāpañho
੧੦. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਕਿਂਲਕ੍ਖਣਾ ਸਦ੍ਧਾ’’ਤਿ? ‘‘ਸਮ੍ਪਸਾਦਨਲਕ੍ਖਣਾ ਚ, ਮਹਾਰਾਜ, ਸਦ੍ਧਾ, ਸਮ੍ਪਕ੍ਖਨ੍ਦਨਲਕ੍ਖਣਾ ਚਾ’’ਤਿ। ‘‘ਕਥਂ, ਭਨ੍ਤੇ, ਸਮ੍ਪਸਾਦਨਲਕ੍ਖਣਾ ਸਦ੍ਧਾ’’ਤਿ? ‘‘ਸਦ੍ਧਾ ਖੋ, ਮਹਾਰਾਜ, ਉਪ੍ਪਜ੍ਜਮਾਨਾ ਨੀવਰਣੇ વਿਕ੍ਖਮ੍ਭੇਤਿ, વਿਨੀવਰਣਂ ਚਿਤ੍ਤਂ ਹੋਤਿ ਅਚ੍ਛਂ વਿਪ੍ਪਸਨ੍ਨਂ ਅਨਾવਿਲਂ। ਏવਂ ਖੋ, ਮਹਾਰਾਜ, ਸਮ੍ਪਸਾਦਨਲਕ੍ਖਣਾ ਸਦ੍ਧਾ’’ਤਿ।
10. Rājā āha ‘‘bhante nāgasena, kiṃlakkhaṇā saddhā’’ti? ‘‘Sampasādanalakkhaṇā ca, mahārāja, saddhā, sampakkhandanalakkhaṇā cā’’ti. ‘‘Kathaṃ, bhante, sampasādanalakkhaṇā saddhā’’ti? ‘‘Saddhā kho, mahārāja, uppajjamānā nīvaraṇe vikkhambheti, vinīvaraṇaṃ cittaṃ hoti acchaṃ vippasannaṃ anāvilaṃ. Evaṃ kho, mahārāja, sampasādanalakkhaṇā saddhā’’ti.
‘‘ਓਪਮ੍ਮਂ ਕਰੋਹੀ’’ਤਿ। ‘‘ਯਥਾ, ਮਹਾਰਾਜ, ਰਾਜਾ ਚਕ੍ਕવਤ੍ਤੀ ਚਤੁਰਙ੍ਗਿਨਿਯਾ ਸੇਨਾਯ ਸਦ੍ਧਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਪਰਿਤ੍ਤਂ ਉਦਕਂ ਤਰੇਯ੍ਯ, ਤਂ ਉਦਕਂ ਹਤ੍ਥੀਹਿ ਚ ਅਸ੍ਸੇਹਿ ਚ ਰਥੇਹਿ ਚ ਪਤ੍ਤੀਹਿ ਚ ਖੁਭਿਤਂ ਭવੇਯ੍ਯ ਆવਿਲਂ ਲੁਲ਼ਿਤਂ ਕਲਲੀਭੂਤਂ। ਉਤ੍ਤਿਣ੍ਣੋ ਚ ਰਾਜਾ ਚਕ੍ਕવਤ੍ਤੀ ਮਨੁਸ੍ਸੇ ਆਣਾਪੇਯ੍ਯ ‘ਪਾਨੀਯਂ, ਭਣੇ, ਆਹਰਥ, ਪਿવਿਸ੍ਸਾਮੀ’ਤਿ, ਰਞ੍ਞੋ ਚ ਉਦਕਪ੍ਪਸਾਦਕੋ ਮਣਿ ਭવੇਯ੍ਯ। ‘ਏવਂ ਦੇવਾ’ਤਿ ਖੋ ਤੇ ਮਨੁਸ੍ਸਾ ਰਞ੍ਞੋ ਚਕ੍ਕવਤ੍ਤਿਸ੍ਸ ਪਟਿਸ੍ਸੁਤ੍વਾ ਤਂ ਉਦਕਪ੍ਪਸਾਦਕਂ ਮਣਿਂ ਉਦਕੇ ਪਕ੍ਖਿਪੇਯ੍ਯੁਂ, ਤਸ੍ਮਿਂ ਉਦਕੇ ਪਕ੍ਖਿਤ੍ਤਮਤ੍ਤੇ ਸਙ੍ਖਸੇવਾਲਪਣਕਂ વਿਗਚ੍ਛੇਯ੍ਯ, ਕਦ੍ਦਮੋ ਚ ਸਨ੍ਨਿਸੀਦੇਯ੍ਯ, ਅਚ੍ਛਂ ਭવੇਯ੍ਯ ਉਦਕਂ વਿਪ੍ਪਸਨ੍ਨਂ ਅਨਾવਿਲਂ। ਤਤੋ ਰਞ੍ਞੋ ਚਕ੍ਕવਤ੍ਤਿਸ੍ਸ ਪਾਨੀਯਂ ਉਪਨਾਮੇਯ੍ਯੁਂ ‘ਪਿવਤੁ, ਦੇવ, ਪਾਨੀਯ’ਨ੍ਤਿ।
‘‘Opammaṃ karohī’’ti. ‘‘Yathā, mahārāja, rājā cakkavattī caturaṅginiyā senāya saddhiṃ addhānamaggappaṭipanno parittaṃ udakaṃ tareyya, taṃ udakaṃ hatthīhi ca assehi ca rathehi ca pattīhi ca khubhitaṃ bhaveyya āvilaṃ luḷitaṃ kalalībhūtaṃ. Uttiṇṇo ca rājā cakkavattī manusse āṇāpeyya ‘pānīyaṃ, bhaṇe, āharatha, pivissāmī’ti, rañño ca udakappasādako maṇi bhaveyya. ‘Evaṃ devā’ti kho te manussā rañño cakkavattissa paṭissutvā taṃ udakappasādakaṃ maṇiṃ udake pakkhipeyyuṃ, tasmiṃ udake pakkhittamatte saṅkhasevālapaṇakaṃ vigaccheyya, kaddamo ca sannisīdeyya, acchaṃ bhaveyya udakaṃ vippasannaṃ anāvilaṃ. Tato rañño cakkavattissa pānīyaṃ upanāmeyyuṃ ‘pivatu, deva, pānīya’nti.
‘‘ਯਥਾ, ਮਹਾਰਾਜ, ਉਦਕਂ, ਏવਂ ਚਿਤ੍ਤਂ ਦਟ੍ਠਬ੍ਬਂ, ਯਥਾ ਤੇ ਮਨੁਸ੍ਸਾ, ਏવਂ ਯੋਗਾવਚਰੋ ਦਟ੍ਠਬ੍ਬੋ, ਯਥਾ ਸਙ੍ਖਸੇવਾਲਪਣਕਂ ਕਦ੍ਦਮੋ ਚ, ਏવਂ ਕਿਲੇਸਾ ਦਟ੍ਠਬ੍ਬਾ। ਯਥਾ ਉਦਕਪ੍ਪਸਾਦਕੋ ਮਣਿ, ਏવਂ ਸਦ੍ਧਾ ਦਟ੍ਠਬ੍ਬਾ, ਯਥਾ ਉਦਕਪ੍ਪਸਾਦਕੇ ਮਣਿਮ੍ਹਿ ਉਦਕੇ ਪਕ੍ਖਿਤ੍ਤਮਤ੍ਤੇ ਸਙ੍ਖਸੇવਾਲਪਣਕਂ વਿਗਚ੍ਛੇਯ੍ਯ, ਕਦ੍ਦਮੋ ਚ ਸਨ੍ਨਿਸੀਦੇਯ੍ਯ, ਅਚ੍ਛਂ ਭવੇਯ੍ਯ ਉਦਕਂ વਿਪ੍ਪਸਨ੍ਨਂ ਅਨਾવਿਲਂ, ਏવਮੇવ ਖੋ, ਮਹਾਰਾਜ, ਸਦ੍ਧਾ ਉਪ੍ਪਜ੍ਜਮਾਨਾ ਨੀવਰਣੇ વਿਕ੍ਖਮ੍ਭੇਤਿ, વਿਨੀવਰਣਂ ਚਿਤ੍ਤਂ ਹੋਤਿ ਅਚ੍ਛਂ વਿਪ੍ਪਸਨ੍ਨਂ ਅਨਾવਿਲਂ, ਏવਂ ਖੋ, ਮਹਾਰਾਜ, ਸਮ੍ਪਸਾਦਨਲਕ੍ਖਣਾ ਸਦ੍ਧਾ’’ਤਿ।
‘‘Yathā, mahārāja, udakaṃ, evaṃ cittaṃ daṭṭhabbaṃ, yathā te manussā, evaṃ yogāvacaro daṭṭhabbo, yathā saṅkhasevālapaṇakaṃ kaddamo ca, evaṃ kilesā daṭṭhabbā. Yathā udakappasādako maṇi, evaṃ saddhā daṭṭhabbā, yathā udakappasādake maṇimhi udake pakkhittamatte saṅkhasevālapaṇakaṃ vigaccheyya, kaddamo ca sannisīdeyya, acchaṃ bhaveyya udakaṃ vippasannaṃ anāvilaṃ, evameva kho, mahārāja, saddhā uppajjamānā nīvaraṇe vikkhambheti, vinīvaraṇaṃ cittaṃ hoti acchaṃ vippasannaṃ anāvilaṃ, evaṃ kho, mahārāja, sampasādanalakkhaṇā saddhā’’ti.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ।
‘‘Kallosi, bhante nāgasenā’’ti.
ਸਮ੍ਪਸਾਦਨਲਕ੍ਖਣਸਦ੍ਧਾਪਞ੍ਹੋ ਦਸਮੋ।
Sampasādanalakkhaṇasaddhāpañho dasamo.
