| Library / Tipiṭaka / திபிடக • Tipiṭaka / தீ³க⁴னிகாய • Dīghanikāya |
5. ஸம்பஸாத³னீயஸுத்தங்
5. Sampasādanīyasuttaṃ
ஸாரிபுத்தஸீஹனாதோ³
Sāriputtasīhanādo
141. ஏவங் மே ஸுதங் – ஏகங் ஸமயங் ப⁴க³வா நாளந்தா³யங் விஹரதி பாவாரிகம்ப³வனே. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘ஏவங்பஸன்னோ அஹங், ப⁴ந்தே, ப⁴க³வதி, ந சாஹு ந ச ப⁴விஸ்ஸதி ந சேதரஹி விஜ்ஜதி அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ யதி³த³ங் ஸம்போ³தி⁴ய’’ந்தி.
141. Evaṃ me sutaṃ – ekaṃ samayaṃ bhagavā nāḷandāyaṃ viharati pāvārikambavane. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca – ‘‘evaṃpasanno ahaṃ, bhante, bhagavati, na cāhu na ca bhavissati na cetarahi vijjati añño samaṇo vā brāhmaṇo vā bhagavatā bhiyyobhiññataro yadidaṃ sambodhiya’’nti.
142. ‘‘உளாரா கோ² தே அயங், ஸாரிபுத்த, ஆஸபீ⁴ வாசா பா⁴ஸிதா, ஏகங்ஸோ க³ஹிதோ, ஸீஹனாதோ³ நதி³தோ – ‘ஏவங்பஸன்னோ அஹங், ப⁴ந்தே, ப⁴க³வதி; ந சாஹு ந ச ப⁴விஸ்ஸதி ந சேதரஹி விஜ்ஜதி அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ யதி³த³ங் ஸம்போ³தி⁴ய’ந்தி. கிங் தே 1, ஸாரிபுத்த, யே தே அஹேஸுங் அதீதமத்³தா⁴னங் அரஹந்தோ ஸம்மாஸம்பு³த்³தா⁴, ஸப்³பே³ தே ப⁴க³வந்தோ சேதஸா சேதோ பரிச்ச விதி³தா – ‘ஏவங்ஸீலா தே ப⁴க³வந்தோ அஹேஸுங் இதிபி, ஏவங்த⁴ம்மா தே ப⁴க³வந்தோ அஹேஸுங் இதிபி , ஏவங்பஞ்ஞா தே ப⁴க³வந்தோ அஹேஸுங் இதிபி, ஏவங்விஹாரீ தே ப⁴க³வந்தோ அஹேஸுங் இதிபி, ஏவங்விமுத்தா தே ப⁴க³வந்தோ அஹேஸுங் இதிபீ’’’தி? ‘‘நோ ஹேதங், ப⁴ந்தே’’.
142. ‘‘Uḷārā kho te ayaṃ, sāriputta, āsabhī vācā bhāsitā, ekaṃso gahito, sīhanādo nadito – ‘evaṃpasanno ahaṃ, bhante, bhagavati; na cāhu na ca bhavissati na cetarahi vijjati añño samaṇo vā brāhmaṇo vā bhagavatā bhiyyobhiññataro yadidaṃ sambodhiya’nti. Kiṃ te 2, sāriputta, ye te ahesuṃ atītamaddhānaṃ arahanto sammāsambuddhā, sabbe te bhagavanto cetasā ceto paricca viditā – ‘evaṃsīlā te bhagavanto ahesuṃ itipi, evaṃdhammā te bhagavanto ahesuṃ itipi , evaṃpaññā te bhagavanto ahesuṃ itipi, evaṃvihārī te bhagavanto ahesuṃ itipi, evaṃvimuttā te bhagavanto ahesuṃ itipī’’’ti? ‘‘No hetaṃ, bhante’’.
‘‘கிங் பன தே 3, ஸாரிபுத்த, யே தே ப⁴விஸ்ஸந்தி அனாக³தமத்³தா⁴னங் அரஹந்தோ ஸம்மாஸம்பு³த்³தா⁴ , ஸப்³பே³ தே ப⁴க³வந்தோ சேதஸா சேதோ பரிச்ச விதி³தா, `ஏவங்ஸீலா தே ப⁴க³வந்தோ ப⁴விஸ்ஸந்தி இதிபி, ஏவங்த⁴ம்மா…பே॰… ஏவங்பஞ்ஞா… ஏவங்விஹாரீ… ஏவங்விமுத்தா தே ப⁴க³வந்தோ ப⁴விஸ்ஸந்தி இதிபீ’’’தி? ‘‘நோ ஹேதங், ப⁴ந்தே’’.
‘‘Kiṃ pana te 4, sāriputta, ye te bhavissanti anāgatamaddhānaṃ arahanto sammāsambuddhā , sabbe te bhagavanto cetasā ceto paricca viditā, `evaṃsīlā te bhagavanto bhavissanti itipi, evaṃdhammā…pe… evaṃpaññā… evaṃvihārī… evaṃvimuttā te bhagavanto bhavissanti itipī’’’ti? ‘‘No hetaṃ, bhante’’.
‘‘கிங் பன தே 5, ஸாரிபுத்த, அஹங் ஏதரஹி அரஹங் ஸம்மாஸம்பு³த்³தோ⁴ சேதஸா சேதோ பரிச்ச விதி³தோ – ‘ஏவங்ஸீலோ ப⁴க³வா இதிபி, ஏவங்த⁴ம்மோ…பே॰… ஏவங்பஞ்ஞோ … ஏவங்விஹாரீ… ஏவங்விமுத்தோ ப⁴க³வா இதிபீ’’’தி? ‘‘நோ ஹேதங், ப⁴ந்தே’’.
‘‘Kiṃ pana te 6, sāriputta, ahaṃ etarahi arahaṃ sammāsambuddho cetasā ceto paricca vidito – ‘evaṃsīlo bhagavā itipi, evaṃdhammo…pe… evaṃpañño … evaṃvihārī… evaṃvimutto bhagavā itipī’’’ti? ‘‘No hetaṃ, bhante’’.
‘‘எத்த² ச ஹி தே, ஸாரிபுத்த, அதீதானாக³தபச்சுப்பன்னேஸு அரஹந்தேஸு ஸம்மாஸம்பு³த்³தே⁴ஸு சேதோபரியஞாணங் நத்தி². அத² கிங் சரஹி தே அயங், ஸாரிபுத்த, உளாரா ஆஸபீ⁴ வாசா பா⁴ஸிதா, ஏகங்ஸோ க³ஹிதோ, ஸீஹனாதோ³ நதி³தோ – ‘ஏவங்பஸன்னோ அஹங், ப⁴ந்தே, ப⁴க³வதி, ந சாஹு ந ச ப⁴விஸ்ஸதி ந சேதரஹி விஜ்ஜதி அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ யதி³த³ங் ஸம்போ³தி⁴ய’’’ந்தி?
‘‘Ettha ca hi te, sāriputta, atītānāgatapaccuppannesu arahantesu sammāsambuddhesu cetopariyañāṇaṃ natthi. Atha kiṃ carahi te ayaṃ, sāriputta, uḷārā āsabhī vācā bhāsitā, ekaṃso gahito, sīhanādo nadito – ‘evaṃpasanno ahaṃ, bhante, bhagavati, na cāhu na ca bhavissati na cetarahi vijjati añño samaṇo vā brāhmaṇo vā bhagavatā bhiyyobhiññataro yadidaṃ sambodhiya’’’nti?
143. ‘‘ந கோ² மே 7, ப⁴ந்தே, அதீதானாக³தபச்சுப்பன்னேஸு அரஹந்தேஸு ஸம்மாஸம்பு³த்³தே⁴ஸு சேதோபரியஞாணங் அத்தி². அபி ச, மே 8 த⁴ம்மன்வயோ விதி³தோ. ஸெய்யதா²பி, ப⁴ந்தே , ரஞ்ஞோ பச்சந்திமங் நக³ரங் த³ள்ஹுத்³தா⁴பங் 9 த³ள்ஹபாகாரதோரணங் ஏகத்³வாரங். தத்ரஸ்ஸ தோ³வாரிகோ பண்டி³தோ ப்³யத்தோ மேதா⁴வீ அஞ்ஞாதானங் நிவாரேதா, ஞாதானங் பவேஸேதா. ஸோ தஸ்ஸ நக³ரஸ்ஸ ஸமந்தா அனுபரியாயபத²ங் அனுக்கமமானோ ந பஸ்ஸெய்ய பாகாரஸந்தி⁴ங் வா பாகாரவிவரங் வா அந்தமஸோ பி³ளாரனிக்க²மனமத்தம்பி. தஸ்ஸ ஏவமஸ்ஸ – ‘யே கோ² கேசி ஓளாரிகா பாணா இமங் நக³ரங் பவிஸந்தி வா நிக்க²மந்தி வா, ஸப்³பே³ தே இமினாவ த்³வாரேன பவிஸந்தி வா நிக்க²மந்தி வா’தி. ஏவமேவ கோ² மே, ப⁴ந்தே, த⁴ம்மன்வயோ விதி³தோ. யே தே, ப⁴ந்தே, அஹேஸுங் அதீதமத்³தா⁴னங் அரஹந்தோ ஸம்மாஸம்பு³த்³தா⁴, ஸப்³பே³ தே ப⁴க³வந்தோ பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே சதூஸு ஸதிபட்டா²னேஸு ஸுப்பதிட்டி²தசித்தா, ஸத்த ஸம்பொ³ஜ்ஜ²ங்கே³ யதா²பூ⁴தங் பா⁴வெத்வா அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி²ங்ஸு. யேபி தே, ப⁴ந்தே, ப⁴விஸ்ஸந்தி அனாக³தமத்³தா⁴னங் அரஹந்தோ ஸம்மாஸம்பு³த்³தா⁴, ஸப்³பே³ தே ப⁴க³வந்தோ பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே சதூஸு ஸதிபட்டா²னேஸு ஸுப்பதிட்டி²தசித்தா, ஸத்த ஸம்பொ³ஜ்ஜ²ங்கே³ யதா²பூ⁴தங் பா⁴வெத்வா அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி²ஸ்ஸந்தி. ப⁴க³வாபி, ப⁴ந்தே, ஏதரஹி அரஹங் ஸம்மாஸம்பு³த்³தோ⁴ பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே சதூஸு ஸதிபட்டா²னேஸு ஸுப்பதிட்டி²தசித்தோ ஸத்த ஸம்பொ³ஜ்ஜ²ங்கே³ யதா²பூ⁴தங் பா⁴வெத்வா அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴.
143. ‘‘Na kho me 10, bhante, atītānāgatapaccuppannesu arahantesu sammāsambuddhesu cetopariyañāṇaṃ atthi. Api ca, me 11 dhammanvayo vidito. Seyyathāpi, bhante , rañño paccantimaṃ nagaraṃ daḷhuddhāpaṃ 12 daḷhapākāratoraṇaṃ ekadvāraṃ. Tatrassa dovāriko paṇḍito byatto medhāvī aññātānaṃ nivāretā, ñātānaṃ pavesetā. So tassa nagarassa samantā anupariyāyapathaṃ anukkamamāno na passeyya pākārasandhiṃ vā pākāravivaraṃ vā antamaso biḷāranikkhamanamattampi. Tassa evamassa – ‘ye kho keci oḷārikā pāṇā imaṃ nagaraṃ pavisanti vā nikkhamanti vā, sabbe te imināva dvārena pavisanti vā nikkhamanti vā’ti. Evameva kho me, bhante, dhammanvayo vidito. Ye te, bhante, ahesuṃ atītamaddhānaṃ arahanto sammāsambuddhā, sabbe te bhagavanto pañca nīvaraṇe pahāya cetaso upakkilese paññāya dubbalīkaraṇe catūsu satipaṭṭhānesu suppatiṭṭhitacittā, satta sambojjhaṅge yathābhūtaṃ bhāvetvā anuttaraṃ sammāsambodhiṃ abhisambujjhiṃsu. Yepi te, bhante, bhavissanti anāgatamaddhānaṃ arahanto sammāsambuddhā, sabbe te bhagavanto pañca nīvaraṇe pahāya cetaso upakkilese paññāya dubbalīkaraṇe catūsu satipaṭṭhānesu suppatiṭṭhitacittā, satta sambojjhaṅge yathābhūtaṃ bhāvetvā anuttaraṃ sammāsambodhiṃ abhisambujjhissanti. Bhagavāpi, bhante, etarahi arahaṃ sammāsambuddho pañca nīvaraṇe pahāya cetaso upakkilese paññāya dubbalīkaraṇe catūsu satipaṭṭhānesu suppatiṭṭhitacitto satta sambojjhaṅge yathābhūtaṃ bhāvetvā anuttaraṃ sammāsambodhiṃ abhisambuddho.
144. ‘‘இதா⁴ஹங், ப⁴ந்தே, யேன ப⁴க³வா தேனுபஸங்கமிங் த⁴ம்மஸ்ஸவனாய. தஸ்ஸ மே, ப⁴ந்தே, ப⁴க³வா த⁴ம்மங் தே³ஸேதி உத்தருத்தரங் பணீதபணீதங் கண்ஹஸுக்கஸப்படிபா⁴க³ங். யதா² யதா² மே, ப⁴ந்தே, ப⁴க³வா த⁴ம்மங் தே³ஸேஸி உத்தருத்தரங் பணீதபணீதங் கண்ஹஸுக்கஸப்படிபா⁴க³ங், ததா² ததா²ஹங் தஸ்மிங் த⁴ம்மே அபி⁴ஞ்ஞா இதே⁴கச்சங் த⁴ம்மங் த⁴ம்மேஸு நிட்ட²மக³மங்; ஸத்த²ரி பஸீதி³ங் – ‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ ப⁴க³வதா த⁴ம்மோ, ஸுப்படிபன்னோ ஸாவகஸங்கோ⁴’தி.
144. ‘‘Idhāhaṃ, bhante, yena bhagavā tenupasaṅkamiṃ dhammassavanāya. Tassa me, bhante, bhagavā dhammaṃ deseti uttaruttaraṃ paṇītapaṇītaṃ kaṇhasukkasappaṭibhāgaṃ. Yathā yathā me, bhante, bhagavā dhammaṃ desesi uttaruttaraṃ paṇītapaṇītaṃ kaṇhasukkasappaṭibhāgaṃ, tathā tathāhaṃ tasmiṃ dhamme abhiññā idhekaccaṃ dhammaṃ dhammesu niṭṭhamagamaṃ; satthari pasīdiṃ – ‘sammāsambuddho bhagavā, svākkhāto bhagavatā dhammo, suppaṭipanno sāvakasaṅgho’ti.
குஸலத⁴ம்மதே³ஸனா
Kusaladhammadesanā
145. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி குஸலேஸு த⁴ம்மேஸு. தத்ரிமே குஸலா த⁴ம்மா ஸெய்யதி²த³ங், சத்தாரோ ஸதிபட்டா²னா, சத்தாரோ ஸம்மப்பதா⁴னா, சத்தாரோ இத்³தி⁴பாதா³, பஞ்சிந்த்³ரியானி, பஞ்ச ப³லானி, ஸத்த பொ³ஜ்ஜ²ங்கா³, அரியோ அட்ட²ங்கி³கோ மக்³கோ³. இத⁴, ப⁴ந்தே, பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏததா³னுத்தரியங், ப⁴ந்தே, குஸலேஸு த⁴ம்மேஸு. தங் ப⁴க³வா அஸேஸமபி⁴ஜானாதி, தங் ப⁴க³வதோ அஸேஸமபி⁴ஜானதோ உத்தரி அபி⁴ஞ்ஞெய்யங் நத்தி², யத³பி⁴ஜானங் அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ அஸ்ஸ, யதி³த³ங் குஸலேஸு த⁴ம்மேஸு.
145. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti kusalesu dhammesu. Tatrime kusalā dhammā seyyathidaṃ, cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo. Idha, bhante, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Etadānuttariyaṃ, bhante, kusalesu dhammesu. Taṃ bhagavā asesamabhijānāti, taṃ bhagavato asesamabhijānato uttari abhiññeyyaṃ natthi, yadabhijānaṃ añño samaṇo vā brāhmaṇo vā bhagavatā bhiyyobhiññataro assa, yadidaṃ kusalesu dhammesu.
ஆயதனபண்ணத்திதே³ஸனா
Āyatanapaṇṇattidesanā
146. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி ஆயதனபண்ணத்தீஸு. ச²யிமானி, ப⁴ந்தே, அஜ்ஜ²த்திகபா³ஹிரானி ஆயதனானி. சக்கு²ஞ்சேவ ரூபா 13 ச, ஸோதஞ்சேவ ஸத்³தா³ ச, கா⁴னஞ்சேவ க³ந்தா⁴ ச, ஜிவ்ஹா சேவ ரஸா ச, காயோ சேவ பொ²ட்ட²ப்³பா³ ச, மனோ சேவ த⁴ம்மா ச. ஏததா³னுத்தரியங், ப⁴ந்தே, ஆயதனபண்ணத்தீஸு. தங் ப⁴க³வா அஸேஸமபி⁴ஜானாதி, தங் ப⁴க³வதோ அஸேஸமபி⁴ஜானதோ உத்தரி அபி⁴ஞ்ஞெய்யங் நத்தி², யத³பி⁴ஜானங் அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ அஸ்ஸ யதி³த³ங் ஆயதனபண்ணத்தீஸு.
146. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti āyatanapaṇṇattīsu. Chayimāni, bhante, ajjhattikabāhirāni āyatanāni. Cakkhuñceva rūpā 14 ca, sotañceva saddā ca, ghānañceva gandhā ca, jivhā ceva rasā ca, kāyo ceva phoṭṭhabbā ca, mano ceva dhammā ca. Etadānuttariyaṃ, bhante, āyatanapaṇṇattīsu. Taṃ bhagavā asesamabhijānāti, taṃ bhagavato asesamabhijānato uttari abhiññeyyaṃ natthi, yadabhijānaṃ añño samaṇo vā brāhmaṇo vā bhagavatā bhiyyobhiññataro assa yadidaṃ āyatanapaṇṇattīsu.
க³ப்³பா⁴வக்கந்திதே³ஸனா
Gabbhāvakkantidesanā
147. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி க³ப்³பா⁴வக்கந்தீஸு. சதஸ்ஸோ இமா, ப⁴ந்தே, க³ப்³பா⁴வக்கந்தியோ. இத⁴ , ப⁴ந்தே, ஏகச்சோ அஸம்பஜானோ மாதுகுச்சி²ங் ஓக்கமதி; அஸம்பஜானோ மாதுகுச்சி²ஸ்மிங் டா²தி; அஸம்பஜானோ மாதுகுச்சி²ம்ஹா நிக்க²மதி. அயங் பட²மா க³ப்³பா⁴வக்கந்தி.
147. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti gabbhāvakkantīsu. Catasso imā, bhante, gabbhāvakkantiyo. Idha , bhante, ekacco asampajāno mātukucchiṃ okkamati; asampajāno mātukucchismiṃ ṭhāti; asampajāno mātukucchimhā nikkhamati. Ayaṃ paṭhamā gabbhāvakkanti.
‘‘புன சபரங், ப⁴ந்தே, இதே⁴கச்சோ ஸம்பஜானோ மாதுகுச்சி²ங் ஓக்கமதி; அஸம்பஜானோ மாதுகுச்சி²ஸ்மிங் டா²தி; அஸம்பஜானோ மாதுகுச்சி²ம்ஹா நிக்க²மதி. அயங் து³தியா க³ப்³பா⁴வக்கந்தி.
‘‘Puna caparaṃ, bhante, idhekacco sampajāno mātukucchiṃ okkamati; asampajāno mātukucchismiṃ ṭhāti; asampajāno mātukucchimhā nikkhamati. Ayaṃ dutiyā gabbhāvakkanti.
‘‘புன சபரங், ப⁴ந்தே, இதே⁴கச்சோ ஸம்பஜானோ மாதுகுச்சி²ங் ஓக்கமதி; ஸம்பஜானோ மாதுகுச்சி²ஸ்மிங் டா²தி; அஸம்பஜானோ மாதுகுச்சி²ம்ஹா நிக்க²மதி. அயங் ததியா க³ப்³பா⁴வக்கந்தி.
‘‘Puna caparaṃ, bhante, idhekacco sampajāno mātukucchiṃ okkamati; sampajāno mātukucchismiṃ ṭhāti; asampajāno mātukucchimhā nikkhamati. Ayaṃ tatiyā gabbhāvakkanti.
‘‘புன சபரங், ப⁴ந்தே, இதே⁴கச்சோ ஸம்பஜானோ மாதுகுச்சி²ங் ஓக்கமதி; ஸம்பஜானோ மாதுகுச்சி²ஸ்மிங் டா²தி; ஸம்பஜானோ மாதுகுச்சி²ம்ஹா நிக்க²மதி. அயங் சதுத்தா² க³ப்³பா⁴வக்கந்தி. ஏததா³னுத்தரியங், ப⁴ந்தே, க³ப்³பா⁴வக்கந்தீஸு.
‘‘Puna caparaṃ, bhante, idhekacco sampajāno mātukucchiṃ okkamati; sampajāno mātukucchismiṃ ṭhāti; sampajāno mātukucchimhā nikkhamati. Ayaṃ catutthā gabbhāvakkanti. Etadānuttariyaṃ, bhante, gabbhāvakkantīsu.
ஆதே³ஸனவிதா⁴தே³ஸனா
Ādesanavidhādesanā
148. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி ஆதே³ஸனவிதா⁴ஸு. சதஸ்ஸோ இமா, ப⁴ந்தே, ஆதே³ஸனவிதா⁴. இத⁴, ப⁴ந்தே, ஏகச்சோ நிமித்தேன ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². அயங் பட²மா ஆதே³ஸனவிதா⁴.
148. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti ādesanavidhāsu. Catasso imā, bhante, ādesanavidhā. Idha, bhante, ekacco nimittena ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Ayaṃ paṭhamā ādesanavidhā.
‘‘புன சபரங், ப⁴ந்தே, இதே⁴கச்சோ ந ஹேவ கோ² நிமித்தேன ஆதி³ஸதி. அபி ச கோ² மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². அயங் து³தியா ஆதே³ஸனவிதா⁴.
‘‘Puna caparaṃ, bhante, idhekacco na heva kho nimittena ādisati. Api ca kho manussānaṃ vā amanussānaṃ vā devatānaṃ vā saddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Ayaṃ dutiyā ādesanavidhā.
‘‘புன சபரங், ப⁴ந்தே, இதே⁴கச்சோ ந ஹேவ கோ² நிமித்தேன ஆதி³ஸதி, நாபி மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி. அபி ச கோ² விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². அயங் ததியா ஆதே³ஸனவிதா⁴.
‘‘Puna caparaṃ, bhante, idhekacco na heva kho nimittena ādisati, nāpi manussānaṃ vā amanussānaṃ vā devatānaṃ vā saddaṃ sutvā ādisati. Api ca kho vitakkayato vicārayato vitakkavipphārasaddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Ayaṃ tatiyā ādesanavidhā.
‘‘புன சபரங், ப⁴ந்தே, இதே⁴கச்சோ ந ஹேவ கோ² நிமித்தேன ஆதி³ஸதி, நாபி மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி, நாபி விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி. அபி ச கோ² அவிதக்கங் அவிசாரங் ஸமாதி⁴ங் ஸமாபன்னஸ்ஸ 15 சேதஸா சேதோ பரிச்ச பஜானாதி – ‘யதா² இமஸ்ஸ போ⁴தோ மனோஸங்கா²ரா பணிஹிதா. ததா² இமஸ்ஸ சித்தஸ்ஸ அனந்தரா இமங் நாம விதக்கங் விதக்கெஸ்ஸதீ’தி. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². அயங் சதுத்தா² ஆதே³ஸனவிதா⁴. ஏததா³னுத்தரியங், ப⁴ந்தே, ஆதே³ஸனவிதா⁴ஸு.
‘‘Puna caparaṃ, bhante, idhekacco na heva kho nimittena ādisati, nāpi manussānaṃ vā amanussānaṃ vā devatānaṃ vā saddaṃ sutvā ādisati, nāpi vitakkayato vicārayato vitakkavipphārasaddaṃ sutvā ādisati. Api ca kho avitakkaṃ avicāraṃ samādhiṃ samāpannassa 16 cetasā ceto paricca pajānāti – ‘yathā imassa bhoto manosaṅkhārā paṇihitā. Tathā imassa cittassa anantarā imaṃ nāma vitakkaṃ vitakkessatī’ti. So bahuṃ cepi ādisati, tatheva taṃ hoti, no aññathā. Ayaṃ catutthā ādesanavidhā. Etadānuttariyaṃ, bhante, ādesanavidhāsu.
த³ஸ்ஸனஸமாபத்திதே³ஸனா
Dassanasamāpattidesanā
149. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி த³ஸ்ஸனஸமாபத்தீஸு. சதஸ்ஸோ இமா, ப⁴ந்தே, த³ஸ்ஸனஸமாபத்தியோ. இத⁴, ப⁴ந்தே, ஏகச்சோ ஸமணோ வா ப்³ராஹ்மணோ வா ஆதப்பமன்வாய பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே இமமேவ காயங் உத்³த⁴ங் பாத³தலா அதோ⁴ கேஸமத்த²கா தசபரியந்தங் பூரங் நானப்பகாரஸ்ஸ அஸுசினோ பச்சவெக்க²தி – ‘அத்தி² இமஸ்மிங் காயே கேஸா லோமா நகா² த³ந்தா தசோ மங்ஸங் ந்ஹாரு அட்டி² அட்டி²மிஞ்ஜங் வக்கங் ஹத³யங் யகனங் கிலோமகங் பிஹகங் பப்பா²ஸங் அந்தங் அந்தகு³ணங் உத³ரியங் கரீஸங் பித்தங் ஸெம்ஹங் புப்³போ³ லோஹிதங் ஸேதோ³ மேதோ³ அஸ்ஸு வஸா கே²ளோ ஸிங்கா⁴னிகா லஸிகா முத்த’ந்தி. அயங் பட²மா த³ஸ்ஸனஸமாபத்தி.
149. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti dassanasamāpattīsu. Catasso imā, bhante, dassanasamāpattiyo. Idha, bhante, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṃ cetosamādhiṃ phusati, yathāsamāhite citte imameva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati – ‘atthi imasmiṃ kāye kesā lomā nakhā dantā taco maṃsaṃ nhāru aṭṭhi aṭṭhimiñjaṃ vakkaṃ hadayaṃ yakanaṃ kilomakaṃ pihakaṃ papphāsaṃ antaṃ antaguṇaṃ udariyaṃ karīsaṃ pittaṃ semhaṃ pubbo lohitaṃ sedo medo assu vasā kheḷo siṅghānikā lasikā mutta’nti. Ayaṃ paṭhamā dassanasamāpatti.
‘‘புன சபரங் , ப⁴ந்தே, இதே⁴கச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே இமமேவ காயங் உத்³த⁴ங் பாத³தலா அதோ⁴ கேஸமத்த²கா தசபரியந்தங் பூரங் நானப்பகாரஸ்ஸ அஸுசினோ பச்சவெக்க²தி – ‘அத்தி² இமஸ்மிங் காயே கேஸா லோமா…பே॰… லஸிகா முத்த’ந்தி. அதிக்கம்ம ச புரிஸஸ்ஸ ச²விமங்ஸலோஹிதங் அட்டி²ங் பச்சவெக்க²தி. அயங் து³தியா த³ஸ்ஸனஸமாபத்தி.
‘‘Puna caparaṃ , bhante, idhekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte imameva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati – ‘atthi imasmiṃ kāye kesā lomā…pe… lasikā mutta’nti. Atikkamma ca purisassa chavimaṃsalohitaṃ aṭṭhiṃ paccavekkhati. Ayaṃ dutiyā dassanasamāpatti.
‘‘புன சபரங், ப⁴ந்தே, இதே⁴கச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே இமமேவ காயங் உத்³த⁴ங் பாத³தலா அதோ⁴ கேஸமத்த²கா தசபரியந்தங் பூரங் நானப்பகாரஸ்ஸ அஸுசினோ பச்சவெக்க²தி – ‘அத்தி² இமஸ்மிங் காயே கேஸா லோமா…பே॰… லஸிகா முத்த’ந்தி. அதிக்கம்ம ச புரிஸஸ்ஸ ச²விமங்ஸலோஹிதங் அட்டி²ங் பச்சவெக்க²தி. புரிஸஸ்ஸ ச விஞ்ஞாணஸோதங் பஜானாதி, உப⁴யதோ அப்³பொ³ச்சி²ன்னங் இத⁴ லோகே பதிட்டி²தஞ்ச பரலோகே பதிட்டி²தஞ்ச. அயங் ததியா த³ஸ்ஸனஸமாபத்தி.
‘‘Puna caparaṃ, bhante, idhekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte imameva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati – ‘atthi imasmiṃ kāye kesā lomā…pe… lasikā mutta’nti. Atikkamma ca purisassa chavimaṃsalohitaṃ aṭṭhiṃ paccavekkhati. Purisassa ca viññāṇasotaṃ pajānāti, ubhayato abbocchinnaṃ idha loke patiṭṭhitañca paraloke patiṭṭhitañca. Ayaṃ tatiyā dassanasamāpatti.
‘‘புன சபரங், ப⁴ந்தே, இதே⁴கச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே இமமேவ காயங் உத்³த⁴ங் பாத³தலா அதோ⁴ கேஸமத்த²கா தசபரியந்தங் பூரங் நானப்பகாரஸ்ஸ அஸுசினோ பச்சவெக்க²தி – ‘அத்தி² இமஸ்மிங் காயே கேஸா லோமா…பே॰… லஸிகா முத்த’ந்தி. அதிக்கம்ம ச புரிஸஸ்ஸ ச²விமங்ஸலோஹிதங் அட்டி²ங் பச்சவெக்க²தி. புரிஸஸ்ஸ ச விஞ்ஞாணஸோதங் பஜானாதி, உப⁴யதோ அப்³பொ³ச்சி²ன்னங் இத⁴ லோகே அப்பதிட்டி²தஞ்ச பரலோகே அப்பதிட்டி²தஞ்ச. அயங் சதுத்தா² த³ஸ்ஸனஸமாபத்தி. ஏததா³னுத்தரியங், ப⁴ந்தே, த³ஸ்ஸனஸமாபத்தீஸு.
‘‘Puna caparaṃ, bhante, idhekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte imameva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati – ‘atthi imasmiṃ kāye kesā lomā…pe… lasikā mutta’nti. Atikkamma ca purisassa chavimaṃsalohitaṃ aṭṭhiṃ paccavekkhati. Purisassa ca viññāṇasotaṃ pajānāti, ubhayato abbocchinnaṃ idha loke appatiṭṭhitañca paraloke appatiṭṭhitañca. Ayaṃ catutthā dassanasamāpatti. Etadānuttariyaṃ, bhante, dassanasamāpattīsu.
புக்³க³லபண்ணத்திதே³ஸனா
Puggalapaṇṇattidesanā
150. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி புக்³க³லபண்ணத்தீஸு. ஸத்திமே, ப⁴ந்தே, புக்³க³லா. உப⁴தோபா⁴க³விமுத்தோ பஞ்ஞாவிமுத்தோ காயஸக்கீ² தி³ட்டி²ப்பத்தோ ஸத்³தா⁴விமுத்தோ த⁴ம்மானுஸாரீ ஸத்³தா⁴னுஸாரீ. ஏததா³னுத்தரியங், ப⁴ந்தே, புக்³க³லபண்ணத்தீஸு.
150. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti puggalapaṇṇattīsu. Sattime, bhante, puggalā. Ubhatobhāgavimutto paññāvimutto kāyasakkhī diṭṭhippatto saddhāvimutto dhammānusārī saddhānusārī. Etadānuttariyaṃ, bhante, puggalapaṇṇattīsu.
பதா⁴னதே³ஸனா
Padhānadesanā
151. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி பதா⁴னேஸு. ஸத்திமே, ப⁴ந்தே ஸம்பொ³ஜ்ஜ²ங்கா³ ஸதிஸம்பொ³ஜ்ஜ²ங்கோ³ த⁴ம்மவிசயஸம்பொ³ஜ்ஜ²ங்கோ³ வீரியஸம்பொ³ஜ்ஜ²ங்கோ³ பீதிஸம்பொ³ஜ்ஜ²ங்கோ³ பஸ்ஸத்³தி⁴ஸம்பொ³ஜ்ஜ²ங்கோ³ ஸமாதி⁴ஸம்பொ³ஜ்ஜ²ங்கோ³ உபெக்கா²ஸம்பொ³ஜ்ஜ²ங்கோ³. ஏததா³னுத்தரியங், ப⁴ந்தே, பதா⁴னேஸு.
151. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti padhānesu. Sattime, bhante sambojjhaṅgā satisambojjhaṅgo dhammavicayasambojjhaṅgo vīriyasambojjhaṅgo pītisambojjhaṅgo passaddhisambojjhaṅgo samādhisambojjhaṅgo upekkhāsambojjhaṅgo. Etadānuttariyaṃ, bhante, padhānesu.
படிபதா³தே³ஸனா
Paṭipadādesanā
152. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி படிபதா³ஸு. சதஸ்ஸோ இமா, ப⁴ந்தே, படிபதா³ து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞாதி. தத்ர, ப⁴ந்தே, யாயங் படிபதா³ து³க்கா² த³ந்தா⁴பி⁴ஞ்ஞா, அயங், ப⁴ந்தே, படிபதா³ உப⁴யேனேவ ஹீனா அக்கா²யதி து³க்க²த்தா ச த³ந்த⁴த்தா ச. தத்ர, ப⁴ந்தே, யாயங் படிபதா³ து³க்கா² கி²ப்பாபி⁴ஞ்ஞா, அயங் பன, ப⁴ந்தே, படிபதா³ து³க்க²த்தா ஹீனா அக்கா²யதி . தத்ர, ப⁴ந்தே, யாயங் படிபதா³ ஸுகா² த³ந்தா⁴பி⁴ஞ்ஞா, அயங் பன, ப⁴ந்தே, படிபதா³ த³ந்த⁴த்தா ஹீனா அக்கா²யதி. தத்ர, ப⁴ந்தே, யாயங் படிபதா³ ஸுகா² கி²ப்பாபி⁴ஞ்ஞா, அயங் பன, ப⁴ந்தே, படிபதா³ உப⁴யேனேவ பணீதா அக்கா²யதி ஸுக²த்தா ச கி²ப்பத்தா ச. ஏததா³னுத்தரியங், ப⁴ந்தே, படிபதா³ஸு.
152. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti paṭipadāsu. Catasso imā, bhante, paṭipadā dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññāti. Tatra, bhante, yāyaṃ paṭipadā dukkhā dandhābhiññā, ayaṃ, bhante, paṭipadā ubhayeneva hīnā akkhāyati dukkhattā ca dandhattā ca. Tatra, bhante, yāyaṃ paṭipadā dukkhā khippābhiññā, ayaṃ pana, bhante, paṭipadā dukkhattā hīnā akkhāyati . Tatra, bhante, yāyaṃ paṭipadā sukhā dandhābhiññā, ayaṃ pana, bhante, paṭipadā dandhattā hīnā akkhāyati. Tatra, bhante, yāyaṃ paṭipadā sukhā khippābhiññā, ayaṃ pana, bhante, paṭipadā ubhayeneva paṇītā akkhāyati sukhattā ca khippattā ca. Etadānuttariyaṃ, bhante, paṭipadāsu.
ப⁴ஸ்ஸஸமாசாராதி³தே³ஸனா
Bhassasamācārādidesanā
153. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி ப⁴ஸ்ஸஸமாசாரே. இத⁴, ப⁴ந்தே, ஏகச்சோ ந சேவ முஸாவாது³பஸஞ்ஹிதங் வாசங் பா⁴ஸதி ந ச வேபூ⁴தியங் ந ச பேஸுணியங் ந ச ஸாரம்ப⁴ஜங் ஜயாபெக்கோ²; மந்தா மந்தா ச வாசங் பா⁴ஸதி நிதா⁴னவதிங் காலேன. ஏததா³னுத்தரியங், ப⁴ந்தே, ப⁴ஸ்ஸஸமாசாரே.
153. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti bhassasamācāre. Idha, bhante, ekacco na ceva musāvādupasañhitaṃ vācaṃ bhāsati na ca vebhūtiyaṃ na ca pesuṇiyaṃ na ca sārambhajaṃ jayāpekkho; mantā mantā ca vācaṃ bhāsati nidhānavatiṃ kālena. Etadānuttariyaṃ, bhante, bhassasamācāre.
‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி புரிஸஸீலஸமாசாரே. இத⁴, ப⁴ந்தே, ஏகச்சோ ஸச்சோ சஸ்ஸ ஸத்³தோ⁴ ச, ந ச குஹகோ, ந ச லபகோ, ந ச நேமித்திகோ, ந ச நிப்பேஸிகோ, ந ச லாபே⁴ன லாப⁴ங் நிஜிகீ³ஸனகோ 17, இந்த்³ரியேஸு கு³த்தத்³வாரோ, போ⁴ஜனே மத்தஞ்ஞூ, ஸமகாரீ, ஜாக³ரியானுயோக³மனுயுத்தோ, அதந்தி³தோ, ஆரத்³த⁴வீரியோ, ஜா²யீ, ஸதிமா, கல்யாணபடிபா⁴னோ, க³திமா, தி⁴திமா, மதிமா, ந ச காமேஸு கி³த்³தோ⁴, ஸதோ ச நிபகோ ச. ஏததா³னுத்தரியங், ப⁴ந்தே, புரிஸஸீலஸமாசாரே.
‘‘Aparaṃ pana, bhante, etadānuttariyaṃ, yathā bhagavā dhammaṃ deseti purisasīlasamācāre. Idha, bhante, ekacco sacco cassa saddho ca, na ca kuhako, na ca lapako, na ca nemittiko, na ca nippesiko, na ca lābhena lābhaṃ nijigīsanako 18, indriyesu guttadvāro, bhojane mattaññū, samakārī, jāgariyānuyogamanuyutto, atandito, āraddhavīriyo, jhāyī, satimā, kalyāṇapaṭibhāno, gatimā, dhitimā, matimā, na ca kāmesu giddho, sato ca nipako ca. Etadānuttariyaṃ, bhante, purisasīlasamācāre.
அனுஸாஸனவிதா⁴தே³ஸனா
Anusāsanavidhādesanā
154. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி அனுஸாஸனவிதா⁴ஸு. சதஸ்ஸோ இமா ப⁴ந்தே அனுஸாஸனவிதா⁴ – ஜானாதி , ப⁴ந்தே, ப⁴க³வா அபரங் புக்³க³லங் பச்சத்தங் யோனிஸோமனஸிகாரா ‘அயங் புக்³க³லோ யதா²னுஸிட்ட²ங் ததா² படிபஜ்ஜமானோ திண்ணங் ஸங்யோஜனானங் பரிக்க²யா ஸோதாபன்னோ ப⁴விஸ்ஸதி அவினிபாதத⁴ம்மோ நியதோ ஸம்போ³தி⁴பராயணோ’தி. ஜானாதி, ப⁴ந்தே, ப⁴க³வா பரங் புக்³க³லங் பச்சத்தங் யோனிஸோமனஸிகாரா – ‘அயங் புக்³க³லோ யதா²னுஸிட்ட²ங் ததா² படிபஜ்ஜமானோ திண்ணங் ஸங்யோஜனானங் பரிக்க²யா ராக³தோ³ஸமோஹானங் தனுத்தா ஸகதா³கா³மீ ப⁴விஸ்ஸதி, ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரிஸ்ஸதீ’தி. ஜானாதி, ப⁴ந்தே, ப⁴க³வா பரங் புக்³க³லங் பச்சத்தங் யோனிஸோமனஸிகாரா – ‘அயங் புக்³க³லோ யதா²னுஸிட்ட²ங் ததா² படிபஜ்ஜமானோ பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகோ ப⁴விஸ்ஸதி தத்த² பரினிப்³பா³யீ அனாவத்தித⁴ம்மோ தஸ்மா லோகா’தி. ஜானாதி, ப⁴ந்தே, ப⁴க³வா பரங் புக்³க³லங் பச்சத்தங் யோனிஸோமனஸிகாரா – ‘அயங் புக்³க³லோ யதா²னுஸிட்ட²ங் ததா² படிபஜ்ஜமானோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதீ’தி. ஏததா³னுத்தரியங், ப⁴ந்தே, அனுஸாஸனவிதா⁴ஸு.
154. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti anusāsanavidhāsu. Catasso imā bhante anusāsanavidhā – jānāti , bhante, bhagavā aparaṃ puggalaṃ paccattaṃ yonisomanasikārā ‘ayaṃ puggalo yathānusiṭṭhaṃ tathā paṭipajjamāno tiṇṇaṃ saṃyojanānaṃ parikkhayā sotāpanno bhavissati avinipātadhammo niyato sambodhiparāyaṇo’ti. Jānāti, bhante, bhagavā paraṃ puggalaṃ paccattaṃ yonisomanasikārā – ‘ayaṃ puggalo yathānusiṭṭhaṃ tathā paṭipajjamāno tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī bhavissati, sakideva imaṃ lokaṃ āgantvā dukkhassantaṃ karissatī’ti. Jānāti, bhante, bhagavā paraṃ puggalaṃ paccattaṃ yonisomanasikārā – ‘ayaṃ puggalo yathānusiṭṭhaṃ tathā paṭipajjamāno pañcannaṃ orambhāgiyānaṃ saṃyojanānaṃ parikkhayā opapātiko bhavissati tattha parinibbāyī anāvattidhammo tasmā lokā’ti. Jānāti, bhante, bhagavā paraṃ puggalaṃ paccattaṃ yonisomanasikārā – ‘ayaṃ puggalo yathānusiṭṭhaṃ tathā paṭipajjamāno āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissatī’ti. Etadānuttariyaṃ, bhante, anusāsanavidhāsu.
பரபுக்³க³லவிமுத்திஞாணதே³ஸனா
Parapuggalavimuttiñāṇadesanā
155. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி பரபுக்³க³லவிமுத்திஞாணே. ஜானாதி, ப⁴ந்தே, ப⁴க³வா பரங் புக்³க³லங் பச்சத்தங் யோனிஸோமனஸிகாரா – ‘அயங் புக்³க³லோ திண்ணங் ஸங்யோஜனானங் பரிக்க²யா ஸோதாபன்னோ ப⁴விஸ்ஸதி அவினிபாதத⁴ம்மோ நியதோ ஸம்போ³தி⁴பராயணோ’தி. ஜானாதி, ப⁴ந்தே, ப⁴க³வா பரங் புக்³க³லங் பச்சத்தங் யோனிஸோமனஸிகாரா – ‘அயங் புக்³க³லோ திண்ணங் ஸங்யோஜனானங் பரிக்க²யா ராக³தோ³ஸமோஹானங் தனுத்தா ஸகதா³கா³மீ ப⁴விஸ்ஸதி, ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரிஸ்ஸதீ’தி. ஜானாதி, ப⁴ந்தே, ப⁴க³வா பரங் புக்³க³லங் பச்சத்தங் யோனிஸோமனஸிகாரா – ‘அயங் புக்³க³லோ பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகோ ப⁴விஸ்ஸதி தத்த² பரினிப்³பா³யீ அனாவத்தித⁴ம்மோ தஸ்மா லோகா’தி. ஜானாதி, ப⁴ந்தே, ப⁴க³வா பரங் புக்³க³லங் பச்சத்தங் யோனிஸோமனஸிகாரா – ‘அயங் புக்³க³லோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதீ’தி. ஏததா³னுத்தரியங், ப⁴ந்தே, பரபுக்³க³லவிமுத்திஞாணே.
155. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti parapuggalavimuttiñāṇe. Jānāti, bhante, bhagavā paraṃ puggalaṃ paccattaṃ yonisomanasikārā – ‘ayaṃ puggalo tiṇṇaṃ saṃyojanānaṃ parikkhayā sotāpanno bhavissati avinipātadhammo niyato sambodhiparāyaṇo’ti. Jānāti, bhante, bhagavā paraṃ puggalaṃ paccattaṃ yonisomanasikārā – ‘ayaṃ puggalo tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī bhavissati, sakideva imaṃ lokaṃ āgantvā dukkhassantaṃ karissatī’ti. Jānāti, bhante, bhagavā paraṃ puggalaṃ paccattaṃ yonisomanasikārā – ‘ayaṃ puggalo pañcannaṃ orambhāgiyānaṃ saṃyojanānaṃ parikkhayā opapātiko bhavissati tattha parinibbāyī anāvattidhammo tasmā lokā’ti. Jānāti, bhante, bhagavā paraṃ puggalaṃ paccattaṃ yonisomanasikārā – ‘ayaṃ puggalo āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissatī’ti. Etadānuttariyaṃ, bhante, parapuggalavimuttiñāṇe.
ஸஸ்ஸதவாத³தே³ஸனா
Sassatavādadesanā
156. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி ஸஸ்ஸதவாதே³ஸு. தயோமே, ப⁴ந்தே, ஸஸ்ஸதவாதா³. இத⁴, ப⁴ந்தே, ஏகச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே அனேகவிஹிதங் புப்³பே³னிவாஸங் அனுஸ்ஸரதி. ஸெய்யதி²த³ங், ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகானிபி ஜாதிஸதானி அனேகானிபி ஜாதிஸஹஸ்ஸானி அனேகானிபி ஜாதிஸதஸஹஸ்ஸானி, ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. ஸோ ஏவமாஹ – ‘அதீதங்பாஹங் அத்³தா⁴னங் ஜானாமி – ஸங்வட்டி வா லோகோ விவட்டி வாதி. அனாக³தங்பாஹங் அத்³தா⁴னங் ஜானாமி – ஸங்வட்டிஸ்ஸதி வா லோகோ விவட்டிஸ்ஸதி வாதி. ஸஸ்ஸதோ அத்தா ச லோகோ ச வஞ்ஜோ² கூடட்டோ² ஏஸிகட்டா²யிட்டி²தோ. தே ச ஸத்தா ஸந்தா⁴வந்தி ஸங்ஸரந்தி சவந்தி உபபஜ்ஜந்தி, அத்தி²த்வேவ ஸஸ்ஸதிஸம’ந்தி. அயங் பட²மோ ஸஸ்ஸதவாதோ³.
156. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti sassatavādesu. Tayome, bhante, sassatavādā. Idha, bhante, ekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte anekavihitaṃ pubbenivāsaṃ anussarati. Seyyathidaṃ, ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekānipi jātisatāni anekānipi jātisahassāni anekānipi jātisatasahassāni, ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti. Iti sākāraṃ sauddesaṃ anekavihitaṃ pubbenivāsaṃ anussarati. So evamāha – ‘atītaṃpāhaṃ addhānaṃ jānāmi – saṃvaṭṭi vā loko vivaṭṭi vāti. Anāgataṃpāhaṃ addhānaṃ jānāmi – saṃvaṭṭissati vā loko vivaṭṭissati vāti. Sassato attā ca loko ca vañjho kūṭaṭṭho esikaṭṭhāyiṭṭhito. Te ca sattā sandhāvanti saṃsaranti cavanti upapajjanti, atthitveva sassatisama’nti. Ayaṃ paṭhamo sassatavādo.
‘‘புன சபரங், ப⁴ந்தே, இதே⁴கச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே அனேகவிஹிதங் புப்³பே³னிவாஸங் அனுஸ்ஸரதி. ஸெய்யதி²த³ங், ஏகம்பி ஸங்வட்டவிவட்டங் த்³வேபி ஸங்வட்டவிவட்டானி தீணிபி ஸங்வட்டவிவட்டானி சத்தாரிபி ஸங்வட்டவிவட்டானி பஞ்சபி ஸங்வட்டவிவட்டானி த³ஸபி ஸங்வட்டவிவட்டானி, ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. ஸோ ஏவமாஹ – ‘அதீதங்பாஹங் அத்³தா⁴னங் ஜானாமி ஸங்வட்டி வா லோகோ விவட்டி வாதி . அனாக³தங்பாஹங் அத்³தா⁴னங் ஜானாமி ஸங்வட்டிஸ்ஸதி வா லோகோ விவட்டிஸ்ஸதி வாதி. ஸஸ்ஸதோ அத்தா ச லோகோ ச வஞ்ஜோ² கூடட்டோ² ஏஸிகட்டா²யிட்டி²தோ. தே ச ஸத்தா ஸந்தா⁴வந்தி ஸங்ஸரந்தி சவந்தி உபபஜ்ஜந்தி, அத்தி²த்வேவ ஸஸ்ஸதிஸம’ந்தி. அயங் து³தியோ ஸஸ்ஸதவாதோ³.
‘‘Puna caparaṃ, bhante, idhekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte anekavihitaṃ pubbenivāsaṃ anussarati. Seyyathidaṃ, ekampi saṃvaṭṭavivaṭṭaṃ dvepi saṃvaṭṭavivaṭṭāni tīṇipi saṃvaṭṭavivaṭṭāni cattāripi saṃvaṭṭavivaṭṭāni pañcapi saṃvaṭṭavivaṭṭāni dasapi saṃvaṭṭavivaṭṭāni, ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti. Iti sākāraṃ sauddesaṃ anekavihitaṃ pubbenivāsaṃ anussarati. So evamāha – ‘atītaṃpāhaṃ addhānaṃ jānāmi saṃvaṭṭi vā loko vivaṭṭi vāti . Anāgataṃpāhaṃ addhānaṃ jānāmi saṃvaṭṭissati vā loko vivaṭṭissati vāti. Sassato attā ca loko ca vañjho kūṭaṭṭho esikaṭṭhāyiṭṭhito. Te ca sattā sandhāvanti saṃsaranti cavanti upapajjanti, atthitveva sassatisama’nti. Ayaṃ dutiyo sassatavādo.
‘‘புன சபரங், ப⁴ந்தே, இதே⁴கச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே அனேகவிஹிதங் புப்³பே³னிவாஸங் அனுஸ்ஸரதி. ஸெய்யதி²த³ங், த³ஸபி ஸங்வட்டவிவட்டானி வீஸம்பி ஸங்வட்டவிவட்டானி திங்ஸம்பி ஸங்வட்டவிவட்டானி சத்தாலீஸம்பி ஸங்வட்டவிவட்டானி, ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. ஸோ ஏவமாஹ – ‘அதீதங்பாஹங் அத்³தா⁴னங் ஜானாமி ஸங்வட்டிபி லோகோ விவட்டிபீதி; அனாக³தங்பாஹங் அத்³தா⁴னங் ஜானாமி ஸங்வட்டிஸ்ஸதிபி லோகோ விவட்டிஸ்ஸதிபீதி. ஸஸ்ஸதோ அத்தா ச லோகோ ச வஞ்ஜோ² கூடட்டோ² ஏஸிகட்டா²யிட்டி²தோ. தே ச ஸத்தா ஸந்தா⁴வந்தி ஸங்ஸரந்தி சவந்தி உபபஜ்ஜந்தி, அத்தி²த்வேவ ஸஸ்ஸதிஸம’ந்தி. அயங் ததியோ ஸஸ்ஸதவாதோ³, ஏததா³னுத்தரியங், ப⁴ந்தே, ஸஸ்ஸதவாதே³ஸு.
‘‘Puna caparaṃ, bhante, idhekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte anekavihitaṃ pubbenivāsaṃ anussarati. Seyyathidaṃ, dasapi saṃvaṭṭavivaṭṭāni vīsampi saṃvaṭṭavivaṭṭāni tiṃsampi saṃvaṭṭavivaṭṭāni cattālīsampi saṃvaṭṭavivaṭṭāni, ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti. Iti sākāraṃ sauddesaṃ anekavihitaṃ pubbenivāsaṃ anussarati. So evamāha – ‘atītaṃpāhaṃ addhānaṃ jānāmi saṃvaṭṭipi loko vivaṭṭipīti; anāgataṃpāhaṃ addhānaṃ jānāmi saṃvaṭṭissatipi loko vivaṭṭissatipīti. Sassato attā ca loko ca vañjho kūṭaṭṭho esikaṭṭhāyiṭṭhito. Te ca sattā sandhāvanti saṃsaranti cavanti upapajjanti, atthitveva sassatisama’nti. Ayaṃ tatiyo sassatavādo, etadānuttariyaṃ, bhante, sassatavādesu.
புப்³பே³னிவாஸானுஸ்ஸதிஞாணதே³ஸனா
Pubbenivāsānussatiñāṇadesanā
157. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி புப்³பே³னிவாஸானுஸ்ஸதிஞாணே. இத⁴, ப⁴ந்தே, ஏகச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே அனேகவிஹிதங் புப்³பே³னிவாஸங் அனுஸ்ஸரதி. ஸெய்யதி²த³ங், ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே, ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. ஸந்தி, ப⁴ந்தே, தே³வா 19, யேஸங் ந ஸக்கா க³ணனாய வா ஸங்கா²னேன வா ஆயு ஸங்கா²துங். அபி ச, யஸ்மிங் யஸ்மிங் அத்தபா⁴வே அபி⁴னிவுட்ட²புப்³போ³ 20 ஹோதி யதி³ வா ரூபீஸு யதி³ வா அரூபீஸு யதி³ வா ஸஞ்ஞீஸு யதி³ வா அஸஞ்ஞீஸு யதி³ வா நேவஸஞ்ஞீனாஸஞ்ஞீஸு. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. ஏததா³னுத்தரியங், ப⁴ந்தே, புப்³பே³னிவாஸானுஸ்ஸதிஞாணே.
157. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti pubbenivāsānussatiñāṇe. Idha, bhante, ekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte anekavihitaṃ pubbenivāsaṃ anussarati. Seyyathidaṃ, ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe, ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti. Iti sākāraṃ sauddesaṃ anekavihitaṃ pubbenivāsaṃ anussarati. Santi, bhante, devā 21, yesaṃ na sakkā gaṇanāya vā saṅkhānena vā āyu saṅkhātuṃ. Api ca, yasmiṃ yasmiṃ attabhāve abhinivuṭṭhapubbo 22 hoti yadi vā rūpīsu yadi vā arūpīsu yadi vā saññīsu yadi vā asaññīsu yadi vā nevasaññīnāsaññīsu. Iti sākāraṃ sauddesaṃ anekavihitaṃ pubbenivāsaṃ anussarati. Etadānuttariyaṃ, bhante, pubbenivāsānussatiñāṇe.
சுதூபபாதஞாணதே³ஸனா
Cutūpapātañāṇadesanā
158. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி ஸத்தானங் சுதூபபாதஞாணே. இத⁴, ப⁴ந்தே, ஏகச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாதி – ‘இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா. தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபன்னா. இமே வா பன பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா. தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாதி. ஏததா³னுத்தரியங், ப⁴ந்தே, ஸத்தானங் சுதூபபாதஞாணே.
158. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti sattānaṃ cutūpapātañāṇe. Idha, bhante, ekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti – ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā. Te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā. Te kāyassa bhedā paraṃ maraṇā sugatiṃ saggaṃ lokaṃ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti. Etadānuttariyaṃ, bhante, sattānaṃ cutūpapātañāṇe.
இத்³தி⁴வித⁴தே³ஸனா
Iddhividhadesanā
159. ‘‘அபரங் பன, ப⁴ந்தே, ஏததா³னுத்தரியங், யதா² ப⁴க³வா த⁴ம்மங் தே³ஸேதி இத்³தி⁴விதா⁴ஸு. த்³வேமா, ப⁴ந்தே, இத்³தி⁴விதா⁴யோ – அத்தி², ப⁴ந்தே, இத்³தி⁴ ஸாஸவா ஸஉபதி⁴கா, ‘நோ அரியா’தி வுச்சதி. அத்தி², ப⁴ந்தே, இத்³தி⁴ அனாஸவா அனுபதி⁴கா ‘அரியா’தி வுச்சதி. ‘‘கதமா ச, ப⁴ந்தே, இத்³தி⁴ ஸாஸவா ஸஉபதி⁴கா, ‘நோ அரியா’தி வுச்சதி? இத⁴, ப⁴ந்தே, ஏகச்சோ ஸமணோ வா ப்³ராஹ்மணோ வா ஆதப்பமன்வாய…பே॰… ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே அனேகவிஹிதங் இத்³தி⁴வித⁴ங் பச்சனுபோ⁴தி. ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி; ஆவிபா⁴வங் திரோபா⁴வங் திரோகுட்டங் திரோபாகாரங் திரோபப்³ப³தங் அஸஜ்ஜமானோ க³ச்ச²தி ஸெய்யதா²பி ஆகாஸே. பத²வியாபி உம்முஜ்ஜனிமுஜ்ஜங் கரோதி, ஸெய்யதா²பி உத³கே. உத³கேபி அபி⁴ஜ்ஜமானே க³ச்ச²தி, ஸெய்யதா²பி பத²வியங். ஆகாஸேபி பல்லங்கேன கமதி, ஸெய்யதா²பி பக்கீ² ஸகுணோ. இமேபி சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா பராமஸதி பரிமஜ்ஜதி. யாவ ப்³ரஹ்மலோகாபி காயேன வஸங் வத்தேதி. அயங், ப⁴ந்தே, இத்³தி⁴ ஸாஸவா ஸஉபதி⁴கா, ‘நோ அரியா’தி வுச்சதி.
159. ‘‘Aparaṃ pana, bhante, etadānuttariyaṃ, yathā bhagavā dhammaṃ deseti iddhividhāsu. Dvemā, bhante, iddhividhāyo – atthi, bhante, iddhi sāsavā saupadhikā, ‘no ariyā’ti vuccati. Atthi, bhante, iddhi anāsavā anupadhikā ‘ariyā’ti vuccati. ‘‘Katamā ca, bhante, iddhi sāsavā saupadhikā, ‘no ariyā’ti vuccati? Idha, bhante, ekacco samaṇo vā brāhmaṇo vā ātappamanvāya…pe… tathārūpaṃ cetosamādhiṃ phusati, yathāsamāhite citte anekavihitaṃ iddhividhaṃ paccanubhoti. Ekopi hutvā bahudhā hoti, bahudhāpi hutvā eko hoti; āvibhāvaṃ tirobhāvaṃ tirokuṭṭaṃ tiropākāraṃ tiropabbataṃ asajjamāno gacchati seyyathāpi ākāse. Pathaviyāpi ummujjanimujjaṃ karoti, seyyathāpi udake. Udakepi abhijjamāne gacchati, seyyathāpi pathaviyaṃ. Ākāsepi pallaṅkena kamati, seyyathāpi pakkhī sakuṇo. Imepi candimasūriye evaṃmahiddhike evaṃmahānubhāve pāṇinā parāmasati parimajjati. Yāva brahmalokāpi kāyena vasaṃ vatteti. Ayaṃ, bhante, iddhi sāsavā saupadhikā, ‘no ariyā’ti vuccati.
‘‘கதமா பன, ப⁴ந்தே, இத்³தி⁴ அனாஸவா அனுபதி⁴கா, ‘அரியா’தி வுச்சதி? இத⁴, ப⁴ந்தே, பி⁴க்கு² ஸசே ஆகங்க²தி – ‘படிகூலே அப்படிகூலஸஞ்ஞீ விஹரெய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே படிகூலஸஞ்ஞீ விஹரெய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலே ச அப்படிகூலே ச அப்படிகூலஸஞ்ஞீ விஹரெய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலே ச அப்படிகூலே ச படிகூலஸஞ்ஞீ விஹரெய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலஞ்ச அப்படிகூலஞ்ச தது³ப⁴யங் அபி⁴னிவஜ்ஜெத்வா உபெக்க²கோ விஹரெய்யங் ஸதோ ஸம்பஜானோ’தி, உபெக்க²கோ தத்த² விஹரதி ஸதோ ஸம்பஜானோ. அயங், ப⁴ந்தே, இத்³தி⁴ அனாஸவா அனுபதி⁴கா ‘அரியா’தி வுச்சதி. ஏததா³னுத்தரியங், ப⁴ந்தே, இத்³தி⁴விதா⁴ஸு . தங் ப⁴க³வா அஸேஸமபி⁴ஜானாதி, தங் ப⁴க³வதோ அஸேஸமபி⁴ஜானதோ உத்தரி அபி⁴ஞ்ஞெய்யங் நத்தி², யத³பி⁴ஜானங் அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ அஸ்ஸ யதி³த³ங் இத்³தி⁴விதா⁴ஸு.
‘‘Katamā pana, bhante, iddhi anāsavā anupadhikā, ‘ariyā’ti vuccati? Idha, bhante, bhikkhu sace ākaṅkhati – ‘paṭikūle appaṭikūlasaññī vihareyya’nti, appaṭikūlasaññī tattha viharati. Sace ākaṅkhati – ‘appaṭikūle paṭikūlasaññī vihareyya’nti, paṭikūlasaññī tattha viharati. Sace ākaṅkhati – ‘paṭikūle ca appaṭikūle ca appaṭikūlasaññī vihareyya’nti, appaṭikūlasaññī tattha viharati. Sace ākaṅkhati – ‘paṭikūle ca appaṭikūle ca paṭikūlasaññī vihareyya’nti, paṭikūlasaññī tattha viharati. Sace ākaṅkhati – ‘paṭikūlañca appaṭikūlañca tadubhayaṃ abhinivajjetvā upekkhako vihareyyaṃ sato sampajāno’ti, upekkhako tattha viharati sato sampajāno. Ayaṃ, bhante, iddhi anāsavā anupadhikā ‘ariyā’ti vuccati. Etadānuttariyaṃ, bhante, iddhividhāsu . Taṃ bhagavā asesamabhijānāti, taṃ bhagavato asesamabhijānato uttari abhiññeyyaṃ natthi, yadabhijānaṃ añño samaṇo vā brāhmaṇo vā bhagavatā bhiyyobhiññataro assa yadidaṃ iddhividhāsu.
அஞ்ஞதா²ஸத்து²கு³ணத³ஸ்ஸனங்
Aññathāsatthuguṇadassanaṃ
160. ‘‘யங் தங், ப⁴ந்தே, ஸத்³தே⁴ன குலபுத்தேன பத்தப்³ப³ங் ஆரத்³த⁴வீரியேன தா²மவதா புரிஸதா²மேன புரிஸவீரியேன புரிஸபரக்கமேன புரிஸதோ⁴ரய்ஹேன, அனுப்பத்தங் தங் ப⁴க³வதா. ந ச, ப⁴ந்தே, ப⁴க³வா காமேஸு காமஸுக²ல்லிகானுயோக³மனுயுத்தோ ஹீனங் க³ம்மங் போது²ஜ்ஜனிகங் அனரியங் அனத்த²ஸங்ஹிதங், ந ச அத்தகிலமதா²னுயோக³மனுயுத்தோ து³க்க²ங் அனரியங் அனத்த²ஸங்ஹிதங். சதுன்னஞ்ச ப⁴க³வா ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴ அகிச்ச²லாபீ⁴ அகஸிரலாபீ⁴.
160. ‘‘Yaṃ taṃ, bhante, saddhena kulaputtena pattabbaṃ āraddhavīriyena thāmavatā purisathāmena purisavīriyena purisaparakkamena purisadhorayhena, anuppattaṃ taṃ bhagavatā. Na ca, bhante, bhagavā kāmesu kāmasukhallikānuyogamanuyutto hīnaṃ gammaṃ pothujjanikaṃ anariyaṃ anatthasaṃhitaṃ, na ca attakilamathānuyogamanuyutto dukkhaṃ anariyaṃ anatthasaṃhitaṃ. Catunnañca bhagavā jhānānaṃ ābhicetasikānaṃ diṭṭhadhammasukhavihārānaṃ nikāmalābhī akicchalābhī akasiralābhī.
அனுயோக³தா³னப்பகாரோ
Anuyogadānappakāro
161. ‘‘ஸசே மங், ப⁴ந்தே, ஏவங் புச்செ²ய்ய – ‘கிங் நு கோ², ஆவுஸோ ஸாரிபுத்த, அஹேஸுங் அதீதமத்³தா⁴னங் அஞ்ஞே ஸமணா வா ப்³ராஹ்மணா வா ப⁴க³வதா பி⁴ய்யோபி⁴ஞ்ஞதரா ஸம்போ³தி⁴ய’ந்தி, ஏவங் புட்டோ² அஹங், ப⁴ந்தே, ‘நோ’தி வதெ³ய்யங். ‘கிங் பனாவுஸோ ஸாரிபுத்த, ப⁴விஸ்ஸந்தி அனாக³தமத்³தா⁴னங் அஞ்ஞே ஸமணா வா ப்³ராஹ்மணா வா ப⁴க³வதா பி⁴ய்யோபி⁴ஞ்ஞதரா ஸம்போ³தி⁴ய’ந்தி, ஏவங் புட்டோ² அஹங், ப⁴ந்தே, ‘நோ’தி வதெ³ய்யங் . ‘கிங் பனாவுஸோ ஸாரிபுத்த, அத்தே²தரஹி அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ ஸம்போ³தி⁴ய’ந்தி, ஏவங் புட்டோ² அஹங், ப⁴ந்தே, ‘நோ’தி வதெ³ய்யங்.
161. ‘‘Sace maṃ, bhante, evaṃ puccheyya – ‘kiṃ nu kho, āvuso sāriputta, ahesuṃ atītamaddhānaṃ aññe samaṇā vā brāhmaṇā vā bhagavatā bhiyyobhiññatarā sambodhiya’nti, evaṃ puṭṭho ahaṃ, bhante, ‘no’ti vadeyyaṃ. ‘Kiṃ panāvuso sāriputta, bhavissanti anāgatamaddhānaṃ aññe samaṇā vā brāhmaṇā vā bhagavatā bhiyyobhiññatarā sambodhiya’nti, evaṃ puṭṭho ahaṃ, bhante, ‘no’ti vadeyyaṃ . ‘Kiṃ panāvuso sāriputta, atthetarahi añño samaṇo vā brāhmaṇo vā bhagavatā bhiyyobhiññataro sambodhiya’nti, evaṃ puṭṭho ahaṃ, bhante, ‘no’ti vadeyyaṃ.
‘‘ஸசே பன மங், ப⁴ந்தே, ஏவங் புச்செ²ய்ய – ‘கிங் நு கோ², ஆவுஸோ ஸாரிபுத்த, அஹேஸுங் அதீதமத்³தா⁴னங் அஞ்ஞே ஸமணா வா ப்³ராஹ்மணா வா ப⁴க³வதா ஸமஸமா ஸம்போ³தி⁴ய’ந்தி, ஏவங் புட்டோ² அஹங், ப⁴ந்தே, ‘ஏவ’ந்தி வதெ³ய்யங். ‘கிங் பனாவுஸோ ஸாரிபுத்த, ப⁴விஸ்ஸந்தி அனாக³தமத்³தா⁴னங் அஞ்ஞே ஸமணா வா ப்³ராஹ்மணா வா ப⁴க³வதா ஸமஸமா ஸம்போ³தி⁴ய’ந்தி, ஏவங் புட்டோ² அஹங், ப⁴ந்தே, ‘‘ஏவ’’ந்தி வதெ³ய்யங் . ‘கிங் பனாவுஸோ ஸாரிபுத்த, அத்தே²தரஹி அஞ்ஞே ஸமணா வா ப்³ராஹ்மணா வா ப⁴க³வதா ஸமஸமா ஸம்போ³தி⁴ய’ந்தி, ஏவங் புட்டோ² அஹங் ப⁴ந்தே ‘நோ’தி வதெ³ய்யங்.
‘‘Sace pana maṃ, bhante, evaṃ puccheyya – ‘kiṃ nu kho, āvuso sāriputta, ahesuṃ atītamaddhānaṃ aññe samaṇā vā brāhmaṇā vā bhagavatā samasamā sambodhiya’nti, evaṃ puṭṭho ahaṃ, bhante, ‘eva’nti vadeyyaṃ. ‘Kiṃ panāvuso sāriputta, bhavissanti anāgatamaddhānaṃ aññe samaṇā vā brāhmaṇā vā bhagavatā samasamā sambodhiya’nti, evaṃ puṭṭho ahaṃ, bhante, ‘‘eva’’nti vadeyyaṃ . ‘Kiṃ panāvuso sāriputta, atthetarahi aññe samaṇā vā brāhmaṇā vā bhagavatā samasamā sambodhiya’nti, evaṃ puṭṭho ahaṃ bhante ‘no’ti vadeyyaṃ.
‘‘ஸசே பன மங், ப⁴ந்தே, ஏவங் புச்செ²ய்ய – ‘கிங் பனாயஸ்மா ஸாரிபுத்தோ ஏகச்சங் அப்³ப⁴னுஜானாதி , ஏகச்சங் ந அப்³ப⁴னுஜானாதீ’தி, ஏவங் புட்டோ² அஹங், ப⁴ந்தே, ஏவங் ப்³யாகரெய்யங் – ‘ஸம்முகா² மேதங், ஆவுஸோ, ப⁴க³வதோ ஸுதங், ஸம்முகா² படிக்³க³ஹிதங் – ‘‘அஹேஸுங் அதீதமத்³தா⁴னங் அரஹந்தோ ஸம்மாஸம்பு³த்³தா⁴ மயா ஸமஸமா ஸம்போ³தி⁴ய’’ந்தி. ஸம்முகா² மேதங், ஆவுஸோ, ப⁴க³வதோ ஸுதங், ஸம்முகா² படிக்³க³ஹிதங் – ‘‘ப⁴விஸ்ஸந்தி அனாக³தமத்³தா⁴னங் அரஹந்தோ ஸம்மாஸம்பு³த்³தா⁴ மயா ஸமஸமா ஸம்போ³தி⁴ய’’ந்தி. ஸம்முகா² மேதங், ஆவுஸோ, ப⁴க³வதோ ஸுதங் ஸம்முகா² படிக்³க³ஹிதங் – ‘‘அட்டா²னமேதங் அனவகாஸோ யங் ஏகிஸ்ஸா லோகதா⁴துயா த்³வே அரஹந்தோ ஸம்மாஸம்பு³த்³தா⁴ அபுப்³ப³ங் அசரிமங் உப்பஜ்ஜெய்யுங், நேதங் டா²னங் விஜ்ஜதீ’’’தி.
‘‘Sace pana maṃ, bhante, evaṃ puccheyya – ‘kiṃ panāyasmā sāriputto ekaccaṃ abbhanujānāti , ekaccaṃ na abbhanujānātī’ti, evaṃ puṭṭho ahaṃ, bhante, evaṃ byākareyyaṃ – ‘sammukhā metaṃ, āvuso, bhagavato sutaṃ, sammukhā paṭiggahitaṃ – ‘‘ahesuṃ atītamaddhānaṃ arahanto sammāsambuddhā mayā samasamā sambodhiya’’nti. Sammukhā metaṃ, āvuso, bhagavato sutaṃ, sammukhā paṭiggahitaṃ – ‘‘bhavissanti anāgatamaddhānaṃ arahanto sammāsambuddhā mayā samasamā sambodhiya’’nti. Sammukhā metaṃ, āvuso, bhagavato sutaṃ sammukhā paṭiggahitaṃ – ‘‘aṭṭhānametaṃ anavakāso yaṃ ekissā lokadhātuyā dve arahanto sammāsambuddhā apubbaṃ acarimaṃ uppajjeyyuṃ, netaṃ ṭhānaṃ vijjatī’’’ti.
‘‘கச்சாஹங், ப⁴ந்தே, ஏவங் புட்டோ² ஏவங் ப்³யாகரமானோ வுத்தவாதீ³ சேவ ப⁴க³வதோ ஹோமி, ந ச ப⁴க³வந்தங் அபூ⁴தேன அப்³பா⁴சிக்கா²மி, த⁴ம்மஸ்ஸ சானுத⁴ம்மங் ப்³யாகரோமி, ந ச கோசி ஸஹத⁴ம்மிகோ வாதா³னுவாதோ³ 23 கா³ரய்ஹங் டா²னங் ஆக³ச்ச²தீ’’தி? ‘‘தக்³க⁴ த்வங், ஸாரிபுத்த, ஏவங் புட்டோ² ஏவங் ப்³யாகரமானோ வுத்தவாதீ³ சேவ மே ஹோஸி, ந ச மங் அபூ⁴தேன அப்³பா⁴சிக்க²ஸி, த⁴ம்மஸ்ஸ சானுத⁴ம்மங் ப்³யாகரோஸி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்ச²தீ’’தி.
‘‘Kaccāhaṃ, bhante, evaṃ puṭṭho evaṃ byākaramāno vuttavādī ceva bhagavato homi, na ca bhagavantaṃ abhūtena abbhācikkhāmi, dhammassa cānudhammaṃ byākaromi, na ca koci sahadhammiko vādānuvādo 24 gārayhaṃ ṭhānaṃ āgacchatī’’ti? ‘‘Taggha tvaṃ, sāriputta, evaṃ puṭṭho evaṃ byākaramāno vuttavādī ceva me hosi, na ca maṃ abhūtena abbhācikkhasi, dhammassa cānudhammaṃ byākarosi, na ca koci sahadhammiko vādānuvādo gārayhaṃ ṭhānaṃ āgacchatī’’ti.
அச்ச²ரியஅப்³பு⁴தங்
Acchariyaabbhutaṃ
162. ஏவங் வுத்தே, ஆயஸ்மா உதா³யீ ப⁴க³வந்தங் ஏதத³வோச – ‘‘அச்ச²ரியங், ப⁴ந்தே, அப்³பு⁴தங், ப⁴ந்தே, ததா²க³தஸ்ஸ அப்பிச்ச²தா ஸந்துட்டி²தா ஸல்லேக²தா. யத்ர ஹி நாம ததா²க³தோ ஏவங்மஹித்³தி⁴கோ ஏவங்மஹானுபா⁴வோ, அத² ச பன நேவத்தானங் பாதுகரிஸ்ஸதி! ஏகமேகஞ்சேபி இதோ, ப⁴ந்தே, த⁴ம்மங் அஞ்ஞதித்தி²யா பரிப்³பா³ஜகா அத்தனி ஸமனுபஸ்ஸெய்யுங், தே தாவதகேனேவ படாகங் பரிஹரெய்யுங். அச்ச²ரியங், ப⁴ந்தே, அப்³பு⁴தங், ப⁴ந்தே, ததா²க³தஸ்ஸ அப்பிச்ச²தா ஸந்துட்டி²தா ஸல்லேக²தா. யத்ர ஹி நாம ததா²க³தோ ஏவங் மஹித்³தி⁴கோ ஏவங்மஹானுபா⁴வோ. அத² ச பன நேவத்தானங் பாதுகரிஸ்ஸதீ’’தி!
162. Evaṃ vutte, āyasmā udāyī bhagavantaṃ etadavoca – ‘‘acchariyaṃ, bhante, abbhutaṃ, bhante, tathāgatassa appicchatā santuṭṭhitā sallekhatā. Yatra hi nāma tathāgato evaṃmahiddhiko evaṃmahānubhāvo, atha ca pana nevattānaṃ pātukarissati! Ekamekañcepi ito, bhante, dhammaṃ aññatitthiyā paribbājakā attani samanupasseyyuṃ, te tāvatakeneva paṭākaṃ parihareyyuṃ. Acchariyaṃ, bhante, abbhutaṃ, bhante, tathāgatassa appicchatā santuṭṭhitā sallekhatā. Yatra hi nāma tathāgato evaṃ mahiddhiko evaṃmahānubhāvo. Atha ca pana nevattānaṃ pātukarissatī’’ti!
‘‘பஸ்ஸ கோ² த்வங், உதா³யி, ‘ததா²க³தஸ்ஸ அப்பிச்ச²தா ஸந்துட்டி²தா ஸல்லேக²தா. யத்ர ஹி நாம ததா²க³தோ ஏவங்மஹித்³தி⁴கோ ஏவங்மஹானுபா⁴வோ, அத² ச பன நேவத்தானங் பாதுகரிஸ்ஸதி’! ஏகமேகஞ்சேபி இதோ, உதா³யி, த⁴ம்மங் அஞ்ஞதித்தி²யா பரிப்³பா³ஜகா அத்தனி ஸமனுபஸ்ஸெய்யுங், தே தாவதகேனேவ படாகங் பரிஹரெய்யுங். பஸ்ஸ கோ² த்வங், உதா³யி, ‘ததா²க³தஸ்ஸ அப்பிச்ச²தா ஸந்துட்டி²தா ஸல்லேக²தா. யத்ர ஹி நாம ததா²க³தோ ஏவங்மஹித்³தி⁴கோ ஏவங்மஹானுபா⁴வோ, அத² ச பன நேவத்தானங் பாதுகரிஸ்ஸதீ’’’தி!
‘‘Passa kho tvaṃ, udāyi, ‘tathāgatassa appicchatā santuṭṭhitā sallekhatā. Yatra hi nāma tathāgato evaṃmahiddhiko evaṃmahānubhāvo, atha ca pana nevattānaṃ pātukarissati’! Ekamekañcepi ito, udāyi, dhammaṃ aññatitthiyā paribbājakā attani samanupasseyyuṃ, te tāvatakeneva paṭākaṃ parihareyyuṃ. Passa kho tvaṃ, udāyi, ‘tathāgatassa appicchatā santuṭṭhitā sallekhatā. Yatra hi nāma tathāgato evaṃmahiddhiko evaṃmahānubhāvo, atha ca pana nevattānaṃ pātukarissatī’’’ti!
163. அத² கோ² ப⁴க³வா ஆயஸ்மந்தங் ஸாரிபுத்தங் ஆமந்தேஸி – ‘‘தஸ்மா திஹ த்வங், ஸாரிபுத்த, இமங் த⁴ம்மபரியாயங் அபி⁴க்க²ணங் பா⁴ஸெய்யாஸி பி⁴க்கூ²னங் பி⁴க்கு²னீனங் உபாஸகானங் உபாஸிகானங். யேஸம்பி ஹி, ஸாரிபுத்த, மோக⁴புரிஸானங் ப⁴விஸ்ஸதி ததா²க³தே கங்கா² வா விமதி வா, தேஸமிமங் த⁴ம்மபரியாயங் ஸுத்வா ததா²க³தே கங்கா² வா விமதி வா, ஸா பஹீயிஸ்ஸதீ’’தி. இதி ஹித³ங் ஆயஸ்மா ஸாரிபுத்தோ ப⁴க³வதோ ஸம்முகா² ஸம்பஸாத³ங் பவேதே³ஸி. தஸ்மா இமஸ்ஸ வெய்யாகரணஸ்ஸ ஸம்பஸாத³னீயங் த்வேவ அதி⁴வசனந்தி.
163. Atha kho bhagavā āyasmantaṃ sāriputtaṃ āmantesi – ‘‘tasmā tiha tvaṃ, sāriputta, imaṃ dhammapariyāyaṃ abhikkhaṇaṃ bhāseyyāsi bhikkhūnaṃ bhikkhunīnaṃ upāsakānaṃ upāsikānaṃ. Yesampi hi, sāriputta, moghapurisānaṃ bhavissati tathāgate kaṅkhā vā vimati vā, tesamimaṃ dhammapariyāyaṃ sutvā tathāgate kaṅkhā vā vimati vā, sā pahīyissatī’’ti. Iti hidaṃ āyasmā sāriputto bhagavato sammukhā sampasādaṃ pavedesi. Tasmā imassa veyyākaraṇassa sampasādanīyaṃ tveva adhivacananti.
ஸம்பஸாத³னீயஸுத்தங் நிட்டி²தங் பஞ்சமங்.
Sampasādanīyasuttaṃ niṭṭhitaṃ pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 5. ஸம்பஸாத³னீயஸுத்தவண்ணனா • 5. Sampasādanīyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 5. ஸம்பஸாத³னீயஸுத்தவண்ணனா • 5. Sampasādanīyasuttavaṇṇanā
