| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
6. ஸம்பயுத்தவாரவண்ணனா
6. Sampayuttavāravaṇṇanā
392-400. ஸதி³ஸங் ஸம்பயுத்தந்தி ‘‘யங் ஸதி³ஸங், தங் ஸங்ஸட்ட²’’ந்தி வுச்சமானங் ஸம்பயுத்தங் ந ஹோதி ‘‘ஸங்ஸட்டா² யோஜிதா ஹயா’’திஆதீ³ஸு. அஸங்ஸட்ட²ங் வோகிண்ணந்தி யங் ந ஸங்ஸட்ட²ங் அந்தரந்தரா உப்பஜ்ஜமானேன வோகிண்ணம்பி விமிஸ்ஸதாய ஸம்பயுத்தந்தி வுச்சமானங், தங் ஸங்ஸட்ட²ங் ந ஹோதி ‘‘யா ஸா வீமங்ஸா…பே॰… கோஸஜ்ஜஸம்பயுத்தா’’திஆதீ³ஸு. ஏவங் அஸம்பயுத்தஸ்ஸபி ஸங்ஸட்ட²பரியாயோ அஸங்ஸட்ட²ஸ்ஸ ச ஸம்பயுத்தபரியாயோ அத்தீ²தி தது³ப⁴யங் இதரேதரங் நியமேதீதி த³ஸ்ஸனத்த²ங் வாரத்³வயதே³ஸனாதி த³ஸ்ஸெந்தோ ஆஹ ‘‘உப⁴யங்…பே॰… நியாமகங் ஹோதீ’’தி, ஸங்ஸட்ட²ஸத்³தோ³ ஹி வோகிண்ணட்டோ² நத்தி², ஸம்பயுத்தஸத்³தோ³ ச ஸதி³ஸத்தோ², தஸ்மா யதா² ஸங்ஸட்ட²ஸத்³தோ³ ஸம்பயுத்தஸத்³தா³பெக்கோ² ஸதி³ஸத்த²தோ வினிவத்தித்வா ஏகுப்பாதா³தி³ஸபா⁴வமேவ அத்த²ங் போ³தே⁴தி, ஏவங் ஸம்பயுத்தஸத்³தோ³பி ஸங்ஸட்ட²ஸத்³தா³பெக்கோ² வோகிண்ணட்ட²தோ வினிவத்தித்வாதி அஞ்ஞமஞ்ஞாபெக்க²ஸ்ஸ ஸத்³த³த்³வயஸ்ஸ அஞ்ஞமஞ்ஞனியாமகதா வேதி³தப்³பா³.
392-400. Sadisaṃ sampayuttanti ‘‘yaṃ sadisaṃ, taṃ saṃsaṭṭha’’nti vuccamānaṃ sampayuttaṃ na hoti ‘‘saṃsaṭṭhā yojitā hayā’’tiādīsu. Asaṃsaṭṭhaṃ vokiṇṇanti yaṃ na saṃsaṭṭhaṃ antarantarā uppajjamānena vokiṇṇampi vimissatāya sampayuttanti vuccamānaṃ, taṃ saṃsaṭṭhaṃ na hoti ‘‘yā sā vīmaṃsā…pe… kosajjasampayuttā’’tiādīsu. Evaṃ asampayuttassapi saṃsaṭṭhapariyāyo asaṃsaṭṭhassa ca sampayuttapariyāyo atthīti tadubhayaṃ itaretaraṃ niyametīti dassanatthaṃ vāradvayadesanāti dassento āha ‘‘ubhayaṃ…pe… niyāmakaṃ hotī’’ti, saṃsaṭṭhasaddo hi vokiṇṇaṭṭho natthi, sampayuttasaddo ca sadisattho, tasmā yathā saṃsaṭṭhasaddo sampayuttasaddāpekkho sadisatthato vinivattitvā ekuppādādisabhāvameva atthaṃ bodheti, evaṃ sampayuttasaddopi saṃsaṭṭhasaddāpekkho vokiṇṇaṭṭhato vinivattitvāti aññamaññāpekkhassa saddadvayassa aññamaññaniyāmakatā veditabbā.
ஸம்பயுத்தவாரவண்ணனா நிட்டி²தா.
Sampayuttavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 1. குஸலத்திகங் • 1. Kusalattikaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 6. ஸம்பயுத்தவாரவண்ணனா • 6. Sampayuttavāravaṇṇanā
