| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৬. সম্পযুত্তৰারৰণ্ণনা
6. Sampayuttavāravaṇṇanā
৩৯২-৪০০. সম্পযুত্তৰারে কুসলং ধম্মং সম্পযুত্তোতি কুসলং ধম্মং সম্পযুত্তপচ্চযং কত্ৰাতি অত্থো। সেসমেত্থ সংসট্ঠৰারে ৰুত্তনযেনেৰ ৰেদিতব্বং। অৰসানে পনস্স ‘‘সংসট্ঠত্তং নাম সম্পযুত্তত্তং, সম্পযুত্তত্তং নাম সংসট্ঠত্ত’’ন্তি ইদং উভিন্নম্পি এতেসং ৰারানং অত্থতো নিন্নানাকরণভাৰদস্সনত্থং ৰুত্তং। অত্থতো হি এতেপি পটিচ্চসহজাতা ৰিয পচ্চযনিস্সযা ৰিয চ নিন্নানাকরণা। এৰং সন্তেপি অঞ্ঞমঞ্ঞস্স অত্থনিযমনত্থং ৰুত্তা। ‘‘সংসট্ঠা যোজিতা হযা’’তিআদীসু (জা॰ ২.২২.৭০) হি অসম্পযুত্তম্পি সংসট্ঠন্তি ৰুচ্চতি। ‘‘যা সা ৰীমংসা কোসজ্জসহগতা কোসজ্জসম্পযুত্তা’’তিআদীসু (সং॰ নি॰ ৫.৮৩২) অসংসট্ঠং ৰোকিণ্ণম্পি সম্পযুত্তন্তি। ইতি সংসট্ঠৰারেন একুপ্পাদলক্খণস্স সম্পযুত্তস্স সংসট্ঠভাৰং সম্পযুত্তৰারেন চ সংসট্ঠস্স একুপ্পাদাদিলক্খণস্স সম্পযুত্তভাৰং নিযমেতুং উভোপেতে ৰুত্তা। অপিচ তথা বুজ্ঝনকানং অজ্ঝাসযৰসেন দেসনাৰিলাসেন নিরুত্তিপটিসম্ভিদাপভেদজাননৰসেন চাপি এতে উভোপি ৰুত্তাতি।
392-400. Sampayuttavāre kusalaṃ dhammaṃ sampayuttoti kusalaṃ dhammaṃ sampayuttapaccayaṃ katvāti attho. Sesamettha saṃsaṭṭhavāre vuttanayeneva veditabbaṃ. Avasāne panassa ‘‘saṃsaṭṭhattaṃ nāma sampayuttattaṃ, sampayuttattaṃ nāma saṃsaṭṭhatta’’nti idaṃ ubhinnampi etesaṃ vārānaṃ atthato ninnānākaraṇabhāvadassanatthaṃ vuttaṃ. Atthato hi etepi paṭiccasahajātā viya paccayanissayā viya ca ninnānākaraṇā. Evaṃ santepi aññamaññassa atthaniyamanatthaṃ vuttā. ‘‘Saṃsaṭṭhā yojitā hayā’’tiādīsu (jā. 2.22.70) hi asampayuttampi saṃsaṭṭhanti vuccati. ‘‘Yā sā vīmaṃsā kosajjasahagatā kosajjasampayuttā’’tiādīsu (saṃ. ni. 5.832) asaṃsaṭṭhaṃ vokiṇṇampi sampayuttanti. Iti saṃsaṭṭhavārena ekuppādalakkhaṇassa sampayuttassa saṃsaṭṭhabhāvaṃ sampayuttavārena ca saṃsaṭṭhassa ekuppādādilakkhaṇassa sampayuttabhāvaṃ niyametuṃ ubhopete vuttā. Apica tathā bujjhanakānaṃ ajjhāsayavasena desanāvilāsena niruttipaṭisambhidāpabhedajānanavasena cāpi ete ubhopi vuttāti.
সম্পযুত্তৰারৰণ্ণনা।
Sampayuttavāravaṇṇanā.
এতেসু পন ছসু ৰারেসু অত্থি কোচি পচ্চযো একন্তং অনুলোমতো ন তিট্ঠতি, পচ্চনীকতোৰ তিট্ঠতি; অত্থি একন্তং পচ্চনীকতো ন তিট্ঠতি, অনুলোমতোৰ তিট্ঠতি; অত্থি অনেকন্তং অনুলোমতো চেৰ তিট্ঠতি, পচ্চনীকতো চাতি ইদং পকিণ্ণকং ৰেদিতব্বং। তত্থ পঠমো পঞ্হো পচ্ছাজাতস্স, দুতিযো মহাচতুক্কস্স, ততিযো যুজ্জমানকানং সেসানং ৰসেন ৰেদিতব্বোতি।
Etesu pana chasu vāresu atthi koci paccayo ekantaṃ anulomato na tiṭṭhati, paccanīkatova tiṭṭhati; atthi ekantaṃ paccanīkato na tiṭṭhati, anulomatova tiṭṭhati; atthi anekantaṃ anulomato ceva tiṭṭhati, paccanīkato cāti idaṃ pakiṇṇakaṃ veditabbaṃ. Tattha paṭhamo pañho pacchājātassa, dutiyo mahācatukkassa, tatiyo yujjamānakānaṃ sesānaṃ vasena veditabboti.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ১. কুসলত্তিকং • 1. Kusalattikaṃ
