| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੬. ਸਮ੍ਪਯੁਤ੍ਤવਾਰવਣ੍ਣਨਾ
6. Sampayuttavāravaṇṇanā
੩੯੨-੪੦੦. ਸਮ੍ਪਯੁਤ੍ਤવਾਰੇ ਕੁਸਲਂ ਧਮ੍ਮਂ ਸਮ੍ਪਯੁਤ੍ਤੋਤਿ ਕੁਸਲਂ ਧਮ੍ਮਂ ਸਮ੍ਪਯੁਤ੍ਤਪਚ੍ਚਯਂ ਕਤ੍વਾਤਿ ਅਤ੍ਥੋ। ਸੇਸਮੇਤ੍ਥ ਸਂਸਟ੍ਠવਾਰੇ વੁਤ੍ਤਨਯੇਨੇવ વੇਦਿਤਬ੍ਬਂ। ਅવਸਾਨੇ ਪਨਸ੍ਸ ‘‘ਸਂਸਟ੍ਠਤ੍ਤਂ ਨਾਮ ਸਮ੍ਪਯੁਤ੍ਤਤ੍ਤਂ, ਸਮ੍ਪਯੁਤ੍ਤਤ੍ਤਂ ਨਾਮ ਸਂਸਟ੍ਠਤ੍ਤ’’ਨ੍ਤਿ ਇਦਂ ਉਭਿਨ੍ਨਮ੍ਪਿ ਏਤੇਸਂ વਾਰਾਨਂ ਅਤ੍ਥਤੋ ਨਿਨ੍ਨਾਨਾਕਰਣਭਾવਦਸ੍ਸਨਤ੍ਥਂ વੁਤ੍ਤਂ। ਅਤ੍ਥਤੋ ਹਿ ਏਤੇਪਿ ਪਟਿਚ੍ਚਸਹਜਾਤਾ વਿਯ ਪਚ੍ਚਯਨਿਸ੍ਸਯਾ વਿਯ ਚ ਨਿਨ੍ਨਾਨਾਕਰਣਾ। ਏવਂ ਸਨ੍ਤੇਪਿ ਅਞ੍ਞਮਞ੍ਞਸ੍ਸ ਅਤ੍ਥਨਿਯਮਨਤ੍ਥਂ વੁਤ੍ਤਾ। ‘‘ਸਂਸਟ੍ਠਾ ਯੋਜਿਤਾ ਹਯਾ’’ਤਿਆਦੀਸੁ (ਜਾ॰ ੨.੨੨.੭੦) ਹਿ ਅਸਮ੍ਪਯੁਤ੍ਤਮ੍ਪਿ ਸਂਸਟ੍ਠਨ੍ਤਿ વੁਚ੍ਚਤਿ। ‘‘ਯਾ ਸਾ વੀਮਂਸਾ ਕੋਸਜ੍ਜਸਹਗਤਾ ਕੋਸਜ੍ਜਸਮ੍ਪਯੁਤ੍ਤਾ’’ਤਿਆਦੀਸੁ (ਸਂ॰ ਨਿ॰ ੫.੮੩੨) ਅਸਂਸਟ੍ਠਂ વੋਕਿਣ੍ਣਮ੍ਪਿ ਸਮ੍ਪਯੁਤ੍ਤਨ੍ਤਿ। ਇਤਿ ਸਂਸਟ੍ਠવਾਰੇਨ ਏਕੁਪ੍ਪਾਦਲਕ੍ਖਣਸ੍ਸ ਸਮ੍ਪਯੁਤ੍ਤਸ੍ਸ ਸਂਸਟ੍ਠਭਾવਂ ਸਮ੍ਪਯੁਤ੍ਤવਾਰੇਨ ਚ ਸਂਸਟ੍ਠਸ੍ਸ ਏਕੁਪ੍ਪਾਦਾਦਿਲਕ੍ਖਣਸ੍ਸ ਸਮ੍ਪਯੁਤ੍ਤਭਾવਂ ਨਿਯਮੇਤੁਂ ਉਭੋਪੇਤੇ વੁਤ੍ਤਾ। ਅਪਿਚ ਤਥਾ ਬੁਜ੍ਝਨਕਾਨਂ ਅਜ੍ਝਾਸਯવਸੇਨ ਦੇਸਨਾવਿਲਾਸੇਨ ਨਿਰੁਤ੍ਤਿਪਟਿਸਮ੍ਭਿਦਾਪਭੇਦਜਾਨਨવਸੇਨ ਚਾਪਿ ਏਤੇ ਉਭੋਪਿ વੁਤ੍ਤਾਤਿ।
392-400. Sampayuttavāre kusalaṃ dhammaṃ sampayuttoti kusalaṃ dhammaṃ sampayuttapaccayaṃ katvāti attho. Sesamettha saṃsaṭṭhavāre vuttanayeneva veditabbaṃ. Avasāne panassa ‘‘saṃsaṭṭhattaṃ nāma sampayuttattaṃ, sampayuttattaṃ nāma saṃsaṭṭhatta’’nti idaṃ ubhinnampi etesaṃ vārānaṃ atthato ninnānākaraṇabhāvadassanatthaṃ vuttaṃ. Atthato hi etepi paṭiccasahajātā viya paccayanissayā viya ca ninnānākaraṇā. Evaṃ santepi aññamaññassa atthaniyamanatthaṃ vuttā. ‘‘Saṃsaṭṭhā yojitā hayā’’tiādīsu (jā. 2.22.70) hi asampayuttampi saṃsaṭṭhanti vuccati. ‘‘Yā sā vīmaṃsā kosajjasahagatā kosajjasampayuttā’’tiādīsu (saṃ. ni. 5.832) asaṃsaṭṭhaṃ vokiṇṇampi sampayuttanti. Iti saṃsaṭṭhavārena ekuppādalakkhaṇassa sampayuttassa saṃsaṭṭhabhāvaṃ sampayuttavārena ca saṃsaṭṭhassa ekuppādādilakkhaṇassa sampayuttabhāvaṃ niyametuṃ ubhopete vuttā. Apica tathā bujjhanakānaṃ ajjhāsayavasena desanāvilāsena niruttipaṭisambhidāpabhedajānanavasena cāpi ete ubhopi vuttāti.
ਸਮ੍ਪਯੁਤ੍ਤવਾਰવਣ੍ਣਨਾ।
Sampayuttavāravaṇṇanā.
ਏਤੇਸੁ ਪਨ ਛਸੁ વਾਰੇਸੁ ਅਤ੍ਥਿ ਕੋਚਿ ਪਚ੍ਚਯੋ ਏਕਨ੍ਤਂ ਅਨੁਲੋਮਤੋ ਨ ਤਿਟ੍ਠਤਿ, ਪਚ੍ਚਨੀਕਤੋવ ਤਿਟ੍ਠਤਿ; ਅਤ੍ਥਿ ਏਕਨ੍ਤਂ ਪਚ੍ਚਨੀਕਤੋ ਨ ਤਿਟ੍ਠਤਿ, ਅਨੁਲੋਮਤੋવ ਤਿਟ੍ਠਤਿ; ਅਤ੍ਥਿ ਅਨੇਕਨ੍ਤਂ ਅਨੁਲੋਮਤੋ ਚੇવ ਤਿਟ੍ਠਤਿ, ਪਚ੍ਚਨੀਕਤੋ ਚਾਤਿ ਇਦਂ ਪਕਿਣ੍ਣਕਂ વੇਦਿਤਬ੍ਬਂ। ਤਤ੍ਥ ਪਠਮੋ ਪਞ੍ਹੋ ਪਚ੍ਛਾਜਾਤਸ੍ਸ, ਦੁਤਿਯੋ ਮਹਾਚਤੁਕ੍ਕਸ੍ਸ, ਤਤਿਯੋ ਯੁਜ੍ਜਮਾਨਕਾਨਂ ਸੇਸਾਨਂ વਸੇਨ વੇਦਿਤਬ੍ਬੋਤਿ।
Etesu pana chasu vāresu atthi koci paccayo ekantaṃ anulomato na tiṭṭhati, paccanīkatova tiṭṭhati; atthi ekantaṃ paccanīkato na tiṭṭhati, anulomatova tiṭṭhati; atthi anekantaṃ anulomato ceva tiṭṭhati, paccanīkato cāti idaṃ pakiṇṇakaṃ veditabbaṃ. Tattha paṭhamo pañho pacchājātassa, dutiyo mahācatukkassa, tatiyo yujjamānakānaṃ sesānaṃ vasena veditabboti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਪਟ੍ਠਾਨਪਾਲ਼ਿ • Paṭṭhānapāḷi / ੧. ਕੁਸਲਤ੍ਤਿਕਂ • 1. Kusalattikaṃ
