| Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā |
2. уб̣б̣ариваг̇г̇о
2. Ubbarivaggo
1. сам̣саараможагабзд̇ивад̇т̇уван̣н̣анаа
1. Saṃsāramocakapetivatthuvaṇṇanā
наг̇г̇аа д̣̇уб̣б̣ан̣н̣аруубаасийд̇и ид̣̇ам̣ сад̇т̇ари взл̣уванз вихаранд̇з маг̇ад̇харадтз идтагавад̇ийнаамагз г̇аамз ан̃н̃ад̇арам̣ бзд̇им̣ аараб̣бха вуд̇д̇ам̣. маг̇ад̇харадтз гира идтагавад̇ий жа д̣̇ийгхарааж̇и жаад̇и д̣̇вз г̇аамагаа ахзсум̣, д̇ад̇т̇а б̣ахуу сам̣саараможагаа мижчаад̣̇идтигаа бадивасанд̇и. ад̇ийд̇з жа гаалз бан̃жаннам̣ вассасад̇аанам̣ мад̇т̇агз ан̃н̃ад̇араа ид̇т̇ий д̇ад̇т̇зва идтагавад̇ияам̣ ан̃н̃ад̇арасмим̣ сам̣саараможагагулз ниб̣б̣ад̇д̇ид̇ваа мижчаад̣̇идтивасзна б̣ахуу гийдабадан̇г̇з ж̇ийвид̇аа воробзд̇ваа бзд̇зсу ниб̣б̣ад̇д̇и.
Naggādubbaṇṇarūpāsīti idaṃ satthari veḷuvane viharante magadharaṭṭhe iṭṭhakavatīnāmake gāme aññataraṃ petiṃ ārabbha vuttaṃ. Magadharaṭṭhe kira iṭṭhakavatī ca dīgharāji cāti dve gāmakā ahesuṃ, tattha bahū saṃsāramocakā micchādiṭṭhikā paṭivasanti. Atīte ca kāle pañcannaṃ vassasatānaṃ matthake aññatarā itthī tattheva iṭṭhakavatiyaṃ aññatarasmiṃ saṃsāramocakakule nibbattitvā micchādiṭṭhivasena bahū kīṭapaṭaṅge jīvitā voropetvā petesu nibbatti.
саа бан̃жа вассасад̇аани куббибаасаад̣̇ид̣̇угкам̣ анубхавид̇ваа амхаагам̣ бхаг̇авад̇и логз уббаж̇ж̇ид̇ваа бавад̇д̇ид̇аварад̇хаммажаггз ануггамзна рааж̇аг̇ахам̣ убаниссааяа взл̣уванз вихаранд̇з бунаби идтагавад̇ияам̣язва ан̃н̃ад̇арасмим̣ сам̣саараможагагулзязва ниб̣б̣ад̇д̇ид̇ваа яад̣̇аа сад̇д̇адтавассуд̣̇д̣̇зсигагаалз ан̃н̃аахи д̣̇ааригаахи сад̣̇д̇хим̣ рат̇игааяа гийл̣анасамад̇т̇аа ахоси, д̇ад̣̇аа ааяасмаа саарибуд̇д̇ад̇т̇зро д̇амзва г̇аамам̣ убаниссааяа арун̣авад̇ийвихаарз вихаранд̇о згад̣̇ивасам̣ д̣̇ваад̣̇асахи бхигкуухи сад̣̇д̇хим̣ д̇асса г̇аамасса д̣̇ваарасамийбзна маг̇г̇зна ад̇иггамад̇и. д̇асмим̣ кан̣з б̣ахуу г̇аамад̣̇ааригаа г̇аамад̇о нигкамид̇ваа д̣̇ваарасамийбз гийл̣анд̇ияо басаннамаанасаа маад̇аабид̇уунам̣ бадибад̇д̇ид̣̇ассанзна взг̇знааг̇анд̇ваа т̇зрам̣ ан̃н̃з жа бхигкуу бан̃жабад̇идтид̇зна ванд̣̇им̣су. саа банзсаа ассад̣̇д̇хагуласса д̇хийд̇аа жирагаалам̣ абарижид̇агусалад̇ааяа саад̇хуж̇анаажааравирахид̇аа анаад̣̇араа алагкигаа вияа адтааси. т̇зро д̇ассаа буб̣б̣ажарид̇ам̣ ид̣̇аани жа сам̣саараможагагулз ниб̣б̣ад̇д̇анам̣ ааяад̇ин̃жа нираяз ниб̣б̣ад̇д̇анаарахад̇ам̣ д̣̇исваа ‘‘сажааяам̣ мам̣ ванд̣̇иссад̇и, нираяз на уббаж̇ж̇иссад̇и, бзд̇зсу ниб̣б̣ад̇д̇ид̇вааби мамам̣язва ниссааяа самбад̇д̇им̣ бадилабхиссад̇ий’’д̇и н̃ад̇ваа гарун̣аасан̃жод̣̇ид̇амаанасо д̇аа д̣̇ааригааяо ааха – ‘‘д̇умхз бхигкуу ванд̣̇ат̇а, аяам̣ бана д̣̇ааригаа алагкигаа вияа тид̇аа’’д̇и. ат̇а нам̣ д̇аа д̣̇ааригаа хад̇т̇зсу бариг̇г̇ахзд̇ваа аагад̣дхид̇ваа б̣алаггаарзна т̇зрасса баад̣̇з ванд̣̇аабзсум̣.
Sā pañca vassasatāni khuppipāsādidukkhaṃ anubhavitvā amhākaṃ bhagavati loke uppajjitvā pavattitavaradhammacakke anukkamena rājagahaṃ upanissāya veḷuvane viharante punapi iṭṭhakavatiyaṃyeva aññatarasmiṃ saṃsāramocakakuleyeva nibbattitvā yadā sattaṭṭhavassuddesikakāle aññāhi dārikāhi saddhiṃ rathikāya kīḷanasamatthā ahosi, tadā āyasmā sāriputtatthero tameva gāmaṃ upanissāya aruṇavatīvihāre viharanto ekadivasaṃ dvādasahi bhikkhūhi saddhiṃ tassa gāmassa dvārasamīpena maggena atikkamati. Tasmiṃ khaṇe bahū gāmadārikā gāmato nikkhamitvā dvārasamīpe kīḷantiyo pasannamānasā mātāpitūnaṃ paṭipattidassanena vegenāgantvā theraṃ aññe ca bhikkhū pañcapatiṭṭhitena vandiṃsu. Sā panesā assaddhakulassa dhītā cirakālaṃ aparicitakusalatāya sādhujanācāravirahitā anādarā alakkhikā viya aṭṭhāsi. Thero tassā pubbacaritaṃ idāni ca saṃsāramocakakule nibbattanaṃ āyatiñca niraye nibbattanārahataṃ disvā ‘‘sacāyaṃ maṃ vandissati, niraye na uppajjissati, petesu nibbattitvāpi mamaṃyeva nissāya sampattiṃ paṭilabhissatī’’ti ñatvā karuṇāsañcoditamānaso tā dārikāyo āha – ‘‘tumhe bhikkhū vandatha, ayaṃ pana dārikā alakkhikā viya ṭhitā’’ti. Atha naṃ tā dārikā hatthesu pariggahetvā ākaḍḍhitvā balakkārena therassa pāde vandāpesuṃ.
саа абарзна самаязна ваяаббад̇д̇аа д̣̇ийгхарааж̇ияам̣ сам̣саараможагагулз ан̃н̃ад̇арасса гумаарасса д̣̇иннаа барибун̣н̣аг̇аб̣бхаа худ̇ваа гаалагад̇аа бзд̇зсу уббаж̇ж̇ид̇ваа наг̇г̇аа д̣̇уб̣б̣ан̣н̣аруубаа куббибаасаабхибхууд̇аа ад̇ивияа б̣ийбхажчад̣̇ассанаа вижаранд̇ий рад̇д̇ияам̣ ааяасмад̇о саарибуд̇д̇ад̇т̇зрасса ад̇д̇аанам̣ д̣̇ассзд̇ваа згаманд̇ам̣ адтааси. д̇ам̣ д̣̇исваа т̇зро –
Sā aparena samayena vayappattā dīgharājiyaṃ saṃsāramocakakule aññatarassa kumārassa dinnā paripuṇṇagabbhā hutvā kālakatā petesu uppajjitvā naggā dubbaṇṇarūpā khuppipāsābhibhūtā ativiya bībhacchadassanā vicarantī rattiyaṃ āyasmato sāriputtattherassa attānaṃ dassetvā ekamantaṃ aṭṭhāsi. Taṃ disvā thero –
95.
95.
‘‘наг̇г̇аа д̣̇уб̣б̣ан̣н̣аруубааси, гисаа д̇хаманисант̇ад̇аа;
‘‘Naggā dubbaṇṇarūpāsi, kisā dhamanisanthatā;
убпаасулигз гисигз, гаа ну д̇вам̣ ид̇ха д̇идтасий’’д̇и. –
Upphāsulike kisike, kā nu tvaṃ idha tiṭṭhasī’’ti. –
г̇аат̇ааяа бужчи. д̇ад̇т̇а д̇хаманисант̇ад̇аад̇и ниммам̣салохид̇ад̇ааяа сирааж̇аалзхи бад̇т̇ад̇аг̇ад̇д̇аа. убпаасулигзд̇и уг̇г̇ад̇апаасулигз. гисигзд̇и гисасарийрз. буб̣б̣зби ‘‘гисаа’’д̇и вад̇ваа буна ‘‘гисигз’’д̇и важанам̣ адтижамманхаарумад̇д̇асарийрад̇ааяа ад̇ивияа гисабхаавад̣̇ассанад̇т̇ам̣ вуд̇д̇ам̣. д̇ам̣ суд̇ваа бзд̇ий ад̇д̇аанам̣ бавзд̣̇знд̇ий –
Gāthāya pucchi. Tattha dhamanisanthatāti nimmaṃsalohitatāya sirājālehi patthatagattā. Upphāsuliketi uggataphāsulike. Kisiketi kisasarīre. Pubbepi ‘‘kisā’’ti vatvā puna ‘‘kisike’’ti vacanaṃ aṭṭhicammanhārumattasarīratāya ativiya kisabhāvadassanatthaṃ vuttaṃ. Taṃ sutvā petī attānaṃ pavedentī –
96.
96.
‘‘ахам̣ бхад̣̇анд̇з бзд̇иймхи, д̣̇уг̇г̇ад̇аа яамалогигаа;
‘‘Ahaṃ bhadante petīmhi, duggatā yamalokikā;
баабагаммам̣ гарид̇ваана, бзд̇алогам̣ ид̇о г̇ад̇аа’’д̇и. – г̇аат̇ам̣ вад̇ваа буна т̇зрзна –
Pāpakammaṃ karitvāna, petalokaṃ ito gatā’’ti. – gāthaṃ vatvā puna therena –
97.
97.
‘‘гим̣ ну гааязна ваажааяа, манасаа д̣̇уггадам̣ гад̇ам̣;
‘‘Kiṃ nu kāyena vācāya, manasā dukkaṭaṃ kataṃ;
гиссагаммавибаагзна, бзд̇алогам̣ ид̇о г̇ад̇аа’’д̇и. –
Kissakammavipākena, petalokaṃ ito gatā’’ti. –
гад̇агаммам̣ будтаа ‘‘ад̣̇аанасийлаа мажчариний худ̇ваа бзд̇аяонияам̣ ниб̣б̣ад̇д̇ид̇ваа звам̣ махаад̣̇угкам̣ анубхаваамий’’д̇и д̣̇ассзнд̇ий д̇иссо г̇аат̇аа абхааси –
Katakammaṃ puṭṭhā ‘‘adānasīlā maccharinī hutvā petayoniyaṃ nibbattitvā evaṃ mahādukkhaṃ anubhavāmī’’ti dassentī tisso gāthā abhāsi –
98.
98.
‘‘анугамбагаа маяхам̣ наахзсум̣ бханд̇з, бид̇аа жа маад̇аа ат̇авааби н̃аад̇агаа;
‘‘Anukampakā mayhaṃ nāhesuṃ bhante, pitā ca mātā athavāpi ñātakā;
яз мам̣ нияож̇зяяум̣ д̣̇ад̣̇аахи д̣̇аанам̣, басаннажид̇д̇аа саман̣аб̣раахман̣аанам̣.
Ye maṃ niyojeyyuṃ dadāhi dānaṃ, pasannacittā samaṇabrāhmaṇānaṃ.
99.
99.
‘‘ид̇о ахам̣ вассасад̇аани бан̃жа, яам̣ зваруубаа вижараами наг̇г̇аа;
‘‘Ito ahaṃ vassasatāni pañca, yaṃ evarūpā vicarāmi naggā;
куд̣̇ааяа д̇ан̣хааяа жа каж̇ж̇амаанаа, баабасса гаммасса палам̣ мамзд̣̇ам̣.
Khudāya taṇhāya ca khajjamānā, pāpassa kammassa phalaṃ mamedaṃ.
100.
100.
‘‘ванд̣̇аами д̇ам̣ аяяа басаннажид̇д̇аа, анугамба мам̣ вийра махаанубхаава;
‘‘Vandāmi taṃ ayya pasannacittā, anukampa maṃ vīra mahānubhāva;
д̣̇ад̇ваа жа мз аад̣̇иса яан̃хи гин̃жи, можзхи мам̣ д̣̇уг̇г̇ад̇ияаа бхад̣̇анд̇з’’д̇и.
Datvā ca me ādisa yañhi kiñci, mocehi maṃ duggatiyā bhadante’’ti.
98. д̇ад̇т̇а анугамбагаад̇и самбарааяигзна ад̇т̇зна ануг̇г̇ан̣хагаа. бханд̇зд̇и т̇зрам̣ аалабад̇и. яз мам̣ нияож̇зяяунд̇и маад̇аа ваа бид̇аа ваа ат̇а ваа н̃аад̇агаа зд̣̇исаа басаннажид̇д̇аа худ̇ваа ‘‘саман̣аб̣раахман̣аанам̣ д̣̇ад̣̇аахи д̣̇аана’’нд̇и яз мам̣ нияож̇зяяум̣, д̇аад̣̇исаа анугамбагаа маяхам̣ наахзсунд̇и яож̇анаа.
98. Tattha anukampakāti samparāyikena atthena anuggaṇhakā. Bhanteti theraṃ ālapati. Ye maṃ niyojeyyunti mātā vā pitā vā atha vā ñātakā edisā pasannacittā hutvā ‘‘samaṇabrāhmaṇānaṃ dadāhi dāna’’nti ye maṃ niyojeyyuṃ, tādisā anukampakā mayhaṃ nāhesunti yojanā.
99. ид̇о ахам̣ вассасад̇аани бан̃жа, яам̣ зваруубаа вижараами наг̇г̇аад̇и ид̣̇ам̣ саа бзд̇ий ид̇о д̇ад̇ияааяа ж̇аад̇ияаа ад̇д̇ано бзд̇ад̇д̇абхаавам̣ ануссарид̇ваа ид̣̇ааниби д̇ат̇аа бан̃жавассасад̇аани вижараамийд̇и ад̇хиббааязнааха. д̇ад̇т̇а яанд̇и яасмаа, д̣̇аанаад̣̇ийнам̣ бун̃н̃аанам̣ агад̇ад̇д̇аа зваруубаа наг̇г̇аа бзд̇ий худ̇ваа ид̇о бадтааяа вассасад̇аани бан̃жа вижараамийд̇и яож̇анаа. д̇ан̣хааяаад̇и бибаасааяа. каж̇ж̇амаанаад̇и каад̣̇ияамаанаа, б̣аад̇хияамаанаад̇и ад̇т̇о.
99.Ito ahaṃ vassasatāni pañca, yaṃ evarūpā vicarāmi naggāti idaṃ sā petī ito tatiyāya jātiyā attano petattabhāvaṃ anussaritvā idānipi tathā pañcavassasatāni vicarāmīti adhippāyenāha. Tattha yanti yasmā, dānādīnaṃ puññānaṃ akatattā evarūpā naggā petī hutvā ito paṭṭhāya vassasatāni pañca vicarāmīti yojanā. Taṇhāyāti pipāsāya. Khajjamānāti khādiyamānā, bādhiyamānāti attho.
100. ванд̣̇аами д̇ам̣ аяяа басаннажид̇д̇аад̇и аяяа, д̇амахам̣ басаннажид̇д̇аа худ̇ваа ванд̣̇аами, зд̇д̇агамзва бун̃н̃ам̣ ид̣̇аани маяаа гаад̇ум̣ саггаад̇и д̣̇ассзд̇и. анугамба манд̇и ануг̇г̇ан̣ха мамам̣ уд̣̇д̣̇исса ануд̣̇д̣̇аяам̣ гарохи. д̣̇ад̇ваа жа мз аад̣̇иса яан̃хи гин̃жийд̇и гин̃жид̣̇зва д̣̇зяяад̇хаммам̣ саман̣аб̣раахман̣аанам̣ д̣̇ад̇ваа д̇ам̣ д̣̇агкин̣ам̣ маяхам̣ аад̣̇иса, д̇зна мз ид̇о бзд̇аяонид̇о могко бхависсад̇ийд̇и ад̇хиббааязна вад̣̇ад̇и. д̇знзвааха ‘‘можзхи мам̣ д̣̇уг̇г̇ад̇ияаа бхад̣̇анд̇з’’д̇и.
100.Vandāmi taṃ ayya pasannacittāti ayya, tamahaṃ pasannacittā hutvā vandāmi, ettakameva puññaṃ idāni mayā kātuṃ sakkāti dasseti. Anukampa manti anuggaṇha mamaṃ uddissa anuddayaṃ karohi. Datvā ca me ādisa yañhi kiñcīti kiñcideva deyyadhammaṃ samaṇabrāhmaṇānaṃ datvā taṃ dakkhiṇaṃ mayhaṃ ādisa, tena me ito petayonito mokkho bhavissatīti adhippāyena vadati. Tenevāha ‘‘mocehi maṃ duggatiyā bhadante’’ti.
звам̣ бзд̇ияаа вуд̇д̇з яат̇аа со т̇зро бадибаж̇ж̇и, д̇ам̣ д̣̇ассзд̇ум̣ сан̇г̇ийд̇игаарзхи д̇иссо г̇аат̇аа вуд̇д̇аа –
Evaṃ petiyā vutte yathā so thero paṭipajji, taṃ dassetuṃ saṅgītikārehi tisso gāthā vuttā –
101.
101.
‘‘саад̇хууд̇и со бадиссуд̇ваа, саарибуд̇д̇онугамбаго;
‘‘Sādhūti so paṭissutvā, sāriputtonukampako;
бхигкуунам̣ аалобам̣ д̣̇ад̇ваа, баан̣имад̇д̇ан̃жа жол̣агам̣;
Bhikkhūnaṃ ālopaṃ datvā, pāṇimattañca coḷakaṃ;
т̇аалагасса жа баанийяам̣, д̇ассаа д̣̇агкин̣амаад̣̇иси.
Thālakassa ca pānīyaṃ, tassā dakkhiṇamādisi.
102.
102.
‘‘самананд̇араануд̣̇д̣̇идтз , вибааго уд̣̇абаж̇ж̇ат̇а;
‘‘Samanantarānuddiṭṭhe , vipāko udapajjatha;
бхож̇анажчаад̣̇анабаанийяам̣, д̣̇агкин̣ааяа ид̣̇ам̣ палам̣.
Bhojanacchādanapānīyaṃ, dakkhiṇāya idaṃ phalaṃ.
103.
103.
‘‘д̇ад̇о суд̣̇д̇хаа суживасанаа, гаасигуд̇д̇амад̇хаариний;
‘‘Tato suddhā sucivasanā, kāsikuttamadhārinī;
вижид̇д̇авад̇т̇аабхаран̣аа, саарибуд̇д̇ам̣ убасан̇гамий’’д̇и.
Vicittavatthābharaṇā, sāriputtaṃ upasaṅkamī’’ti.
101-103. д̇ад̇т̇а бхигкуунанд̇и бхигкуно, важанавибаллаасзна хзд̇ам̣ вуд̇д̇ам̣. ‘‘аалобам̣ бхигкуно д̣̇ад̇ваа’’д̇и гзжи батанд̇и. аалобанд̇и габ̣ал̣ам̣, згаалобамад̇д̇ам̣ бхож̇ананд̇и ад̇т̇о. баан̣имад̇д̇ан̃жа жол̣аганд̇и згахад̇т̇аббамаан̣ам̣ жол̣акан̣д̣анд̇и ад̇т̇о. т̇аалагасса жа баанийяанд̇и згат̇аалагабууран̣амад̇д̇ам̣ уд̣̇агам̣. сзсам̣ каллаадияабзд̇авад̇т̇усмим̣ вуд̇д̇анаяамзва.
101-103. Tattha bhikkhūnanti bhikkhuno, vacanavipallāsena hetaṃ vuttaṃ. ‘‘Ālopaṃ bhikkhuno datvā’’ti keci paṭhanti. Ālopanti kabaḷaṃ, ekālopamattaṃ bhojananti attho. Pāṇimattañca coḷakanti ekahatthappamāṇaṃ coḷakhaṇḍanti attho. Thālakassa ca pānīyanti ekathālakapūraṇamattaṃ udakaṃ. Sesaṃ khallāṭiyapetavatthusmiṃ vuttanayameva.
ат̇ааяасмаа саарибуд̇д̇о д̇ам̣ бзд̇им̣ бийн̣инд̣̇рияам̣ барисуд̣̇д̇хачавиван̣н̣ам̣ д̣̇иб̣б̣авад̇т̇аабхаран̣аалан̇гаарам̣ саманд̇ад̇о ад̇д̇ано бабхааяа обхаасзнд̇им̣ ад̇д̇ано санд̇игам̣ убаг̇анд̇ваа тид̇ам̣ д̣̇исваа бажжагкад̇о гаммапалам̣ д̇ааяа вибхаавзд̇угаамо худ̇ваа д̇иссо г̇аат̇аа абхааси –
Athāyasmā sāriputto taṃ petiṃ pīṇindriyaṃ parisuddhachavivaṇṇaṃ dibbavatthābharaṇālaṅkāraṃ samantato attano pabhāya obhāsentiṃ attano santikaṃ upagantvā ṭhitaṃ disvā paccakkhato kammaphalaṃ tāya vibhāvetukāmo hutvā tisso gāthā abhāsi –
104.
104.
‘‘абхигганд̇зна ван̣н̣зна, яаа д̇вам̣ д̇идтаси д̣̇звад̇з;
‘‘Abhikkantena vaṇṇena, yā tvaṃ tiṭṭhasi devate;
обхаасзнд̇ий д̣̇исаа саб̣б̣аа, осад̇хий вияа д̇аарагаа.
Obhāsentī disā sabbā, osadhī viya tārakā.
105.
105.
‘‘гзна д̇зд̇аад̣̇исо ван̣н̣о, гзна д̇з ид̇ха миж̇жхад̇и;
‘‘Kena tetādiso vaṇṇo, kena te idha mijjhati;
уббаж̇ж̇анд̇и жа д̇з бхог̇аа, яз гзжи манасо бияаа.
Uppajjanti ca te bhogā, ye keci manaso piyā.
106.
106.
‘‘бужчаами д̇ам̣ д̣̇зви махаанубхаавз, мануссабхууд̇аа гимагааси бун̃н̃ам̣;
‘‘Pucchāmi taṃ devi mahānubhāve, manussabhūtā kimakāsi puññaṃ;
гзнааси звам̣ ж̇алид̇аанубхааваа, ван̣н̣о жа д̇з саб̣б̣ад̣̇исаа бабхаасад̇ий’’д̇и.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
104. д̇ад̇т̇а абхигганд̇знаад̇и ад̇иманаабзна, абхируубзнаад̇и ад̇т̇о. ван̣н̣знаад̇и чавиван̣н̣зна. обхаасзнд̇ий д̣̇исаа саб̣б̣аад̇и саб̣б̣ааби д̣̇аса д̣̇исаа ж̇од̇знд̇ий згаалогам̣ гаронд̇ий. яат̇аа гинд̇и ааха ‘‘осад̇хий вияа д̇аарагаа’’д̇и. уссаннаа бабхаа зд̇ааяа д̇хийяад̇и, осад̇хаанам̣ ваа ануб̣алаббад̣̇ааяигаад̇и гад̇ваа ‘‘осад̇хий’’д̇и лад̣̇д̇ханаамаа д̇аарагаа яат̇аа саманд̇ад̇о аалогам̣ гурумаанаа д̇идтад̇и, звамзва д̇вам̣ саб̣б̣ад̣̇исаа обхаасзнд̇ийд̇и ад̇т̇о.
104. Tattha abhikkantenāti atimanāpena, abhirūpenāti attho. Vaṇṇenāti chavivaṇṇena. Obhāsentī disā sabbāti sabbāpi dasa disā jotentī ekālokaṃ karontī. Yathā kinti āha ‘‘osadhī viya tārakā’’ti. Ussannā pabhā etāya dhīyati, osadhānaṃ vā anubalappadāyikāti katvā ‘‘osadhī’’ti laddhanāmā tārakā yathā samantato ālokaṃ kurumānā tiṭṭhati, evameva tvaṃ sabbadisā obhāsentīti attho.
105. гзнаад̇и гим̣-сад̣̇д̣̇о бужчааяам̣. хзд̇уад̇т̇з жзд̇ам̣ гаран̣аважанам̣, гзна хзд̇унаад̇и ад̇т̇о. д̇зд̇и д̇ава. зд̇аад̣̇исод̇и зд̣̇исо, зд̇арахи яат̇аад̣̇иссамаанод̇и вуд̇д̇ам̣ ход̇и. гзна д̇з ид̇ха миж̇жхад̇ийд̇и гзна бун̃н̃ависзсзна ид̇ха имасмим̣ таанз ид̣̇аани д̇аяаа лаб̣бхамаанам̣ сужарид̇апалам̣ иж̇жхад̇и нибпаж̇ж̇ад̇и. уббаж̇ж̇анд̇ийд̇и ниб̣б̣ад̇д̇анд̇и. бхог̇аад̇и барибхун̃ж̇ид̇аб̣б̣адтзна ‘‘бхог̇аа’’д̇и лад̣̇д̇ханаамаа вад̇т̇аабхаран̣аад̣̇ивид̇д̇уубагаран̣ависзсаа. яз гзжийд̇и бхог̇з анавасзсад̇о б̣яаабзд̇ваа сан̇г̇ан̣хаад̇и . анавасзсаб̣яаабаго хи аяам̣ нид̣̇д̣̇зсо яат̇аа ‘‘яз гзжи сан̇каараа’’д̇и. манасо бияаад̇и манасаа бияааяид̇аб̣б̣аа, манаабияаад̇и ад̇т̇о.
105.Kenāti kiṃ-saddo pucchāyaṃ. Hetuatthe cetaṃ karaṇavacanaṃ, kena hetunāti attho. Teti tava. Etādisoti ediso, etarahi yathādissamānoti vuttaṃ hoti. Kena te idha mijjhatīti kena puññavisesena idha imasmiṃ ṭhāne idāni tayā labbhamānaṃ sucaritaphalaṃ ijjhati nipphajjati. Uppajjantīti nibbattanti. Bhogāti paribhuñjitabbaṭṭhena ‘‘bhogā’’ti laddhanāmā vatthābharaṇādivittūpakaraṇavisesā. Ye kecīti bhoge anavasesato byāpetvā saṅgaṇhāti . Anavasesabyāpako hi ayaṃ niddeso yathā ‘‘ye keci saṅkhārā’’ti. Manaso piyāti manasā piyāyitabbā, manāpiyāti attho.
106. бужчаамийд̇и бужчам̣ гароми, н̃аад̇ум̣ ижчаамийд̇и ад̇т̇о. д̇анд̇и д̇вам̣. д̣̇звийд̇и д̣̇иб̣б̣аанабхаавасаман̇г̇ид̇ааяа, д̣̇зви. д̇знааха ‘‘махаанубхаавз’’д̇и. мануссабхууд̇аад̇и мануссзсу ж̇аад̇аа мануссабхаавам̣ бад̇д̇аа. ид̣̇ам̣ язбхуяязна сад̇д̇аа мануссад̇д̇абхаавз тид̇аа бун̃н̃аани гаронд̇ийд̇и гад̇ваа вуд̇д̇ам̣. аяамзд̇ааяам̣ г̇аат̇аанам̣ сан̇кзбад̇о ад̇т̇о, вид̇т̇аарад̇о бана барамад̇т̇ад̣̇ийбанияам̣ вимаанавад̇т̇уадтагат̇ааяам̣ вуд̇д̇анаязнзва взд̣̇ид̇аб̣б̣о.
106.Pucchāmīti pucchaṃ karomi, ñātuṃ icchāmīti attho. Tanti tvaṃ. Devīti dibbānabhāvasamaṅgitāya, devi. Tenāha ‘‘mahānubhāve’’ti. Manussabhūtāti manussesu jātā manussabhāvaṃ pattā. Idaṃ yebhuyyena sattā manussattabhāve ṭhitā puññāni karontīti katvā vuttaṃ. Ayametāyaṃ gāthānaṃ saṅkhepato attho, vitthārato pana paramatthadīpaniyaṃ vimānavatthuaṭṭhakathāyaṃ vuttanayeneva veditabbo.
звам̣ буна т̇зрзна будтаа бзд̇ий д̇ассаа самбад̇д̇ияаа лад̣̇д̇хагааран̣ам̣ багаасзнд̇ий сзсаг̇аат̇аа абхааси –
Evaṃ puna therena puṭṭhā petī tassā sampattiyā laddhakāraṇaṃ pakāsentī sesagāthā abhāsi –
107.
107.
‘‘уббан̣д̣угим̣ гисам̣ чаад̇ам̣, наг̇г̇ам̣ самбад̇ид̇ажчавим̣;
‘‘Uppaṇḍukiṃ kisaṃ chātaṃ, naggaṃ sampatitacchaviṃ;
муни гаарун̣иго логз, д̇ам̣ мам̣ ад̣̇д̣̇агки д̣̇уг̇г̇ад̇ам̣.
Muni kāruṇiko loke, taṃ maṃ addakkhi duggataṃ.
108.
108.
‘‘бхигкуунам̣ аалобам̣ д̣̇ад̇ваа, баан̣имад̇д̇ан̃жа жол̣агам̣;
‘‘Bhikkhūnaṃ ālopaṃ datvā, pāṇimattañca coḷakaṃ;
т̇аалагасса жа баанийяам̣, мама д̣̇агкин̣амаад̣̇иси.
Thālakassa ca pānīyaṃ, mama dakkhiṇamādisi.
109.
109.
‘‘аалобасса палам̣ басса, бхад̇д̇ам̣ вассасад̇ам̣ д̣̇аса;
‘‘Ālopassa phalaṃ passa, bhattaṃ vassasataṃ dasa;
бхун̃ж̇аами гаамагааминий, анзгарасаб̣яан̃ж̇анам̣.
Bhuñjāmi kāmakāminī, anekarasabyañjanaṃ.
110.
110.
‘‘баан̣имад̇д̇асса жол̣асса, вибаагам̣ басса яаад̣̇исам̣;
‘‘Pāṇimattassa coḷassa, vipākaṃ passa yādisaṃ;
яаавад̇аа нанд̣̇арааж̇асса, виж̇ид̇асмим̣ бадижчад̣̇аа.
Yāvatā nandarājassa, vijitasmiṃ paṭicchadā.
111.
111.
‘‘д̇ад̇о б̣ахуд̇араа бханд̇з, вад̇т̇аанажчаад̣̇анаани мз;
‘‘Tato bahutarā bhante, vatthānacchādanāni me;
госзяяагамб̣алийяаани, комагаббаасигаани жа.
Koseyyakambalīyāni, khomakappāsikāni ca.
112.
112.
‘‘вибулаа жа махаг̇гхаа жа, д̇збаагаасзваламб̣арз;
‘‘Vipulā ca mahagghā ca, tepākāsevalambare;
саахам̣ д̇ам̣ барид̣̇ахаами, яам̣ яан̃хи манасо бияам̣.
Sāhaṃ taṃ paridahāmi, yaṃ yañhi manaso piyaṃ.
113.
113.
‘‘т̇аалагасса жа баанийяам̣, вибаагам̣ басса яаад̣̇исам̣;
‘‘Thālakassa ca pānīyaṃ, vipākaṃ passa yādisaṃ;
г̇амбхийраа жад̇урассаа жа, богкаран̃н̃о суниммид̇аа.
Gambhīrā caturassā ca, pokkharañño sunimmitā.
114.
114.
‘‘сзд̇од̣̇агаа суббад̇ид̇т̇аа, сийд̇аа аббадиг̇анд̇хияаа;
‘‘Setodakā suppatitthā, sītā appaṭigandhiyā;
бад̣̇умуббаласан̃чаннаа, вааригин̃ж̇агкабуурид̇аа.
Padumuppalasañchannā, vārikiñjakkhapūritā.
115.
115.
‘‘саахам̣ рамаами гийл̣аами, мод̣̇аами агуд̇обхаяаа;
‘‘Sāhaṃ ramāmi kīḷāmi, modāmi akutobhayā;
муним̣ гаарун̣игам̣ логз, бханд̇з ванд̣̇ид̇умааг̇ад̇аа’’д̇и.
Muniṃ kāruṇikaṃ loke, bhante vanditumāgatā’’ti.
107. д̇ад̇т̇а уббан̣д̣угинд̇и уббан̣д̣угаж̇аад̇ам̣. чаад̇анд̇и б̣убхугкид̇ам̣ куд̣̇ааяа абхибхууд̇ам̣. самбад̇ид̇ажчавинд̇и чиннабхиннасарийражчавим̣. логзд̇и ид̣̇ам̣ ‘‘гаарун̣иго’’д̇и зд̇т̇а вуд̇д̇агарун̣ааяа висаяад̣̇ассанам̣. д̇ам̣ манд̇и д̇аад̣̇исам̣ мамам̣, вуд̇д̇анаязна зганд̇ад̇о гарун̣адтаанияам̣ мам̣. д̣̇уг̇г̇ад̇анд̇и д̣̇уг̇г̇ад̇им̣ г̇ад̇ам̣.
107. Tattha uppaṇḍukinti uppaṇḍukajātaṃ. Chātanti bubhukkhitaṃ khudāya abhibhūtaṃ. Sampatitacchavinti chinnabhinnasarīracchaviṃ. Loketi idaṃ ‘‘kāruṇiko’’ti ettha vuttakaruṇāya visayadassanaṃ. Taṃ manti tādisaṃ mamaṃ, vuttanayena ekantato karuṇaṭṭhāniyaṃ maṃ. Duggatanti duggatiṃ gataṃ.
108-109. бхигкуунам̣ аалобам̣ д̣̇ад̇ваад̇иаад̣̇и т̇зрзна ад̇д̇ано гарун̣ааяа гад̇аагаарад̣̇ассанам̣. д̇ад̇т̇а бхад̇д̇анд̇и од̣̇анам̣, д̣̇иб̣б̣абхож̇ананд̇и ад̇т̇о. вассасад̇ам̣ д̣̇асаад̇и д̣̇аса вассасад̇аани, вассасахассанд̇и вуд̇д̇ам̣ ход̇и. ажжанд̇асам̣яог̇з жзд̇ам̣ убаяог̇аважанам̣. бхун̃ж̇аами гаамагааминий, анзгарасаб̣яан̃ж̇ананд̇и ан̃н̃зхиби гаамзд̇аб̣б̣агаамзхи саманнааг̇ад̇аа анзгарасаб̣яан̃ж̇анам̣ бхад̇д̇ам̣ бхун̃ж̇аамийд̇и яож̇анаа.
108-109.Bhikkhūnaṃ ālopaṃ datvātiādi therena attano karuṇāya katākāradassanaṃ. Tattha bhattanti odanaṃ, dibbabhojananti attho. Vassasataṃ dasāti dasa vassasatāni, vassasahassanti vuttaṃ hoti. Accantasaṃyoge cetaṃ upayogavacanaṃ. Bhuñjāmi kāmakāminī, anekarasabyañjananti aññehipi kāmetabbakāmehi samannāgatā anekarasabyañjanaṃ bhattaṃ bhuñjāmīti yojanā.
110. жол̣ассаад̇и д̣̇зяяад̇хаммасийсзна д̇аб̣б̣исаяам̣ д̣̇аанамаяам̣ бун̃н̃амзва д̣̇ассзд̇и. вибаагам̣ басса яаад̣̇исанд̇и д̇асса жол̣ад̣̇аанасса вибаагасан̇каад̇ам̣ палам̣ басса, бханд̇з. д̇ам̣ бана яаад̣̇исам̣ яат̇ааруубам̣, гинд̇и жзд̇и ааха ‘‘яаавад̇аа нанд̣̇арааж̇ассаа’’д̇иаад̣̇и.
110.Coḷassāti deyyadhammasīsena tabbisayaṃ dānamayaṃ puññameva dasseti. Vipākaṃ passa yādisanti tassa coḷadānassa vipākasaṅkhātaṃ phalaṃ passa, bhante. Taṃ pana yādisaṃ yathārūpaṃ, kinti ceti āha ‘‘yāvatā nandarājassā’’tiādi.
д̇ад̇т̇а гояам̣ нанд̣̇арааж̇аа наама? ад̇ийд̇з гира д̣̇асавассасахассааяугзсу мануссзсу б̣аараан̣асиваасий зго гудумб̣иго аран̃н̃з ж̇ан̇гхаавихаарам̣ вижаранд̇о аран̃н̃адтаанз ан̃н̃ад̇арам̣ бажжзгаб̣уд̣̇д̇хам̣ ад̣̇д̣̇аса. со бажжзгаб̣уд̣̇д̇хо д̇ад̇т̇а жийварагаммам̣ гаронд̇о ануваад̇з аббахонд̇з сам̣харид̇ваава табзд̇ум̣ аарад̣̇д̇хо. со гудумб̣иго д̇ам̣ д̣̇исваа, ‘‘бханд̇з, гим̣ гарот̇аа’’д̇и вад̇ваа д̇зна аббижчад̇ааяа гин̃жи авуд̇д̇зби ‘‘жийварад̣̇уссам̣ наббаход̇ий’’д̇и н̃ад̇ваа ад̇д̇ано уд̇д̇араасан̇г̇ам̣ бажжзгаб̣уд̣̇д̇хасса баад̣̇амуулз табзд̇ваа аг̇амааси. бажжзгаб̣уд̣̇д̇хо д̇ам̣ г̇ахзд̇ваа ануваад̇ам̣ ааробзнд̇о жийварам̣ гад̇ваа бааруби. со гудумб̣игаа ж̇ийвид̇абарияосаанз гаалам̣ гад̇ваа д̇аавад̇им̣сабхаванз ниб̣б̣ад̇д̇ид̇ваа д̇ад̇т̇а яаавад̇ааяугам̣ д̣̇иб̣б̣асамбад̇д̇им̣ анубхавид̇ваа д̇ад̇о жавид̇ваа б̣аараан̣асид̇о яож̇анамад̇д̇з таанз ан̃н̃ад̇арасмим̣ г̇аамз амажжагулз ниб̣б̣ад̇д̇и.
Tattha koyaṃ nandarājā nāma? Atīte kira dasavassasahassāyukesu manussesu bārāṇasivāsī eko kuṭumbiko araññe jaṅghāvihāraṃ vicaranto araññaṭṭhāne aññataraṃ paccekabuddhaṃ addasa. So paccekabuddho tattha cīvarakammaṃ karonto anuvāte appahonte saṃharitvāva ṭhapetuṃ āraddho. So kuṭumbiko taṃ disvā, ‘‘bhante, kiṃ karothā’’ti vatvā tena appicchatāya kiñci avuttepi ‘‘cīvaradussaṃ nappahotī’’ti ñatvā attano uttarāsaṅgaṃ paccekabuddhassa pādamūle ṭhapetvā agamāsi. Paccekabuddho taṃ gahetvā anuvātaṃ āropento cīvaraṃ katvā pārupi. So kuṭumbikā jīvitapariyosāne kālaṃ katvā tāvatiṃsabhavane nibbattitvā tattha yāvatāyukaṃ dibbasampattiṃ anubhavitvā tato cavitvā bārāṇasito yojanamatte ṭhāne aññatarasmiṃ gāme amaccakule nibbatti.
д̇асса ваяаббад̇д̇агаалз д̇асмим̣ г̇аамз нагкад̇д̇ам̣ сан̇гхудтам̣ ахоси. со маад̇арам̣ ааха – ‘‘амма, саадагам̣ мз д̣̇зхи, нагкад̇д̇ам̣ гийл̣иссаамий’’д̇и. саа суд̇ход̇авад̇т̇ам̣ нийхарид̇ваа ад̣̇ааси. ‘‘амма, т̇уулам̣ ид̣̇а’’нд̇и. ан̃н̃ам̣ нийхарид̇ваа ад̣̇ааси, д̇амби бадигкиби. ат̇а нам̣ маад̇аа ааха – ‘‘д̇аад̇а, яаад̣̇исз г̇зхз маяам̣ ж̇аад̇аа, над̇т̇и но ид̇о сукумад̇арасса вад̇т̇асса бадилаабхааяа бун̃н̃а’’нд̇и. ‘‘лабханадтаанам̣ г̇ажчаами, аммаа’’д̇и. ‘‘г̇ажча, буд̇д̇а, ахам̣ аж̇ж̇зва д̇уяхам̣ б̣аараан̣асинаг̇арз раж̇ж̇абадилаабхам̣ ижчаамий’’д̇и. со ‘‘саад̇ху, аммаа’’д̇и маад̇арам̣ ванд̣̇ид̇ваа бад̣̇агкин̣ам̣ гад̇ваа ааха – ‘‘г̇ажчаами, аммаа’’д̇и. ‘‘г̇ажча, д̇аад̇аа’’д̇и. звам̣ гирассаа жид̇д̇ам̣ ахоси – ‘‘гахам̣ г̇амиссад̇и, ид̇ха ваа зд̇т̇а ваа г̇зхз нисийд̣̇иссад̇ий’’д̇и. со бана бун̃н̃анияаамзна жод̣̇ияамаано г̇аамад̇о нигкамид̇ваа б̣аараан̣асим̣ г̇анд̇ваа ман̇г̇аласилаабаддз сасийсам̣ баарубид̇ваа нибаж̇ж̇и. со жа б̣аараан̣асиран̃н̃о гаалагад̇асса сад̇д̇амо д̣̇ивасо ход̇и.
Tassa vayappattakāle tasmiṃ gāme nakkhattaṃ saṅghuṭṭhaṃ ahosi. So mātaraṃ āha – ‘‘amma, sāṭakaṃ me dehi, nakkhattaṃ kīḷissāmī’’ti. Sā sudhotavatthaṃ nīharitvā adāsi. ‘‘Amma, thūlaṃ ida’’nti. Aññaṃ nīharitvā adāsi, tampi paṭikkhipi. Atha naṃ mātā āha – ‘‘tāta, yādise gehe mayaṃ jātā, natthi no ito sukhumatarassa vatthassa paṭilābhāya puñña’’nti. ‘‘Labhanaṭṭhānaṃ gacchāmi, ammā’’ti. ‘‘Gaccha, putta, ahaṃ ajjeva tuyhaṃ bārāṇasinagare rajjapaṭilābhaṃ icchāmī’’ti. So ‘‘sādhu, ammā’’ti mātaraṃ vanditvā padakkhiṇaṃ katvā āha – ‘‘gacchāmi, ammā’’ti. ‘‘Gaccha, tātā’’ti. Evaṃ kirassā cittaṃ ahosi – ‘‘kahaṃ gamissati, idha vā ettha vā gehe nisīdissatī’’ti. So pana puññaniyāmena codiyamāno gāmato nikkhamitvā bārāṇasiṃ gantvā maṅgalasilāpaṭṭe sasīsaṃ pārupitvā nipajji. So ca bārāṇasirañño kālakatassa sattamo divaso hoti.
амажжаа жа бурохид̇о жа ран̃н̃о сарийрагижжам̣ гад̇ваа рааж̇ан̇г̇ан̣з нисийд̣̇ид̇ваа манд̇аяим̣су – ‘‘ран̃н̃о згаа д̇хийд̇аа ад̇т̇и, буд̇д̇о над̇т̇и, арааж̇агам̣ раж̇ж̇ам̣ на д̇идтад̇и, пуссарат̇ам̣ виссаж̇ж̇змаа’’д̇и. д̇з гумуд̣̇аван̣н̣з жад̇д̇ааро синд̇хавз яож̇зд̇ваа сзд̇ажчад̇д̇аббамукам̣ бан̃жавид̇хам̣ рааж̇агагуд̇хабхан̣д̣ам̣ рат̇асмим̣язва табзд̇ваа рат̇ам̣ виссаж̇ж̇зд̇ваа бажчад̇о д̇уурияаани баг̇г̇ан̣хаабзсум̣. рат̇о баажийнад̣̇ваарзна нигкамид̇ваа уяяаанаабхимугко ахоси. ‘‘барижаязна уяяаанаабхимуко г̇ажчад̇и , нивад̇д̇змаа’’д̇и гзжи аахам̣су. бурохид̇о ‘‘маа нивад̇д̇аяид̇т̇аа’’д̇и ааха. рат̇о гумаарам̣ бад̣̇агкин̣ам̣ гад̇ваа аароханасаж̇ж̇о худ̇ваа адтааси, бурохид̇о баарубанаган̣н̣ам̣ абанзд̇ваа баад̣̇ад̇алаани ологзнд̇о ‘‘д̇идтад̇у аяам̣ д̣̇ийбо, д̣̇висахассад̣̇ийбабариваарзсу жад̇уусу махаад̣̇ийбзсу згараж̇ж̇ам̣ гаарзд̇ум̣ яуд̇д̇о’’д̇и вад̇ваа ‘‘д̇уурияаани баг̇г̇ан̣хат̇а, бунаби баг̇г̇ан̣хат̇аа’’д̇и д̇игкад̇д̇ум̣ д̇уурияаани баг̇г̇ан̣хаабзси.
Amaccā ca purohito ca rañño sarīrakiccaṃ katvā rājaṅgaṇe nisīditvā mantayiṃsu – ‘‘rañño ekā dhītā atthi, putto natthi, arājakaṃ rajjaṃ na tiṭṭhati, phussarathaṃ vissajjemā’’ti. Te kumudavaṇṇe cattāro sindhave yojetvā setacchattappamukhaṃ pañcavidhaṃ rājakakudhabhaṇḍaṃ rathasmiṃyeva ṭhapetvā rathaṃ vissajjetvā pacchato tūriyāni paggaṇhāpesuṃ. Ratho pācīnadvārena nikkhamitvā uyyānābhimukkho ahosi. ‘‘Paricayena uyyānābhimukho gacchati , nivattemā’’ti keci āhaṃsu. Purohito ‘‘mā nivattayitthā’’ti āha. Ratho kumāraṃ padakkhiṇaṃ katvā ārohanasajjo hutvā aṭṭhāsi, purohito pārupanakaṇṇaṃ apanetvā pādatalāni olokento ‘‘tiṭṭhatu ayaṃ dīpo, dvisahassadīpaparivāresu catūsu mahādīpesu ekarajjaṃ kāretuṃ yutto’’ti vatvā ‘‘tūriyāni paggaṇhatha, punapi paggaṇhathā’’ti tikkhattuṃ tūriyāni paggaṇhāpesi.
ат̇а гумааро мукам̣ виварид̇ваа ологзд̇ваа ‘‘гзна гаммзна ааг̇ад̇ад̇т̇а, д̇аад̇аа’’д̇и ааха. ‘‘д̣̇зва, д̇умхаагам̣ раж̇ж̇ам̣ баабун̣аад̇ий’’д̇и. ‘‘д̇умхаагам̣ рааж̇аа гаха’’нд̇и? ‘‘д̣̇иван̇г̇ад̇о, саамий’’д̇и. ‘‘гад̇и д̣̇ивасаа ад̇игганд̇аа’’д̇и? ‘‘аж̇ж̇а сад̇д̇амо д̣̇ивасо’’д̇и. ‘‘буд̇д̇о ваа д̇хийд̇аа ваа над̇т̇ий’’д̇и? ‘‘д̇хийд̇аа ад̇т̇и, д̣̇зва, буд̇д̇о над̇т̇ий’’д̇и. ‘‘д̇зна хи гариссаами раж̇ж̇а’’нд̇и. д̇з д̇аавад̣̇зва абхисзгаман̣д̣абам̣ гад̇ваа рааж̇ад̇хийд̇арам̣ саб̣б̣аалан̇гаарзхи алан̇гарид̇ваа уяяаанам̣ аанзд̇ваа гумаарасса абхисзгам̣ агам̣су.
Atha kumāro mukhaṃ vivaritvā oloketvā ‘‘kena kammena āgatattha, tātā’’ti āha. ‘‘Deva, tumhākaṃ rajjaṃ pāpuṇātī’’ti. ‘‘Tumhākaṃ rājā kaha’’nti? ‘‘Divaṅgato, sāmī’’ti. ‘‘Kati divasā atikkantā’’ti? ‘‘Ajja sattamo divaso’’ti. ‘‘Putto vā dhītā vā natthī’’ti? ‘‘Dhītā atthi, deva, putto natthī’’ti. ‘‘Tena hi karissāmi rajja’’nti. Te tāvadeva abhisekamaṇḍapaṃ katvā rājadhītaraṃ sabbālaṅkārehi alaṅkaritvā uyyānaṃ ānetvā kumārassa abhisekaṃ akaṃsu.
ат̇асса гад̇аабхисзгасса сад̇асахассаг̇гханигам̣ вад̇т̇ам̣ убанзсум̣. со ‘‘гимид̣̇ам̣, д̇аад̇аа’’д̇и ааха. ‘‘ниваасанавад̇т̇ам̣, д̣̇зваа’’д̇и. ‘‘нану, д̇аад̇аа, т̇уула’’нд̇и? ‘‘мануссаанам̣ барибхог̇авад̇т̇зсу ид̇о сукумад̇арам̣ над̇т̇и, д̣̇зваа’’д̇и. ‘‘д̇умхаагам̣ рааж̇аа зваруубам̣ ниваасзсий’’д̇и? ‘‘аама, д̣̇зваа’’д̇и. ‘‘на ман̃н̃з бун̃н̃аваа д̇умхаагам̣ рааж̇аа (а. ни. адта. 1.1.191) суван̣н̣абхин̇гаарам̣ аахарат̇а, лабхиссаами вад̇т̇а’’нд̇и. суван̣н̣абхин̇гаарам̣ аахарим̣су. со удтааяа хад̇т̇з д̇ховид̇ваа мукам̣ вигкаалзд̇ваа хад̇т̇зна уд̣̇агам̣ аад̣̇ааяа бурад̇т̇имад̣̇исааяам̣ аб̣бхуггири. д̇ад̣̇аа гханабат̇авим̣ бхинд̣̇ид̇ваа адта габбаругкаа удтахим̣су. буна уд̣̇агам̣ г̇ахзд̇ваа д̣̇агкин̣ааяа бажчимааяа уд̇д̇арааяаад̇и звам̣ жад̇уусу д̣̇исаасу аб̣бхуггири. саб̣б̣ад̣̇исаасу адта адта гад̇ваа д̣̇вад̇д̇им̣са габбаругкаа удтахим̣су. згзгааяа д̣̇исааяа сол̣аса сол̣аса гад̇ваа жад̇усадти гаммаругкаад̇и гзжи вад̣̇анд̇и. со згам̣ д̣̇иб̣б̣ад̣̇уссам̣ ниваасзд̇ваа згам̣ баарубид̇ваа ‘‘нанд̣̇аран̃н̃о виж̇ид̇з суд̇д̇аганд̇игаа ид̇т̇ияо маа суд̇д̇ам̣ ганд̇им̣сууд̇и бхзрим̣ жараабзт̇аа’’д̇и вад̇ваа чад̇д̇ам̣ уссаабзд̇ваа алан̇гад̇абадияад̇д̇о хад̇т̇игканд̇хавараг̇ад̇о наг̇арам̣ бависид̇ваа баасаад̣̇ам̣ ааруяха махаасамбад̇д̇им̣ анубхави.
Athassa katābhisekassa satasahassagghanikaṃ vatthaṃ upanesuṃ. So ‘‘kimidaṃ, tātā’’ti āha. ‘‘Nivāsanavatthaṃ, devā’’ti. ‘‘Nanu, tātā, thūla’’nti? ‘‘Manussānaṃ paribhogavatthesu ito sukhumataraṃ natthi, devā’’ti. ‘‘Tumhākaṃ rājā evarūpaṃ nivāsesī’’ti? ‘‘Āma, devā’’ti. ‘‘Na maññe puññavā tumhākaṃ rājā (a. ni. aṭṭha. 1.1.191) suvaṇṇabhiṅkāraṃ āharatha, labhissāmi vattha’’nti. Suvaṇṇabhiṅkāraṃ āhariṃsu. So uṭṭhāya hatthe dhovitvā mukhaṃ vikkhāletvā hatthena udakaṃ ādāya puratthimadisāyaṃ abbhukkiri. Tadā ghanapathaviṃ bhinditvā aṭṭha kapparukkhā uṭṭhahiṃsu. Puna udakaṃ gahetvā dakkhiṇāya pacchimāya uttarāyāti evaṃ catūsu disāsu abbhukkiri. Sabbadisāsu aṭṭha aṭṭha katvā dvattiṃsa kapparukkhā uṭṭhahiṃsu. Ekekāya disāya soḷasa soḷasa katvā catusaṭṭhi kammarukkhāti keci vadanti. So ekaṃ dibbadussaṃ nivāsetvā ekaṃ pārupitvā ‘‘nandarañño vijite suttakantikā itthiyo mā suttaṃ kantiṃsūti bheriṃ carāpethā’’ti vatvā chattaṃ ussāpetvā alaṅkatapaṭiyatto hatthikkhandhavaragato nagaraṃ pavisitvā pāsādaṃ āruyha mahāsampattiṃ anubhavi.
звам̣ г̇ажчанд̇з гаалз згад̣̇ивасам̣ д̣̇звий ран̃н̃о самбад̇д̇им̣ д̣̇исваа ‘‘ахо д̇абассий’’д̇и гаарун̃н̃аагаарам̣ д̣̇ассзси. ‘‘гимид̣̇ам̣, д̣̇звий’’д̇и жа будтаа ‘‘ад̇имахад̇ий д̇з, д̣̇зва, самбад̇д̇и. ад̇ийд̇з ад̣̇д̇хани галяаан̣ам̣ агад̇т̇а, ид̣̇аани анааг̇ад̇асса ад̇т̇ааяа гусалам̣ на гарот̇аа’’д̇и ааха. ‘‘гасса д̣̇зма? сийлаванд̇о над̇т̇ий’’д̇и. ‘‘асун̃н̃о, д̣̇зва, ж̇амб̣уд̣̇ийбо араханд̇зхи, д̇умхз д̣̇аанамзва саж̇ж̇зт̇а, ахам̣ араханд̇з лажчаамий’’д̇и ааха. бунад̣̇ивасз рааж̇аа махаарахам̣ д̣̇аанам̣ саж̇ж̇аабзси. д̣̇звий ‘‘сажз имиссааяа д̣̇исааяа араханд̇о ад̇т̇и, ид̇хааг̇анд̇ваа амхаагам̣ бхигкам̣ г̇ан̣ханд̇уу’’д̇и ад̇хидтахид̇ваа уд̇д̇арад̣̇исаабхимукаа урзна нибаж̇ж̇и. нибаннамад̇д̇ааяа зва д̣̇звияаа химаванд̇з васанд̇аанам̣ бад̣̇умавад̇ияаа буд̇д̇аанам̣ бан̃жасад̇аанам̣ бажжзгаб̣уд̣̇д̇хаанам̣ ж̇здтаго махаабад̣̇умабажжзгаб̣уд̣̇д̇хо бхаад̇игз ааманд̇зси – ‘‘маарисаа нанд̣̇арааж̇аа д̇умхз ниманд̇зд̇и, ад̇хиваасзт̇а д̇ассаа’’д̇и. д̇з ад̇хиваасзд̇ваа д̇аавад̣̇зва аагаасзнааг̇анд̇ваа уд̇д̇арад̣̇ваарз од̇арим̣су. мануссаа ‘‘бан̃жасад̇аа, д̣̇зва, бажжзгаб̣уд̣̇д̇хаа ааг̇ад̇аа’’д̇и ран̃н̃о аарожзсум̣. рааж̇аа сад̣̇д̇хим̣ д̣̇звияаа ааг̇анд̇ваа ванд̣̇ид̇ваа бад̇д̇ам̣ г̇ахзд̇ваа бажжзгаб̣уд̣̇д̇хз баасаад̣̇ам̣ ааробзд̇ваа д̇ад̇т̇а д̇зсам̣ д̣̇аанам̣ д̣̇ад̇ваа бхад̇д̇агижжаавасаанз рааж̇аа сан̇гхад̇т̇зрасса, д̣̇звий сан̇гханавагасса баад̣̇амуулз нибаж̇ж̇ид̇ваа ‘‘аяяаа, бажжаязхи на гиламиссанд̇и, маяам̣ бун̃н̃зна на хааяиссаама, амхаагам̣ ид̇ха ниваасааяа бадин̃н̃ам̣ д̣̇зт̇аа’’д̇и бадин̃н̃ам̣ гаарзд̇ваа уяяаанз ниваасадтаанаани гаарзд̇ваа яааваж̇ийвам̣ бажжзгаб̣уд̣̇д̇хз убадтахид̇ваа д̇зсу бариниб̣б̣уд̇зсу саад̇хугийл̣ид̇ам̣ гаарзд̇ваа г̇анд̇хад̣̇ааруаад̣̇ийхи сарийрагижжам̣ гаарзд̇ваа д̇хаад̇уяо г̇ахзд̇ваа жзд̇ияам̣ бад̇идтаабзд̇ваа ‘‘зваруубаанамби наама махаанубхааваанам̣ махзсийнам̣ маран̣ам̣ бхависсад̇и, гиман̇г̇ам̣ бана маад̣̇исаана’’нд̇и сам̣взг̇аж̇аад̇о ж̇здтабуд̇д̇ам̣ раж̇ж̇з бад̇идтаабзд̇ваа саяам̣ д̇аабасабаб̣б̣аж̇ж̇ам̣ баб̣б̣аж̇и. д̣̇звийби ‘‘ран̃н̃з баб̣б̣аж̇ид̇з ахам̣ гим̣ гариссаамий’’д̇и баб̣б̣аж̇и. д̣̇взби уяяаанз васанд̇аа жхаанаани ниб̣б̣ад̇д̇зд̇ваа жхаанасукзна вийд̇инаамзд̇ваа ааяубарияосаанз б̣рахмалогз ниб̣б̣ад̇д̇им̣су. со гира нанд̣̇арааж̇аа амхаагам̣ сад̇т̇у махаасааваго махаагассабад̇т̇зро ахосий, д̇асса аг̇г̇амахзсий бхад̣̇д̣̇аа гаабилааний наама.
Evaṃ gacchante kāle ekadivasaṃ devī rañño sampattiṃ disvā ‘‘aho tapassī’’ti kāruññākāraṃ dassesi. ‘‘Kimidaṃ, devī’’ti ca puṭṭhā ‘‘atimahatī te, deva, sampatti. Atīte addhani kalyāṇaṃ akattha, idāni anāgatassa atthāya kusalaṃ na karothā’’ti āha. ‘‘Kassa dema? Sīlavanto natthī’’ti. ‘‘Asuñño, deva, jambudīpo arahantehi, tumhe dānameva sajjetha, ahaṃ arahante lacchāmī’’ti āha. Punadivase rājā mahārahaṃ dānaṃ sajjāpesi. Devī ‘‘sace imissāya disāya arahanto atthi, idhāgantvā amhākaṃ bhikkhaṃ gaṇhantū’’ti adhiṭṭhahitvā uttaradisābhimukhā urena nipajji. Nipannamattāya eva deviyā himavante vasantānaṃ padumavatiyā puttānaṃ pañcasatānaṃ paccekabuddhānaṃ jeṭṭhako mahāpadumapaccekabuddho bhātike āmantesi – ‘‘mārisā nandarājā tumhe nimanteti, adhivāsetha tassā’’ti. Te adhivāsetvā tāvadeva ākāsenāgantvā uttaradvāre otariṃsu. Manussā ‘‘pañcasatā, deva, paccekabuddhā āgatā’’ti rañño ārocesuṃ. Rājā saddhiṃ deviyā āgantvā vanditvā pattaṃ gahetvā paccekabuddhe pāsādaṃ āropetvā tattha tesaṃ dānaṃ datvā bhattakiccāvasāne rājā saṅghattherassa, devī saṅghanavakassa pādamūle nipajjitvā ‘‘ayyā, paccayehi na kilamissanti, mayaṃ puññena na hāyissāma, amhākaṃ idha nivāsāya paṭiññaṃ dethā’’ti paṭiññaṃ kāretvā uyyāne nivāsaṭṭhānāni kāretvā yāvajīvaṃ paccekabuddhe upaṭṭhahitvā tesu parinibbutesu sādhukīḷitaṃ kāretvā gandhadāruādīhi sarīrakiccaṃ kāretvā dhātuyo gahetvā cetiyaṃ patiṭṭhāpetvā ‘‘evarūpānampi nāma mahānubhāvānaṃ mahesīnaṃ maraṇaṃ bhavissati, kimaṅgaṃ pana mādisāna’’nti saṃvegajāto jeṭṭhaputtaṃ rajje patiṭṭhāpetvā sayaṃ tāpasapabbajjaṃ pabbaji. Devīpi ‘‘raññe pabbajite ahaṃ kiṃ karissāmī’’ti pabbaji. Dvepi uyyāne vasantā jhānāni nibbattetvā jhānasukhena vītināmetvā āyupariyosāne brahmaloke nibbattiṃsu. So kira nandarājā amhākaṃ satthu mahāsāvako mahākassapatthero ahosī, tassa aggamahesī bhaddā kāpilānī nāma.
аяам̣ бана нанд̣̇арааж̇аа д̣̇аса вассасахассаани саяам̣ д̣̇иб̣б̣авад̇т̇аани барид̣̇аханд̇о саб̣б̣амзва ад̇д̇ано виж̇ид̇ам̣ уд̇д̇арагурусад̣̇исам̣ гаронд̇о ааг̇ад̇ааг̇ад̇аанам̣ мануссаанам̣ д̣̇иб̣б̣ад̣̇уссаани ад̣̇ааси. д̇аяид̣̇ам̣ д̣̇иб̣б̣авад̇т̇асамид̣̇д̇хим̣ санд̇хааяа саа бзд̇ий ааха ‘‘яаавад̇аа нанд̣̇арааж̇асса, виж̇ид̇асмим̣ бадижчад̣̇аа’’д̇и. д̇ад̇т̇а виж̇ид̇асминд̇и радтз. бадижчад̣̇аад̇и вад̇т̇аани. д̇аани хи бадижчаад̣̇знд̇и зд̇зхийд̇и ‘‘бадижчад̣̇аа’’д̇и вужжанд̇и.
Ayaṃ pana nandarājā dasa vassasahassāni sayaṃ dibbavatthāni paridahanto sabbameva attano vijitaṃ uttarakurusadisaṃ karonto āgatāgatānaṃ manussānaṃ dibbadussāni adāsi. Tayidaṃ dibbavatthasamiddhiṃ sandhāya sā petī āha ‘‘yāvatā nandarājassa, vijitasmiṃ paṭicchadā’’ti. Tattha vijitasminti raṭṭhe. Paṭicchadāti vatthāni. Tāni hi paṭicchādenti etehīti ‘‘paṭicchadā’’ti vuccanti.
111. ид̣̇аани саа бзд̇ий ‘‘нанд̣̇арааж̇асамид̣̇д̇хид̇оби зд̇арахи маяхам̣ самид̣̇д̇хи вибулад̇араа’’д̇и д̣̇ассзнд̇ий ‘‘д̇ад̇о б̣ахуд̇араа, бханд̇з, вад̇т̇аанажчаад̣̇анаани мз’’д̇иаад̣̇имааха. д̇ад̇т̇а д̇ад̇од̇и нанд̣̇арааж̇асса бариг̇г̇ахабхууд̇авад̇т̇ад̇оби б̣ахуд̇араани маяхам̣ вад̇т̇ажчаад̣̇анаанийд̇и ад̇т̇о. вад̇т̇аанажчаад̣̇анаанийд̇и ниваасанавад̇т̇аани жзва баарубанавад̇т̇аани жа . госзяяагамб̣алийяаанийд̇и госзяяаани жзва гамб̣алаани жа. комагаббаасигаанийд̇и комавад̇т̇аани жзва габбаасамаяавад̇т̇аани жа.
111. Idāni sā petī ‘‘nandarājasamiddhitopi etarahi mayhaṃ samiddhi vipulatarā’’ti dassentī ‘‘tato bahutarā, bhante, vatthānacchādanāni me’’tiādimāha. Tattha tatoti nandarājassa pariggahabhūtavatthatopi bahutarāni mayhaṃ vatthacchādanānīti attho. Vatthānacchādanānīti nivāsanavatthāni ceva pārupanavatthāni ca . Koseyyakambalīyānīti koseyyāni ceva kambalāni ca. Khomakappāsikānīti khomavatthāni ceva kappāsamayavatthāni ca.
112. вибулаад̇и ааяаамад̇о жа вид̇т̇аарад̇о жа вибулаа. махаг̇гхаад̇и махаг̇гхавасзна маханд̇аа махаарахаа. аагаасзваламб̣арзд̇и аагаасзязва оламб̣амаанаа д̇идтанд̇и. яам̣ яан̃хи манасо бияанд̇и яам̣ яам̣ маяхам̣ манасо бияам̣, д̇ам̣ д̇ам̣ г̇ахзд̇ваа барид̣̇ахаами баарубаами жаад̇и яож̇анаа.
112.Vipulāti āyāmato ca vitthārato ca vipulā. Mahagghāti mahagghavasena mahantā mahārahā. Ākāsevalambareti ākāseyeva olambamānā tiṭṭhanti. Yaṃ yañhi manaso piyanti yaṃ yaṃ mayhaṃ manaso piyaṃ, taṃ taṃ gahetvā paridahāmi pārupāmi cāti yojanā.
113. т̇аалагасса жа баанийяам̣, вибаагам̣ басса яаад̣̇исанд̇и т̇аалагабууран̣амад̇д̇ам̣ баанийяам̣ д̣̇иннам̣ анумод̣̇ид̇ам̣ , д̇асса бана вибаагам̣ яаад̣̇исам̣ яаава маханд̇ам̣ бассаад̇и д̣̇ассзнд̇ий ‘‘г̇амбхийраа жад̇урассаа жаа’’д̇иаад̣̇имааха. д̇ад̇т̇а г̇амбхийраад̇и аг̇аад̇хаа. жад̇урассаад̇и жад̇урассасан̣таанаа. богкаран̃н̃од̇и богкаран̣ияо. суниммид̇аад̇и гаммаанубхаавзнзва судту ниммид̇аа.
113.Thālakassa ca pānīyaṃ, vipākaṃ passa yādisanti thālakapūraṇamattaṃ pānīyaṃ dinnaṃ anumoditaṃ , tassa pana vipākaṃ yādisaṃ yāva mahantaṃ passāti dassentī ‘‘gambhīrā caturassā cā’’tiādimāha. Tattha gambhīrāti agādhā. Caturassāti caturassasaṇṭhānā. Pokkharaññoti pokkharaṇiyo. Sunimmitāti kammānubhāveneva suṭṭhu nimmitā.
114. сзд̇од̣̇агаад̇и сзд̇ауд̣̇агаа сзд̇аваалугасамбаригин̣н̣аа. суббад̇ид̇т̇аад̇и сунд̣̇арад̇ид̇т̇аа. сийд̇аад̇и сийд̇алод̣̇агаа. аббадиг̇анд̇хияаад̇и бадигуулаг̇анд̇харахид̇аа сурабхиг̇анд̇хаа. вааригин̃ж̇агкабуурид̇аад̇и гамалагувалаяаад̣̇ийнам̣ гзсарасан̃чаннзна вааринаа барибун̣н̣аа.
114.Setodakāti setaudakā setavālukasamparikiṇṇā. Suppatitthāti sundaratitthā. Sītāti sītalodakā. Appaṭigandhiyāti paṭikūlagandharahitā surabhigandhā. Vārikiñjakkhapūritāti kamalakuvalayādīnaṃ kesarasañchannena vārinā paripuṇṇā.
115. сааханд̇и саа ахам̣. рамаамийд̇и рад̇им̣ винд̣̇аами. гийл̣аамийд̇и инд̣̇рияаани барижаарзми. мод̣̇аамийд̇и бхог̇асамбад̇д̇ияаа бамуд̣̇ид̇аа хоми. агуд̇обхаяаад̇и гуд̇ожиби асан̃ж̇аад̇абхаяаа, сзрий сукавихаариний хоми . бханд̇з, ванд̣̇ид̇умааг̇ад̇аад̇и, бханд̇з, имиссаа д̣̇иб̣б̣асамбад̇д̇ияаа бадилаабхасса гааран̣абхууд̇ам̣ д̇вам̣ ванд̣̇ид̇ум̣ ааг̇ад̇аа убаг̇ад̇аад̇и ад̇т̇о. яам̣ банзд̇т̇а ад̇т̇ад̇о авибхад̇д̇ам̣, д̇ам̣ д̇ад̇т̇а д̇ад̇т̇а вуд̇д̇амзва.
115.Sāhanti sā ahaṃ. Ramāmīti ratiṃ vindāmi. Kīḷāmīti indriyāni paricāremi. Modāmīti bhogasampattiyā pamuditā homi. Akutobhayāti kutocipi asañjātabhayā, serī sukhavihārinī homi . Bhante, vanditumāgatāti, bhante, imissā dibbasampattiyā paṭilābhassa kāraṇabhūtaṃ tvaṃ vandituṃ āgatā upagatāti attho. Yaṃ panettha atthato avibhattaṃ, taṃ tattha tattha vuttameva.
звам̣ д̇ааяа бзд̇ияаа вуд̇д̇з ааяасмаа саарибуд̇д̇о идтагавад̇ияам̣ д̣̇ийгхарааж̇ияанд̇и г̇аамад̣̇ваяаваасигзсу ад̇д̇ано санд̇игам̣ убаг̇ад̇зсу мануссзсу имамад̇т̇ам̣ вид̇т̇аарад̇о гат̇знд̇о сам̣взж̇зд̇ваа сам̣саараможанабаабагаммад̇о можзд̇ваа убаасагабхаавз бад̇идтаабзси. саа бавад̇д̇и бхигкуусу баагадаа ж̇аад̇аа. д̇ам̣ бхигкуу бхаг̇авад̇о аарожзсум̣. бхаг̇аваа д̇амад̇т̇ам̣ адтуббад̇д̇им̣ гад̇ваа самбад̇д̇абарисааяа д̇хаммам̣ д̣̇зсзси, саа д̣̇зсанаа махааж̇анасса саад̇т̇игаа ахосийд̇и.
Evaṃ tāya petiyā vutte āyasmā sāriputto iṭṭhakavatiyaṃ dīgharājiyanti gāmadvayavāsikesu attano santikaṃ upagatesu manussesu imamatthaṃ vitthārato kathento saṃvejetvā saṃsāramocanapāpakammato mocetvā upāsakabhāve patiṭṭhāpesi. Sā pavatti bhikkhūsu pākaṭā jātā. Taṃ bhikkhū bhagavato ārocesuṃ. Bhagavā tamatthaṃ aṭṭhuppattiṃ katvā sampattaparisāya dhammaṃ desesi, sā desanā mahājanassa sātthikā ahosīti.
сам̣саараможагабзд̇ивад̇т̇уван̣н̣анаа нидтид̇аа.
Saṃsāramocakapetivatthuvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 1. сам̣саараможагабзд̇ивад̇т̇у • 1. Saṃsāramocakapetivatthu
