| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
9. ஸங்ஸாரபஞ்ஹோ
9. Saṃsārapañho
9. ராஜா ஆஹ ‘‘ப⁴ந்தே நாக³ஸேன, யங் பனேதங் ப்³ரூஸி ‘ஸங்ஸாரோ’தி, கதமோ ஸோ ஸங்ஸாரோ’’தி? ‘‘இத⁴, மஹாராஜ, ஜாதோ இதே⁴வ மரதி, இத⁴ மதோ அஞ்ஞத்ர உப்பஜ்ஜதி, தஹிங் ஜாதோ தஹிங் யேவ மரதி, தஹிங் மதோ அஞ்ஞத்ர உப்பஜ்ஜதி, ஏவங் கோ², மஹாராஜ, ஸங்ஸாரோ ஹோதீ’’தி. ‘‘ஓபம்மங் கரோஹீ’’தி. ‘‘யதா², மஹாராஜ, கோசிதே³வ புரிஸோ பக்கங் அம்ப³ங் கா²தி³த்வா அட்டி²ங் ரோபெய்ய, ததோ மஹந்தோ அம்ப³ருக்கோ² நிப்³ப³த்தித்வா ப²லானி த³தெ³ய்ய, அத² ஸோ புரிஸோ ததோபி பக்கங் அம்ப³ங் கா²தி³த்வா அட்டி²ங் ரோபெய்ய, ததோபி மஹந்தோ அம்ப³ருக்கோ² நிப்³ப³த்தித்வா ப²லானி த³தெ³ய்ய, ஏவமேதேஸங் ருக்கா²னங் கோடி ந பஞ்ஞாயதி, ஏவமேவ கோ², மஹாராஜ, இத⁴ ஜாதோ இதே⁴வ மரதி, இத⁴ மதோ அஞ்ஞத்ர உப்பஜ்ஜதி, தஹிங் ஜாதோ தஹிங் யேவ மரதி, தஹிங் மதோ அஞ்ஞத்ர உப்பஜ்ஜதி, ஏவங் கோ², மஹாராஜ, ஸங்ஸாரோ ஹோதீ’’தி.
9. Rājā āha ‘‘bhante nāgasena, yaṃ panetaṃ brūsi ‘saṃsāro’ti, katamo so saṃsāro’’ti? ‘‘Idha, mahārāja, jāto idheva marati, idha mato aññatra uppajjati, tahiṃ jāto tahiṃ yeva marati, tahiṃ mato aññatra uppajjati, evaṃ kho, mahārāja, saṃsāro hotī’’ti. ‘‘Opammaṃ karohī’’ti. ‘‘Yathā, mahārāja, kocideva puriso pakkaṃ ambaṃ khāditvā aṭṭhiṃ ropeyya, tato mahanto ambarukkho nibbattitvā phalāni dadeyya, atha so puriso tatopi pakkaṃ ambaṃ khāditvā aṭṭhiṃ ropeyya, tatopi mahanto ambarukkho nibbattitvā phalāni dadeyya, evametesaṃ rukkhānaṃ koṭi na paññāyati, evameva kho, mahārāja, idha jāto idheva marati, idha mato aññatra uppajjati, tahiṃ jāto tahiṃ yeva marati, tahiṃ mato aññatra uppajjati, evaṃ kho, mahārāja, saṃsāro hotī’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
ஸங்ஸாரபஞ்ஹோ நவமோ.
Saṃsārapañho navamo.
