| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. සංසාරපඤ්‌හො
9. Saṃsārapañho
9. රාජා ආහ ‘‘භන්‌තෙ නාගසෙන, යං පනෙතං බ්‍රූසි ‘සංසාරො’ති, කතමො සො සංසාරො’’ති? ‘‘ඉධ, මහාරාජ, ජාතො ඉධෙව මරති, ඉධ මතො අඤ්‌ඤත්‍ර උප්‌පජ්‌ජති, තහිං ජාතො තහිං යෙව මරති, තහිං මතො අඤ්‌ඤත්‍ර උප්‌පජ්‌ජති, එවං ඛො, මහාරාජ, සංසාරො හොතී’’ති. ‘‘ඔපම්‌මං කරොහී’’ති. ‘‘යථා, මහාරාජ, කොචිදෙව පුරිසො පක්‌කං අම්‌බං ඛාදිත්‌වා අට්‌ඨිං රොපෙය්‍ය, තතො මහන්‌තො අම්‌බරුක්‌ඛො නිබ්‌බත්‌තිත්‌වා ඵලානි දදෙය්‍ය, අථ සො පුරිසො තතොපි පක්‌කං අම්‌බං ඛාදිත්‌වා අට්‌ඨිං රොපෙය්‍ය, තතොපි මහන්‌තො අම්‌බරුක්‌ඛො නිබ්‌බත්‌තිත්‌වා ඵලානි දදෙය්‍ය, එවමෙතෙසං රුක්‌ඛානං කොටි න පඤ්‌ඤායති, එවමෙව ඛො, මහාරාජ, ඉධ ජාතො ඉධෙව මරති, ඉධ මතො අඤ්‌ඤත්‍ර උප්‌පජ්‌ජති, තහිං ජාතො තහිං යෙව මරති, තහිං මතො අඤ්‌ඤත්‍ර උප්‌පජ්‌ජති, එවං ඛො, මහාරාජ, සංසාරො හොතී’’ති.
9. Rājā āha ‘‘bhante nāgasena, yaṃ panetaṃ brūsi ‘saṃsāro’ti, katamo so saṃsāro’’ti? ‘‘Idha, mahārāja, jāto idheva marati, idha mato aññatra uppajjati, tahiṃ jāto tahiṃ yeva marati, tahiṃ mato aññatra uppajjati, evaṃ kho, mahārāja, saṃsāro hotī’’ti. ‘‘Opammaṃ karohī’’ti. ‘‘Yathā, mahārāja, kocideva puriso pakkaṃ ambaṃ khāditvā aṭṭhiṃ ropeyya, tato mahanto ambarukkho nibbattitvā phalāni dadeyya, atha so puriso tatopi pakkaṃ ambaṃ khāditvā aṭṭhiṃ ropeyya, tatopi mahanto ambarukkho nibbattitvā phalāni dadeyya, evametesaṃ rukkhānaṃ koṭi na paññāyati, evameva kho, mahārāja, idha jāto idheva marati, idha mato aññatra uppajjati, tahiṃ jāto tahiṃ yeva marati, tahiṃ mato aññatra uppajjati, evaṃ kho, mahārāja, saṃsāro hotī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
සංසාරපඤ්‌හො නවමො.
Saṃsārapañho navamo.
