| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸங்ஸட்ட²வாராதி³வண்ணனா
Saṃsaṭṭhavārādivaṇṇanā
306. அதி⁴கரணந்தி வா ஸமதா²தி வா இமே த⁴ம்மா ஸங்ஸட்டா²திஆதி³ ஸமதா²னங் அதி⁴கரணேஸு ஏவ யதா²ரஹங் பவத்திங், அதி⁴கரணானி வினா தேஸங் விஸுங் அட்டா²னஞ்ச த³ஸ்ஸேதுங் வுத்தங். வினிப்³பு⁴ஜித்வா நானாகரணங் பஞ்ஞாபேதுந்தி அதி⁴கரணதோ ஸமதே²ஹி வியோஜெத்வா அஸங்ஸட்டே² கத்வா நானாகரணங் அஞ்ஞமஞ்ஞங் அஸங்ஸட்ட²தாய டி²தபா⁴வஸங்கா²தங் நானத்தங் பஞ்ஞாபேதுங் அதி⁴கரணவூபஸமக்க²ணே ஏவ தேஸங் அஸங்ஸக்³க³ங் பஞ்ஞாபேதுங் கிங் ஸக்காதி புச்ச²தி.
306.Adhikaraṇantivā samathāti vā ime dhammā saṃsaṭṭhātiādi samathānaṃ adhikaraṇesu eva yathārahaṃ pavattiṃ, adhikaraṇāni vinā tesaṃ visuṃ aṭṭhānañca dassetuṃ vuttaṃ. Vinibbhujitvā nānākaraṇaṃ paññāpetunti adhikaraṇato samathehi viyojetvā asaṃsaṭṭhe katvā nānākaraṇaṃ aññamaññaṃ asaṃsaṭṭhatāya ṭhitabhāvasaṅkhātaṃ nānattaṃ paññāpetuṃ adhikaraṇavūpasamakkhaṇe eva tesaṃ asaṃsaggaṃ paññāpetuṃ kiṃ sakkāti pucchati.
அதி⁴கரணந்திஆதி³ கா³ரய்ஹவாத³த³ஸ்ஸனங். ஸோ மா ஹேவந்தி யோ ஏவங் வத³தி, ஸோ ‘‘மா ஏவங் வதா³’’தி வசனீயோ அஸ்ஸ, ந ச லப்³ப⁴தி ஸமதா²னங் அஞ்ஞத்ர அதி⁴கரணா வூபஸமலக்க²ணந்தி பஹானாவத்தா²னஸங்கா²தங் நானாகரணங் படிக்கி²பதி. லக்க²ணதோ பன அதி⁴கரணேஹி ஸமதா²னங் நானாகரணங் அத்தே²வாதி த³ட்ட²ப்³ப³ங். ஸமதா² அதி⁴கரணேஹி ஸம்மந்தீதி அபலோகனாதீ³ஹி சதூஹி கிச்சாதி⁴கரணேஹி ஸப்³பே³பி ஸமதா² நிட்டா²னங் க³ச்ச²ந்தி, நாஞ்ஞேஹீதி இமமத்த²ங் ஸந்தா⁴ய வுத்தங். தேனேவ வக்க²தி ‘‘ஸம்முகா²வினயோ விவாதா³தி⁴கரணேன ந ஸம்மதி. அனுவாத³…பே॰… ஆபத்தாதி⁴கரணேன ந ஸம்மதி, கிச்சாதி⁴கரணேன ஸம்மதீ’’திஆதி³ (பரி॰ 311).
Adhikaraṇantiādi gārayhavādadassanaṃ. So mā hevanti yo evaṃ vadati, so ‘‘mā evaṃ vadā’’ti vacanīyo assa, na ca labbhati samathānaṃ aññatra adhikaraṇā vūpasamalakkhaṇanti pahānāvatthānasaṅkhātaṃ nānākaraṇaṃ paṭikkhipati. Lakkhaṇato pana adhikaraṇehi samathānaṃ nānākaraṇaṃ atthevāti daṭṭhabbaṃ. Samathā adhikaraṇehi sammantīti apalokanādīhi catūhi kiccādhikaraṇehi sabbepi samathā niṭṭhānaṃ gacchanti, nāññehīti imamatthaṃ sandhāya vuttaṃ. Teneva vakkhati ‘‘sammukhāvinayo vivādādhikaraṇena na sammati. Anuvāda…pe… āpattādhikaraṇena na sammati, kiccādhikaraṇena sammatī’’tiādi (pari. 311).
307-313. விவாதா³தி⁴கரணங் கதிஹி ஸமதே²ஹி ஸம்மதீதிஆதி³கோ ஸம்மதிவாரோ. தத³னந்தரோ ஸம்மதினஸம்மதிவாரோ ச அதி⁴கரணேஹி ஸமதா²னங் ஸங்ஸட்ட²தங், விஸங்ஸட்ட²தஞ்ச த³ஸ்ஸேதுங் வுத்தோ. ஸமதா² ஸமதே²ஹி ஸம்மந்தீதிஆதி³கோ ஸமதா²தி⁴கரணவாரோ ஸமதா²னங் அஞ்ஞமஞ்ஞங், அதி⁴கரணேஹி ச அதி⁴கரணானஞ்ச அஞ்ஞமஞ்ஞங், ஸமதே²ஹி ச வூபஸமாவூபஸமங் த³ஸ்ஸேதுங் வுத்தோ.
307-313.Vivādādhikaraṇaṃ katihi samathehi sammatītiādiko sammativāro. Tadanantaro sammatinasammativāro ca adhikaraṇehi samathānaṃ saṃsaṭṭhataṃ, visaṃsaṭṭhatañca dassetuṃ vutto. Samathā samathehi sammantītiādiko samathādhikaraṇavāro samathānaṃ aññamaññaṃ, adhikaraṇehi ca adhikaraṇānañca aññamaññaṃ, samathehi ca vūpasamāvūpasamaṃ dassetuṃ vutto.
314. ஸமுட்டா²பேதிவாரோ பன அதி⁴கரணேஹி அதி⁴கரணானங் உப்பத்திப்பகாரத³ஸ்ஸனத்த²ங் வுத்தோ. ந கதமங் அதி⁴கரணந்தி அத்தனோ ஸம்ப⁴வமத்தேன ஏகம்பி அதி⁴கரணங் ந ஸமுட்டா²பேதீதி அத்தோ². கத²ஞ்சரஹி ஸமுட்டா²பேதீதி ஆஹ ‘‘அபி சா’’திஆதி³. தத்த² ஜாயந்தீதி அனந்தரமேவ அனுப்பஜ்ஜித்வா பரம்பரபச்சயா ஜாயந்தீதி அதி⁴ப்பாயோ. ‘‘த⁴ம்மோ அத⁴ம்மோ’’திஆதி³னா உபி⁴ன்னங் புக்³க³லானங் விவாத³பச்சயா அஞ்ஞமஞ்ஞகே²மப⁴ங்கா³ ஹொந்தி, தப்பச்சயா தேஸங் பக்க²ங் பரியேஸனேன கலஹங் வட்³ட⁴ந்தானங் விவாதோ³ கஞ்சி மஹாபரிஸங் ஸங்க⁴பரிணாயகங் லஜ்ஜிங் ஆக³ம்ம வூபஸமங் க³ச்ச²தி. ததா² அவூபஸமந்தே பன விவாதோ³ கமேன வட்³டி⁴த்வா ஸகலேபி ஸங்கே⁴ விவாத³ங் ஸமுட்டா²பேதி, ததோ அனுவாதா³தீ³னீதி ஏவங் பரம்பரக்கமேன வூபஸமகாரணாபா⁴வே சத்தாரி அதி⁴கரணானி ஜாயந்தி. தங் ஸந்தா⁴யாஹ ‘‘ஸங்கோ⁴ விவத³தி விவாதா³தி⁴கரண’’ந்தி. ஸங்க⁴ஸ்ஸ விவத³தோ யோ விவாதோ³, தங் விவாதா³தி⁴கரணங் ஹோதீதி அத்தோ². ஏஸ நயோ ஸேஸேஸுபி.
314. Samuṭṭhāpetivāro pana adhikaraṇehi adhikaraṇānaṃ uppattippakāradassanatthaṃ vutto. Na katamaṃ adhikaraṇanti attano sambhavamattena ekampi adhikaraṇaṃ na samuṭṭhāpetīti attho. Kathañcarahi samuṭṭhāpetīti āha ‘‘api cā’’tiādi. Tattha jāyantīti anantarameva anuppajjitvā paramparapaccayā jāyantīti adhippāyo. ‘‘Dhammo adhammo’’tiādinā ubhinnaṃ puggalānaṃ vivādapaccayā aññamaññakhemabhaṅgā honti, tappaccayā tesaṃ pakkhaṃ pariyesanena kalahaṃ vaḍḍhantānaṃ vivādo kañci mahāparisaṃ saṅghapariṇāyakaṃ lajjiṃ āgamma vūpasamaṃ gacchati. Tathā avūpasamante pana vivādo kamena vaḍḍhitvā sakalepi saṅghe vivādaṃ samuṭṭhāpeti, tato anuvādādīnīti evaṃ paramparakkamena vūpasamakāraṇābhāve cattāri adhikaraṇāni jāyanti. Taṃ sandhāyāha ‘‘saṅgho vivadati vivādādhikaraṇa’’nti. Saṅghassa vivadato yo vivādo, taṃ vivādādhikaraṇaṃ hotīti attho. Esa nayo sesesupi.
ஸங்ஸட்ட²வாராதி³வண்ணனா நிட்டி²தா.
Saṃsaṭṭhavārādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
16. ஸங்ஸட்ட²வாரோ • 16. Saṃsaṭṭhavāro
17. ஸம்மதிவாரோ • 17. Sammativāro
18. ஸம்மந்தி ந ஸம்மந்திவாரோ • 18. Sammanti na sammantivāro
19. ஸமதா²தி⁴கரணவாரோ • 19. Samathādhikaraṇavāro
20. ஸமுட்டா²பனவாரோ • 20. Samuṭṭhāpanavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
ஸங்ஸட்ட²வாரகதா²வண்ணனா • Saṃsaṭṭhavārakathāvaṇṇanā
ஸமதா²தி⁴கரணவாரகதா²வண்ணனா • Samathādhikaraṇavārakathāvaṇṇanā
ஸமுட்டா²பனவாரகதா²வண்ணனா • Samuṭṭhāpanavārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸங்ஸட்ட²வாராதி³வண்ணனா • Saṃsaṭṭhavārādivaṇṇanā
