| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৫. সংসট্ঠৰারৰণ্ণনা
5. Saṃsaṭṭhavāravaṇṇanā
৩৩৮-৩৪৬. সংসট্ঠৰারে কুসলং ধম্মং সংসট্ঠোতি কুসলং ধম্মং একুপ্পাদাদিলক্খণেন সম্পযোগট্ঠেন পচ্চযং কত্ৰাতি অত্থো। কুসলং একং খন্ধং সংসট্ঠোতি কুসলং একং খন্ধং সম্পযুত্তপচ্চযং কত্ৰা তযো খন্ধা উপ্পজ্জন্তি হেতুপচ্চযাতি ৰুত্তং হোতি। ইমিনা উপাযেন সব্বপদেসু অত্থো ৰেদিতব্বো। ইমস্মিং পন হেতুপচ্চযে অরূপধম্মস্সেৰ সম্পযোগট্ঠেন পচ্চযং কত্ৰা তযো পঞ্হা ৰিস্সজ্জিতা। যথা চ হেতুপচ্চযে, তথা আরম্মণপচ্চযাদীসুপি, কেৰলং ৰিপাকপচ্চযে একমেৰ ৰিস্সজ্জনং।
338-346. Saṃsaṭṭhavāre kusalaṃ dhammaṃ saṃsaṭṭhoti kusalaṃ dhammaṃ ekuppādādilakkhaṇena sampayogaṭṭhena paccayaṃ katvāti attho. Kusalaṃ ekaṃ khandhaṃ saṃsaṭṭhoti kusalaṃ ekaṃ khandhaṃ sampayuttapaccayaṃ katvā tayo khandhā uppajjanti hetupaccayāti vuttaṃ hoti. Iminā upāyena sabbapadesu attho veditabbo. Imasmiṃ pana hetupaccaye arūpadhammasseva sampayogaṭṭhena paccayaṃ katvā tayo pañhā vissajjitā. Yathā ca hetupaccaye, tathā ārammaṇapaccayādīsupi, kevalaṃ vipākapaccaye ekameva vissajjanaṃ.
৩৪৭-৩৫০. ইদানি যথালদ্ধানি ৰিস্সজ্জনানি গণনৰসেন দস্সেতুং হেতুযা তীণীতিআদি ৰুত্তং। তত্থ সব্বতিকেসু কুসলেন কুসলং, অকুসলেন অকুসলং, অব্যাকতেন অব্যাকতন্তি অযমেৰ নিযমো। এককে পন অব্যাকতেন অব্যাকতমেৰ লব্ভতীতি এৰমেত্থ বাৰীসতিযা পচ্চযেসু তীণি, ৰিপাকে একন্তি দ্ৰে পরিচ্ছেদা। পচ্ছাজাতে অনুলোমং নত্থি। তস্মা তীণি একন্তি ইমেসঞ্ঞেৰ ৰসেন দুকতিকাদীসু পচ্চযসংসন্দনে যত্থ ৰিপাকপচ্চযো পৰিসতি; তত্থ একং, সেসেসু তীণীতি এৰং গণনা ৰেদিতব্বা। সেসমেত্থ অনুলোমে উত্তানত্থমেৰ।
347-350. Idāni yathāladdhāni vissajjanāni gaṇanavasena dassetuṃ hetuyā tīṇītiādi vuttaṃ. Tattha sabbatikesu kusalena kusalaṃ, akusalena akusalaṃ, abyākatena abyākatanti ayameva niyamo. Ekake pana abyākatena abyākatameva labbhatīti evamettha bāvīsatiyā paccayesu tīṇi, vipāke ekanti dve paricchedā. Pacchājāte anulomaṃ natthi. Tasmā tīṇi ekanti imesaññeva vasena dukatikādīsu paccayasaṃsandane yattha vipākapaccayo pavisati; tattha ekaṃ, sesesu tīṇīti evaṃ gaṇanā veditabbā. Sesamettha anulome uttānatthameva.
৩৫১-৩৫৪. পচ্চনীযে পন কুসলং ন লব্ভতীতি অকুসলমেৰ আদিং কত্ৰা ৰিস্সজ্জনং কতং, তং উত্তানত্থমেৰ।
351-354. Paccanīye pana kusalaṃ na labbhatīti akusalameva ādiṃ katvā vissajjanaṃ kataṃ, taṃ uttānatthameva.
৩৫৯. যং পনেত্থ পচ্চনীযে ৰিস্সজ্জনপরিচ্ছেদং গণনতো দস্সেতুং নহেতুযা দ্ৰেতিআদি ৰুত্তং, তত্থ দ্ৰে তীণি একন্তি তযো পরিচ্ছেদা। তেসং ৰসেন দুকতিকাদীসু পচ্চযসংসন্দনে গণনা ৰেদিতব্বা। ইধাপি অধিকতরগণনানং ঊনতরগণনেন সদ্ধিং সংসন্দনে ঊনতরগণনমেৰ লব্ভতি, সমগণনেন সদ্ধিং সমগণনং। যস্মা চেত্থ অরূপধম্মাযেৰ পচ্চযুপ্পন্না, তস্মা নহেতুনাধিপতিনপুরেজাতনপচ্ছাজাতনাসেৰননকম্মনৰিপাকনঝাননমগ্গনৰিপ্পযুত্তৰসেন দসেৰ পচ্চযা পচ্চনীকতো দস্সিতা, সেসা চুদ্দস ন লব্ভন্তি। যেপি লব্ভন্তি, তেসুপি ৰিপাকে পচ্চযুপ্পন্নে নকম্মনৰিপাকা ন লব্ভন্তি।
359. Yaṃ panettha paccanīye vissajjanaparicchedaṃ gaṇanato dassetuṃ nahetuyā dvetiādi vuttaṃ, tattha dve tīṇi ekanti tayo paricchedā. Tesaṃ vasena dukatikādīsu paccayasaṃsandane gaṇanā veditabbā. Idhāpi adhikataragaṇanānaṃ ūnataragaṇanena saddhiṃ saṃsandane ūnataragaṇanameva labbhati, samagaṇanena saddhiṃ samagaṇanaṃ. Yasmā cettha arūpadhammāyeva paccayuppannā, tasmā nahetunādhipatinapurejātanapacchājātanāsevananakammanavipākanajhānanamagganavippayuttavasena daseva paccayā paccanīkato dassitā, sesā cuddasa na labbhanti. Yepi labbhanti, tesupi vipāke paccayuppanne nakammanavipākā na labbhanti.
৩৬০-৩৬৮. নহেতুপচ্চযা নাধিপতিযা দ্ৰেতি নহেতুযা লদ্ধং দ্ৰযমেৰ। সেসদ্ৰযেসুপি এসেৰ নযো। নকম্মে একন্তি অহেতুককিরিযচেতনং পচ্চযুপ্পন্নং কত্ৰা অব্যাকতেন অব্যাকতং। নৰিপাকে দ্ৰেতি অহেতুকমোহকিরিযৰসেন দ্ৰে। নঝানে একন্তি অহেতুকপঞ্চৰিঞ্ঞাণৰসেন অব্যাকতৰিস্সজ্জনং ৰেদিতব্বং। নমগ্গে একন্তি অহেতুকৰিপাককিরিযৰসেন অব্যাকতৰিস্সজ্জনং। ইমিনাৰুপাযেন সব্বসংসন্দনেসু অত্থো ৰেদিতব্বোতি।
360-368. Nahetupaccayā nādhipatiyā dveti nahetuyā laddhaṃ dvayameva. Sesadvayesupi eseva nayo. Nakamme ekanti ahetukakiriyacetanaṃ paccayuppannaṃ katvā abyākatena abyākataṃ. Navipāke dveti ahetukamohakiriyavasena dve. Najhāne ekanti ahetukapañcaviññāṇavasena abyākatavissajjanaṃ veditabbaṃ. Namagge ekanti ahetukavipākakiriyavasena abyākatavissajjanaṃ. Imināvupāyena sabbasaṃsandanesu attho veditabboti.
৩৬৯-৩৮৩. অনুলোমপচ্চনীযে হেট্ঠা ৰুত্তা নহেতুআদযো দসেৰ পচ্চনীযতো লব্ভন্তি, ন সেসা। যেপি লব্ভন্তি, তেসু হেতুম্হি অনুলোমতো ঠিতে ঝানমগ্গা পচ্চনীযতো ন লব্ভন্তীতি সব্বং হেট্ঠা ৰুত্তনযেনেৰ ৰেদিতব্বন্তি।
369-383. Anulomapaccanīye heṭṭhā vuttā nahetuādayo daseva paccanīyato labbhanti, na sesā. Yepi labbhanti, tesu hetumhi anulomato ṭhite jhānamaggā paccanīyato na labbhantīti sabbaṃ heṭṭhā vuttanayeneva veditabbanti.
৩৮৪-৩৯১. পচ্চনীযানুলোমে নহেতুপচ্চযুপ্পন্নেসু অহেতুকমোহোৰ ঝানমগ্গপচ্চযং লভতি, সেসা ন লভন্তি। নঝানপচ্চযে অট্ঠাহেতুকচিত্তানিপি। নকম্মপচ্চযা নহেতুপচ্চযা নাধিপতিপচ্চযা নপুরেজাতপচ্চযা আরম্মণে একন্তি আরুপ্পে অহেতুককিরিযচেতনাৰসেন অব্যাকতেন অব্যাকতং। ইমিনা উপাযেন যং লব্ভতি, যঞ্চ ন লব্ভতি, তস্স ৰসেন সব্বত্থ গণনা ৰেদিতব্বাতি।
384-391. Paccanīyānulome nahetupaccayuppannesu ahetukamohova jhānamaggapaccayaṃ labhati, sesā na labhanti. Najhānapaccaye aṭṭhāhetukacittānipi. Nakammapaccayā nahetupaccayā nādhipatipaccayā napurejātapaccayā ārammaṇe ekanti āruppe ahetukakiriyacetanāvasena abyākatena abyākataṃ. Iminā upāyena yaṃ labbhati, yañca na labbhati, tassa vasena sabbattha gaṇanā veditabbāti.
সংসট্ঠৰারৰণ্ণনা।
Saṃsaṭṭhavāravaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ১. কুসলত্তিকং • 1. Kusalattikaṃ
