| Library / Tipiṭaka / ཏིཔིཊཀ • Tipiṭaka / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā |
༥. སཾསཊྛཝཱརཝཎྞནཱ
5. Saṃsaṭṭhavāravaṇṇanā
༣༥༡-༣༦༨. སཾསཊྛཝཱརེ པཙྩནཱིཡེ ‘‘ནཝིཔྤཡུཏྟེ པཊིསནྡྷི ནཏྠཱི’’ཏི ཨིདཾ ཝཏྠུཝིརཧིཏཱཡ པཊིསནྡྷིཡཱ ཝིསུཾ ཨནུདྡྷརཎཏོ ཝུཏྟཾ། པཊིཙྩཝཱརཱདཱིསུ ཧི སཧཛཱཏསྶ པཙྩཡབྷཱཝདསྶནཏྠཾ སཝཏྠུཀཱ པཊིསནྡྷི ཨུདྡྷཊཱ, སཱ ཨིདྷཱཔི ཨདྷིཔཏིཔུརེཛཱཏཱསེཝནེསུ ནཀམྨནཝིཔཱཀནཛྷཱནནཝིཔྤཡུཏྟེསུ ན ལབྦྷཏི, ཨཉྙེསུ ཙ ཨནུལོམཏོ པཙྩནཱིཡཏོ ཙ ལབྦྷམཱནཔཙྩཡེསུ ལབྦྷཏཱིཏི ཨིམསྶ ཝིསེསསྶ དསྶནཏྠཾ ཨུདྡྷཊཱཏི། སེསཱ ཏེརས ན ལབྦྷནྟཱིཏི ཨེཏྠ ‘‘སེསཱ ཙུདྡསཱ’’ཏི བྷཝིཏབྦཾ། ན ཛྷཱནེ ཨེཀནྟི ཨཧེཏུཀཔཉྩཝིཉྙཱཎཝསེནཱཏི པཉྩཝིཉྙཱཎཱནཾ ཧེཏུཔཙྩཡཝིརཧིཏམཏྟདསྶནཏྠཾ ཨཧེཏུཀགྒཧཎཾ ཀཏནྟི དཊྛབྦཾ, ‘‘ནམགྒེ ཨེཀནྟི ཨཧེཏུཀཀིརིཡཝསེནཱ’’ཏི ཝུཏྟཾ, ‘‘ཨཧེཏུཀཝིཔཱཀཀིརིཡཝསེནཱ’’ཏི བྷཝིཏབྦཾ།
351-368. Saṃsaṭṭhavāre paccanīye ‘‘navippayutte paṭisandhi natthī’’ti idaṃ vatthuvirahitāya paṭisandhiyā visuṃ anuddharaṇato vuttaṃ. Paṭiccavārādīsu hi sahajātassa paccayabhāvadassanatthaṃ savatthukā paṭisandhi uddhaṭā, sā idhāpi adhipatipurejātāsevanesu nakammanavipākanajhānanavippayuttesu na labbhati, aññesu ca anulomato paccanīyato ca labbhamānapaccayesu labbhatīti imassa visesassa dassanatthaṃ uddhaṭāti. Sesā terasa na labbhantīti ettha ‘‘sesā cuddasā’’ti bhavitabbaṃ. Na jhāne ekanti ahetukapañcaviññāṇavasenāti pañcaviññāṇānaṃ hetupaccayavirahitamattadassanatthaṃ ahetukaggahaṇaṃ katanti daṭṭhabbaṃ, ‘‘namagge ekanti ahetukakiriyavasenā’’ti vuttaṃ, ‘‘ahetukavipākakiriyavasenā’’ti bhavitabbaṃ.
༣༦༩-༣༩༡. ཧེཊྛཱ ཝུཏྟནཡེནེཝཱཏི པཊིཙྩཝཱརེ ཨནུལོམཔཙྩནཱིཡེ ཝུཏྟནཡེན། ‘‘ནཧེཏུཔཙྩཡུཔྤནྣེསུ ཨཧེཏུཀམོཧོཝ ཛྷཱནམགྒཔཙྩཡཾ ལབྷཏི, སེསཱ ན ལབྷནྟཱི’’ཏི ཝུཏྟཾ, སེསེསུ པན པཉྩཝིཉྙཱཎཝཛྫཱཧེཏུཀཀྑནྡྷཱ ཏཾསམུཊྛཱནཱ པཙྩཡུཔྤནྣདྷམྨཱ ཛྷཱནཔཙྩཡཾ ལབྷནྟི, ན པཙྩནཱིཡཱནུལོམེ དྭིནྣཾ པཙྩཡཱནཾ ཨནུལོམེན སཧ ཡོཛནཱ ཨཏྠཱིཏི ཛྷཱནམགྒཔཙྩཡཾ སཧིཏཾ ལབྷཏཱིཏི ཙ ན སཀྐཱ ཝཏྟུཾ, ཏསྨཱ ‘‘ཨཧེཏུཀམོཧོཝ མགྒཔཙྩཡཾ ལབྷཏཱི’’ཏི ཝཏྟབྦཾ།
369-391. Heṭṭhāvuttanayenevāti paṭiccavāre anulomapaccanīye vuttanayena. ‘‘Nahetupaccayuppannesu ahetukamohova jhānamaggapaccayaṃ labhati, sesā na labhantī’’ti vuttaṃ, sesesu pana pañcaviññāṇavajjāhetukakkhandhā taṃsamuṭṭhānā paccayuppannadhammā jhānapaccayaṃ labhanti, na paccanīyānulome dvinnaṃ paccayānaṃ anulomena saha yojanā atthīti jhānamaggapaccayaṃ sahitaṃ labhatīti ca na sakkā vattuṃ, tasmā ‘‘ahetukamohova maggapaccayaṃ labhatī’’ti vattabbaṃ.
སཾསཊྛཝཱརཝཎྞནཱ ནིཊྛིཏཱ།
Saṃsaṭṭhavāravaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / པཊྛཱནཔཱལི༹ • Paṭṭhānapāḷi / ༡. ཀུསལཏྟིཀཾ • 1. Kusalattikaṃ
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༥. སཾསཊྛཝཱརཝཎྞནཱ • 5. Saṃsaṭṭhavāravaṇṇanā
