| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
8. ஸமுச்சயவாரோ
8. Samuccayavāro
200. மேது²னங் த⁴ம்மங் படிஸேவனபச்சயா கதி ஆபத்தியோ ஆபஜ்ஜதி? மேது²னங் த⁴ம்மங் படிஸேவனபச்சயா சதஸ்ஸோ ஆபத்தியோ ஆபஜ்ஜதி. அக்கா²யிதே ஸரீரே மேது²னங் த⁴ம்மங் படிஸேவதி, ஆபத்தி பாராஜிகஸ்ஸ; யேபு⁴ய்யேன கா²யிதே ஸரீரே மேது²னங் த⁴ம்மங் படிஸேவதி, ஆபத்தி து²ல்லச்சயஸ்ஸ; வட்டகதே முகே² அச்சு²பந்தங் அங்க³ஜாதங் பவேஸேதி, ஆபத்தி து³க்கடஸ்ஸ; ஜதுமட்ட²கே பாசித்தியங் – மேது²னங் த⁴ம்மங் படிஸேவனபச்சயா இமா சதஸ்ஸோ ஆபத்தியோ ஆபஜ்ஜதி. தா ஆபத்தியோ சதுன்னங் விபத்தீனங் கதி விபத்தியோ ப⁴ஜந்தி? ஸத்தன்னங் ஆபத்திக்க²ந்தா⁴னங் கதிஹி ஆபத்திக்க²ந்தே⁴ஹி ஸங்க³ஹிதா? ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்ட²ந்தி? சதுன்னங் அதி⁴கரணானங் கதமங் அதி⁴கரணங்? ஸத்தன்னங் ஸமதா²னங் கதிஹி ஸமதே²ஹி ஸம்மந்தி? தா ஆபத்தியோ சதுன்னங் விபத்தீனங் த்³வே விபத்தியோ ப⁴ஜந்தி – ஸியா ஸீலவிபத்திங் ஸியா ஆசாரவிபத்திங். ஸத்தன்னங் ஆபத்திக்க²ந்தா⁴னங் சதூஹி ஆபத்திக்க²ந்தே⁴ஹி ஸங்க³ஹிதா – ஸியா பாராஜிகாபத்திக்க²ந்தே⁴ன, ஸியா து²ல்லச்சயாபத்திக்க²ந்தே⁴ன, ஸியா பாசித்தியாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்ட²ந்தி – காயதோ ச சித்ததோ ச ஸமுட்ட²ந்தி, ந வாசதோ. சதுன்னங் அதி⁴கரணானங், ஆபத்தாதி⁴கரணங். ஸத்தன்னங் ஸமதா²னங், தீஹி ஸமதே²ஹி ஸம்மந்தி – ஸியா ஸம்முகா²வினயேன ச, படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச…பே॰….
200. Methunaṃ dhammaṃ paṭisevanapaccayā kati āpattiyo āpajjati? Methunaṃ dhammaṃ paṭisevanapaccayā catasso āpattiyo āpajjati. Akkhāyite sarīre methunaṃ dhammaṃ paṭisevati, āpatti pārājikassa; yebhuyyena khāyite sarīre methunaṃ dhammaṃ paṭisevati, āpatti thullaccayassa; vaṭṭakate mukhe acchupantaṃ aṅgajātaṃ paveseti, āpatti dukkaṭassa; jatumaṭṭhake pācittiyaṃ – methunaṃ dhammaṃ paṭisevanapaccayā imā catasso āpattiyo āpajjati. Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ. Sattannaṃ āpattikkhandhānaṃ catūhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca cittato ca samuṭṭhanti, na vācato. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ, tīhi samathehi sammanti – siyā sammukhāvinayena ca, paṭiññātakaraṇena ca, siyā sammukhāvinayena ca tiṇavatthārakena ca…pe….
அனாத³ரியங் படிச்ச உத³கே உச்சாரங் வா பஸ்ஸாவங் வா கே²ளங் வா கரணபச்சயா கதி ஆபத்தியோ ஆபஜ்ஜதி? அனாத³ரியங் படிச்ச உத³கே உச்சாரங் வா பஸ்ஸாவங் வா கே²ளங் வா கரணபச்சயா ஏகங் ஆபத்திங் ஆபஜ்ஜதி. து³க்கடங் – அனாத³ரியங் படிச்ச உத³கே உச்சாரங் வா பஸ்ஸாவங் வா கே²ளங் வா கரணபச்சயா இமங் ஏகங் ஆபத்திங் ஆபஜ்ஜதி. ஸா ஆபத்தி சதுன்னங் விபத்தீனங் கதி விபத்தியோ ப⁴ஜதி? ஸத்தன்னங் ஆபத்திக்க²ந்தா⁴னங் கதிஹி ஆபத்திக்க²ந்தே⁴ஹி ஸங்க³ஹிதா? ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்டா²தி? சதுன்னங் அதி⁴கரணானங் கதமங் அதி⁴கரணங்? ஸத்தன்னங் ஸமதா²னங் கதிஹி ஸமதே²ஹி ஸம்மதி? ஸா ஆபத்தி சதுன்னங் விபத்தீனங் ஏகங் விபத்திங் ப⁴ஜதி – ஆசாரவிபத்திங். ஸத்தன்னங் ஆபத்திக்க²ந்தா⁴னங் ஏகேன ஆபத்திக்க²ந்தே⁴ன ஸங்க³ஹிதா – து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ. சதுன்னங் அதி⁴கரணானங், ஆபத்தாதி⁴கரணங். ஸத்தன்னங் ஸமதா²னங் தீஹி ஸமதே²ஹி ஸம்மதி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன சாதி.
Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā kati āpattiyo āpajjati? Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā ekaṃ āpattiṃ āpajjati. Dukkaṭaṃ – anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā imaṃ ekaṃ āpattiṃ āpajjati. Sā āpatti catunnaṃ vipattīnaṃ kati vipattiyo bhajati? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhāti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammati? Sā āpatti catunnaṃ vipattīnaṃ ekaṃ vipattiṃ bhajati – ācāravipattiṃ. Sattannaṃ āpattikkhandhānaṃ ekena āpattikkhandhena saṅgahitā – dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammati – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena cāti.
ஸமுச்சயவாரோ நிட்டி²தோ அட்ட²மோ.
Samuccayavāro niṭṭhito aṭṭhamo.
அட்ட²பச்சயவாரா நிட்டி²தா.
Aṭṭhapaccayavārā niṭṭhitā.
மஹாவிப⁴ங்கே³ ஸோளஸமஹாவாரா நிட்டி²தா.
Mahāvibhaṅge soḷasamahāvārā niṭṭhitā.
பி⁴க்கு²விப⁴ங்க³மஹாவாரோ நிட்டி²தோ.
Bhikkhuvibhaṅgamahāvāro niṭṭhito.
