| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
8. ஸமுச்சயவாரோ
8. Samuccayavāro
246. அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யந்தீ கதி ஆபத்தியோ ஆபஜ்ஜதி? அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யந்தீ திஸ்ஸோ ஆபத்தியோ ஆபஜ்ஜதி. அத⁴க்க²கங் உப்³ப⁴ஜாணுமண்ட³லங் க³ஹணங் ஸாதி³யதி, ஆபத்தி பாராஜிகஸ்ஸ; உப்³ப⁴க்க²கங் அதோ⁴ஜாணுமண்ட³லங் க³ஹணங் ஸாதி³யதி, ஆபத்தி து²ல்லச்சயஸ்ஸ; காயபடிப³த்³த⁴ங் க³ஹணங் ஸாதி³யதி, ஆபத்தி து³க்கடஸ்ஸ – அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யந்தீ இமா திஸ்ஸோ ஆபத்தியோ ஆபஜ்ஜதி.
246. Avassutā bhikkhunī avassutassa purisapuggalassa kāyasaṃsaggaṃ sādiyantī kati āpattiyo āpajjati? Avassutā bhikkhunī avassutassa purisapuggalassa kāyasaṃsaggaṃ sādiyantī tisso āpattiyo āpajjati. Adhakkhakaṃ ubbhajāṇumaṇḍalaṃ gahaṇaṃ sādiyati, āpatti pārājikassa; ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassa; kāyapaṭibaddhaṃ gahaṇaṃ sādiyati, āpatti dukkaṭassa – avassutā bhikkhunī avassutassa purisapuggalassa kāyasaṃsaggaṃ sādiyantī imā tisso āpattiyo āpajjati.
தா ஆபத்தியோ சதுன்னங் விபத்தீனங் கதி விபத்தியோ ப⁴ஜந்தி? ஸத்தன்னங் ஆபத்திக்க²ந்தா⁴னங் கதிஹி ஆபத்திக்க²ந்தே⁴ஹி ஸங்க³ஹிதா? ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்ட²ந்தி? சதுன்னங் அதி⁴கரணானங் கதமங் அதி⁴கரணங்? ஸத்தன்னங் ஸமதா²னங் கதிஹி ஸமதே²ஹி ஸம்மந்தி? தா ஆபத்தியோ சதுன்னங் விபத்தீனங் த்³வே விபத்தியோ ப⁴ஜந்தி – ஸியா ஸீலவிபத்திங், ஸியா ஆசாரவிபத்திங். ஸத்தன்னங் ஆபத்திக்க²ந்தா⁴னங் தீஹி ஆபத்திக்க²ந்தே⁴ஹி ஸங்க³ஹிதா – ஸியா பாராஜிகாபத்திக்க²ந்தே⁴ன, ஸியா து²ல்லச்சயாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்ட²ந்தி – காயதோ ச சித்ததோ ச ஸமுட்ட²ந்தி, ந வாசதோ. சதுன்னங் அதி⁴கரணானங் ஆபத்தாதி⁴கரணங். ஸத்தன்னங் ஸமதா²னங் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச…பே॰….
Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ tīhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca cittato ca samuṭṭhanti, na vācato. Catunnaṃ adhikaraṇānaṃ āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca…pe….
த³தி⁴ங் விஞ்ஞாபெத்வா பு⁴ஞ்ஜந்தீ கதி ஆபத்தியோ ஆபஜ்ஜதி? த³தி⁴ங் விஞ்ஞாபெத்வா பு⁴ஞ்ஜந்தீ த்³வே ஆபத்தியோ ஆபஜ்ஜதி. பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ – த³தி⁴ங் விஞ்ஞாபெத்வா பு⁴ஞ்ஜந்தீ இமா த்³வே ஆபத்தியோ ஆபஜ்ஜதி.
Dadhiṃ viññāpetvā bhuñjantī kati āpattiyo āpajjati? Dadhiṃ viññāpetvā bhuñjantī dve āpattiyo āpajjati. Bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa – dadhiṃ viññāpetvā bhuñjantī imā dve āpattiyo āpajjati.
தா ஆபத்தியோ சதுன்னங் விபத்தீனங் கதி விபத்தியோ ப⁴ஜந்தி? ஸத்தன்னங் ஆபத்திக்க²ந்தா⁴னங் கதிஹி ஆபத்திக்க²ந்தே⁴ஹி ஸங்க³ஹிதா? ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்ட²ந்தி? சதுன்னங் அதி⁴கரணானங் கதமங் அதி⁴கரணங்? ஸத்தன்னங் ஸமதா²னங் கதிஹி ஸமதே²ஹி ஸம்மந்தி? தா ஆபத்தியோ சதுன்னங் விபத்தீனங் ஏகங் விபத்திங் ப⁴ஜந்தி – ஆசாரவிபத்திங். ஸத்தன்னங் ஆபத்திக்க²ந்தா⁴னங் த்³வீஹி ஆபத்திக்க²ந்தே⁴ஹி ஸங்க³ஹிதா – ஸியா பாடிதே³ஸனீயாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் சதூஹி ஸமுட்டா²னேஹி ஸமுட்ட²ந்தி – ஸியா காயதோ ஸமுட்ட²ந்தி ந வாசதோ ந சித்ததோ, ஸியா காயதோ ச வாசதோ ச ஸமுட்ட²ந்தி ந சித்ததோ, ஸியா காயதோ ச சித்ததோ ச ஸமுட்ட²ந்தி ந வாசதோ, ஸியா காயதோ ச வாசதோ ச சித்ததோ ச ஸமுட்ட²ந்தி. சதுன்னங் அதி⁴கரணானங் – ஆபத்தாதி⁴கரணங். ஸத்தன்னங் ஸமதா²னங் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச.
Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ ekaṃ vipattiṃ bhajanti – ācāravipattiṃ. Sattannaṃ āpattikkhandhānaṃ dvīhi āpattikkhandhehi saṅgahitā – siyā pāṭidesanīyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ catūhi samuṭṭhānehi samuṭṭhanti – siyā kāyato samuṭṭhanti na vācato na cittato, siyā kāyato ca vācato ca samuṭṭhanti na cittato, siyā kāyato ca cittato ca samuṭṭhanti na vācato, siyā kāyato ca vācato ca cittato ca samuṭṭhanti. Catunnaṃ adhikaraṇānaṃ – āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
ஸமுச்சயவாரோ நிட்டி²தோ அட்ட²மோ.
Samuccayavāro niṭṭhito aṭṭhamo.
