| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৮. সমুচ্চযৰারো
8. Samuccayavāro
২০০. মেথুনং ধম্মং পটিসেৰনপচ্চযা কতি আপত্তিযো আপজ্জতি? মেথুনং ধম্মং পটিসেৰনপচ্চযা চতস্সো আপত্তিযো আপজ্জতি। অক্খাযিতে সরীরে মেথুনং ধম্মং পটিসেৰতি, আপত্তি পারাজিকস্স; যেভুয্যেন খাযিতে সরীরে মেথুনং ধম্মং পটিসেৰতি, আপত্তি থুল্লচ্চযস্স; ৰট্টকতে মুখে অচ্ছুপন্তং অঙ্গজাতং পৰেসেতি, আপত্তি দুক্কটস্স; জতুমট্ঠকে পাচিত্তিযং – মেথুনং ধম্মং পটিসেৰনপচ্চযা ইমা চতস্সো আপত্তিযো আপজ্জতি। তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং সিযা আচারৰিপত্তিং। সত্তন্নং আপত্তিক্খন্ধানং চতূহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন। ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ চিত্ততো চ সমুট্ঠন্তি, ন ৰাচতো। চতুন্নং অধিকরণানং, আপত্তাধিকরণং। সত্তন্নং সমথানং, তীহি সমথেহি সম্মন্তি – সিযা সম্মুখাৰিনযেন চ, পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ…পে॰…।
200. Methunaṃ dhammaṃ paṭisevanapaccayā kati āpattiyo āpajjati? Methunaṃ dhammaṃ paṭisevanapaccayā catasso āpattiyo āpajjati. Akkhāyite sarīre methunaṃ dhammaṃ paṭisevati, āpatti pārājikassa; yebhuyyena khāyite sarīre methunaṃ dhammaṃ paṭisevati, āpatti thullaccayassa; vaṭṭakate mukhe acchupantaṃ aṅgajātaṃ paveseti, āpatti dukkaṭassa; jatumaṭṭhake pācittiyaṃ – methunaṃ dhammaṃ paṭisevanapaccayā imā catasso āpattiyo āpajjati. Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ. Sattannaṃ āpattikkhandhānaṃ catūhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca cittato ca samuṭṭhanti, na vācato. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ, tīhi samathehi sammanti – siyā sammukhāvinayena ca, paṭiññātakaraṇena ca, siyā sammukhāvinayena ca tiṇavatthārakena ca…pe….
অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণপচ্চযা কতি আপত্তিযো আপজ্জতি? অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণপচ্চযা একং আপত্তিং আপজ্জতি। দুক্কটং – অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণপচ্চযা ইমং একং আপত্তিং আপজ্জতি। সা আপত্তি চতুন্নং ৰিপত্তীনং কতি ৰিপত্তিযো ভজতি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মতি? সা আপত্তি চতুন্নং ৰিপত্তীনং একং ৰিপত্তিং ভজতি – আচারৰিপত্তিং। সত্তন্নং আপত্তিক্খন্ধানং একেন আপত্তিক্খন্ধেন সঙ্গহিতা – দুক্কটাপত্তিক্খন্ধেন। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো। চতুন্নং অধিকরণানং, আপত্তাধিকরণং। সত্তন্নং সমথানং তীহি সমথেহি সম্মতি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চাতি।
Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā kati āpattiyo āpajjati? Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā ekaṃ āpattiṃ āpajjati. Dukkaṭaṃ – anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā imaṃ ekaṃ āpattiṃ āpajjati. Sā āpatti catunnaṃ vipattīnaṃ kati vipattiyo bhajati? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhāti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammati? Sā āpatti catunnaṃ vipattīnaṃ ekaṃ vipattiṃ bhajati – ācāravipattiṃ. Sattannaṃ āpattikkhandhānaṃ ekena āpattikkhandhena saṅgahitā – dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammati – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena cāti.
সমুচ্চযৰারো নিট্ঠিতো অট্ঠমো।
Samuccayavāro niṭṭhito aṭṭhamo.
অট্ঠপচ্চযৰারা নিট্ঠিতা।
Aṭṭhapaccayavārā niṭṭhitā.
মহাৰিভঙ্গে সোল়সমহাৰারা নিট্ঠিতা।
Mahāvibhaṅge soḷasamahāvārā niṭṭhitā.
ভিক্খুৰিভঙ্গমহাৰারো নিট্ঠিতো।
Bhikkhuvibhaṅgamahāvāro niṭṭhito.
