| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༨. སམུཙྩཡཝཱརོ
8. Samuccayavāro
༢༠༠. མེཐུནཾ དྷམྨཾ པཊིསེཝནཔཙྩཡཱ ཀཏི ཨཱཔཏྟིཡོ ཨཱཔཛྫཏི? མེཐུནཾ དྷམྨཾ པཊིསེཝནཔཙྩཡཱ ཙཏསྶོ ཨཱཔཏྟིཡོ ཨཱཔཛྫཏི། ཨཀྑཱཡིཏེ སརཱིརེ མེཐུནཾ དྷམྨཾ པཊིསེཝཏི, ཨཱཔཏྟི པཱརཱཛིཀསྶ; ཡེབྷུཡྻེན ཁཱཡིཏེ སརཱིརེ མེཐུནཾ དྷམྨཾ པཊིསེཝཏི, ཨཱཔཏྟི ཐུལླཙྩཡསྶ; ཝཊྚཀཏེ མུཁེ ཨཙྪུཔནྟཾ ཨངྒཛཱཏཾ པཝེསེཏི, ཨཱཔཏྟི དུཀྐཊསྶ; ཛཏུམཊྛཀེ པཱཙིཏྟིཡཾ – མེཐུནཾ དྷམྨཾ པཊིསེཝནཔཙྩཡཱ ཨིམཱ ཙཏསྶོ ཨཱཔཏྟིཡོ ཨཱཔཛྫཏི། ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ སམཐཱནཾ ཀཏིཧི སམཐེཧི སམྨནྟི? ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ སིཡཱ ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ ཙཏཱུཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱརཱཛིཀཱཔཏྟིཀྑནྡྷེན, སིཡཱ ཐུལླཙྩཡཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛནྟི – ཀཱཡཏོ ཙ ཙིཏྟཏོ ཙ སམུཊྛནྟི, ན ཝཱཙཏོ། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ སམཐཱནཾ, ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ, པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ…པེ॰…།
200. Methunaṃ dhammaṃ paṭisevanapaccayā kati āpattiyo āpajjati? Methunaṃ dhammaṃ paṭisevanapaccayā catasso āpattiyo āpajjati. Akkhāyite sarīre methunaṃ dhammaṃ paṭisevati, āpatti pārājikassa; yebhuyyena khāyite sarīre methunaṃ dhammaṃ paṭisevati, āpatti thullaccayassa; vaṭṭakate mukhe acchupantaṃ aṅgajātaṃ paveseti, āpatti dukkaṭassa; jatumaṭṭhake pācittiyaṃ – methunaṃ dhammaṃ paṭisevanapaccayā imā catasso āpattiyo āpajjati. Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ. Sattannaṃ āpattikkhandhānaṃ catūhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca cittato ca samuṭṭhanti, na vācato. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ, tīhi samathehi sammanti – siyā sammukhāvinayena ca, paṭiññātakaraṇena ca, siyā sammukhāvinayena ca tiṇavatthārakena ca…pe….
ཨནཱདརིཡཾ པཊིཙྩ ཨུདཀེ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཨནཱདརིཡཾ པཊིཙྩ ཨུདཀེ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརཎཔཙྩཡཱ ཨེཀཾ ཨཱཔཏྟིཾ ཨཱཔཛྫཏི། དུཀྐཊཾ – ཨནཱདརིཡཾ པཊིཙྩ ཨུདཀེ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརཎཔཙྩཡཱ ཨིམཾ ཨེཀཾ ཨཱཔཏྟིཾ ཨཱཔཛྫཏི། སཱ ཨཱཔཏྟི ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛཏི? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛཱཏི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ སམཐཱནཾ ཀཏིཧི སམཐེཧི སམྨཏི? སཱ ཨཱཔཏྟི ཙཏུནྣཾ ཝིཔཏྟཱིནཾ ཨེཀཾ ཝིཔཏྟིཾ བྷཛཏི – ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ ཨེཀེན ཨཱཔཏྟིཀྑནྡྷེན སངྒཧིཏཱ – དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛཱཏི – ཀཱཡཏོ ཙ ཙིཏྟཏོ ཙ སམུཊྛཱཏི, ན ཝཱཙཏོ། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ སམཐཱནཾ ཏཱིཧི སམཐེཧི སམྨཏི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙཱཏི།
Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā kati āpattiyo āpajjati? Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā ekaṃ āpattiṃ āpajjati. Dukkaṭaṃ – anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā imaṃ ekaṃ āpattiṃ āpajjati. Sā āpatti catunnaṃ vipattīnaṃ kati vipattiyo bhajati? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhāti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammati? Sā āpatti catunnaṃ vipattīnaṃ ekaṃ vipattiṃ bhajati – ācāravipattiṃ. Sattannaṃ āpattikkhandhānaṃ ekena āpattikkhandhena saṅgahitā – dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammati – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena cāti.
སམུཙྩཡཝཱརོ ནིཊྛིཏོ ཨཊྛམོ།
Samuccayavāro niṭṭhito aṭṭhamo.
ཨཊྛཔཙྩཡཝཱརཱ ནིཊྛིཏཱ།
Aṭṭhapaccayavārā niṭṭhitā.
མཧཱཝིབྷངྒེ སོལ༹སམཧཱཝཱརཱ ནིཊྛིཏཱ།
Mahāvibhaṅge soḷasamahāvārā niṭṭhitā.
བྷིཀྑུཝིབྷངྒམཧཱཝཱརོ ནིཊྛིཏོ།
Bhikkhuvibhaṅgamahāvāro niṭṭhito.
