| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༨. སམུཙྩཡཝཱརོ
8. Samuccayavāro
༢༥༦. ཀཱཡསཾསགྒཾ སཱདིཡནཔཙྩཡཱ ཀཏི ཨཱཔཏྟིཡོ ཨཱཔཛྫཏི? ཀཱཡསཾསགྒཾ སཱདིཡནཔཙྩཡཱ པཉྩ ཨཱཔཏྟིཡོ ཨཱཔཛྫཏི། ཨཝསྶུཏཱ བྷིཀྑུནཱི ཨཝསྶུཏསྶ པུརིསཔུགྒལསྶ ཨདྷཀྑཀཾ ཨུབྦྷཛཱཎུམཎྜལཾ གཧཎཾ སཱདིཡཏི, ཨཱཔཏྟི པཱརཱཛིཀསྶ; བྷིཀྑུ ཀཱཡེན ཀཱཡཾ ཨཱམསཏི, ཨཱཔཏྟི སངྒྷཱདིསེསསྶ; ཀཱཡེན ཀཱཡཔཊིབདྡྷཾ ཨཱམསཏི, ཨཱཔཏྟི ཐུལླཙྩཡསྶ ; ཀཱཡཔཊིབདྡྷེན ཀཱཡཔཊིབདྡྷཾ ཨཱམསཏི, ཨཱཔཏྟི དུཀྐཊསྶ; ཨངྒུལིཔཏོདཀེ པཱཙིཏྟིཡཾ – ཀཱཡསཾསགྒཾ སཱདིཡནཔཙྩཡཱ ཨིམཱ པཉྩ ཨཱཔཏྟིཡོ ཨཱཔཛྫཏི།
256. Kāyasaṃsaggaṃ sādiyanapaccayā kati āpattiyo āpajjati? Kāyasaṃsaggaṃ sādiyanapaccayā pañca āpattiyo āpajjati. Avassutā bhikkhunī avassutassa purisapuggalassa adhakkhakaṃ ubbhajāṇumaṇḍalaṃ gahaṇaṃ sādiyati, āpatti pārājikassa; bhikkhu kāyena kāyaṃ āmasati, āpatti saṅghādisesassa; kāyena kāyapaṭibaddhaṃ āmasati, āpatti thullaccayassa ; kāyapaṭibaddhena kāyapaṭibaddhaṃ āmasati, āpatti dukkaṭassa; aṅgulipatodake pācittiyaṃ – kāyasaṃsaggaṃ sādiyanapaccayā imā pañca āpattiyo āpajjati.
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ? སཏྟནྣཾ སམཐཱནཾ ཀཏིཧི སམཐེཧི སམྨནྟི? ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ དྭེ ཝིཔཏྟིཡོ བྷཛནྟི – སིཡཱ སཱིལཝིཔཏྟིཾ, སིཡཱ ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ པཉྩཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱརཱཛིཀཱཔཏྟིཀྑནྡྷེན, སིཡཱ སངྒྷཱདིསེསཱཔཏྟིཀྑནྡྷེན, སིཡཱ ཐུལླཙྩཡཱཔཏྟིཀྑནྡྷེན, སིཡཱ པཱཙིཏྟིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛནྟི – ཀཱཡཏོ ཙ ཙིཏྟཏོ ཙ སམུཊྛནྟི, ན ཝཱཙཏོ། ཙཏུནྣཾ ཨདྷིཀརཎཱནཾ ཨཱཔཏྟཱདྷིཀརཎཾ། སཏྟནྣཾ སམཐཱནཾ ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙ…པེ॰…།
Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ pañcahi āpattikkhandhehi saṅgahitā – siyā pārājikāpattikkhandhena, siyā saṅghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca cittato ca samuṭṭhanti, na vācato. Catunnaṃ adhikaraṇānaṃ āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca…pe….
དདྷིཾ ཝིཉྙཱཔེཏྭཱ བྷུཉྫནཔཙྩཡཱ ཀཏི ཨཱཔཏྟིཡོ ཨཱཔཛྫཏི? དདྷིཾ ཝིཉྙཱཔེཏྭཱ བྷུཉྫནཔཙྩཡཱ དྭེ ཨཱཔཏྟིཡོ ཨཱཔཛྫཏི། བྷུཉྫིསྶཱམཱིཏི པཊིགྒཎྷཱཏི, ཨཱཔཏྟི དུཀྐཊསྶ; ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི པཱཊིདེསནཱིཡསྶ – དདྷིཾ ཝིཉྙཱཔེཏྭཱ བྷུཉྫནཔཙྩཡཱ ཨིམཱ དྭེ ཨཱཔཏྟིཡོ ཨཱཔཛྫཏི།
Dadhiṃ viññāpetvā bhuñjanapaccayā kati āpattiyo āpajjati? Dadhiṃ viññāpetvā bhuñjanapaccayā dve āpattiyo āpajjati. Bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa – dadhiṃ viññāpetvā bhuñjanapaccayā imā dve āpattiyo āpajjati.
ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟི? སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ? ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛནྟི? ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ ? སཏྟནྣཾ སམཐཱནཾ ཀཏིཧི སམཐེཧི སམྨནྟི? ཏཱ ཨཱཔཏྟིཡོ ཙཏུནྣཾ ཝིཔཏྟཱིནཾ ཨེཀཾ ཝིཔཏྟིཾ བྷཛནྟི – ཨཱཙཱརཝིཔཏྟིཾ། སཏྟནྣཾ ཨཱཔཏྟིཀྑནྡྷཱནཾ དྭཱིཧི ཨཱཔཏྟིཀྑནྡྷེཧི སངྒཧིཏཱ – སིཡཱ པཱཊིདེསནཱིཡཱཔཏྟིཀྑནྡྷེན, སིཡཱ དུཀྐཊཱཔཏྟིཀྑནྡྷེན། ཚནྣཾ ཨཱཔཏྟིསམུཊྛཱནཱནཾ ཙཏཱུཧི སམུཊྛཱནེཧི སམུཊྛནྟི – སིཡཱ ཀཱཡཏོ སམུཊྛནྟི, ན ཝཱཙཏོ ན ཙིཏྟཏོ; སིཡཱ ཀཱཡཏོ ཙ ཝཱཙཏོ ཙ སམུཊྛནྟི, ན ཙིཏྟཏོ; སིཡཱ ཀཱཡཏོ ཙ ཙིཏྟཏོ ཙ སམུཊྛནྟི ན ཝཱཙཏོ; སིཡཱ ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛནྟི། ཙཏུནྣཾ ཨདྷིཀརཎཱནཾ, ཨཱཔཏྟཱདྷིཀརཎཾ། སཏྟནྣཾ སམཐཱནཾ ཏཱིཧི སམཐེཧི སམྨནྟི – སིཡཱ སམྨུཁཱཝིནཡེན ཙ པཊིཉྙཱཏཀརཎེན ཙ, སིཡཱ སམྨུཁཱཝིནཡེན ཙ ཏིཎཝཏྠཱརཀེན ཙཱཏི།
Tā āpattiyo catunnaṃ vipattīnaṃ kati vipattiyo bhajanti? Sattannaṃ āpattikkhandhānaṃ katihi āpattikkhandhehi saṅgahitā? Channaṃ āpattisamuṭṭhānānaṃ katihi samuṭṭhānehi samuṭṭhanti? Catunnaṃ adhikaraṇānaṃ katamaṃ adhikaraṇaṃ ? Sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ ekaṃ vipattiṃ bhajanti – ācāravipattiṃ. Sattannaṃ āpattikkhandhānaṃ dvīhi āpattikkhandhehi saṅgahitā – siyā pāṭidesanīyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ catūhi samuṭṭhānehi samuṭṭhanti – siyā kāyato samuṭṭhanti, na vācato na cittato; siyā kāyato ca vācato ca samuṭṭhanti, na cittato; siyā kāyato ca cittato ca samuṭṭhanti na vācato; siyā kāyato ca vācato ca cittato ca samuṭṭhanti. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena cāti.
ཨཊྛ པཙྩཡཝཱརཱ ནིཊྛིཏཱ།
Aṭṭha paccayavārā niṭṭhitā.
བྷིཀྑུནཱིཝིབྷངྒེ སོལ༹ས མཧཱཝཱརཱ ནིཊྛིཏཱ།
Bhikkhunīvibhaṅge soḷasa mahāvārā niṭṭhitā.
Footnotes:
