| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
13. அவிஜ்ஜாவக்³கோ³
13. Avijjāvaggo
1. ஸமுத³யத⁴ம்மஸுத்தங்
1. Samudayadhammasuttaṃ
126. ஸாவத்தி²னிதா³னங் . அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா…பே॰… ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘‘அவிஜ்ஜா அவிஜ்ஜா’தி, ப⁴ந்தே, வுச்சதி. கதமா நு கோ², ப⁴ந்தே, அவிஜ்ஜா, கித்தாவதா ச அவிஜ்ஜாக³தோ ஹோதீ’’தி?
126. Sāvatthinidānaṃ . Atha kho aññataro bhikkhu yena bhagavā tenupasaṅkami; upasaṅkamitvā…pe… ekamantaṃ nisinno kho so bhikkhu bhagavantaṃ etadavoca – ‘‘‘avijjā avijjā’ti, bhante, vuccati. Katamā nu kho, bhante, avijjā, kittāvatā ca avijjāgato hotī’’ti?
‘‘இத⁴ , பி⁴க்கு², அஸ்ஸுதவா புது²ஜ்ஜனோ ஸமுத³யத⁴ம்மங் ரூபங் ‘ஸமுத³யத⁴ம்மங் ரூப’ந்தி யதா²பூ⁴தங் நப்பஜானாதி ; வயத⁴ம்மங் ரூபங் ‘வயத⁴ம்மங் ரூப’ந்தி யதா²பூ⁴தங் நப்பஜானாதி; ஸமுத³யவயத⁴ம்மங் ரூபங் ‘ஸமுத³யவயத⁴ம்மங் ரூப’ந்தி யதா²பூ⁴தங் நப்பஜானாதி. ஸமுத³யத⁴ம்மங் வேத³னங் ‘ஸமுத³யத⁴ம்மா வேத³னா’தி யதா²பூ⁴தங் நப்பஜானாதி; வயத⁴ம்மங் வேத³னங் ‘வயத⁴ம்மா வேத³னா’தி யதா²பூ⁴தங் நப்பஜானாதி; ஸமுத³யவயத⁴ம்மங் வேத³னங் ‘ஸமுத³யவயத⁴ம்மா வேத³னா’தி யதா²பூ⁴தங் நப்பஜானாதி. ஸமுத³யத⁴ம்மங் ஸஞ்ஞங்…பே॰… ஸமுத³யத⁴ம்மே ஸங்கா²ரே ‘ஸமுத³யத⁴ம்மா ஸங்கா²ரா’தி யதா²பூ⁴தங் நப்பஜானாதி; வயத⁴ம்மே ஸங்கா²ரே ‘வயத⁴ம்மா ஸங்கா²ரா’தி யதா²பூ⁴தங் நப்பஜானாதி; ஸமுத³யவயத⁴ம்மே ஸங்கா²ரே ‘ஸமுத³யவயத⁴ம்மா ஸங்கா²ரா’தி யதா²பூ⁴தங் நப்பஜானாதி. ஸமுத³யத⁴ம்மங் விஞ்ஞாணங் ‘ஸமுத³யத⁴ம்மங் விஞ்ஞாண’ந்தி யதா²பூ⁴தங் நப்பஜானாதி; வயத⁴ம்மங் விஞ்ஞாணங் ‘வயத⁴ம்மங் விஞ்ஞாண’ந்தி யதா²பூ⁴தங் நப்பஜானாதி; ஸமுத³யவயத⁴ம்மங் விஞ்ஞாணங் ‘ஸமுத³யவயத⁴ம்மங் விஞ்ஞாண’ந்தி யதா²பூ⁴தங் நப்பஜானாதி. அயங் வுச்சதி, பி⁴க்கு², அவிஜ்ஜா; எத்தாவதா ச அவிஜ்ஜாக³தோ ஹோதீ’’தி.
‘‘Idha , bhikkhu, assutavā puthujjano samudayadhammaṃ rūpaṃ ‘samudayadhammaṃ rūpa’nti yathābhūtaṃ nappajānāti ; vayadhammaṃ rūpaṃ ‘vayadhammaṃ rūpa’nti yathābhūtaṃ nappajānāti; samudayavayadhammaṃ rūpaṃ ‘samudayavayadhammaṃ rūpa’nti yathābhūtaṃ nappajānāti. Samudayadhammaṃ vedanaṃ ‘samudayadhammā vedanā’ti yathābhūtaṃ nappajānāti; vayadhammaṃ vedanaṃ ‘vayadhammā vedanā’ti yathābhūtaṃ nappajānāti; samudayavayadhammaṃ vedanaṃ ‘samudayavayadhammā vedanā’ti yathābhūtaṃ nappajānāti. Samudayadhammaṃ saññaṃ…pe… samudayadhamme saṅkhāre ‘samudayadhammā saṅkhārā’ti yathābhūtaṃ nappajānāti; vayadhamme saṅkhāre ‘vayadhammā saṅkhārā’ti yathābhūtaṃ nappajānāti; samudayavayadhamme saṅkhāre ‘samudayavayadhammā saṅkhārā’ti yathābhūtaṃ nappajānāti. Samudayadhammaṃ viññāṇaṃ ‘samudayadhammaṃ viññāṇa’nti yathābhūtaṃ nappajānāti; vayadhammaṃ viññāṇaṃ ‘vayadhammaṃ viññāṇa’nti yathābhūtaṃ nappajānāti; samudayavayadhammaṃ viññāṇaṃ ‘samudayavayadhammaṃ viññāṇa’nti yathābhūtaṃ nappajānāti. Ayaṃ vuccati, bhikkhu, avijjā; ettāvatā ca avijjāgato hotī’’ti.
ஏவங் வுத்தே, ஸோ பி⁴க்கு² ப⁴க³வந்தங் ஏதத³வோச – ‘‘‘விஜ்ஜா விஜ்ஜா’தி, ப⁴ந்தே, வுச்சதி. கதமா நு கோ², ப⁴ந்தே, விஜ்ஜா, கித்தாவதா ச விஜ்ஜாக³தோ ஹோதீ’’தி?
Evaṃ vutte, so bhikkhu bhagavantaṃ etadavoca – ‘‘‘vijjā vijjā’ti, bhante, vuccati. Katamā nu kho, bhante, vijjā, kittāvatā ca vijjāgato hotī’’ti?
‘‘இத⁴, பி⁴க்கு², ஸுதவா அரியஸாவகோ ஸமுத³யத⁴ம்மங் ரூபங் ‘ஸமுத³யத⁴ம்மங் ரூப’ந்தி யதா²பூ⁴தங் பஜானாதி; வயத⁴ம்மங் ரூபங் ‘வயத⁴ம்மங் ரூப’ந்தி யதா²பூ⁴தங் பஜானாதி ; ஸமுத³யவயத⁴ம்மங் ரூபங் ‘ஸமுத³யவயத⁴ம்மங் ரூப’ந்தி யதா²பூ⁴தங் பஜானாதி. ஸமுத³யத⁴ம்மங் வேத³னங் ‘ஸமுத³யத⁴ம்மா வேத³னா’தி யதா²பூ⁴தங் பஜானாதி; வயத⁴ம்மங் வேத³னங் ‘வயத⁴ம்மா வேத³னா’தி யதா²பூ⁴தங் பஜானாதி; ஸமுத³யவயத⁴ம்மங் வேத³னங் ‘ஸமுத³யவயத⁴ம்மா வேத³னா’தி யதா²பூ⁴தங் பஜானாதி. ஸமுத³யத⁴ம்மங் ஸஞ்ஞங்… ஸமுத³யத⁴ம்மே ஸங்கா²ரே ‘ஸமுத³யத⁴ம்மா ஸங்கா²ரா’தி யதா²பூ⁴தங் பஜானாதி; வயத⁴ம்மே ஸங்கா²ரே ‘வயத⁴ம்மா ஸங்கா²ரா’தி யதா²பூ⁴தங் பஜானாதி; ஸமுத³யவயத⁴ம்மே ஸங்கா²ரே ‘ஸமுத³யவயத⁴ம்மா ஸங்கா²ரா’தி யதா²பூ⁴தங் பஜானாதி. ஸமுத³யத⁴ம்மங் விஞ்ஞாணங் ‘ஸமுத³யத⁴ம்மங் விஞ்ஞாண’ந்தி யதா²பூ⁴தங் பஜானாதி; வயத⁴ம்மங் விஞ்ஞாணங் ‘வயத⁴ம்மங் விஞ்ஞாண’ந்தி யதா²பூ⁴தங் பஜானாதி; ஸமுத³யவயத⁴ம்மங் விஞ்ஞாணங் ‘ஸமுத³யவயத⁴ம்மங் விஞ்ஞாண’ந்தி யதா²பூ⁴தங் பஜானாதி. அயங் வுச்சதி, பி⁴க்கு², விஜ்ஜா; எத்தாவதா ச விஜ்ஜாக³தோ ஹோதீ’’தி. பட²மங்.
‘‘Idha, bhikkhu, sutavā ariyasāvako samudayadhammaṃ rūpaṃ ‘samudayadhammaṃ rūpa’nti yathābhūtaṃ pajānāti; vayadhammaṃ rūpaṃ ‘vayadhammaṃ rūpa’nti yathābhūtaṃ pajānāti ; samudayavayadhammaṃ rūpaṃ ‘samudayavayadhammaṃ rūpa’nti yathābhūtaṃ pajānāti. Samudayadhammaṃ vedanaṃ ‘samudayadhammā vedanā’ti yathābhūtaṃ pajānāti; vayadhammaṃ vedanaṃ ‘vayadhammā vedanā’ti yathābhūtaṃ pajānāti; samudayavayadhammaṃ vedanaṃ ‘samudayavayadhammā vedanā’ti yathābhūtaṃ pajānāti. Samudayadhammaṃ saññaṃ… samudayadhamme saṅkhāre ‘samudayadhammā saṅkhārā’ti yathābhūtaṃ pajānāti; vayadhamme saṅkhāre ‘vayadhammā saṅkhārā’ti yathābhūtaṃ pajānāti; samudayavayadhamme saṅkhāre ‘samudayavayadhammā saṅkhārā’ti yathābhūtaṃ pajānāti. Samudayadhammaṃ viññāṇaṃ ‘samudayadhammaṃ viññāṇa’nti yathābhūtaṃ pajānāti; vayadhammaṃ viññāṇaṃ ‘vayadhammaṃ viññāṇa’nti yathābhūtaṃ pajānāti; samudayavayadhammaṃ viññāṇaṃ ‘samudayavayadhammaṃ viññāṇa’nti yathābhūtaṃ pajānāti. Ayaṃ vuccati, bhikkhu, vijjā; ettāvatā ca vijjāgato hotī’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-10. ஸமுத³யத⁴ம்மஸுத்தாதி³வண்ணனா • 1-10. Samudayadhammasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-10. ஸமுத³யத⁴ம்மஸுத்தாதி³வண்ணனா • 1-10. Samudayadhammasuttādivaṇṇanā
