| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༣. ཨཝིཛྫཱཝགྒོ
13. Avijjāvaggo
༡. སམུདཡདྷམྨསུཏྟཾ
1. Samudayadhammasuttaṃ
༡༢༦. སཱཝཏྠིནིདཱནཾ ། ཨཐ ཁོ ཨཉྙཏརོ བྷིཀྑུ ཡེན བྷགཝཱ ཏེནུཔསངྐམི; ཨུཔསངྐམིཏྭཱ…པེ॰… ཨེཀམནྟཾ ནིསིནྣོ ཁོ སོ བྷིཀྑུ བྷགཝནྟཾ ཨེཏདཝོཙ – ‘‘‘ཨཝིཛྫཱ ཨཝིཛྫཱ’ཏི, བྷནྟེ, ཝུཙྩཏི། ཀཏམཱ ནུ ཁོ, བྷནྟེ, ཨཝིཛྫཱ, ཀིཏྟཱཝཏཱ ཙ ཨཝིཛྫཱགཏོ ཧོཏཱི’’ཏི?
126. Sāvatthinidānaṃ . Atha kho aññataro bhikkhu yena bhagavā tenupasaṅkami; upasaṅkamitvā…pe… ekamantaṃ nisinno kho so bhikkhu bhagavantaṃ etadavoca – ‘‘‘avijjā avijjā’ti, bhante, vuccati. Katamā nu kho, bhante, avijjā, kittāvatā ca avijjāgato hotī’’ti?
‘‘ཨིདྷ , བྷིཀྑུ, ཨསྶུཏཝཱ པུཐུཛྫནོ སམུདཡདྷམྨཾ རཱུཔཾ ‘སམུདཡདྷམྨཾ རཱུཔ’ནྟི ཡཐཱབྷཱུཏཾ ནཔྤཛཱནཱཏི ; ཝཡདྷམྨཾ རཱུཔཾ ‘ཝཡདྷམྨཾ རཱུཔ’ནྟི ཡཐཱབྷཱུཏཾ ནཔྤཛཱནཱཏི; སམུདཡཝཡདྷམྨཾ རཱུཔཾ ‘སམུདཡཝཡདྷམྨཾ རཱུཔ’ནྟི ཡཐཱབྷཱུཏཾ ནཔྤཛཱནཱཏི། སམུདཡདྷམྨཾ ཝེདནཾ ‘སམུདཡདྷམྨཱ ཝེདནཱ’ཏི ཡཐཱབྷཱུཏཾ ནཔྤཛཱནཱཏི; ཝཡདྷམྨཾ ཝེདནཾ ‘ཝཡདྷམྨཱ ཝེདནཱ’ཏི ཡཐཱབྷཱུཏཾ ནཔྤཛཱནཱཏི; སམུདཡཝཡདྷམྨཾ ཝེདནཾ ‘སམུདཡཝཡདྷམྨཱ ཝེདནཱ’ཏི ཡཐཱབྷཱུཏཾ ནཔྤཛཱནཱཏི། སམུདཡདྷམྨཾ སཉྙཾ…པེ॰… སམུདཡདྷམྨེ སངྑཱརེ ‘སམུདཡདྷམྨཱ སངྑཱརཱ’ཏི ཡཐཱབྷཱུཏཾ ནཔྤཛཱནཱཏི; ཝཡདྷམྨེ སངྑཱརེ ‘ཝཡདྷམྨཱ སངྑཱརཱ’ཏི ཡཐཱབྷཱུཏཾ ནཔྤཛཱནཱཏི; སམུདཡཝཡདྷམྨེ སངྑཱརེ ‘སམུདཡཝཡདྷམྨཱ སངྑཱརཱ’ཏི ཡཐཱབྷཱུཏཾ ནཔྤཛཱནཱཏི། སམུདཡདྷམྨཾ ཝིཉྙཱཎཾ ‘སམུདཡདྷམྨཾ ཝིཉྙཱཎ’ནྟི ཡཐཱབྷཱུཏཾ ནཔྤཛཱནཱཏི; ཝཡདྷམྨཾ ཝིཉྙཱཎཾ ‘ཝཡདྷམྨཾ ཝིཉྙཱཎ’ནྟི ཡཐཱབྷཱུཏཾ ནཔྤཛཱནཱཏི; སམུདཡཝཡདྷམྨཾ ཝིཉྙཱཎཾ ‘སམུདཡཝཡདྷམྨཾ ཝིཉྙཱཎ’ནྟི ཡཐཱབྷཱུཏཾ ནཔྤཛཱནཱཏི། ཨཡཾ ཝུཙྩཏི, བྷིཀྑུ, ཨཝིཛྫཱ; ཨེཏྟཱཝཏཱ ཙ ཨཝིཛྫཱགཏོ ཧོཏཱི’’ཏི།
‘‘Idha , bhikkhu, assutavā puthujjano samudayadhammaṃ rūpaṃ ‘samudayadhammaṃ rūpa’nti yathābhūtaṃ nappajānāti ; vayadhammaṃ rūpaṃ ‘vayadhammaṃ rūpa’nti yathābhūtaṃ nappajānāti; samudayavayadhammaṃ rūpaṃ ‘samudayavayadhammaṃ rūpa’nti yathābhūtaṃ nappajānāti. Samudayadhammaṃ vedanaṃ ‘samudayadhammā vedanā’ti yathābhūtaṃ nappajānāti; vayadhammaṃ vedanaṃ ‘vayadhammā vedanā’ti yathābhūtaṃ nappajānāti; samudayavayadhammaṃ vedanaṃ ‘samudayavayadhammā vedanā’ti yathābhūtaṃ nappajānāti. Samudayadhammaṃ saññaṃ…pe… samudayadhamme saṅkhāre ‘samudayadhammā saṅkhārā’ti yathābhūtaṃ nappajānāti; vayadhamme saṅkhāre ‘vayadhammā saṅkhārā’ti yathābhūtaṃ nappajānāti; samudayavayadhamme saṅkhāre ‘samudayavayadhammā saṅkhārā’ti yathābhūtaṃ nappajānāti. Samudayadhammaṃ viññāṇaṃ ‘samudayadhammaṃ viññāṇa’nti yathābhūtaṃ nappajānāti; vayadhammaṃ viññāṇaṃ ‘vayadhammaṃ viññāṇa’nti yathābhūtaṃ nappajānāti; samudayavayadhammaṃ viññāṇaṃ ‘samudayavayadhammaṃ viññāṇa’nti yathābhūtaṃ nappajānāti. Ayaṃ vuccati, bhikkhu, avijjā; ettāvatā ca avijjāgato hotī’’ti.
ཨེཝཾ ཝུཏྟེ, སོ བྷིཀྑུ བྷགཝནྟཾ ཨེཏདཝོཙ – ‘‘‘ཝིཛྫཱ ཝིཛྫཱ’ཏི, བྷནྟེ, ཝུཙྩཏི། ཀཏམཱ ནུ ཁོ, བྷནྟེ, ཝིཛྫཱ, ཀིཏྟཱཝཏཱ ཙ ཝིཛྫཱགཏོ ཧོཏཱི’’ཏི?
Evaṃ vutte, so bhikkhu bhagavantaṃ etadavoca – ‘‘‘vijjā vijjā’ti, bhante, vuccati. Katamā nu kho, bhante, vijjā, kittāvatā ca vijjāgato hotī’’ti?
‘‘ཨིདྷ, བྷིཀྑུ, སུཏཝཱ ཨརིཡསཱཝཀོ སམུདཡདྷམྨཾ རཱུཔཾ ‘སམུདཡདྷམྨཾ རཱུཔ’ནྟི ཡཐཱབྷཱུཏཾ པཛཱནཱཏི; ཝཡདྷམྨཾ རཱུཔཾ ‘ཝཡདྷམྨཾ རཱུཔ’ནྟི ཡཐཱབྷཱུཏཾ པཛཱནཱཏི ; སམུདཡཝཡདྷམྨཾ རཱུཔཾ ‘སམུདཡཝཡདྷམྨཾ རཱུཔ’ནྟི ཡཐཱབྷཱུཏཾ པཛཱནཱཏི། སམུདཡདྷམྨཾ ཝེདནཾ ‘སམུདཡདྷམྨཱ ཝེདནཱ’ཏི ཡཐཱབྷཱུཏཾ པཛཱནཱཏི; ཝཡདྷམྨཾ ཝེདནཾ ‘ཝཡདྷམྨཱ ཝེདནཱ’ཏི ཡཐཱབྷཱུཏཾ པཛཱནཱཏི; སམུདཡཝཡདྷམྨཾ ཝེདནཾ ‘སམུདཡཝཡདྷམྨཱ ཝེདནཱ’ཏི ཡཐཱབྷཱུཏཾ པཛཱནཱཏི། སམུདཡདྷམྨཾ སཉྙཾ… སམུདཡདྷམྨེ སངྑཱརེ ‘སམུདཡདྷམྨཱ སངྑཱརཱ’ཏི ཡཐཱབྷཱུཏཾ པཛཱནཱཏི; ཝཡདྷམྨེ སངྑཱརེ ‘ཝཡདྷམྨཱ སངྑཱརཱ’ཏི ཡཐཱབྷཱུཏཾ པཛཱནཱཏི; སམུདཡཝཡདྷམྨེ སངྑཱརེ ‘སམུདཡཝཡདྷམྨཱ སངྑཱརཱ’ཏི ཡཐཱབྷཱུཏཾ པཛཱནཱཏི། སམུདཡདྷམྨཾ ཝིཉྙཱཎཾ ‘སམུདཡདྷམྨཾ ཝིཉྙཱཎ’ནྟི ཡཐཱབྷཱུཏཾ པཛཱནཱཏི; ཝཡདྷམྨཾ ཝིཉྙཱཎཾ ‘ཝཡདྷམྨཾ ཝིཉྙཱཎ’ནྟི ཡཐཱབྷཱུཏཾ པཛཱནཱཏི; སམུདཡཝཡདྷམྨཾ ཝིཉྙཱཎཾ ‘སམུདཡཝཡདྷམྨཾ ཝིཉྙཱཎ’ནྟི ཡཐཱབྷཱུཏཾ པཛཱནཱཏི། ཨཡཾ ཝུཙྩཏི, བྷིཀྑུ, ཝིཛྫཱ; ཨེཏྟཱཝཏཱ ཙ ཝིཛྫཱགཏོ ཧོཏཱི’’ཏི། པཋམཾ།
‘‘Idha, bhikkhu, sutavā ariyasāvako samudayadhammaṃ rūpaṃ ‘samudayadhammaṃ rūpa’nti yathābhūtaṃ pajānāti; vayadhammaṃ rūpaṃ ‘vayadhammaṃ rūpa’nti yathābhūtaṃ pajānāti ; samudayavayadhammaṃ rūpaṃ ‘samudayavayadhammaṃ rūpa’nti yathābhūtaṃ pajānāti. Samudayadhammaṃ vedanaṃ ‘samudayadhammā vedanā’ti yathābhūtaṃ pajānāti; vayadhammaṃ vedanaṃ ‘vayadhammā vedanā’ti yathābhūtaṃ pajānāti; samudayavayadhammaṃ vedanaṃ ‘samudayavayadhammā vedanā’ti yathābhūtaṃ pajānāti. Samudayadhammaṃ saññaṃ… samudayadhamme saṅkhāre ‘samudayadhammā saṅkhārā’ti yathābhūtaṃ pajānāti; vayadhamme saṅkhāre ‘vayadhammā saṅkhārā’ti yathābhūtaṃ pajānāti; samudayavayadhamme saṅkhāre ‘samudayavayadhammā saṅkhārā’ti yathābhūtaṃ pajānāti. Samudayadhammaṃ viññāṇaṃ ‘samudayadhammaṃ viññāṇa’nti yathābhūtaṃ pajānāti; vayadhammaṃ viññāṇaṃ ‘vayadhammaṃ viññāṇa’nti yathābhūtaṃ pajānāti; samudayavayadhammaṃ viññāṇaṃ ‘samudayavayadhammaṃ viññāṇa’nti yathābhūtaṃ pajānāti. Ayaṃ vuccati, bhikkhu, vijjā; ettāvatā ca vijjāgato hotī’’ti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡-༡༠. སམུདཡདྷམྨསུཏྟཱདིཝཎྞནཱ • 1-10. Samudayadhammasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡-༡༠. སམུདཡདྷམྨསུཏྟཱདིཝཎྞནཱ • 1-10. Samudayadhammasuttādivaṇṇanā
