| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
ஸமுத³யஸச்சனித்³தே³ஸவண்ணனா
Samudayasaccaniddesavaṇṇanā
34. ஸமுத³யஸச்சனித்³தே³ஸே யாயங் தண்ஹாதி யா அயங் தண்ஹா. போனோப⁴விகாதி புனப்³ப⁴வகரணங் புனோப⁴வோ, புனோப⁴வோ ஸீலமஸ்ஸாதி போனோப⁴விகா. அபிச புனப்³ப⁴வங் தே³தி, புனப்³ப⁴வாய ஸங்வத்ததி, புனப்புனங் ப⁴வே நிப்³ப³த்தேதீதி போனோப⁴விகா. ஸா பனேஸா புனப்³ப⁴வஸ்ஸ தா³யிகாபி அத்தி² அதா³யிகாபி, புனப்³ப⁴வாய ஸங்வத்தனிகாபி அத்தி² அஸங்வத்தனிகாபி, தி³ன்னாய படிஸந்தி⁴யா உபதி⁴வேபக்கமத்தாபி. ஸா திப்பகாராபி போனோப⁴விகாதி நாமங் லப⁴தி. போனப்³ப⁴விகாதிபி பாடோ², ஸோயேவத்தோ². அபி⁴னந்த³னஸங்கா²தேன நந்தி³ராகே³ன ஸஹ க³தாதி நந்தி³ராக³ஸஹக³தா. நந்தி³ராகே³ன ஸத்³தி⁴ங் அத்த²தோ ஏகத்தமேவ க³தாதி வுத்தங் ஹோதி. தத்ர தத்ராபி⁴னந்தி³னீதி யத்ர யத்ர அத்தபா⁴வோ நிப்³ப³த்ததி, தத்ர தத்ர அபி⁴னந்தி³னீ. ரூபாதீ³ஸு வா ஆரம்மணேஸு தத்ர தத்ராபி⁴னந்தி³னீ, ரூபாபி⁴னந்தி³னீ ஸத்³த³க³ந்த⁴ரஸபொ²ட்ட²ப்³ப³த⁴ம்மாபி⁴னந்தி³னீதி அத்தோ². தத்ர தத்ராபி⁴னந்தீ³திபி பாடோ², தத்ர தத்ர அபி⁴னந்த³யதீதி அத்தோ². ஸெய்யதி²த³ந்தி நிபாதோ, தஸ்ஸ ஸா கதமா இதி சேதி அத்தோ². காமதண்ஹாதி காமே தண்ஹா, பஞ்சகாமகு³ணிகராக³ஸ்ஸேதங் அதி⁴வசனங். ப⁴வதண்ஹாதி ப⁴வே தண்ஹா. ப⁴வபத்த²னாவஸேன உப்பன்னஸ்ஸ ஸஸ்ஸததி³ட்டி²ஸஹக³தஸ்ஸ ராக³ஸ்ஸ ரூபாரூபப⁴வராக³ஸ்ஸ ச ஜா²னநிகந்தியா ச ஏதங் அதி⁴வசனங். விப⁴வதண்ஹாதி விப⁴வே தண்ஹா. உச்சே²த³தி³ட்டி²ஸஹக³தராக³ஸ்ஸேதங் அதி⁴வசனங்.
34. Samudayasaccaniddese yāyaṃ taṇhāti yā ayaṃ taṇhā. Ponobhavikāti punabbhavakaraṇaṃ punobhavo, punobhavo sīlamassāti ponobhavikā. Apica punabbhavaṃ deti, punabbhavāya saṃvattati, punappunaṃ bhave nibbattetīti ponobhavikā. Sā panesā punabbhavassa dāyikāpi atthi adāyikāpi, punabbhavāya saṃvattanikāpi atthi asaṃvattanikāpi, dinnāya paṭisandhiyā upadhivepakkamattāpi. Sā tippakārāpi ponobhavikāti nāmaṃ labhati. Ponabbhavikātipi pāṭho, soyevattho. Abhinandanasaṅkhātena nandirāgena saha gatāti nandirāgasahagatā. Nandirāgena saddhiṃ atthato ekattameva gatāti vuttaṃ hoti. Tatra tatrābhinandinīti yatra yatra attabhāvo nibbattati, tatra tatra abhinandinī. Rūpādīsu vā ārammaṇesu tatra tatrābhinandinī, rūpābhinandinī saddagandharasaphoṭṭhabbadhammābhinandinīti attho. Tatra tatrābhinandītipi pāṭho, tatra tatra abhinandayatīti attho. Seyyathidanti nipāto, tassa sā katamā iti ceti attho. Kāmataṇhāti kāme taṇhā, pañcakāmaguṇikarāgassetaṃ adhivacanaṃ. Bhavataṇhāti bhave taṇhā. Bhavapatthanāvasena uppannassa sassatadiṭṭhisahagatassa rāgassa rūpārūpabhavarāgassa ca jhānanikantiyā ca etaṃ adhivacanaṃ. Vibhavataṇhāti vibhave taṇhā. Ucchedadiṭṭhisahagatarāgassetaṃ adhivacanaṃ.
இதா³னி தஸ்ஸா தண்ஹாய வத்து²ங் வித்தா²ரதோ த³ஸ்ஸேதுங் ஸா கோ² பனேஸாதிஆதி³மாஹ. தத்த² உப்பஜ்ஜதீதி ஜாயதி. நிவிஸதீதி புனப்புனங் பவத்திவஸேன பதிட்டா²தி. உப்பஜ்ஜமானா கத்த² உப்பஜ்ஜதி, நிவிஸமானா கத்த² நிவிஸதீதி ஸம்ப³ந்தோ⁴. யங் லோகே பியரூபங் ஸாதரூபந்தி யங் லோகஸ்மிங் பியஸபா⁴வஞ்சேவ மது⁴ரஸபா⁴வஞ்ச. சக்கு² லோகேதிஆதீ³ஸு லோகஸ்மிஞ்ஹி சக்கு²ஆதீ³ஸு மமத்தேன அபி⁴னிவிட்டா² ஸத்தா ஸம்பத்தியங் பதிட்டி²தா அத்தனோ சக்கு²ங் ஆதா³ஸாதீ³ஸு நிமித்தக்³க³ஹணானுஸாரேன விப்பஸன்னங் பஞ்சபஸாத³ங் ஸுவண்ணவிமானே உக்³கா⁴டிதமணிஸீஹபஞ்ஜரங் விய மஞ்ஞந்தி, ஸோதங் ரஜதபனாளிகங் விய பாமங்க³ஸுத்தகங் விய ச மஞ்ஞந்தி, துங்க³னாஸாதி லத்³த⁴வோஹாரங் கா⁴னங் வட்டெத்வா ட²பிதஹரிதாலவட்டிங் விய மஞ்ஞந்தி, ஜிவ்ஹங் ரத்தகம்ப³லபடலங் விய முது³ஸினித்³த⁴மது⁴ரரஸத³ங் மஞ்ஞந்தி, காயங் ஸாலலட்டி²ங் விய ஸுவண்ணதோரணங் விய ச மஞ்ஞந்தி, மனங் அஞ்ஞேஸங் மனேன அஸதி³ஸங் உளாரங் மஞ்ஞந்தி, ரூபங் ஸுவண்ணகணிகாரபுப்பா²தி³வண்ணங் விய, ஸத்³த³ங் மத்தகரவீககோகிலமந்த³த⁴மிதமணிவங்ஸனிக்³கோ⁴ஸங் விய, அத்தனா படிலத்³தா⁴னி சதுஸமுட்டா²னிகக³ந்தா⁴ரம்மணாதீ³னி ‘‘கஸ்ஸஞ்ஞஸ்ஸ ஏவரூபானி அத்தீ²’’தி மஞ்ஞந்தி, தேஸங் ஏவங் மஞ்ஞமானானங் தானி சக்கா²தீ³னி பியரூபானி சேவ ஸாதரூபானி ச ஹொந்தி. அத² நேஸங் தத்த² அனுப்பன்னா சேவ தண்ஹா உப்பஜ்ஜதி , உப்பன்னா ச புனப்புனங் பவத்திவஸேன நிவிஸதி. தஸ்மா தே²ரோ ‘‘சக்கு² லோகே பியரூபங் ஸாதரூபங், எத்தே²ஸா தண்ஹா உப்பஜ்ஜமானா உப்பஜ்ஜதீ’’திஆதி³மாஹ. தத்த² உப்பஜ்ஜமானாதி யதா³ உப்பஜ்ஜதி, ததா³ எத்த² உப்பஜ்ஜதீதி அத்தோ².
Idāni tassā taṇhāya vatthuṃ vitthārato dassetuṃ sā kho panesātiādimāha. Tattha uppajjatīti jāyati. Nivisatīti punappunaṃ pavattivasena patiṭṭhāti. Uppajjamānā kattha uppajjati, nivisamānā kattha nivisatīti sambandho. Yaṃ loke piyarūpaṃ sātarūpanti yaṃ lokasmiṃ piyasabhāvañceva madhurasabhāvañca. Cakkhu loketiādīsu lokasmiñhi cakkhuādīsu mamattena abhiniviṭṭhā sattā sampattiyaṃ patiṭṭhitā attano cakkhuṃ ādāsādīsu nimittaggahaṇānusārena vippasannaṃ pañcapasādaṃ suvaṇṇavimāne ugghāṭitamaṇisīhapañjaraṃ viya maññanti, sotaṃ rajatapanāḷikaṃ viya pāmaṅgasuttakaṃ viya ca maññanti, tuṅganāsāti laddhavohāraṃ ghānaṃ vaṭṭetvā ṭhapitaharitālavaṭṭiṃ viya maññanti, jivhaṃ rattakambalapaṭalaṃ viya mudusiniddhamadhurarasadaṃ maññanti, kāyaṃ sālalaṭṭhiṃ viya suvaṇṇatoraṇaṃ viya ca maññanti, manaṃ aññesaṃ manena asadisaṃ uḷāraṃ maññanti, rūpaṃ suvaṇṇakaṇikārapupphādivaṇṇaṃ viya, saddaṃ mattakaravīkakokilamandadhamitamaṇivaṃsanigghosaṃ viya, attanā paṭiladdhāni catusamuṭṭhānikagandhārammaṇādīni ‘‘kassaññassa evarūpāni atthī’’ti maññanti, tesaṃ evaṃ maññamānānaṃ tāni cakkhādīni piyarūpāni ceva sātarūpāni ca honti. Atha nesaṃ tattha anuppannā ceva taṇhā uppajjati , uppannā ca punappunaṃ pavattivasena nivisati. Tasmā thero ‘‘cakkhu loke piyarūpaṃ sātarūpaṃ, etthesā taṇhā uppajjamānā uppajjatī’’tiādimāha. Tattha uppajjamānāti yadā uppajjati, tadā ettha uppajjatīti attho.
ஸமுத³யஸச்சனித்³தே³ஸவண்ணனா நிட்டி²தா.
Samudayasaccaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 1. ஸுதமயஞாணனித்³தே³ஸோ • 1. Sutamayañāṇaniddeso
