| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ஸமுத்³த³கஸுத்தவண்ணனா
10. Samuddakasuttavaṇṇanā
256. த³ஸமே ஸமுத்³த³தீரே பண்ணகுடீஸூதி சக்கவாளமஹாஸமுத்³த³பிட்டி²யங் ரஜதபட்டவண்ணே வாலுகபுளினே வுத்தப்பகாராஸு பண்ணஸாலாஸு வஸந்தி. ஸியாபி நோதி ஸியாபி அம்ஹாகங். அப⁴யத³க்கி²ணங் யாசெய்யாமாதி அப⁴யதா³னங் யாசெய்யாம. யேபு⁴ய்யேன கிர தே³வாஸுரஸங்கா³மோ மஹாஸமுத்³த³பிட்டே² ஹோதி. அஸுரானங் ந ஸப்³ப³காலங் ஜயோ ஹோதி, ப³ஹுவாரே பராஜயோவ ஹோதி. தே தே³வேஹி பராஜிதா பலாயந்தா இஸீனங் அஸ்ஸமபதே³ன க³ச்ச²ந்தா ‘‘ஸக்கோ இமேஹி ஸத்³தி⁴ங் மந்தெத்வா அம்ஹே நாஸேதி, க³ண்ஹத² புத்தஹதாய புத்தே’’தி குபிதா அஸ்ஸமபதே³ பானீயக⁴டசங்கமனஸாலாதீ³னி வித்³த⁴ங்ஸெந்தி. இஸயோ அரஞ்ஞதோ ப²லாப²லங் ஆதா³ய ஆக³தா நங் தி³ஸ்வா புன து³க்கே²ன படிபாகதிகங் கரொந்தி. தேபி புனப்புனங் ததே²வ வினாஸெந்தி. தஸ்மா ‘‘இதா³னி தேஸங் ஸங்கா³மோ பச்சுபட்டி²தோ’’தி ஸுத்வா ஏவங் சிந்தயிங்ஸு.
256. Dasame samuddatīre paṇṇakuṭīsūti cakkavāḷamahāsamuddapiṭṭhiyaṃ rajatapaṭṭavaṇṇe vālukapuḷine vuttappakārāsu paṇṇasālāsu vasanti. Siyāpi noti siyāpi amhākaṃ. Abhayadakkhiṇaṃ yāceyyāmāti abhayadānaṃ yāceyyāma. Yebhuyyena kira devāsurasaṅgāmo mahāsamuddapiṭṭhe hoti. Asurānaṃ na sabbakālaṃ jayo hoti, bahuvāre parājayova hoti. Te devehi parājitā palāyantā isīnaṃ assamapadena gacchantā ‘‘sakko imehi saddhiṃ mantetvā amhe nāseti, gaṇhatha puttahatāya putte’’ti kupitā assamapade pānīyaghaṭacaṅkamanasālādīni viddhaṃsenti. Isayo araññato phalāphalaṃ ādāya āgatā naṃ disvā puna dukkhena paṭipākatikaṃ karonti. Tepi punappunaṃ tatheva vināsenti. Tasmā ‘‘idāni tesaṃ saṅgāmo paccupaṭṭhito’’ti sutvā evaṃ cintayiṃsu.
காமங்கரோதி இச்சி²தகரோ. ப⁴யஸ்ஸ அப⁴யஸ்ஸ வாதி ப⁴யங் வா அப⁴யங் வா. இத³ங் வுத்தங் ஹோதி – ஸசே த்வங் அப⁴யங் தா³துகாமோ, அப⁴யங் தா³துங் பஹோஸி. ஸசே ப⁴யங் தா³துகாமோ. ப⁴யங் தா³துங் பஹோஸி. அம்ஹாகங் பன அப⁴யதா³னங் தே³ஹீதி. து³ட்டா²னந்தி விருத்³தா⁴னங். பவுத்தந்தி கெ²த்தே பதிட்டா²பிதங்.
Kāmaṃkaroti icchitakaro. Bhayassa abhayassa vāti bhayaṃ vā abhayaṃ vā. Idaṃ vuttaṃ hoti – sace tvaṃ abhayaṃ dātukāmo, abhayaṃ dātuṃ pahosi. Sace bhayaṃ dātukāmo. Bhayaṃ dātuṃ pahosi. Amhākaṃ pana abhayadānaṃ dehīti. Duṭṭhānanti viruddhānaṃ. Pavuttanti khette patiṭṭhāpitaṃ.
திக்க²த்துங் உப்³பி³ஜ்ஜீதி ஸாயமாஸப⁴த்தங் பு⁴ஞ்ஜித்வா ஸயனங் அபி⁴ருய்ஹ நிபன்னோ நித்³தா³ய ஓக்கந்தமத்தாய ஸமந்தா ட²த்வா ஸத்திஸதேன பஹடோ விய விரவந்தோ உட்ட²ஹதி, த³ஸயோஜனஸஹஸ்ஸங் அஸுரப⁴வனங் ‘‘கிமித³’’ந்தி ஸங்கோ²ப⁴ங் ஆபஜ்ஜதி. அத² நங் ஆக³ந்த்வா ‘‘கிமித³’’ந்தி புச்ச²ந்தி. ஸோ ‘‘ந கிஞ்சீ’’தி வத³தி. து³தியயாமாதீ³ஸுபி ஏஸேவ நயோ. இதி அஸுரானங் ‘‘மா பா⁴யி, மஹாராஜா’’தி தங் அஸ்ஸாஸெந்தானங்யேவ அருணங் உக்³க³ச்ச²தி. ஏவமஸ்ஸ ததோ பட்டா²ய கே³லஞ்ஞஜாதங் சித்தங் வேபதி. தேனேவ சஸ்ஸ ‘‘வேபசித்தீ’’தி அபரங் நாமங் உத³பாதீ³தி. த³ஸமங்.
Tikkhattuṃ ubbijjīti sāyamāsabhattaṃ bhuñjitvā sayanaṃ abhiruyha nipanno niddāya okkantamattāya samantā ṭhatvā sattisatena pahaṭo viya viravanto uṭṭhahati, dasayojanasahassaṃ asurabhavanaṃ ‘‘kimida’’nti saṅkhobhaṃ āpajjati. Atha naṃ āgantvā ‘‘kimida’’nti pucchanti. So ‘‘na kiñcī’’ti vadati. Dutiyayāmādīsupi eseva nayo. Iti asurānaṃ ‘‘mā bhāyi, mahārājā’’ti taṃ assāsentānaṃyeva aruṇaṃ uggacchati. Evamassa tato paṭṭhāya gelaññajātaṃ cittaṃ vepati. Teneva cassa ‘‘vepacittī’’ti aparaṃ nāmaṃ udapādīti. Dasamaṃ.
பட²மோ வக்³கோ³.
Paṭhamo vaggo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஸமுத்³த³கஸுத்தங் • 10. Samuddakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஸமுத்³த³கஸுத்தவண்ணனா • 10. Samuddakasuttavaṇṇanā
