| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
१०. समुद्दकसुत्तवण्णना
10. Samuddakasuttavaṇṇanā
२५६. चक्कवाळमहासमुद्दपिट्ठियन्ति चक्कवाळपब्बतपादसमन्ता महासमुद्दतीरपिट्ठियं। यथेव सिनेरुसमीपे महासमुद्दो अनुपुब्बनिन्नो अनुपुब्बपोणो अनुपुब्बपब्भारो, एवं येभुय्येन चक्कवाळपादसमीपेपि। तेनाह ‘‘रजतपट्टवण्णे वालुकपुलिने’’ति। वुत्तप्पकारासूति अनन्तरसुत्ते वुत्तप्पकारासु। अस्समपदेनाति अस्समपदवेमज्झेन। एवं चिन्तयिंसूति ‘‘यं नून मय’’न्तिआदिना यथा पाळियं आगतं, एवं मन्तयिंसु।
256.Cakkavāḷamahāsamuddapiṭṭhiyanti cakkavāḷapabbatapādasamantā mahāsamuddatīrapiṭṭhiyaṃ. Yatheva sinerusamīpe mahāsamuddo anupubbaninno anupubbapoṇo anupubbapabbhāro, evaṃ yebhuyyena cakkavāḷapādasamīpepi. Tenāha ‘‘rajatapaṭṭavaṇṇe vālukapuline’’ti. Vuttappakārāsūti anantarasutte vuttappakārāsu. Assamapadenāti assamapadavemajjhena. Evaṃ cintayiṃsūti ‘‘yaṃ nūna maya’’ntiādinā yathā pāḷiyaṃ āgataṃ, evaṃ mantayiṃsu.
इच्छितकरोति यदिच्छितकरणं। दुट्ठानन्ति दुरासयानं। ते पन दुट्ठज्झासया विरुद्धा होन्तीति आह ‘‘दुट्ठानं विरुद्धान’’न्ति। पवुत्तन्ति बीजं सन्धाय वपितं। तेनाह ‘‘खेत्ते पतिट्ठापित’’न्ति।
Icchitakaroti yadicchitakaraṇaṃ. Duṭṭhānanti durāsayānaṃ. Te pana duṭṭhajjhāsayā viruddhā hontīti āha ‘‘duṭṭhānaṃ viruddhāna’’nti. Pavuttanti bījaṃ sandhāya vapitaṃ. Tenāha ‘‘khette patiṭṭhāpita’’nti.
सायमासभत्तन्ति सायं असितब्बभोजनं। यथावारं भक्खितमेतं देवानं विय सुखुमं गुरुवासञ्च न होतीति ‘‘भत्त’’न्ति वुत्तं। गेलञ्ञजातन्ति सञ्जातगेलञ्ञं। वेपतीति कम्पति पवेधति।
Sāyamāsabhattanti sāyaṃ asitabbabhojanaṃ. Yathāvāraṃ bhakkhitametaṃ devānaṃ viya sukhumaṃ guruvāsañca na hotīti ‘‘bhatta’’nti vuttaṃ. Gelaññajātanti sañjātagelaññaṃ. Vepatīti kampati pavedhati.
समुद्दकसुत्तवण्णना निट्ठिता।
Samuddakasuttavaṇṇanā niṭṭhitā.
पठमवग्गवण्णना निट्ठिता।
Paṭhamavaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १०. समुद्दकसुत्तं • 10. Samuddakasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १०. समुद्दकसुत्तवण्णना • 10. Samuddakasuttavaṇṇanā
