| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๑๐. สมุทฺทกสุตฺตวณฺณนา
10. Samuddakasuttavaṇṇanā
๒๕๖. จกฺกวาฬมหาสมุทฺทปิฎฺฐิยนฺติ จกฺกวาฬปพฺพตปาทสมนฺตา มหาสมุทฺทตีรปิฎฺฐิยํฯ ยเถว สิเนรุสมีเป มหาสมุโทฺท อนุปุพฺพนิโนฺน อนุปุพฺพโปโณ อนุปุพฺพปพฺภาโร, เอวํ เยภุเยฺยน จกฺกวาฬปาทสมีเปปิฯ เตนาห ‘‘รชตปฎฺฎวเณฺณ วาลุกปุลิเน’’ติฯ วุตฺตปฺปการาสูติ อนนฺตรสุเตฺต วุตฺตปฺปการาสุฯ อสฺสมปเทนาติ อสฺสมปทเวมเชฺฌนฯ เอวํ จินฺตยิํสูติ ‘‘ยํ นูน มย’’นฺติอาทินา ยถา ปาฬิยํ อาคตํ, เอวํ มนฺตยิํสุฯ
256.Cakkavāḷamahāsamuddapiṭṭhiyanti cakkavāḷapabbatapādasamantā mahāsamuddatīrapiṭṭhiyaṃ. Yatheva sinerusamīpe mahāsamuddo anupubbaninno anupubbapoṇo anupubbapabbhāro, evaṃ yebhuyyena cakkavāḷapādasamīpepi. Tenāha ‘‘rajatapaṭṭavaṇṇe vālukapuline’’ti. Vuttappakārāsūti anantarasutte vuttappakārāsu. Assamapadenāti assamapadavemajjhena. Evaṃ cintayiṃsūti ‘‘yaṃ nūna maya’’ntiādinā yathā pāḷiyaṃ āgataṃ, evaṃ mantayiṃsu.
อิจฺฉิตกโรติ ยทิจฺฉิตกรณํฯ ทุฎฺฐานนฺติ ทุราสยานํฯ เต ปน ทุฎฺฐชฺฌาสยา วิรุทฺธา โหนฺตีติ อาห ‘‘ทุฎฺฐานํ วิรุทฺธาน’’นฺติฯ ปวุตฺตนฺติ พีชํ สนฺธาย วปิตํฯ เตนาห ‘‘เขเตฺต ปติฎฺฐาปิต’’นฺติฯ
Icchitakaroti yadicchitakaraṇaṃ. Duṭṭhānanti durāsayānaṃ. Te pana duṭṭhajjhāsayā viruddhā hontīti āha ‘‘duṭṭhānaṃ viruddhāna’’nti. Pavuttanti bījaṃ sandhāya vapitaṃ. Tenāha ‘‘khette patiṭṭhāpita’’nti.
สายมาสภตฺตนฺติ สายํ อสิตพฺพโภชนํฯ ยถาวารํ ภกฺขิตเมตํ เทวานํ วิย สุขุมํ คุรุวาสญฺจ น โหตีติ ‘‘ภตฺต’’นฺติ วุตฺตํฯ เคลญฺญชาตนฺติ สญฺชาตเคลญฺญํฯ เวปตีติ กมฺปติ ปเวธติฯ
Sāyamāsabhattanti sāyaṃ asitabbabhojanaṃ. Yathāvāraṃ bhakkhitametaṃ devānaṃ viya sukhumaṃ guruvāsañca na hotīti ‘‘bhatta’’nti vuttaṃ. Gelaññajātanti sañjātagelaññaṃ. Vepatīti kampati pavedhati.
สมุทฺทกสุตฺตวณฺณนา นิฎฺฐิตาฯ
Samuddakasuttavaṇṇanā niṭṭhitā.
ปฐมวคฺควณฺณนา นิฎฺฐิตาฯ
Paṭhamavaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๐. สมุทฺทกสุตฺตํ • 10. Samuddakasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๐. สมุทฺทกสุตฺตวณฺณนา • 10. Samuddakasuttavaṇṇanā
