| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
១០. សមុទ្ទកសុត្តវណ្ណនា
10. Samuddakasuttavaṇṇanā
២៥៦. ទសមេ សមុទ្ទតីរេ បណ្ណកុដីសូតិ ចក្កវាឡមហាសមុទ្ទបិដ្ឋិយំ រជតបដ្ដវណ្ណេ វាលុកបុឡិនេ វុត្តប្បការាសុ បណ្ណសាលាសុ វសន្តិ។ សិយាបិ នោតិ សិយាបិ អម្ហាកំ។ អភយទក្ខិណំ យាចេយ្យាមាតិ អភយទានំ យាចេយ្យាម។ យេភុយ្យេន កិរ ទេវាសុរសង្គាមោ មហាសមុទ្ទបិដ្ឋេ ហោតិ។ អសុរានំ ន សព្ពកាលំ ជយោ ហោតិ, ពហុវារេ បរាជយោវ ហោតិ។ តេ ទេវេហិ បរាជិតា បលាយន្តា ឥសីនំ អស្សមបទេន គច្ឆន្តា ‘‘សក្កោ ឥមេហិ សទ្ធិំ មន្តេត្វា អម្ហេ នាសេតិ, គណ្ហថ បុត្តហតាយ បុត្តេ’’តិ កុបិតា អស្សមបទេ បានីយឃដចង្កមនសាលាទីនិ វិទ្ធំសេន្តិ។ ឥសយោ អរញ្ញតោ ផលាផលំ អាទាយ អាគតា នំ ទិស្វា បុន ទុក្ខេន បដិបាកតិកំ ករោន្តិ។ តេបិ បុនប្បុនំ តថេវ វិនាសេន្តិ។ តស្មា ‘‘ឥទានិ តេសំ សង្គាមោ បច្ចុបដ្ឋិតោ’’តិ សុត្វា ឯវំ ចិន្តយិំសុ។
256. Dasame samuddatīre paṇṇakuṭīsūti cakkavāḷamahāsamuddapiṭṭhiyaṃ rajatapaṭṭavaṇṇe vālukapuḷine vuttappakārāsu paṇṇasālāsu vasanti. Siyāpi noti siyāpi amhākaṃ. Abhayadakkhiṇaṃ yāceyyāmāti abhayadānaṃ yāceyyāma. Yebhuyyena kira devāsurasaṅgāmo mahāsamuddapiṭṭhe hoti. Asurānaṃ na sabbakālaṃ jayo hoti, bahuvāre parājayova hoti. Te devehi parājitā palāyantā isīnaṃ assamapadena gacchantā ‘‘sakko imehi saddhiṃ mantetvā amhe nāseti, gaṇhatha puttahatāya putte’’ti kupitā assamapade pānīyaghaṭacaṅkamanasālādīni viddhaṃsenti. Isayo araññato phalāphalaṃ ādāya āgatā naṃ disvā puna dukkhena paṭipākatikaṃ karonti. Tepi punappunaṃ tatheva vināsenti. Tasmā ‘‘idāni tesaṃ saṅgāmo paccupaṭṭhito’’ti sutvā evaṃ cintayiṃsu.
កាមំករោតិ ឥច្ឆិតករោ។ ភយស្ស អភយស្ស វាតិ ភយំ វា អភយំ វា។ ឥទំ វុត្តំ ហោតិ – សចេ ត្វំ អភយំ ទាតុកាមោ, អភយំ ទាតុំ បហោសិ។ សចេ ភយំ ទាតុកាមោ។ ភយំ ទាតុំ បហោសិ។ អម្ហាកំ បន អភយទានំ ទេហីតិ។ ទុដ្ឋានន្តិ វិរុទ្ធានំ។ បវុត្តន្តិ ខេត្តេ បតិដ្ឋាបិតំ។
Kāmaṃkaroti icchitakaro. Bhayassa abhayassa vāti bhayaṃ vā abhayaṃ vā. Idaṃ vuttaṃ hoti – sace tvaṃ abhayaṃ dātukāmo, abhayaṃ dātuṃ pahosi. Sace bhayaṃ dātukāmo. Bhayaṃ dātuṃ pahosi. Amhākaṃ pana abhayadānaṃ dehīti. Duṭṭhānanti viruddhānaṃ. Pavuttanti khette patiṭṭhāpitaṃ.
តិក្ខត្តុំ ឧព្ពិជ្ជីតិ សាយមាសភត្តំ ភុញ្ជិត្វា សយនំ អភិរុយ្ហ និបន្នោ និទ្ទាយ ឱក្កន្តមត្តាយ សមន្តា ឋត្វា សត្តិសតេន បហដោ វិយ វិរវន្តោ ឧដ្ឋហតិ, ទសយោជនសហស្សំ អសុរភវនំ ‘‘កិមិទ’’ន្តិ សង្ខោភំ អាបជ្ជតិ។ អថ នំ អាគន្ត្វា ‘‘កិមិទ’’ន្តិ បុច្ឆន្តិ។ សោ ‘‘ន កិញ្ចី’’តិ វទតិ។ ទុតិយយាមាទីសុបិ ឯសេវ នយោ។ ឥតិ អសុរានំ ‘‘មា ភាយិ, មហារាជា’’តិ តំ អស្សាសេន្តានំយេវ អរុណំ ឧគ្គច្ឆតិ។ ឯវមស្ស តតោ បដ្ឋាយ គេលញ្ញជាតំ ចិត្តំ វេបតិ។ តេនេវ ចស្ស ‘‘វេបចិត្តី’’តិ អបរំ នាមំ ឧទបាទីតិ។ ទសមំ។
Tikkhattuṃ ubbijjīti sāyamāsabhattaṃ bhuñjitvā sayanaṃ abhiruyha nipanno niddāya okkantamattāya samantā ṭhatvā sattisatena pahaṭo viya viravanto uṭṭhahati, dasayojanasahassaṃ asurabhavanaṃ ‘‘kimida’’nti saṅkhobhaṃ āpajjati. Atha naṃ āgantvā ‘‘kimida’’nti pucchanti. So ‘‘na kiñcī’’ti vadati. Dutiyayāmādīsupi eseva nayo. Iti asurānaṃ ‘‘mā bhāyi, mahārājā’’ti taṃ assāsentānaṃyeva aruṇaṃ uggacchati. Evamassa tato paṭṭhāya gelaññajātaṃ cittaṃ vepati. Teneva cassa ‘‘vepacittī’’ti aparaṃ nāmaṃ udapādīti. Dasamaṃ.
បឋមោ វគ្គោ។
Paṭhamo vaggo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. សមុទ្ទកសុត្តំ • 10. Samuddakasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. សមុទ្ទកសុត្តវណ្ណនា • 10. Samuddakasuttavaṇṇanā
