| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. သမုဒ္ဒကသုတ္တဝဏ္ဏနာ
10. Samuddakasuttavaṇṇanā
၂၅၆. ဒသမေ သမုဒ္ဒတီရေ ပဏ္ဏကုဋီသူတိ စက္ကဝာဠမဟာသမုဒ္ဒပိဋ္ဌိယံ ရဇတပဋ္ဋဝဏ္ဏေ ဝာလုကပုဠိနေ ဝုတ္တပ္ပကာရာသု ပဏ္ဏသာလာသု ဝသန္တိ။ သိယာပိ နောတိ သိယာပိ အမ္ဟာကံ။ အဘယဒက္ခိဏံ ယာစေယ္ယာမာတိ အဘယဒာနံ ယာစေယ္ယာမ။ ယေဘုယ္ယေန ကိရ ဒေဝာသုရသင္ဂာမော မဟာသမုဒ္ဒပိဋ္ဌေ ဟောတိ။ အသုရာနံ န သဗ္ဗကာလံ ဇယော ဟောတိ, ဗဟုဝာရေ ပရာဇယောဝ ဟောတိ။ တေ ဒေဝေဟိ ပရာဇိတာ ပလာယန္တာ ဣသီနံ အသ္သမပဒေန ဂစ္ဆန္တာ ‘‘သက္ကော ဣမေဟိ သဒ္ဓိံ မန္တေတ္ဝာ အမ္ဟေ နာသေတိ, ဂဏ္ဟထ ပုတ္တဟတာယ ပုတ္တေ’’တိ ကုပိတာ အသ္သမပဒေ ပာနီယဃဋစင္ကမနသာလာဒီနိ ဝိဒ္ဓံသေန္တိ။ ဣသယော အရညတော ဖလာဖလံ အာဒာယ အာဂတာ နံ ဒိသ္ဝာ ပုန ဒုက္ခေန ပဋိပာကတိကံ ကရောန္တိ။ တေပိ ပုနပ္ပုနံ တထေဝ ဝိနာသေန္တိ။ တသ္မာ ‘‘ဣဒာနိ တေသံ သင္ဂာမော ပစ္စုပဋ္ဌိတော’’တိ သုတ္ဝာ ဧဝံ စိန္တယိံသု။
256. Dasame samuddatīre paṇṇakuṭīsūti cakkavāḷamahāsamuddapiṭṭhiyaṃ rajatapaṭṭavaṇṇe vālukapuḷine vuttappakārāsu paṇṇasālāsu vasanti. Siyāpi noti siyāpi amhākaṃ. Abhayadakkhiṇaṃ yāceyyāmāti abhayadānaṃ yāceyyāma. Yebhuyyena kira devāsurasaṅgāmo mahāsamuddapiṭṭhe hoti. Asurānaṃ na sabbakālaṃ jayo hoti, bahuvāre parājayova hoti. Te devehi parājitā palāyantā isīnaṃ assamapadena gacchantā ‘‘sakko imehi saddhiṃ mantetvā amhe nāseti, gaṇhatha puttahatāya putte’’ti kupitā assamapade pānīyaghaṭacaṅkamanasālādīni viddhaṃsenti. Isayo araññato phalāphalaṃ ādāya āgatā naṃ disvā puna dukkhena paṭipākatikaṃ karonti. Tepi punappunaṃ tatheva vināsenti. Tasmā ‘‘idāni tesaṃ saṅgāmo paccupaṭṭhito’’ti sutvā evaṃ cintayiṃsu.
ကာမံကရောတိ ဣစ္ဆိတကရော။ ဘယသ္သ အဘယသ္သ ဝာတိ ဘယံ ဝာ အဘယံ ဝာ။ ဣဒံ ဝုတ္တံ ဟောတိ – သစေ တ္ဝံ အဘယံ ဒာတုကာမော, အဘယံ ဒာတုံ ပဟောသိ။ သစေ ဘယံ ဒာတုကာမော။ ဘယံ ဒာတုံ ပဟောသိ။ အမ္ဟာကံ ပန အဘယဒာနံ ဒေဟီတိ။ ဒုဋ္ဌာနန္တိ ဝိရုဒ္ဓာနံ။ ပဝုတ္တန္တိ ခေတ္တေ ပတိဋ္ဌာပိတံ။
Kāmaṃkaroti icchitakaro. Bhayassa abhayassa vāti bhayaṃ vā abhayaṃ vā. Idaṃ vuttaṃ hoti – sace tvaṃ abhayaṃ dātukāmo, abhayaṃ dātuṃ pahosi. Sace bhayaṃ dātukāmo. Bhayaṃ dātuṃ pahosi. Amhākaṃ pana abhayadānaṃ dehīti. Duṭṭhānanti viruddhānaṃ. Pavuttanti khette patiṭṭhāpitaṃ.
တိက္ခတ္တုံ ဥဗ္ဗိဇ္ဇီတိ သာယမာသဘတ္တံ ဘုဉ္ဇိတ္ဝာ သယနံ အဘိရုယ္ဟ နိပန္နော နိဒ္ဒာယ ဩက္ကန္တမတ္တာယ သမန္တာ ဌတ္ဝာ သတ္တိသတေန ပဟဋော ဝိယ ဝိရဝန္တော ဥဋ္ဌဟတိ, ဒသယောဇနသဟသ္သံ အသုရဘဝနံ ‘‘ကိမိဒ’’န္တိ သင္ခောဘံ အာပဇ္ဇတိ။ အထ နံ အာဂန္တ္ဝာ ‘‘ကိမိဒ’’န္တိ ပုစ္ဆန္တိ။ သော ‘‘န ကိဉ္စီ’’တိ ဝဒတိ။ ဒုတိယယာမာဒီသုပိ ဧသေဝ နယော။ ဣတိ အသုရာနံ ‘‘မာ ဘာယိ, မဟာရာဇာ’’တိ တံ အသ္သာသေန္တာနံယေဝ အရုဏံ ဥဂ္ဂစ္ဆတိ။ ဧဝမသ္သ တတော ပဋ္ဌာယ ဂေလညဇာတံ စိတ္တံ ဝေပတိ။ တေနေဝ စသ္သ ‘‘ဝေပစိတ္တီ’’တိ အပရံ နာမံ ဥဒပာဒီတိ။ ဒသမံ။
Tikkhattuṃ ubbijjīti sāyamāsabhattaṃ bhuñjitvā sayanaṃ abhiruyha nipanno niddāya okkantamattāya samantā ṭhatvā sattisatena pahaṭo viya viravanto uṭṭhahati, dasayojanasahassaṃ asurabhavanaṃ ‘‘kimida’’nti saṅkhobhaṃ āpajjati. Atha naṃ āgantvā ‘‘kimida’’nti pucchanti. So ‘‘na kiñcī’’ti vadati. Dutiyayāmādīsupi eseva nayo. Iti asurānaṃ ‘‘mā bhāyi, mahārājā’’ti taṃ assāsentānaṃyeva aruṇaṃ uggacchati. Evamassa tato paṭṭhāya gelaññajātaṃ cittaṃ vepati. Teneva cassa ‘‘vepacittī’’ti aparaṃ nāmaṃ udapādīti. Dasamaṃ.
ပဌမော ဝဂ္ဂော။
Paṭhamo vaggo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. သမုဒ္ဒကသုတ္တံ • 10. Samuddakasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. သမုဒ္ဒကသုတ္တဝဏ္ဏနာ • 10. Samuddakasuttavaṇṇanā
