| Library / Tipiṭaka / तिपिटक • Tipiṭaka / जातकपाळि • Jātakapāḷi |
४६६. समुद्दवाणिजजातकं (३)
466. Samuddavāṇijajātakaṃ (3)
२५.
25.
कसन्ति वपन्ति ते जना, मनुजा कम्मफलूपजीविनो।
Kasanti vapanti te janā, manujā kammaphalūpajīvino;
नयिमस्स दीपकस्स भागिनो, जम्बुदीपा इदमेव नो वरं॥
Nayimassa dīpakassa bhāgino, jambudīpā idameva no varaṃ.
२६.
26.
तिपञ्चरत्तूपगतम्हि चन्दे, वेगो महा हेहिति सागरस्स।
Tipañcarattūpagatamhi cande, vego mahā hehiti sāgarassa;
उप्लविस्सं दीपमिमं उळारं, मा वो वधी गच्छथ लेणमञ्ञं॥
Uplavissaṃ dīpamimaṃ uḷāraṃ, mā vo vadhī gacchatha leṇamaññaṃ.
२७.
27.
न जातुयं सागरवारिवेगो, उप्लविस्सं दीपमिमं उळारं।
Na jātuyaṃ sāgaravārivego, uplavissaṃ dīpamimaṃ uḷāraṃ;
तं मे निमित्तेहि बहूहि दिट्ठं, मा भेथ किं सोचथ मोदथव्हो 1॥
Taṃ me nimittehi bahūhi diṭṭhaṃ, mā bhetha kiṃ socatha modathavho 2.
२८.
28.
पहूतभक्खं बहुअन्नपानं, पत्तत्थ आवासमिमं उळारं।
Pahūtabhakkhaṃ bahuannapānaṃ, pattattha āvāsamimaṃ uḷāraṃ;
न वो भयं पटिपस्सामि किञ्चि, आपुत्तपुत्तेहि पमोदथव्हो॥
Na vo bhayaṃ paṭipassāmi kiñci, āputtaputtehi pamodathavho.
२९.
29.
यो देवोयं दक्खिणायं 3 दिसायं, खेमन्ति पक्कोसति तस्स सच्चं।
Yo devoyaṃ dakkhiṇāyaṃ 4 disāyaṃ, khemanti pakkosati tassa saccaṃ;
न उत्तरो वेदि भयाभयस्स, मा भेथ किं सोचथ मोदथव्हो॥
Na uttaro vedi bhayābhayassa, mā bhetha kiṃ socatha modathavho.
३०.
30.
यथा इमे विप्पवदन्ति यक्खा, एको भयं संसति खेममेको।
Yathā ime vippavadanti yakkhā, eko bhayaṃ saṃsati khemameko;
तदिङ्घ मय्हं वचनं सुणाथ, खिप्पं लहुं मा विनस्सिम्ह सब्बे॥
Tadiṅgha mayhaṃ vacanaṃ suṇātha, khippaṃ lahuṃ mā vinassimha sabbe.
३१.
31.
सब्बे समागम्म करोम नावं, दोणिं दळ्हं सब्बयन्तूपपन्नं।
Sabbe samāgamma karoma nāvaṃ, doṇiṃ daḷhaṃ sabbayantūpapannaṃ;
सचे अयं दक्खिणो सच्चमाह, मोघं पटिक्कोसति उत्तरोयं।
Sace ayaṃ dakkhiṇo saccamāha, moghaṃ paṭikkosati uttaroyaṃ;
सा चेव नो हेहिति आपदत्था, इमञ्च दीपं न परिच्चजेम॥
Sā ceva no hehiti āpadatthā, imañca dīpaṃ na pariccajema.
३२.
32.
सचे च खो उत्तरो सच्चमाह, मोघं पटिक्कोसति दक्खिणोयं।
Sace ca kho uttaro saccamāha, moghaṃ paṭikkosati dakkhiṇoyaṃ;
तमेव नावं अभिरुय्ह सब्बे, एवं मयं सोत्थि तरेमु पारं॥
Tameva nāvaṃ abhiruyha sabbe, evaṃ mayaṃ sotthi taremu pāraṃ.
३३.
33.
न वे सुगण्हं पठमेन सेट्ठं, कनिट्ठमापाथगतं गहेत्वा।
Na ve sugaṇhaṃ paṭhamena seṭṭhaṃ, kaniṭṭhamāpāthagataṃ gahetvā;
३४.
34.
यथापि ते सागरवारिमज्झे, सकम्मुना सोत्थि वहिंसु वाणिजा।
Yathāpi te sāgaravārimajjhe, sakammunā sotthi vahiṃsu vāṇijā;
अनागतत्थं पटिविज्झियान, अप्पम्पि नाच्चेति स भूरिपञ्ञो॥
Anāgatatthaṃ paṭivijjhiyāna, appampi nācceti sa bhūripañño.
३५.
35.
बाला च मोहेन रसानुगिद्धा, अनागतं अप्पटिविज्झियत्थं।
Bālā ca mohena rasānugiddhā, anāgataṃ appaṭivijjhiyatthaṃ;
पच्चुप्पन्ने सीदन्ति अत्थजाते, समुद्दमज्झे यथा ते मनुस्सा॥
Paccuppanne sīdanti atthajāte, samuddamajjhe yathā te manussā.
३६.
36.
अनागतं पटिकयिराथ किच्चं, ‘‘मा मं किच्चं किच्चकाले ब्यधेसि’’।
Anāgataṃ paṭikayirātha kiccaṃ, ‘‘mā maṃ kiccaṃ kiccakāle byadhesi’’;
तं तादिसं पटिकत 9 किच्चकारिं, न तं किच्चं किच्चकाले ब्यधेतीति॥
Taṃ tādisaṃ paṭikata 10 kiccakāriṃ, na taṃ kiccaṃ kiccakāle byadhetīti.
समुद्दवाणिजजातकं ततियं।
Samuddavāṇijajātakaṃ tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४६६] ३. समुद्दवाणिजजातकवण्णना • [466] 3. Samuddavāṇijajātakavaṇṇanā
