| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[466] 3. самуд̣̇д̣̇аваан̣иж̇аж̇аад̇агаван̣н̣анаа
[466] 3. Samuddavāṇijajātakavaṇṇanā
гасанд̇и вабанд̇и д̇з ж̇анаад̇и ид̣̇ам̣ сад̇т̇аа ж̇зд̇аванз вихаранд̇о д̣̇звад̣̇ад̇д̇асса бан̃жа гуласад̇аани г̇ахзд̇ваа нираяз бад̇ид̇абхаавам̣ аараб̣бха гат̇зси. со хи аг̇г̇асаавагзсу барисам̣ г̇ахзд̇ваа багганд̇зсу согам̣ санд̇хаарзд̇ум̣ асаггонд̇о ун̣халохид̇з мукад̇о нигканд̇з б̣алававзд̣̇анаабийл̣ид̇о д̇ат̇ааг̇ад̇асса г̇ун̣ам̣ ануссарид̇ваа ‘‘ахамзва нава маасз д̇ат̇ааг̇ад̇асса анад̇т̇ам̣ жинд̇зсим̣, сад̇т̇у бана маяи баабажид̇д̇ам̣ наама над̇т̇и, асийд̇имахаат̇зраанамби маяи аагхаад̇о наама над̇т̇и, маяаа гад̇агаммзна ахамзва ид̣̇аани анаат̇о ж̇аад̇о, сад̇т̇аараабимхи виссадто махаат̇зрзхиби н̃аад̇исздтзна раахулад̇т̇зрзнаби сагяарааж̇агулзхиби, г̇анд̇ваа сад̇т̇аарам̣ камаабзссаамий’’д̇и барисааяа сан̃н̃ам̣ д̣̇ад̇ваа ад̇д̇аанам̣ бан̃жагзна г̇аахаабзд̇ваа рад̇д̇им̣ рад̇д̇им̣ г̇ажчанд̇о госаларадтам̣ самбаабун̣и. аананд̣̇ад̇т̇зро сад̇т̇у аарожзси ‘‘д̣̇звад̣̇ад̇д̇о гира, бханд̇з, д̇умхаагам̣ камаабзд̇ум̣ ааг̇ажчад̇ий’’д̇и. ‘‘аананд̣̇а, д̣̇звад̣̇ад̇д̇о мама д̣̇ассанам̣ на лабхиссад̇ий’’д̇и.
Kasantivapanti te janāti idaṃ satthā jetavane viharanto devadattassa pañca kulasatāni gahetvā niraye patitabhāvaṃ ārabbha kathesi. So hi aggasāvakesu parisaṃ gahetvā pakkantesu sokaṃ sandhāretuṃ asakkonto uṇhalohite mukhato nikkhante balavavedanāpīḷito tathāgatassa guṇaṃ anussaritvā ‘‘ahameva nava māse tathāgatassa anatthaṃ cintesiṃ, satthu pana mayi pāpacittaṃ nāma natthi, asītimahātherānampi mayi āghāto nāma natthi, mayā katakammena ahameva idāni anātho jāto, satthārāpimhi vissaṭṭho mahātherehipi ñātiseṭṭhena rāhulattherenapi sakyarājakulehipi, gantvā satthāraṃ khamāpessāmī’’ti parisāya saññaṃ datvā attānaṃ pañcakena gāhāpetvā rattiṃ rattiṃ gacchanto kosalaraṭṭhaṃ sampāpuṇi. Ānandatthero satthu ārocesi ‘‘devadatto kira, bhante, tumhākaṃ khamāpetuṃ āgacchatī’’ti. ‘‘Ānanda, devadatto mama dassanaṃ na labhissatī’’ti.
ат̇а д̇асмим̣ саавад̇т̇инаг̇арад̣̇ваарам̣ самбад̇д̇з буна т̇зро аарожзси, бхаг̇авааби д̇ат̇зва аважа. д̇асса ж̇зд̇аванз богкаран̣ияаа самийбам̣ ааг̇ад̇асса баабам̣ мад̇т̇агам̣ баабун̣и, сарийрз д̣аахо уббаж̇ж̇и, нхад̇ваа баанийяам̣ бивид̇угаамо худ̇ваа ‘‘ман̃жагад̇о мам̣ аавусо од̇аарзт̇а, баанийяам̣ бивиссаамий’’д̇и ааха. д̇асса од̇аарзд̇ваа бхуумияам̣ табид̇амад̇д̇асса жид̇д̇ассаад̣̇з алад̣̇д̇хзязва махаабат̇авий виварамад̣̇ааси. д̇аавад̣̇зва д̇ам̣ авийжид̇о аг̇г̇иж̇аалаа удтааяа баригкибид̇ваа г̇ан̣хи. со ‘‘баабагаммам̣ мз мад̇т̇агам̣ бад̇д̇а’’нд̇и д̇ат̇ааг̇ад̇асса г̇ун̣з ануссарид̇ваа –
Atha tasmiṃ sāvatthinagaradvāraṃ sampatte puna thero ārocesi, bhagavāpi tatheva avaca. Tassa jetavane pokkharaṇiyā samīpaṃ āgatassa pāpaṃ matthakaṃ pāpuṇi, sarīre ḍāho uppajji, nhatvā pānīyaṃ pivitukāmo hutvā ‘‘mañcakato maṃ āvuso otāretha, pānīyaṃ pivissāmī’’ti āha. Tassa otāretvā bhūmiyaṃ ṭhapitamattassa cittassāde aladdheyeva mahāpathavī vivaramadāsi. Tāvadeva taṃ avīcito aggijālā uṭṭhāya parikkhipitvā gaṇhi. So ‘‘pāpakammaṃ me matthakaṃ patta’’nti tathāgatassa guṇe anussaritvā –
‘‘имзхи адтийхи д̇амаг̇г̇абуг̇г̇алам̣, д̣̇зваад̇ид̣̇звам̣ нарад̣̇аммасаарат̇им̣;
‘‘Imehi aṭṭhīhi tamaggapuggalaṃ, devātidevaṃ naradammasārathiṃ;
саманд̇ажагкум̣ сад̇абун̃н̃алагкан̣ам̣, баан̣зхи б̣уд̣̇д̇хам̣ саран̣ам̣ убзмий’’д̇и. (ми. ба. 4.1.3) –
Samantacakkhuṃ satapuññalakkhaṇaṃ, pāṇehi buddhaṃ saraṇaṃ upemī’’ti. (mi. pa. 4.1.3) –
имааяа г̇аат̇ааяа саран̣з бад̇идтаханд̇о авийжибарааяан̣о ахоси. д̇асса бана бан̃жа убадтаагагуласад̇аани ахзсум̣. д̇ааниби д̇аббагкигаани худ̇ваа д̣̇асаб̣алам̣ аггосид̇ваа авийжимхиязва ниб̣б̣ад̇д̇им̣су. звам̣ со д̇аани бан̃жа гуласад̇аани г̇ан̣хид̇ваа авийжимхи бад̇идтид̇о.
Imāya gāthāya saraṇe patiṭṭhahanto avīciparāyaṇo ahosi. Tassa pana pañca upaṭṭhākakulasatāni ahesuṃ. Tānipi tappakkhikāni hutvā dasabalaṃ akkositvā avīcimhiyeva nibbattiṃsu. Evaṃ so tāni pañca kulasatāni gaṇhitvā avīcimhi patiṭṭhito.
ат̇згад̣̇ивасам̣ бхигкуу д̇хаммасабхааяам̣ гат̇ам̣ самудтаабзсум̣ ‘‘аавусо, д̣̇звад̣̇ад̇д̇о баабо лаабхасаггаараг̇ид̣̇д̇хад̇ааяа саммаасамб̣уд̣̇д̇хз адтаанз гобам̣ б̣анд̇хид̇ваа анааг̇ад̇абхаяаманологзд̇ваа бан̃жахи гуласад̇зхи сад̣̇д̇хим̣ авийжибарааяан̣о ж̇аад̇о’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на бхигкавз, ид̣̇аанзва д̣̇звад̣̇ад̇д̇о лаабхасаггаараг̇ид̣̇д̇хо худ̇ваа анааг̇ад̇абхаяам̣ на ологзси, буб̣б̣зби анааг̇ад̇абхаяам̣ анологзд̇ваа бажжуббаннасукаг̇ид̣̇д̇хзна сад̣̇д̇хим̣ барисааяа махаавинаасам̣ бад̇д̇о’’д̇и вад̇ваа ад̇ийд̇ам̣ аахари.
Athekadivasaṃ bhikkhū dhammasabhāyaṃ kathaṃ samuṭṭhāpesuṃ ‘‘āvuso, devadatto pāpo lābhasakkāragiddhatāya sammāsambuddhe aṭṭhāne kopaṃ bandhitvā anāgatabhayamanoloketvā pañcahi kulasatehi saddhiṃ avīciparāyaṇo jāto’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na bhikkhave, idāneva devadatto lābhasakkāragiddho hutvā anāgatabhayaṃ na olokesi, pubbepi anāgatabhayaṃ anoloketvā paccuppannasukhagiddhena saddhiṃ parisāya mahāvināsaṃ patto’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣аараан̣асид̇о авид̣̇уурз гуласахассаниваасо махаавад̣дхагийг̇аамо ахоси. д̇ад̇т̇а вад̣дхагий ‘‘д̇умхаагам̣ ман̃жам̣ гариссаама, бийтам̣ гариссаама, г̇зхам̣ гариссаамаа’’д̇и вад̇ваа мануссаанам̣ хад̇т̇ад̇о б̣ахум̣ ин̣ам̣ г̇ахзд̇ваа гин̃жи гаад̇ум̣ на сагким̣су. мануссаа д̣̇идтад̣̇идтз вад̣дхагий жод̣̇знд̇и балиб̣уд̣̇д̇ханд̇и. д̇з ин̣ааяигзхи убад̣̇д̣̇уд̇аа сукам̣ васид̇ум̣ асаггонд̇аа ‘‘вид̣̇зсам̣ г̇анд̇ваа яад̇т̇а гад̇т̇ажи васиссаамаа’’д̇и аран̃н̃ам̣ бависид̇ваа ругкз чинд̣̇ид̇ваа махад̇им̣ наавам̣ б̣анд̇хид̇ваа над̣̇им̣ од̇аарзд̇ваа аахарид̇ваа г̇аамад̇о г̇аавуд̇ад̣дхаяож̇анамад̇д̇з таанз табзд̇ваа ад̣дхарад̇д̇асамаяз г̇аамам̣ ааг̇анд̇ваа буд̇д̇ад̣̇аарамаад̣̇ааяа наавадтаанам̣ г̇анд̇ваа наавам̣ ааруяха ануггамзна махаасамуд̣̇д̣̇ам̣ бависид̇ваа ваад̇авзг̇зна вижаранд̇аа самуд̣̇д̣̇амаж̇жхз згам̣ д̣̇ийбагам̣ баабун̣им̣су. д̇асмим̣ бана д̣̇ийбагз саяам̣ж̇аад̇асаалиужчугад̣̇алиамб̣аж̇амб̣убанасад̇ааланаал̣игзраад̣̇ийни вивид̇хапалаани ад̇т̇и, ан̃н̃ад̇аро бабхиннанааво бурисо батамад̇арам̣ д̇ам̣ д̣̇ийбагам̣ бад̇ваа саалибхад̇д̇ам̣ бхун̃ж̇амаано ужчуаад̣̇ийни каад̣̇амаано т̇ууласарийро наг̇г̇о баруул̣хагзсамассу д̇асмим̣ д̣̇ийбагз бадивасад̇и.
Atīte bārāṇasiyaṃ brahmadatte rajjaṃ kārente bārāṇasito avidūre kulasahassanivāso mahāvaḍḍhakīgāmo ahosi. Tattha vaḍḍhakī ‘‘tumhākaṃ mañcaṃ karissāma, pīṭhaṃ karissāma, gehaṃ karissāmā’’ti vatvā manussānaṃ hatthato bahuṃ iṇaṃ gahetvā kiñci kātuṃ na sakkhiṃsu. Manussā diṭṭhadiṭṭhe vaḍḍhakī codenti palibuddhanti. Te iṇāyikehi upaddutā sukhaṃ vasituṃ asakkontā ‘‘videsaṃ gantvā yattha katthaci vasissāmā’’ti araññaṃ pavisitvā rukkhe chinditvā mahatiṃ nāvaṃ bandhitvā nadiṃ otāretvā āharitvā gāmato gāvutaḍḍhayojanamatte ṭhāne ṭhapetvā aḍḍharattasamaye gāmaṃ āgantvā puttadāramādāya nāvaṭṭhānaṃ gantvā nāvaṃ āruyha anukkamena mahāsamuddaṃ pavisitvā vātavegena vicarantā samuddamajjhe ekaṃ dīpakaṃ pāpuṇiṃsu. Tasmiṃ pana dīpake sayaṃjātasāliucchukadaliambajambupanasatālanāḷikerādīni vividhaphalāni atthi, aññataro pabhinnanāvo puriso paṭhamataraṃ taṃ dīpakaṃ patvā sālibhattaṃ bhuñjamāno ucchuādīni khādamāno thūlasarīro naggo parūḷhakesamassu tasmiṃ dīpake paṭivasati.
вад̣дхагий жинд̇аяим̣су ‘‘сажз аяам̣ д̣̇ийбаго рагкасабариг̇г̇ахид̇о бхависсад̇и, саб̣б̣зби амхз винаасам̣ баабун̣иссаама, бариг̇г̇ан̣хиссаама д̇аава на’’нд̇и. ат̇а сад̇д̇адта бурисаа суураа б̣алаванд̇о саннад̣̇д̇хабан̃жаавуд̇хаа худ̇ваа од̇арид̇ваа д̣̇ийбагам̣ бариг̇г̇ан̣хим̣су. д̇асмим̣ кан̣з со бурисо бхуд̇д̇абаад̇араасо ужчурасам̣ бивид̇ваа сукаббад̇д̇о раман̣ийяз бад̣̇зсз раж̇ад̇абаддасад̣̇исз ваалугад̇алз сийд̇ажчааяааяа уд̇д̇аанаго нибаж̇ж̇ид̇ваа ‘‘ж̇амб̣уд̣̇ийбаваасино гасанд̇аа вабанд̇аа зваруубам̣ сукам̣ на лабханд̇и, ж̇амб̣уд̣̇ийбад̇о маяхам̣ аяамзва д̣̇ийбаго вара’’нд̇и г̇ааяамаано уд̣̇аанам̣ уд̣̇аанзси. ат̇а сад̇т̇аа бхигкуу ааманд̇зд̇ваа ‘‘со бхигкавз бурисо имам̣ уд̣̇аанам̣ уд̣̇аанзсий’’д̇и д̣̇ассзнд̇о батамам̣ г̇аат̇амааха –
Vaḍḍhakī cintayiṃsu ‘‘sace ayaṃ dīpako rakkhasapariggahito bhavissati, sabbepi amhe vināsaṃ pāpuṇissāma, pariggaṇhissāma tāva na’’nti. Atha sattaṭṭha purisā sūrā balavanto sannaddhapañcāvudhā hutvā otaritvā dīpakaṃ pariggaṇhiṃsu. Tasmiṃ khaṇe so puriso bhuttapātarāso ucchurasaṃ pivitvā sukhappatto ramaṇīye padese rajatapaṭṭasadise vālukatale sītacchāyāya uttānako nipajjitvā ‘‘jambudīpavāsino kasantā vapantā evarūpaṃ sukhaṃ na labhanti, jambudīpato mayhaṃ ayameva dīpako vara’’nti gāyamāno udānaṃ udānesi. Atha satthā bhikkhū āmantetvā ‘‘so bhikkhave puriso imaṃ udānaṃ udānesī’’ti dassento paṭhamaṃ gāthamāha –
25.
25.
‘‘гасанд̇и вабанд̇и д̇з ж̇анаа, мануж̇аа гаммапалуубаж̇ийвино;
‘‘Kasanti vapanti te janā, manujā kammaphalūpajīvino;
наяимасса д̣̇ийбагасса бхааг̇ино, ж̇амб̣уд̣̇ийбаа ид̣̇амзва но вара’’нд̇и.
Nayimassa dīpakassa bhāgino, jambudīpā idameva no vara’’nti.
д̇ад̇т̇а д̇з ж̇анаад̇и д̇з ж̇амб̣уд̣̇ийбаваасино ж̇анаа. гаммапалуубаж̇ийвинод̇и наанаагаммаанам̣ палуубаж̇ийвино сад̇д̇аа.
Tattha te janāti te jambudīpavāsino janā. Kammaphalūpajīvinoti nānākammānaṃ phalūpajīvino sattā.
ат̇а д̇з д̣̇ийбагам̣ бариг̇г̇ан̣ханд̇аа бурисаа д̇асса г̇ийд̇асад̣̇д̣̇ам̣ суд̇ваа ‘‘мануссасад̣̇д̣̇о вияа суяяад̇и, ж̇ааниссаама на’’нд̇и сад̣̇д̣̇аанусаарзна г̇анд̇ваа д̇ам̣ бурисам̣ д̣̇исваа ‘‘яагко бхависсад̇ий’’д̇и бхийд̇ад̇асид̇аа сарз саннахим̣су. соби д̇з д̣̇исваа ад̇д̇ано вад̇хабхаязна ‘‘наахам̣, саами, яагко, бурисомхи, ж̇ийвид̇ам̣ мз д̣̇зт̇аа’’д̇и яаажанд̇о ‘‘бурисаа наама д̇умхаад̣̇исаа наг̇г̇аа на хонд̇ий’’д̇и вуд̇д̇з бунаббунам̣ яаажид̇ваа мануссабхаавам̣ вин̃н̃аабзси. д̇з д̇ам̣ бурисам̣ убасан̇гамид̇ваа саммод̣̇анийяам̣ гат̇ам̣ суд̇ваа д̇асса д̇ад̇т̇а ааг̇ад̇анияаамам̣ бужчим̣су. соби саб̣б̣ам̣ д̇зсам̣ гат̇зд̇ваа ‘‘д̇умхз ад̇д̇ано бун̃н̃асамбад̇д̇ияаа ид̇хааг̇ад̇аа , аяам̣ уд̇д̇амад̣̇ийбо, на зд̇т̇а сахад̇т̇зна гаммам̣ гад̇ваа ж̇ийванд̇и, саяам̣ж̇аад̇асаалийнан̃жзва ужчуаад̣̇ийнан̃жзд̇т̇а анд̇о над̇т̇ийд̇и анугган̣танд̇аа васат̇аа’’д̇и ааха. ид̇ха бана васанд̇аанам̣ амхаагам̣ ан̃н̃о барибант̇о над̇т̇и, ан̃н̃ам̣ бхаяам̣ зд̇т̇а над̇т̇и, аяам̣ бана амануссабариг̇г̇ахид̇о, амануссаа д̇умхаагам̣ ужжаарабассаавам̣ д̣̇исваа гуж̇жхзяяум̣, д̇асмаа д̇ам̣ гаронд̇аа ваалугам̣ вияуухид̇ваа ваалугааяа бадижчаад̣̇зяяаат̇а, зд̇д̇агам̣ ид̇ха бхаяам̣, ан̃н̃ам̣ над̇т̇и, нижжам̣ аббамад̇д̇аа бхавзяяаат̇аад̇и. д̇з д̇ад̇т̇а ваасам̣ убаг̇ажчим̣су. д̇асмим̣ бана гуласахассз бан̃жаннам̣ бан̃жаннам̣ гуласад̇аанам̣ ж̇здтагаа д̣̇вз вад̣дхагий ахзсум̣. д̇зсу зго б̣аало ахоси расаг̇ид̣̇д̇хо, зго бан̣д̣ид̇о расзсу аналлийно.
Atha te dīpakaṃ pariggaṇhantā purisā tassa gītasaddaṃ sutvā ‘‘manussasaddo viya suyyati, jānissāma na’’nti saddānusārena gantvā taṃ purisaṃ disvā ‘‘yakkho bhavissatī’’ti bhītatasitā sare sannahiṃsu. Sopi te disvā attano vadhabhayena ‘‘nāhaṃ, sāmi, yakkho, purisomhi, jīvitaṃ me dethā’’ti yācanto ‘‘purisā nāma tumhādisā naggā na hontī’’ti vutte punappunaṃ yācitvā manussabhāvaṃ viññāpesi. Te taṃ purisaṃ upasaṅkamitvā sammodanīyaṃ kathaṃ sutvā tassa tattha āgataniyāmaṃ pucchiṃsu. Sopi sabbaṃ tesaṃ kathetvā ‘‘tumhe attano puññasampattiyā idhāgatā , ayaṃ uttamadīpo, na ettha sahatthena kammaṃ katvā jīvanti, sayaṃjātasālīnañceva ucchuādīnañcettha anto natthīti anukkaṇṭhantā vasathā’’ti āha. Idha pana vasantānaṃ amhākaṃ añño paripantho natthi, aññaṃ bhayaṃ ettha natthi, ayaṃ pana amanussapariggahito, amanussā tumhākaṃ uccārapassāvaṃ disvā kujjheyyuṃ, tasmā taṃ karontā vālukaṃ viyūhitvā vālukāya paṭicchādeyyātha, ettakaṃ idha bhayaṃ, aññaṃ natthi, niccaṃ appamattā bhaveyyāthāti. Te tattha vāsaṃ upagacchiṃsu. Tasmiṃ pana kulasahasse pañcannaṃ pañcannaṃ kulasatānaṃ jeṭṭhakā dve vaḍḍhakī ahesuṃ. Tesu eko bālo ahosi rasagiddho, eko paṇḍito rasesu anallīno.
абарабхааг̇з саб̣б̣зби д̇з д̇ад̇т̇а сукам̣ васанд̇аа т̇ууласарийраа худ̇ваа жинд̇аяим̣су ‘‘жирам̣ бийд̇аа но сураа, ужчурасзна мзраяам̣ гад̇ваа бивиссаамаа’’д̇и. д̇з мзраяам̣ гаарзд̇ваа бивид̇ваа мад̣̇авасзна г̇ааяанд̇аа нажжанд̇аа гийл̣анд̇аа бамад̇д̇аа д̇ад̇т̇а д̇ад̇т̇а ужжаарабассаавам̣ гад̇ваа аббадижчаад̣̇зд̇ваа д̣̇ийбагам̣ ж̇зг̇ужчам̣ бадигуулам̣ гарим̣су. д̣̇звад̇аа ‘‘имз амхаагам̣ гийл̣ааман̣д̣алам̣ бадигуулам̣ гаронд̇ий’’д̇и гуж̇жхид̇ваа ‘‘махаасамуд̣̇д̣̇ам̣ уд̇д̇араабзд̇ваа д̣̇ийбагад̇хованам̣ гариссаамаа’’д̇и манд̇зд̇ваа ‘‘аяам̣ гаал̣абагко, аж̇ж̇а амхаагам̣ самааг̇амо жа бхинно, ид̇о д̣̇аани баннарасамз д̣̇ивасз бун̣н̣амийубосат̇ад̣̇ивасз жанд̣̇ассуг̇г̇аманавзлааяа самуд̣̇д̣̇ам̣ уб̣б̣ад̇д̇зд̇ваа саб̣б̣збимз гхаад̇зссаамаа’’д̇и д̣̇ивасам̣ табаяим̣су. ат̇а нзсам̣ анд̇арз зго д̇хаммиго д̣̇звабуд̇д̇о ‘‘маа имз мама бассанд̇асса нассим̣суу’’д̇и анугамбааяа д̇зсу сааяамаасам̣ бхун̃ж̇ид̇ваа гхарад̣̇ваарз сукагат̇ааяа нисиннзсу саб̣б̣аалан̇гаарабадиман̣д̣ид̇о сагалад̣̇ийбам̣ згобхаасам̣ гад̇ваа уд̇д̇арааяа д̣̇исааяа аагаасз тад̇ваа ‘‘амбхо вад̣дхагий, д̣̇звад̇аа д̇умхаагам̣ гуд̣̇д̇хаа. имасмим̣ таанз маа васид̇т̇а, ид̇о ад̣дхамаасажжаязна хи д̣̇звад̇аа самуд̣̇д̣̇ам̣ уб̣б̣ад̇д̇зд̇ваа саб̣б̣зва д̇умхз гхаад̇зссанд̇и, ид̇о нигкамид̇ваа балааяат̇аа’’д̇и вад̇ваа д̣̇уд̇ияам̣ г̇аат̇амааха –
Aparabhāge sabbepi te tattha sukhaṃ vasantā thūlasarīrā hutvā cintayiṃsu ‘‘ciraṃ pītā no surā, ucchurasena merayaṃ katvā pivissāmā’’ti. Te merayaṃ kāretvā pivitvā madavasena gāyantā naccantā kīḷantā pamattā tattha tattha uccārapassāvaṃ katvā appaṭicchādetvā dīpakaṃ jegucchaṃ paṭikūlaṃ kariṃsu. Devatā ‘‘ime amhākaṃ kīḷāmaṇḍalaṃ paṭikūlaṃ karontī’’ti kujjhitvā ‘‘mahāsamuddaṃ uttarāpetvā dīpakadhovanaṃ karissāmā’’ti mantetvā ‘‘ayaṃ kāḷapakkho, ajja amhākaṃ samāgamo ca bhinno, ito dāni pannarasame divase puṇṇamīuposathadivase candassuggamanavelāya samuddaṃ ubbattetvā sabbepime ghātessāmā’’ti divasaṃ ṭhapayiṃsu. Atha nesaṃ antare eko dhammiko devaputto ‘‘mā ime mama passantassa nassiṃsū’’ti anukampāya tesu sāyamāsaṃ bhuñjitvā gharadvāre sukhakathāya nisinnesu sabbālaṅkārapaṭimaṇḍito sakaladīpaṃ ekobhāsaṃ katvā uttarāya disāya ākāse ṭhatvā ‘‘ambho vaḍḍhakī, devatā tumhākaṃ kuddhā. Imasmiṃ ṭhāne mā vasittha, ito aḍḍhamāsaccayena hi devatā samuddaṃ ubbattetvā sabbeva tumhe ghātessanti, ito nikkhamitvā palāyathā’’ti vatvā dutiyaṃ gāthamāha –
26.
26.
‘‘д̇ибан̃жарад̇д̇уубаг̇ад̇амхи жанд̣̇з, взг̇о махаа хзхид̇и сааг̇арасса;
‘‘Tipañcarattūpagatamhi cande, vego mahā hehiti sāgarassa;
ублависсам̣ д̣̇ийбамимам̣ ул̣аарам̣, маа во вад̇хий г̇ажчат̇а лзн̣аман̃н̃а’’нд̇и.
Uplavissaṃ dīpamimaṃ uḷāraṃ, mā vo vadhī gacchatha leṇamañña’’nti.
д̇ад̇т̇а ублависсанд̇и имам̣ д̣̇ийбагам̣ ублаванд̇о аж̇жход̇т̇аранд̇о абхибхависсад̇и. маа во вад̇хийд̇и со сааг̇аравзг̇о д̇умхз маа вад̇хи.
Tattha uplavissanti imaṃ dīpakaṃ uplavanto ajjhottharanto abhibhavissati. Mā vo vadhīti so sāgaravego tumhe mā vadhi.
ид̇и со д̇зсам̣ оваад̣̇ам̣ д̣̇ад̇ваа ад̇д̇ано таанамзва г̇ад̇о. д̇асмим̣ г̇ад̇з абаро саахасиго гагкал̣о д̣̇звабуд̇д̇о ‘‘имз имасса важанам̣ г̇ахзд̇ваа балааязяяум̣, ахам̣ нзсам̣ г̇аманам̣ ниваарзд̇ваа саб̣б̣збимз махаавинаасам̣ баабзссаамий’’д̇и жинд̇зд̇ваа д̣̇иб̣б̣аалан̇гаарабадиман̣д̣ид̇о сагалад̣̇ийбам̣ згобхаасам̣ гаронд̇о ааг̇анд̇ваа д̣̇агкин̣ааяа д̣̇исааяа аагаасз тад̇ваа ‘‘зго д̣̇звабуд̇д̇о ид̇хааг̇ад̇о, но’’д̇и бужчид̇ваа ‘‘ааг̇ад̇о’’д̇и вуд̇д̇з ‘‘со во гим̣ гат̇зсий’’д̇и вад̇ваа ‘‘имам̣ наама, саамий’’д̇и вуд̇д̇з ‘‘со д̇умхаагам̣ ид̇ха ниваасам̣ на ижчад̇и, д̣̇осзна гат̇зд̇и, д̇умхз ан̃н̃ад̇т̇а аг̇анд̇ваа ид̇хзва васат̇аа’’д̇и вад̇ваа д̣̇вз г̇аат̇аа абхааси –
Iti so tesaṃ ovādaṃ datvā attano ṭhānameva gato. Tasmiṃ gate aparo sāhasiko kakkhaḷo devaputto ‘‘ime imassa vacanaṃ gahetvā palāyeyyuṃ, ahaṃ nesaṃ gamanaṃ nivāretvā sabbepime mahāvināsaṃ pāpessāmī’’ti cintetvā dibbālaṅkārapaṭimaṇḍito sakaladīpaṃ ekobhāsaṃ karonto āgantvā dakkhiṇāya disāya ākāse ṭhatvā ‘‘eko devaputto idhāgato, no’’ti pucchitvā ‘‘āgato’’ti vutte ‘‘so vo kiṃ kathesī’’ti vatvā ‘‘imaṃ nāma, sāmī’’ti vutte ‘‘so tumhākaṃ idha nivāsaṃ na icchati, dosena katheti, tumhe aññattha agantvā idheva vasathā’’ti vatvā dve gāthā abhāsi –
27.
27.
‘‘на ж̇аад̇уяам̣ сааг̇аравааривзг̇о, ублависсам̣ д̣̇ийбамимам̣ ул̣аарам̣;
‘‘Na jātuyaṃ sāgaravārivego, uplavissaṃ dīpamimaṃ uḷāraṃ;
д̇ам̣ мз нимид̇д̇зхи б̣ахуухи д̣̇идтам̣, маа бхзт̇а гим̣ сожат̇а мод̣̇ат̇авхо.
Taṃ me nimittehi bahūhi diṭṭhaṃ, mā bhetha kiṃ socatha modathavho.
28.
28.
‘‘бахууд̇абхагкам̣ б̣ахуаннабаанам̣, бад̇д̇ад̇т̇а ааваасамимам̣ ул̣аарам̣;
‘‘Pahūtabhakkhaṃ bahuannapānaṃ, pattattha āvāsamimaṃ uḷāraṃ;
на во бхаяам̣ бадибассаами гин̃жи, аабуд̇д̇абуд̇д̇зхи бамод̣̇ат̇авхо’’д̇и.
Na vo bhayaṃ paṭipassāmi kiñci, āputtaputtehi pamodathavho’’ti.
д̇ад̇т̇а на ж̇аад̇уяанд̇и на ж̇аад̇у аяам̣. маа бхзт̇аад̇и маа бхааяид̇т̇а. мод̣̇ат̇авход̇и бамод̣̇ид̇аа бийд̇исоманассаж̇аад̇аа хот̇а. аабуд̇д̇абуд̇д̇зхийд̇и яаава буд̇д̇аанамби буд̇д̇зхи бамод̣̇ат̇а, над̇т̇и во имасмим̣ таанз бхаяанд̇и.
Tattha na jātuyanti na jātu ayaṃ. Mā bhethāti mā bhāyittha. Modathavhoti pamoditā pītisomanassajātā hotha. Āputtaputtehīti yāva puttānampi puttehi pamodatha, natthi vo imasmiṃ ṭhāne bhayanti.
звам̣ со имаахи д̣̇вийхи г̇аат̇аахи д̇з ассаасзд̇ваа баггаами. д̇асса багганд̇агаалз д̇хаммигад̣̇звабуд̇д̇асса важанам̣ анаад̣̇ияанд̇о б̣аалавад̣дхагий ‘‘сун̣анд̇у мз, бхонд̇о, важана’’нд̇и сзсавад̣дхагий ааманд̇зд̇ваа бан̃жамам̣ г̇аат̇амааха –
Evaṃ so imāhi dvīhi gāthāhi te assāsetvā pakkāmi. Tassa pakkantakāle dhammikadevaputtassa vacanaṃ anādiyanto bālavaḍḍhakī ‘‘suṇantu me, bhonto, vacana’’nti sesavaḍḍhakī āmantetvā pañcamaṃ gāthamāha –
29.
29.
‘‘яо д̣̇звояам̣ д̣̇агкин̣ааяам̣ д̣̇исааяам̣, кзманд̇и баггосад̇и д̇асса сажжам̣;
‘‘Yo devoyaṃ dakkhiṇāyaṃ disāyaṃ, khemanti pakkosati tassa saccaṃ;
на уд̇д̇аро взд̣̇и бхаяаабхаяасса, маа бхзт̇а гим̣ сожат̇а мод̣̇ат̇авхо’’д̇и.
Na uttaro vedi bhayābhayassa, mā bhetha kiṃ socatha modathavho’’ti.
д̇ад̇т̇а д̣̇агкин̣ааяанд̇и д̣̇агкин̣ааяа, аяамзва ваа баато.
Tattha dakkhiṇāyanti dakkhiṇāya, ayameva vā pāṭho.
д̇ам̣ суд̇ваа расаг̇ид̣̇д̇хаа бан̃жасад̇аа вад̣дхагий д̇асса б̣ааласса важанам̣ аад̣̇ияим̣су. ид̇аро бана бан̣д̣ид̇авад̣дхагий д̇асса важанам̣ анаад̣̇ияанд̇о д̇з вад̣дхагий ааманд̇зд̇ваа жад̇ассо г̇аат̇аа абхааси –
Taṃ sutvā rasagiddhā pañcasatā vaḍḍhakī tassa bālassa vacanaṃ ādiyiṃsu. Itaro pana paṇḍitavaḍḍhakī tassa vacanaṃ anādiyanto te vaḍḍhakī āmantetvā catasso gāthā abhāsi –
30.
30.
‘‘яат̇аа имз виббавад̣̇анд̇и яагкаа, зго бхаяам̣ сам̣сад̇и кзмамзго;
‘‘Yathā ime vippavadanti yakkhā, eko bhayaṃ saṃsati khemameko;
д̇ад̣̇ин̇гха маяхам̣ важанам̣ сун̣аат̇а, киббам̣ лахум̣ маа винассимха саб̣б̣з.
Tadiṅgha mayhaṃ vacanaṃ suṇātha, khippaṃ lahuṃ mā vinassimha sabbe.
31.
31.
‘‘саб̣б̣з самааг̇амма гарома наавам̣, д̣̇он̣им̣ д̣̇ал̣хам̣ саб̣б̣аяанд̇уубабаннам̣;
‘‘Sabbe samāgamma karoma nāvaṃ, doṇiṃ daḷhaṃ sabbayantūpapannaṃ;
сажз аяам̣ д̣̇агкин̣о сажжамааха, могхам̣ бадиггосад̇и уд̇д̇арояам̣;
Sace ayaṃ dakkhiṇo saccamāha, moghaṃ paṭikkosati uttaroyaṃ;
саа жзва но хзхид̇и аабад̣̇ад̇т̇аа, иман̃жа д̣̇ийбам̣ на барижжаж̇зма.
Sā ceva no hehiti āpadatthā, imañca dīpaṃ na pariccajema.
32.
32.
‘‘сажз жа ко уд̇д̇аро сажжамааха, могхам̣ бадиггосад̇и д̣̇агкин̣ояам̣;
‘‘Sace ca kho uttaro saccamāha, moghaṃ paṭikkosati dakkhiṇoyaṃ;
д̇амзва наавам̣ абхируяха саб̣б̣з, звам̣ маяам̣ сод̇т̇и д̇арзму баарам̣.
Tameva nāvaṃ abhiruyha sabbe, evaṃ mayaṃ sotthi taremu pāraṃ.
33.
33.
‘‘на вз суг̇ан̣хам̣ батамзна сздтам̣, ганидтамаабаат̇аг̇ад̇ам̣ г̇ахзд̇ваа;
‘‘Na ve sugaṇhaṃ paṭhamena seṭṭhaṃ, kaniṭṭhamāpāthagataṃ gahetvā;
яо жийд̇ха д̇ажчам̣ бавижзяяа г̇ан̣хад̇и, са вз наро сздтамубзд̇и таана’’нд̇и.
Yo cīdha tacchaṃ paviceyya gaṇhati, sa ve naro seṭṭhamupeti ṭhāna’’nti.
д̇ад̇т̇а виббавад̣̇анд̇ийд̇и ан̃н̃аман̃н̃ам̣ вируд̣̇д̇хам̣ вад̣̇анд̇и. лахунд̇и буримасса ад̇т̇ад̣̇ийбанам̣. д̣̇он̣инд̇и г̇амбхийрам̣ махаанаавам̣. саб̣б̣аяанд̇уубабаннанд̇и саб̣б̣зхи пияаарид̇д̇аад̣̇ийхи яанд̇зхи убабаннам̣. саа жзва но хзхид̇и аабад̣̇ад̇т̇аад̇и саа жа но нааваа бажчааби уббаннааяа аабад̣̇ааяа ад̇т̇аа бхависсад̇и, иман̃жа д̣̇ийбам̣ на барижжаж̇иссаама. д̇арзмууд̇и д̇ариссаама. на вз суг̇ан̣ханд̇и на вз сукзна г̇ан̣хид̇аб̣б̣ам̣. сздтанд̇и уд̇д̇амам̣ д̇ат̇ам̣ сажжам̣. ганидтанд̇и батамаважанам̣ убаад̣̇ааяа бажчимаважанам̣ ганидтам̣ наама. ид̇хааби ‘‘на вз суг̇ан̣ха’’нд̇и анувад̇д̇ад̇зва. ид̣̇ам̣ вуд̇д̇ам̣ ход̇и – амбхо вад̣дхагий, язна гзнажи батамзна вуд̇д̇аважанам̣ ‘‘ид̣̇амзва сздтам̣ д̇ат̇ам̣ сажжа’’нд̇и сукам̣ на г̇ан̣хид̇аб̣б̣амзва, яат̇аа жа д̇ам̣, звам̣ ганидтам̣ г̇ажчаа вуд̇д̇аважанамби ‘‘ид̣̇амзва д̇ат̇ам̣ сажжа’’нд̇и на г̇ан̣хид̇аб̣б̣ам̣. яам̣ бана сод̇ависаяам̣ аабаат̇аг̇ад̇ам̣ ход̇и, д̇ам̣ аабаат̇аг̇ад̇ам̣ г̇ахзд̇ваа яо ид̇ха бан̣д̣ид̇абурисо буримаважанан̃жа бажчимаважанан̃жа бавижзяяа вижинид̇ваа д̇ийрзд̇ваа убабаригкид̇ваа д̇ажчам̣ г̇ан̣хаад̇и, яам̣ д̇ат̇ам̣ сажжам̣ сабхаавабхууд̇ам̣, д̇ад̣̇зва бажжагкам̣ гад̇ваа г̇ан̣хаад̇и. са вз наро сздтамубзд̇и таананд̇и со уд̇д̇амам̣ таанам̣ убзд̇и ад̇хиг̇ажчад̇и винд̣̇ад̇и лабхад̇ийд̇и.
Tattha vippavadantīti aññamaññaṃ viruddhaṃ vadanti. Lahunti purimassa atthadīpanaṃ. Doṇinti gambhīraṃ mahānāvaṃ. Sabbayantūpapannanti sabbehi phiyārittādīhi yantehi upapannaṃ. Sā ceva no hehiti āpadatthāti sā ca no nāvā pacchāpi uppannāya āpadāya atthā bhavissati, imañca dīpaṃ na pariccajissāma. Taremūti tarissāma. Na ve sugaṇhanti na ve sukhena gaṇhitabbaṃ. Seṭṭhanti uttamaṃ tathaṃ saccaṃ. Kaniṭṭhanti paṭhamavacanaṃ upādāya pacchimavacanaṃ kaniṭṭhaṃ nāma. Idhāpi ‘‘na ve sugaṇha’’nti anuvattateva. Idaṃ vuttaṃ hoti – ambho vaḍḍhakī, yena kenaci paṭhamena vuttavacanaṃ ‘‘idameva seṭṭhaṃ tathaṃ sacca’’nti sukhaṃ na gaṇhitabbameva, yathā ca taṃ, evaṃ kaniṭṭhaṃ gacchā vuttavacanampi ‘‘idameva tathaṃ sacca’’nti na gaṇhitabbaṃ. Yaṃ pana sotavisayaṃ āpāthagataṃ hoti, taṃ āpāthagataṃ gahetvā yo idha paṇḍitapuriso purimavacanañca pacchimavacanañca paviceyya vicinitvā tīretvā upaparikkhitvā tacchaṃ gaṇhāti, yaṃ tathaṃ saccaṃ sabhāvabhūtaṃ, tadeva paccakkhaṃ katvā gaṇhāti. Sa ve naro seṭṭhamupeti ṭhānanti so uttamaṃ ṭhānaṃ upeti adhigacchati vindati labhatīti.
со зван̃жа бана вад̇ваа ааха – ‘‘амбхо, маяам̣ д̣̇виннамби д̣̇звад̇аанам̣ важанам̣ гариссаама, наавам̣ д̇аава саж̇ж̇зяяаама. сажз батамасса важанам̣ сажжам̣ бхависсад̇и, д̇ам̣ наавам̣ абхирухид̇ваа балааяиссаама, ат̇а ид̇арасса важанам̣ сажжам̣ бхависсад̇и, наавам̣ згаманд̇з табзд̇ваа ид̇хзва васиссаамаа’’д̇и. звам̣ вуд̇д̇з б̣аалавад̣дхагий ‘‘амбхо, д̇вам̣ уд̣̇агабаад̇ияам̣ сусумаарам̣ бассаси, ад̇ийва д̣̇ийгхам̣ бассаси, батамад̣̇звабуд̇д̇о амхзсу д̣̇осавасзна гат̇зси, бажчимо синзхзнзва, имам̣ зваруубам̣ варад̣̇ийбам̣ бахааяа гухим̣ г̇амиссаама, сажз бана д̇вам̣ г̇анд̇угаамо, д̇ава барисам̣ г̇ан̣хид̇ваа наавам̣ гарохи, амхаагам̣ наавааяа гижжам̣ над̇т̇ий’’д̇и ааха. бан̣д̣ид̇о ад̇д̇ано барисам̣ г̇ахзд̇ваа наавам̣ саж̇ж̇зд̇ваа наавааяа саб̣б̣уубагаран̣аани ааробзд̇ваа сабарисо наавааяа адтааси.
So evañca pana vatvā āha – ‘‘ambho, mayaṃ dvinnampi devatānaṃ vacanaṃ karissāma, nāvaṃ tāva sajjeyyāma. Sace paṭhamassa vacanaṃ saccaṃ bhavissati, taṃ nāvaṃ abhiruhitvā palāyissāma, atha itarassa vacanaṃ saccaṃ bhavissati, nāvaṃ ekamante ṭhapetvā idheva vasissāmā’’ti. Evaṃ vutte bālavaḍḍhakī ‘‘ambho, tvaṃ udakapātiyaṃ susumāraṃ passasi, atīva dīghaṃ passasi, paṭhamadevaputto amhesu dosavasena kathesi, pacchimo sineheneva, imaṃ evarūpaṃ varadīpaṃ pahāya kuhiṃ gamissāma, sace pana tvaṃ gantukāmo, tava parisaṃ gaṇhitvā nāvaṃ karohi, amhākaṃ nāvāya kiccaṃ natthī’’ti āha. Paṇḍito attano parisaṃ gahetvā nāvaṃ sajjetvā nāvāya sabbūpakaraṇāni āropetvā sapariso nāvāya aṭṭhāsi.
д̇ад̇о бун̣н̣амад̣̇ивасз жанд̣̇асса уг̇г̇аманавзлааяа самуд̣̇д̣̇ад̇о ууми уд̇д̇арид̇ваа ж̇аан̣угабамаан̣аа худ̇ваа д̣̇ийбагам̣ д̇ховид̇ваа г̇ад̇аа. бан̣д̣ид̇о самуд̣̇д̣̇асса уд̇д̇аран̣абхаавам̣ н̃ад̇ваа наавам̣ виссаж̇ж̇зси. б̣аалавад̣дхагибагкигаани бан̃жа гуласад̇аани ‘‘самуд̣̇д̣̇ад̇о ууми д̣̇ийбад̇хованад̇т̇ааяа ааг̇ад̇аа, зд̇д̇агамзва зд̇а’’нд̇и гат̇знд̇аа нисийд̣̇им̣су. д̇ад̇о бадибаадияаа гадиббамаан̣аа бурисаббамаан̣аа д̇аалаббамаан̣аа сад̇д̇ад̇аалаббамаан̣аа сааг̇араууми д̣̇ийбагамби вуяхамаанаа ааг̇ан̃чи. бан̣д̣ид̇о убааяагусалад̇ааяа расз алаг̇г̇о сод̇т̇инаа г̇ад̇о, б̣аалавад̣дхагий расаг̇ид̣̇д̇хзна анааг̇ад̇абхаяам̣ анологзнд̇о бан̃жахи гуласад̇зхи сад̣̇д̇хим̣ винаасам̣ бад̇д̇о.
Tato puṇṇamadivase candassa uggamanavelāya samuddato ūmi uttaritvā jāṇukapamāṇā hutvā dīpakaṃ dhovitvā gatā. Paṇḍito samuddassa uttaraṇabhāvaṃ ñatvā nāvaṃ vissajjesi. Bālavaḍḍhakipakkhikāni pañca kulasatāni ‘‘samuddato ūmi dīpadhovanatthāya āgatā, ettakameva eta’’nti kathentā nisīdiṃsu. Tato paṭipāṭiyā kaṭippamāṇā purisappamāṇā tālappamāṇā sattatālappamāṇā sāgaraūmi dīpakampi vuyhamānā āgañchi. Paṇḍito upāyakusalatāya rase alaggo sotthinā gato, bālavaḍḍhakī rasagiddhena anāgatabhayaṃ anolokento pañcahi kulasatehi saddhiṃ vināsaṃ patto.
ид̇о бараа саанусаасаний д̇амад̇т̇ам̣ д̣̇ийбаяамаанаа д̇иссо абхисамб̣уд̣̇д̇хаг̇аат̇аа хонд̇и –
Ito parā sānusāsanī tamatthaṃ dīpayamānā tisso abhisambuddhagāthā honti –
34.
34.
‘‘яат̇ааби д̇з сааг̇аравааримаж̇жхз, сагаммунаа сод̇т̇и вахим̣су ваан̣иж̇аа;
‘‘Yathāpi te sāgaravārimajjhe, sakammunā sotthi vahiṃsu vāṇijā;
анааг̇ад̇ад̇т̇ам̣ бадивиж̇жхияаана, аббамби наажжзд̇и са бхуурибан̃н̃о.
Anāgatatthaṃ paṭivijjhiyāna, appampi nācceti sa bhūripañño.
35.
35.
‘‘б̣аалаа жа мохзна расаануг̇ид̣̇д̇хаа, анааг̇ад̇ам̣ аббадивиж̇жхияад̇т̇ам̣;
‘‘Bālā ca mohena rasānugiddhā, anāgataṃ appaṭivijjhiyatthaṃ;
бажжуббаннз сийд̣̇анд̇и ад̇т̇аж̇аад̇з, самуд̣̇д̣̇амаж̇жхз яат̇аа д̇з мануссаа.
Paccuppanne sīdanti atthajāte, samuddamajjhe yathā te manussā.
36.
36.
‘‘анааг̇ад̇ам̣ бадигаяираат̇а гижжам̣, ‘маа мам̣ гижжам̣ гижжагаалз б̣яад̇хзси’;
‘‘Anāgataṃ paṭikayirātha kiccaṃ, ‘mā maṃ kiccaṃ kiccakāle byadhesi’;
д̇ам̣ д̇аад̣̇исам̣ бадигад̇агижжагаарим̣, на д̇ам̣ гижжам̣ гижжагаалз б̣яад̇хзд̇ий’’д̇и.
Taṃ tādisaṃ paṭikatakiccakāriṃ, na taṃ kiccaṃ kiccakāle byadhetī’’ti.
д̇ад̇т̇а сагаммунаад̇и анааг̇ад̇абхаяам̣ д̣̇исваа бурзд̇арам̣ гад̇зна ад̇д̇ано гаммзна. сод̇т̇и вахим̣сууд̇и кзмзна г̇амим̣су. ваан̣иж̇аад̇и самуд̣̇д̣̇з вижаран̣абхаавзна вад̣дхагий вуд̇д̇аа. бадивиж̇жхияаанаад̇и звам̣, бхигкавз , батамад̇арам̣ гад̇д̇аб̣б̣ам̣ анааг̇ад̇ам̣ ад̇т̇ам̣ бадивиж̇жхид̇ваа ид̇халогз бхуурибан̃н̃о гулабуд̇д̇о аббамад̇д̇агамби ад̇д̇ано ад̇т̇ам̣ на ажжзд̇и наад̇ивад̇д̇ад̇и, на хаабзд̇ийд̇и ад̇т̇о. аббадивиж̇жхияад̇т̇анд̇и аббадивиж̇жхид̇ваа ад̇т̇ам̣, батамамзва гад̇д̇аб̣б̣ам̣ агад̇ваад̇и ад̇т̇о. бажжуббаннзд̇и яад̣̇аа д̇ам̣ анааг̇ад̇ам̣ ад̇т̇аж̇аад̇ам̣ уббаж̇ж̇ад̇и, д̇ад̣̇аа д̇асмим̣ бажжуббаннз сийд̣̇анд̇и, ад̇т̇з ж̇аад̇з ад̇д̇ано бад̇идтам̣ на лабханд̇и, самуд̣̇д̣̇з д̇з б̣аалавад̣дхагий мануссаа вияа винаасам̣ баабун̣анд̇и.
Tattha sakammunāti anāgatabhayaṃ disvā puretaraṃ katena attano kammena. Sotthi vahiṃsūti khemena gamiṃsu. Vāṇijāti samudde vicaraṇabhāvena vaḍḍhakī vuttā. Paṭivijjhiyānāti evaṃ, bhikkhave , paṭhamataraṃ kattabbaṃ anāgataṃ atthaṃ paṭivijjhitvā idhaloke bhūripañño kulaputto appamattakampi attano atthaṃ na acceti nātivattati, na hāpetīti attho. Appaṭivijjhiyatthanti appaṭivijjhitvā atthaṃ, paṭhamameva kattabbaṃ akatvāti attho. Paccuppanneti yadā taṃ anāgataṃ atthajātaṃ uppajjati, tadā tasmiṃ paccuppanne sīdanti, atthe jāte attano patiṭṭhaṃ na labhanti, samudde te bālavaḍḍhakī manussā viya vināsaṃ pāpuṇanti.
анааг̇ад̇анд̇и бхигкавз, бан̣д̣ид̇абурисо анааг̇ад̇ам̣ батамад̇арам̣ гад̇д̇аб̣б̣агижжам̣ самбарааяигам̣ ваа д̣̇идтад̇хаммигам̣ ваа бадигаяираат̇а, бурзд̇арамзва гарзяяа. гим̣гааран̣аа? маа мам̣ гижжам̣ гижжагаалз б̣яад̇хзси, бурз гад̇д̇аб̣б̣ан̃хи бурз агаяирамаанам̣ бажчаа бажжуббаннабхааваббад̇д̇ам̣ ад̇д̇ано гижжагаалз гааяажид̇д̇ааб̣аад̇хзна б̣яад̇хзд̇и, д̇ам̣ мам̣ маа б̣яад̇хзсийд̇и батамамзва нам̣ бан̣д̣ид̇о гарзяяа. д̇ам̣ д̇аад̣̇исанд̇и яат̇аа бан̣д̣ид̇ам̣ бурисам̣. бадигад̇агижжагааринд̇и бадигажжзва гад̇д̇аб̣б̣агижжагааринам̣. д̇ам̣ гижжам̣ гижжагаалзд̇и анааг̇ад̇ам̣ гижжам̣ гаяирамаанам̣ бажчаа бажжуббаннабхааваббад̇д̇ам̣ ад̇д̇ано гижжагаалз гааяажид̇д̇ааб̣аад̇хагаалз д̇аад̣̇исам̣ буримам̣ на б̣яад̇хзд̇и на б̣аад̇хад̇и. гасмаа? бурзязва гад̇ад̇д̇аад̇и.
Anāgatanti bhikkhave, paṇḍitapuriso anāgataṃ paṭhamataraṃ kattabbakiccaṃ samparāyikaṃ vā diṭṭhadhammikaṃ vā paṭikayirātha, puretarameva kareyya. Kiṃkāraṇā? Mā maṃ kiccaṃ kiccakāle byadhesi, pure kattabbañhi pure akayiramānaṃ pacchā paccuppannabhāvappattaṃ attano kiccakāle kāyacittābādhena byadheti, taṃ maṃ mā byadhesīti paṭhamameva naṃ paṇḍito kareyya. Taṃ tādisanti yathā paṇḍitaṃ purisaṃ. Paṭikatakiccakārinti paṭikacceva kattabbakiccakārinaṃ. Taṃ kiccaṃ kiccakāleti anāgataṃ kiccaṃ kayiramānaṃ pacchā paccuppannabhāvappattaṃ attano kiccakāle kāyacittābādhakāle tādisaṃ purimaṃ na byadheti na bādhati. Kasmā? Pureyeva katattāti.
сад̇т̇аа имам̣ д̇хаммад̣̇зсанам̣ аахарид̇ваа ‘‘на, бхигкавз, ид̣̇аанзва, буб̣б̣зби д̣̇звад̣̇ад̇д̇о бажжуббаннасукз лаг̇г̇о анааг̇ад̇абхаяам̣ анологзд̇ваа сабарисо винаасам̣ бад̇д̇о’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа б̣аалавад̣дхагий д̣̇звад̣̇ад̇д̇о ахоси, д̣̇агкин̣ад̣̇исааяа тид̇о ад̇хаммигад̣̇звабуд̇д̇о гогаалиго, уд̇д̇арад̣̇исааяа тид̇о д̇хаммигад̣̇звабуд̇д̇о саарибуд̇д̇о, бан̣д̣ид̇авад̣дхагий бана ахамзва ахоси’’нд̇и.
Satthā imaṃ dhammadesanaṃ āharitvā ‘‘na, bhikkhave, idāneva, pubbepi devadatto paccuppannasukhe laggo anāgatabhayaṃ anoloketvā sapariso vināsaṃ patto’’ti vatvā jātakaṃ samodhānesi – ‘‘tadā bālavaḍḍhakī devadatto ahosi, dakkhiṇadisāya ṭhito adhammikadevaputto kokāliko, uttaradisāya ṭhito dhammikadevaputto sāriputto, paṇḍitavaḍḍhakī pana ahameva ahosi’’nti.
самуд̣̇д̣̇аваан̣иж̇аж̇аад̇агаван̣н̣анаа д̇ад̇ияаа.
Samuddavāṇijajātakavaṇṇanā tatiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 466. самуд̣̇д̣̇аваан̣иж̇аж̇аад̇агам̣ • 466. Samuddavāṇijajātakaṃ
