| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๔๓๖. สมุคฺคชาตกํ (๑๐)
436. Samuggajātakaṃ (10)
๘๗.
87.
กุโต นุ อาคจฺฉถ โภ ตโย ชนา, สฺวาคตา เอถ 1 นิสีทถาสเน;
Kuto nu āgacchatha bho tayo janā, svāgatā etha 2 nisīdathāsane;
กจฺจิตฺถ โภโนฺต กุสลํ อนามยํ, จิรสฺสมพฺภาคมนํ หิ โว อิธฯ
Kaccittha bhonto kusalaṃ anāmayaṃ, cirassamabbhāgamanaṃ hi vo idha.
๘๘.
88.
อหเมว เอโก อิธ มชฺช ปโตฺต, น จาปิ เม ทุติโย โกจิ วิชฺชติ;
Ahameva eko idha majja patto, na cāpi me dutiyo koci vijjati;
กิเมว สนฺธาย เต ภาสิตํ อิเส, ‘‘กุโต นุ อาคจฺฉถ โภ ตโย ชนา’’ฯ
Kimeva sandhāya te bhāsitaṃ ise, ‘‘kuto nu āgacchatha bho tayo janā’’.
๘๙.
89.
ตุวญฺจ เอโก ภริยา จ เต ปิยา, สมุคฺคปกฺขิตฺตนิกิณฺณมนฺตเร ;
Tuvañca eko bhariyā ca te piyā, samuggapakkhittanikiṇṇamantare ;
๙๐.
90.
สํวิคฺครูโป อิสินา วิยากโต 7, โส ทานโว ตตฺถ สมุคฺคมุคฺคิลิ;
Saṃviggarūpo isinā viyākato 8, so dānavo tattha samuggamuggili;
อทฺทกฺขิ ภริยํ สุจิ มาลธารินิํ, วายุสฺส ปุเตฺตน สหา ตหิํ รตํฯ
Addakkhi bhariyaṃ suci māladhāriniṃ, vāyussa puttena sahā tahiṃ rataṃ.
๙๑.
91.
สุทิฎฺฐรูปมุคฺคตปานุวตฺตินา 9, หีนา นรา เย ปมทาวสํ คตา;
Sudiṭṭharūpamuggatapānuvattinā 10, hīnā narā ye pamadāvasaṃ gatā;
ยถา หเว ปาณริเวตฺถ รกฺขิตา, ทุฎฺฐา มยี อญฺญมภิปฺปโมทยิฯ
Yathā have pāṇarivettha rakkhitā, duṭṭhā mayī aññamabhippamodayi.
๙๒.
92.
ทิวา จ รโตฺต จ มยา อุปฎฺฐิตา, ตปสฺสินา โชติริวา วเน วสํ;
Divā ca ratto ca mayā upaṭṭhitā, tapassinā jotirivā vane vasaṃ;
สา ธมฺมมุกฺกมฺม อธมฺมมาจริ, อกิริยรูโป ปมทาหิ สนฺถโวฯ
Sā dhammamukkamma adhammamācari, akiriyarūpo pamadāhi santhavo.
๙๓.
93.
สรีรมชฺฌมฺหิ ฐิตาติมญฺญหํ, มยฺหํ อยนฺติ อสติํ อสญฺญตํ;
Sarīramajjhamhi ṭhitātimaññahaṃ, mayhaṃ ayanti asatiṃ asaññataṃ;
สา ธมฺมมุกฺกมฺม อธมฺมมาจริ, อกิริยรูโป ปมทาหิ สนฺถโวฯ
Sā dhammamukkamma adhammamācari, akiriyarūpo pamadāhi santhavo.
๙๔.
94.
สุรกฺขิตํ เมติ กถํ นุ วิสฺสเส, อเนกจิตฺตาสุ น หตฺถิ 11 รกฺขณา;
Surakkhitaṃ meti kathaṃ nu vissase, anekacittāsu na hatthi 12 rakkhaṇā;
เอตา หิ ปาตาลปปาตสนฺนิภา, เอตฺถปฺปมโตฺต พฺยสนํ นิคจฺฉติฯ
Etā hi pātālapapātasannibhā, etthappamatto byasanaṃ nigacchati.
๙๕.
95.
ตสฺมา หิ เต สุขิโน วีตโสกา, เย มาตุคาเมหิ จรนฺติ นิสฺสฎา;
Tasmā hi te sukhino vītasokā, ye mātugāmehi caranti nissaṭā;
เอตํ สิวํ อุตฺตมมาภิปตฺถยํ, น มาตุคาเมหิ กเรยฺย สนฺถวนฺติฯ
Etaṃ sivaṃ uttamamābhipatthayaṃ, na mātugāmehi kareyya santhavanti.
สมุคฺคชาตกํ ทสมํฯ
Samuggajātakaṃ dasamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๔๓๖] ๑๐. สมุคฺคชาตกวณฺณนา • [436] 10. Samuggajātakavaṇṇanā
