| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[436] 10. самуг̇г̇аж̇аад̇агаван̣н̣анаа
[436] 10. Samuggajātakavaṇṇanā
гуд̇о ну ааг̇ажчат̇аад̇и ид̣̇ам̣ сад̇т̇аа ж̇зд̇аванз вихаранд̇о угган̣тид̇абхигкум̣ аараб̣бха гат̇зси. д̇ан̃хи сад̇т̇аа ‘‘сажжам̣ гира д̇вам̣ бхигку угган̣тид̇осий’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘гасмаа бхигку маад̇уг̇аамам̣ бад̇т̇зси, маад̇уг̇аамо наамзса асаб̣бхо агад̇ан̃н̃уу, буб̣б̣з д̣̇аанаварагкасаа г̇илид̇ваа гужчинаа барихаранд̇ааби маад̇уг̇аамам̣ рагкид̇ум̣ згабурисаниссид̇ам̣ гаад̇ум̣ наасагким̣су, д̇вам̣ гат̇ам̣ сагкиссасий’’д̇и вад̇ваа ад̇ийд̇ам̣ аахари.
Kutonu āgacchathāti idaṃ satthā jetavane viharanto ukkaṇṭhitabhikkhuṃ ārabbha kathesi. Tañhi satthā ‘‘saccaṃ kira tvaṃ bhikkhu ukkaṇṭhitosī’’ti pucchitvā ‘‘saccaṃ, bhante’’ti vutte ‘‘kasmā bhikkhu mātugāmaṃ patthesi, mātugāmo nāmesa asabbho akataññū, pubbe dānavarakkhasā gilitvā kucchinā pariharantāpi mātugāmaṃ rakkhituṃ ekapurisanissitaṃ kātuṃ nāsakkhiṃsu, tvaṃ kathaṃ sakkhissasī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о гаамз бахааяа химаванд̇ам̣ бависид̇ваа исибаб̣б̣аж̇ж̇ам̣ баб̣б̣аж̇ид̇ваа абхин̃н̃аа жа самаабад̇д̇ияо жа ниб̣б̣ад̇д̇зд̇ваа палаапалзна яаабзнд̇о вихааси. д̇асса бан̣н̣асаалааяа авид̣̇уурз зго д̣̇аанаварагкасо васад̇и. со анд̇аранд̇араа махаасад̇д̇ам̣ убасан̇гамид̇ваа д̇хаммам̣ сун̣аад̇и, адавияам̣ бана мануссаанам̣ сан̃жаран̣амаг̇г̇з тад̇ваа ааг̇ад̇ааг̇ад̇з мануссз г̇ахзд̇ваа каад̣̇ад̇и. д̇асмим̣ гаалз згаа гаасирадтз гулад̇хийд̇аа уд̇д̇амаруубад̇хараа ан̃н̃ад̇арасмим̣ бажжанд̇аг̇аамз нивуд̇т̇аа ход̇и. д̇ассаа згад̣̇ивасам̣ маад̇аабид̇уунам̣ д̣̇ассанад̇т̇ааяа г̇анд̇ваа бажжааг̇аманагаалз бариваарамануссз д̣̇исваа со д̣̇аанаво бхзраваруубзна багканд̣̇и. мануссаа бхийд̇аа г̇ахид̇аг̇ахид̇аавуд̇хаани чад̣д̣зд̇ваа балааяим̣су. д̣̇аанаво яаанз нисиннам̣ абхируубам̣ маад̇уг̇аамам̣ д̣̇исваа бадиб̣ад̣̇д̇хажид̇д̇о худ̇ваа д̇ам̣ ад̇д̇ано г̇ухам̣ нзд̇ваа бхарияам̣ агааси. д̇ад̇о бадтааяа саббид̇злад̇ан̣д̣уламажчамам̣саад̣̇ийни жзва мад̇хурапалаапалаани жа аахарид̇ваа д̇ам̣ босзси, вад̇т̇аалан̇гаарзхи жа нам̣ алан̇гарид̇ваа рагкан̣ад̇т̇ааяа згасмим̣ гаран̣д̣агз багкибид̇ваа гаран̣д̣агам̣ г̇илид̇ваа гужчинаа барихарад̇и. со згад̣̇ивасам̣ нхааяид̇угаамад̇ааяа згам̣ сарам̣ г̇анд̇ваа гаран̣д̣агам̣ уг̇г̇илид̇ваа д̇ам̣ д̇ад̇о нийхарид̇ваа нхаабзд̇ваа вилимбзд̇ваа алан̇гаарзд̇ваа ‘‘т̇огам̣ д̇ава сарийрам̣ уд̇ум̣ г̇ан̣хаабзхий’’д̇и д̇ам̣ гаран̣д̣агасамийбз табзд̇ваа саяам̣ нхаанад̇ид̇т̇ам̣ од̇арид̇ваа д̇ам̣ анаасан̇гамаано т̇огам̣ д̣̇уурам̣ г̇анд̇ваа нхааяи.
Atīte bārāṇasiyaṃ brahmadatte rajjaṃ kārente bodhisatto kāme pahāya himavantaṃ pavisitvā isipabbajjaṃ pabbajitvā abhiññā ca samāpattiyo ca nibbattetvā phalāphalena yāpento vihāsi. Tassa paṇṇasālāya avidūre eko dānavarakkhaso vasati. So antarantarā mahāsattaṃ upasaṅkamitvā dhammaṃ suṇāti, aṭaviyaṃ pana manussānaṃ sañcaraṇamagge ṭhatvā āgatāgate manusse gahetvā khādati. Tasmiṃ kāle ekā kāsiraṭṭhe kuladhītā uttamarūpadharā aññatarasmiṃ paccantagāme nivutthā hoti. Tassā ekadivasaṃ mātāpitūnaṃ dassanatthāya gantvā paccāgamanakāle parivāramanusse disvā so dānavo bheravarūpena pakkhandi. Manussā bhītā gahitagahitāvudhāni chaḍḍetvā palāyiṃsu. Dānavo yāne nisinnaṃ abhirūpaṃ mātugāmaṃ disvā paṭibaddhacitto hutvā taṃ attano guhaṃ netvā bhariyaṃ akāsi. Tato paṭṭhāya sappitelataṇḍulamacchamaṃsādīni ceva madhuraphalāphalāni ca āharitvā taṃ posesi, vatthālaṅkārehi ca naṃ alaṅkaritvā rakkhaṇatthāya ekasmiṃ karaṇḍake pakkhipitvā karaṇḍakaṃ gilitvā kucchinā pariharati. So ekadivasaṃ nhāyitukāmatāya ekaṃ saraṃ gantvā karaṇḍakaṃ uggilitvā taṃ tato nīharitvā nhāpetvā vilimpetvā alaṅkāretvā ‘‘thokaṃ tava sarīraṃ utuṃ gaṇhāpehī’’ti taṃ karaṇḍakasamīpe ṭhapetvā sayaṃ nhānatitthaṃ otaritvā taṃ anāsaṅkamāno thokaṃ dūraṃ gantvā nhāyi.
д̇асмим̣ самаяз вааяуссабуд̇д̇о наама виж̇ж̇аад̇харо саннад̣̇д̇хакаг̇г̇о аагаасзна г̇ажчад̇и. саа д̇ам̣ д̣̇исваа ‘‘зхий’’д̇и хад̇т̇амуд̣̇д̣̇ам̣ агааси, виж̇ж̇аад̇харо киббам̣ од̇ари. ат̇а нам̣ саа гаран̣д̣агз багкибид̇ваа д̣̇аанавасса ааг̇аманам̣ ологзнд̇ий гаран̣д̣агуубари нисийд̣̇ид̇ваа д̇ам̣ ааг̇ажчанд̇ам̣ д̣̇исваа д̇асса ад̇д̇аанам̣ д̣̇ассзд̇ваа д̇асмим̣ гаран̣д̣агасамийбам̣ асамбад̇д̇зязва гаран̣д̣агам̣ виварид̇ваа анд̇о бависид̇ваа виж̇ж̇аад̇харасса убари нибаж̇ж̇ид̇ваа ад̇д̇ано саадагам̣ бааруби. д̣̇аанаво ааг̇анд̇ваа гаран̣д̣агам̣ асод̇хзд̇ваа ‘‘маад̇уг̇аамоязва мз’’д̇и сан̃н̃ааяа гаран̣д̣агам̣ г̇илид̇ваа ад̇д̇ано г̇ухам̣ г̇ажчанд̇о анд̇араамаг̇г̇з жинд̇зси ‘‘д̇аабасо мз жирам̣ д̣̇идто, аж̇ж̇а д̇аава нам̣ г̇анд̇ваа ванд̣̇иссаамий’’д̇и. со д̇асса санд̇игам̣ аг̇амааси. д̇аабасоби нам̣ д̣̇уурад̇ова ааг̇ажчанд̇ам̣ д̣̇исваа д̣̇виннам̣ ж̇анаанам̣ гужчиг̇ад̇абхаавам̣ н̃ад̇ваа саллабанд̇о батамам̣ г̇аат̇амааха –
Tasmiṃ samaye vāyussaputto nāma vijjādharo sannaddhakhaggo ākāsena gacchati. Sā taṃ disvā ‘‘ehī’’ti hatthamuddaṃ akāsi, vijjādharo khippaṃ otari. Atha naṃ sā karaṇḍake pakkhipitvā dānavassa āgamanaṃ olokentī karaṇḍakūpari nisīditvā taṃ āgacchantaṃ disvā tassa attānaṃ dassetvā tasmiṃ karaṇḍakasamīpaṃ asampatteyeva karaṇḍakaṃ vivaritvā anto pavisitvā vijjādharassa upari nipajjitvā attano sāṭakaṃ pārupi. Dānavo āgantvā karaṇḍakaṃ asodhetvā ‘‘mātugāmoyeva me’’ti saññāya karaṇḍakaṃ gilitvā attano guhaṃ gacchanto antarāmagge cintesi ‘‘tāpaso me ciraṃ diṭṭho, ajja tāva naṃ gantvā vandissāmī’’ti. So tassa santikaṃ agamāsi. Tāpasopi naṃ dūratova āgacchantaṃ disvā dvinnaṃ janānaṃ kucchigatabhāvaṃ ñatvā sallapanto paṭhamaṃ gāthamāha –
87.
87.
‘‘гуд̇о ну ааг̇ажчат̇а бхо д̇аяо ж̇анаа, свааг̇ад̇аа зт̇а нисийд̣̇ат̇аасанз;
‘‘Kuto nu āgacchatha bho tayo janā, svāgatā etha nisīdathāsane;
гажжид̇т̇а, бхонд̇о гусалам̣ анаамаяам̣, жирассамаб̣бхааг̇аманан̃хи во ид̇хаа’’д̇и.
Kaccittha, bhonto kusalaṃ anāmayaṃ, cirassamabbhāgamanañhi vo idhā’’ti.
д̇ад̇т̇а бход̇и аалабанам̣. гажжид̇т̇аад̇и гажжи хот̇а бхават̇а виж̇ж̇ат̇а. бхонд̇од̇и буна аалабанд̇о ааха. гусалам̣ анаамаяанд̇и гажжи д̇умхаагам̣ гусалам̣ аарог̇яам̣. жирассамаб̣бхааг̇аманан̃хи во ид̇хаад̇и аж̇ж̇а д̇умхаагам̣ ид̇ха аб̣бхааг̇аманан̃жа жирам̣ ж̇аад̇ам̣.
Tattha bhoti ālapanaṃ. Kaccitthāti kacci hotha bhavatha vijjatha. Bhontoti puna ālapanto āha. Kusalaṃ anāmayanti kacci tumhākaṃ kusalaṃ ārogyaṃ. Cirassamabbhāgamanañhi vo idhāti ajja tumhākaṃ idha abbhāgamanañca ciraṃ jātaṃ.
д̇ам̣ суд̇ваа д̣̇аанаво ‘‘ахам̣ имасса д̇аабасасса санд̇игам̣ згагова ааг̇ад̇о, аяан̃жа д̇аабасо ‘д̇аяо ж̇анаа’д̇и вад̣̇ад̇и, гим̣ наамзса гат̇зд̇и, гим̣ ну ко сабхаавам̣ н̃ад̇ваа гат̇зд̇и, уд̣̇ааху уммад̇д̇аго худ̇ваа вилабад̇ий’’д̇и жинд̇зд̇ваа д̇аабасам̣ убасан̇гамид̇ваа ванд̣̇ид̇ваа згаманд̇ам̣ нисийд̣̇ид̇ваа д̇зна сад̣̇д̇хим̣ саллабанд̇о д̣̇уд̇ияам̣ г̇аат̇амааха –
Taṃ sutvā dānavo ‘‘ahaṃ imassa tāpasassa santikaṃ ekakova āgato, ayañca tāpaso ‘tayo janā’ti vadati, kiṃ nāmesa katheti, kiṃ nu kho sabhāvaṃ ñatvā katheti, udāhu ummattako hutvā vilapatī’’ti cintetvā tāpasaṃ upasaṅkamitvā vanditvā ekamantaṃ nisīditvā tena saddhiṃ sallapanto dutiyaṃ gāthamāha –
88.
88.
‘‘ахамзва зго ид̇ха маж̇ж̇а бад̇д̇о, на жааби мз д̣̇уд̇ияо гожи виж̇ж̇ад̇и;
‘‘Ahameva eko idha majja patto, na cāpi me dutiyo koci vijjati;
гимзва санд̇хааяа д̇з бхаасид̇ам̣ исз, гуд̇о ну ааг̇ажчат̇а бхо д̇аяо ж̇анаа’’д̇и.
Kimeva sandhāya te bhāsitaṃ ise, kuto nu āgacchatha bho tayo janā’’ti.
д̇ад̇т̇а ид̇ха маж̇ж̇аад̇и ид̇ха аж̇ж̇а. гимзва санд̇хааяа д̇з бхаасид̇ам̣ исзд̇и бханд̇з, иси гим̣ наамзд̇ам̣ санд̇хааяа д̇аяаа бхаасид̇ам̣, баагадам̣ д̇аава мз гад̇ваа гат̇зхийд̇и.
Tattha idha majjāti idha ajja. Kimeva sandhāya te bhāsitaṃ iseti bhante, isi kiṃ nāmetaṃ sandhāya tayā bhāsitaṃ, pākaṭaṃ tāva me katvā kathehīti.
д̇аабасо ‘‘згам̣сзнзваавусо сод̇угаамосий’’д̇и бужчид̇ваа ‘‘аама, бханд̇з’’д̇и вуд̇д̇з ‘‘д̇зна хи сун̣аахий’’д̇и вад̇ваа д̇ад̇ияам̣ г̇аат̇амааха –
Tāpaso ‘‘ekaṃsenevāvuso sotukāmosī’’ti pucchitvā ‘‘āma, bhante’’ti vutte ‘‘tena hi suṇāhī’’ti vatvā tatiyaṃ gāthamāha –
89.
89.
‘‘д̇уван̃жа зго бхарияаа жа д̇з бияаа, самуг̇г̇абагкид̇д̇анигин̣н̣аманд̇арз;
‘‘Tuvañca eko bhariyā ca te piyā, samuggapakkhittanikiṇṇamantare;
саа рагкид̇аа гужчиг̇ад̇аава д̇з сад̣̇аа, вааяуссабуд̇д̇зна сахаа д̇ахим̣ рад̇аа’’д̇и.
Sā rakkhitā kucchigatāva te sadā, vāyussaputtena sahā tahiṃ ratā’’ti.
д̇ад̇т̇а д̇уван̃жа згод̇и батамам̣ д̇аава д̇вам̣ зго ж̇ано. багкид̇д̇анигин̣н̣аманд̇арзд̇и багкид̇д̇аанигин̣н̣аанд̇арз д̇ам̣ д̇ад̇т̇а бхарияам̣ рагкид̇угаамзна сад̣̇аа д̇аяаа самуг̇г̇з багкид̇д̇аа сад̣̇д̇хим̣ самуг̇г̇зна нигин̣н̣аа анд̇арз, анд̇огужчияам̣ табид̇аад̇и ад̇т̇о. вааяуссабуд̇д̇зна сахаад̇и звам̣наамагзна виж̇ж̇аад̇харзна сад̣̇д̇хим̣. д̇ахим̣ рад̇аад̇и д̇ад̇т̇а д̇ава анд̇огужчияан̃н̃зва гилзсарад̇ияаа рад̇аа. со д̣̇аани д̇вам̣ маад̇уг̇аамам̣ ‘‘згам̣ бурисаниссид̇ам̣ гариссаамий’’д̇и гужчинааби барихаранд̇о д̇ассаа ж̇аарам̣ угкибид̇ваа жарасийд̇и.
Tattha tuvañca ekoti paṭhamaṃ tāva tvaṃ eko jano. Pakkhittanikiṇṇamantareti pakkhittānikiṇṇaantare taṃ tattha bhariyaṃ rakkhitukāmena sadā tayā samugge pakkhittā saddhiṃ samuggena nikiṇṇā antare, antokucchiyaṃ ṭhapitāti attho. Vāyussaputtena sahāti evaṃnāmakena vijjādharena saddhiṃ. Tahiṃ ratāti tattha tava antokucchiyaññeva kilesaratiyā ratā. So dāni tvaṃ mātugāmaṃ ‘‘ekaṃ purisanissitaṃ karissāmī’’ti kucchināpi pariharanto tassā jāraṃ ukkhipitvā carasīti.
д̇ам̣ суд̇ваа д̣̇аанаво ‘‘виж̇ж̇аад̇хараа наама б̣ахумааяаа хонд̇и, сажасса каг̇г̇о хад̇т̇аг̇ад̇о бхависсад̇и, гужчим̣ мз паалзд̇вааби балааяиссад̇ий’’д̇и бхийд̇ад̇асид̇о худ̇ваа киббам̣ гаран̣д̣агам̣ уг̇г̇илид̇ваа бурад̇о табзси. сад̇т̇аа абхисамб̣уд̣̇д̇хо худ̇ваа д̇ам̣ бавад̇д̇им̣ багаасзнд̇о жад̇уд̇т̇ам̣ г̇аат̇амааха –
Taṃ sutvā dānavo ‘‘vijjādharā nāma bahumāyā honti, sacassa khaggo hatthagato bhavissati, kucchiṃ me phāletvāpi palāyissatī’’ti bhītatasito hutvā khippaṃ karaṇḍakaṃ uggilitvā purato ṭhapesi. Satthā abhisambuddho hutvā taṃ pavattiṃ pakāsento catutthaṃ gāthamāha –
90.
90.
‘‘сам̣виг̇г̇аруубо исинаа вияаагад̇о, со д̣̇аанаво д̇ад̇т̇а самуг̇г̇амуг̇г̇или;
‘‘Saṃviggarūpo isinā viyākato, so dānavo tattha samuggamuggili;
ад̣̇д̣̇агки бхарияам̣ сужимаалад̇хаариним̣, вааяуссабуд̇д̇зна сахаа д̇ахим̣ рад̇а’’нд̇и.
Addakkhi bhariyaṃ sucimāladhāriniṃ, vāyussaputtena sahā tahiṃ rata’’nti.
д̇ад̇т̇а ад̣̇д̣̇агкийд̇и со гаран̣д̣агам̣ виварид̇ваа ад̣̇д̣̇аса.
Tattha addakkhīti so karaṇḍakaṃ vivaritvā addasa.
гаран̣д̣агз бана вивадамад̇д̇зязва виж̇ж̇аад̇харо виж̇ж̇ам̣ ж̇аббид̇ваа каг̇г̇ам̣ г̇ахзд̇ваа аагаасам̣ багканд̣̇и. д̇ам̣ д̣̇исваа д̣̇аанаво махаасад̇д̇асса д̇уссид̇ваа т̇уд̇ибуб̣б̣ан̇г̇амаа сзсаг̇аат̇аа абхааси –
Karaṇḍake pana vivaṭamatteyeva vijjādharo vijjaṃ jappitvā khaggaṃ gahetvā ākāsaṃ pakkhandi. Taṃ disvā dānavo mahāsattassa tussitvā thutipubbaṅgamā sesagāthā abhāsi –
91.
91.
‘‘суд̣̇идтаруубамуг̇г̇ад̇абаанувад̇д̇инаа, хийнаа нараа яз бамад̣̇аавасам̣ г̇ад̇аа;
‘‘Sudiṭṭharūpamuggatapānuvattinā, hīnā narā ye pamadāvasaṃ gatā;
яат̇аа хавз баан̣аривзд̇т̇а рагкид̇аа, д̣̇удтаа маяий ан̃н̃амабхиббамод̣̇аяи.
Yathā have pāṇarivettha rakkhitā, duṭṭhā mayī aññamabhippamodayi.
92.
92.
‘‘д̣̇иваа жа рад̇д̇о жа маяаа убадтид̇аа, д̇абассинаа ж̇од̇ириваа ванз васам̣;
‘‘Divā ca ratto ca mayā upaṭṭhitā, tapassinā jotirivā vane vasaṃ;
саа д̇хаммамуггамма ад̇хаммамаажари, агирияаруубо бамад̣̇аахи сант̇аво.
Sā dhammamukkamma adhammamācari, akiriyarūpo pamadāhi santhavo.
93.
93.
‘‘сарийрамаж̇жхамхи тид̇аад̇и ман̃н̃ахам̣, маяхам̣ аяанд̇и асад̇им̣ асан̃н̃ад̇ам̣;
‘‘Sarīramajjhamhi ṭhitāti maññahaṃ, mayhaṃ ayanti asatiṃ asaññataṃ;
саа д̇хаммамуггамма ад̇хаммамаажари, агирияаруубо бамад̣̇аахи сант̇аво.
Sā dhammamukkamma adhammamācari, akiriyarūpo pamadāhi santhavo.
94.
94.
‘‘сурагкид̇ам̣ мзд̇и гат̇ам̣ ну виссасз, анзгажид̇д̇аасу на хад̇т̇и рагкан̣аа;
‘‘Surakkhitaṃ meti kathaṃ nu vissase, anekacittāsu na hatthi rakkhaṇā;
зд̇аа хи баад̇аалабабаад̇асаннибхаа, зд̇т̇аббамад̇д̇о б̣яасанам̣ ниг̇ажчад̇и.
Etā hi pātālapapātasannibhā, etthappamatto byasanaṃ nigacchati.
95.
95.
‘‘д̇асмаа хи д̇з сукино вийд̇асогаа, яз маад̇уг̇аамзхи жаранд̇и ниссадаа;
‘‘Tasmā hi te sukhino vītasokā, ye mātugāmehi caranti nissaṭā;
зд̇ам̣ сивам̣ уд̇д̇амамаабхибад̇т̇аяам̣, на маад̇уг̇аамзхи гарзяяа сант̇ава’’нд̇и.
Etaṃ sivaṃ uttamamābhipatthayaṃ, na mātugāmehi kareyya santhava’’nti.
д̇ад̇т̇а суд̣̇идтаруубамуг̇г̇ад̇абаанувад̇д̇инаад̇и бханд̇з, иси уг̇г̇ад̇абаанувад̇д̇инаа д̇аяаа суд̣̇идтаруубам̣ ид̣̇ам̣ гааран̣ам̣. хийнаад̇и нийжаа. яат̇аа хавз баан̣аривзд̇т̇а рагкид̇аад̇и аяам̣ маяаа ад̇д̇ано баан̣аа вияа зд̇т̇а анд̇огужчияам̣ барихаранд̇зна рагкид̇аа. д̣̇удтаа маяийд̇и ид̣̇аани маяи мид̇д̇ад̣̇уб̣бхигаммам̣ гад̇ваа д̣̇удтаа ан̃н̃ам̣ бурисам̣ абхиббамод̣̇ад̇и. ж̇од̇ириваа ванз васанд̇и ванз васанд̇зна д̇абассинаа аг̇г̇и вияа маяаа убадтид̇аа барижарид̇аа. саа д̇хаммамуггаммаад̇и саа зсаа д̇хаммам̣ оггамид̇ваа ад̇иггамид̇ваа. агирияаруубод̇и агад̇д̇аб̣б̣аруубо. сарийрамаж̇жхамхи тид̇аад̇и ман̃н̃ахам̣, маяхам̣ аяанд̇и асад̇им̣ асан̃н̃ад̇анд̇и имам̣ асад̇им̣ асаббурисад̇хаммасаманнааг̇ад̇ам̣ асан̃н̃ад̇ам̣ д̣̇уссийлам̣ ‘‘маяхам̣ сарийрамаж̇жхамхи тид̇аа’’д̇и жа ‘‘маяхам̣ аяа’’нд̇и жа ман̃н̃аами.
Tattha sudiṭṭharūpamuggatapānuvattināti bhante, isi uggatapānuvattinā tayā sudiṭṭharūpaṃ idaṃ kāraṇaṃ. Hīnāti nīcā. Yathā have pāṇarivettha rakkhitāti ayaṃ mayā attano pāṇā viya ettha antokucchiyaṃ pariharantena rakkhitā. Duṭṭhā mayīti idāni mayi mittadubbhikammaṃ katvā duṭṭhā aññaṃ purisaṃ abhippamodati. Jotirivā vane vasanti vane vasantena tapassinā aggi viya mayā upaṭṭhitā paricaritā. Sā dhammamukkammāti sā esā dhammaṃ okkamitvā atikkamitvā. Akiriyarūpoti akattabbarūpo. Sarīramajjhamhi ṭhitāti maññahaṃ, mayhaṃ ayanti asatiṃ asaññatanti imaṃ asatiṃ asappurisadhammasamannāgataṃ asaññataṃ dussīlaṃ ‘‘mayhaṃ sarīramajjhamhi ṭhitā’’ti ca ‘‘mayhaṃ aya’’nti ca maññāmi.
сурагкид̇ам̣ мзд̇и гат̇ам̣ ну виссасзд̇и аяам̣ маяаа сурагкид̇аад̇и гат̇ам̣ бан̣д̣ид̇о виссаасзяяа, яад̇ра хи наама маад̣̇исоби анд̇огужчияам̣ рагканд̇о рагкид̇ум̣ наасагки. баад̇аалабабаад̇асаннибхаад̇и логассаад̣̇зна д̣̇уббууран̣ийяад̇д̇аа махаасамуд̣̇д̣̇з баад̇ааласан̇каад̇зна бабаад̇зна сад̣̇исаа. зд̇т̇аббамад̇д̇од̇и зд̇аасу зваруубаасу ниг̇г̇ун̣аасу бамад̇д̇о бурисо махааб̣яасанам̣ баабун̣аад̇и. д̇асмаа хийд̇и яасмаа маад̇уг̇аамавасам̣ г̇ад̇аа махаавинаасам̣ баабун̣анд̇и, д̇асмаа яз маад̇уг̇аамзхи ниссадаа худ̇ваа жаранд̇и, д̇з сукино. зд̇ам̣ сиванд̇и яад̣̇зд̇ам̣ маад̇уг̇аамад̇о ниссадаанам̣ висам̣садтаанам̣ жаран̣ам̣, зд̇ам̣ жхаанасукамзва сивам̣ кзмам̣ уд̇д̇амам̣ абхибад̇т̇зд̇аб̣б̣ам̣, зд̇ам̣ бад̇т̇аяамаано маад̇уг̇аамзхи сад̣̇д̇хим̣ сант̇авам̣ на гарзяяаад̇и.
Surakkhitaṃ meti kathaṃ nu vissaseti ayaṃ mayā surakkhitāti kathaṃ paṇḍito vissāseyya, yatra hi nāma mādisopi antokucchiyaṃ rakkhanto rakkhituṃ nāsakkhi. Pātālapapātasannibhāti lokassādena duppūraṇīyattā mahāsamudde pātālasaṅkhātena papātena sadisā. Etthappamattoti etāsu evarūpāsu nigguṇāsu pamatto puriso mahābyasanaṃ pāpuṇāti. Tasmā hīti yasmā mātugāmavasaṃ gatā mahāvināsaṃ pāpuṇanti, tasmā ye mātugāmehi nissaṭā hutvā caranti, te sukhino. Etaṃ sivanti yadetaṃ mātugāmato nissaṭānaṃ visaṃsaṭṭhānaṃ caraṇaṃ, etaṃ jhānasukhameva sivaṃ khemaṃ uttamaṃ abhipatthetabbaṃ, etaṃ patthayamāno mātugāmehi saddhiṃ santhavaṃ na kareyyāti.
зван̃жа бана вад̇ваа д̣̇аанаво махаасад̇д̇асса баад̣̇зсу нибад̇ид̇ваа ‘‘бханд̇з, д̇умхз ниссааяа маяаа ж̇ийвид̇ам̣ лад̣̇д̇хам̣, ахам̣ имааяа баабад̇хаммааяа виж̇ж̇аад̇харзна маараабид̇о’’д̇и махаасад̇д̇ам̣ абхид̇т̇ави. собисса д̇хаммам̣ д̣̇зсзд̇ваа ‘‘имиссаа маа гин̃жи баабам̣ агааси, сийлаани г̇ан̣хаахий’’д̇и д̇ам̣ бан̃жасу сийлзсу бад̇идтаабзси. д̣̇аанаво ‘‘ахам̣ гужчинаа барихаранд̇оби д̇ам̣ рагкид̇ум̣ на саггоми, ан̃н̃о го рагкиссад̇ий’’д̇и д̇ам̣ уяяож̇зд̇ваа ад̇д̇ано аран̃н̃амзва аг̇амааси.
Evañca pana vatvā dānavo mahāsattassa pādesu nipatitvā ‘‘bhante, tumhe nissāya mayā jīvitaṃ laddhaṃ, ahaṃ imāya pāpadhammāya vijjādharena mārāpito’’ti mahāsattaṃ abhitthavi. Sopissa dhammaṃ desetvā ‘‘imissā mā kiñci pāpaṃ akāsi, sīlāni gaṇhāhī’’ti taṃ pañcasu sīlesu patiṭṭhāpesi. Dānavo ‘‘ahaṃ kucchinā pariharantopi taṃ rakkhituṃ na sakkomi, añño ko rakkhissatī’’ti taṃ uyyojetvā attano araññameva agamāsi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз угган̣тид̇абхигку сод̇аабад̇д̇ипалз бад̇идтахи. д̇ад̣̇аа д̣̇иб̣б̣ажагкугад̇аабасо ахамзва ахосинд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne ukkaṇṭhitabhikkhu sotāpattiphale patiṭṭhahi. Tadā dibbacakkhukatāpaso ahameva ahosinti.
самуг̇г̇аж̇аад̇агаван̣н̣анаа д̣̇асамаа.
Samuggajātakavaṇṇanā dasamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 436. самуг̇г̇аж̇аад̇агам̣ • 436. Samuggajātakaṃ
